Yowaho 12
12
Yama mahi amosa‑ya Mariya sorokasa
1Oda amoni 6 tohiya Ka‑kariwa‑ya oda marinabone, Betaniya‑ya Yeso oda eyehe tokemarine, Rasaro‑ya nakitame‑kaya.
2Yeso kobone ene mai ya‑yaina, mai yorotokanamaroni, mai tafabonehe. Rasaro oda eyehe tafemarine. Oda tefe‑bone‑ya Maata isonamaroni.
3Yeso teme‑ya yama mahi amosa‑ya Mariya sorokaremaroni. Yama mahi amosa oni narado toha, manakone fotamaroni. Keneko kari kibe‑nima yama mahi amosa na‑ya Yeso teme‑ya sorokare, tati kone‑ya Yeso teme‑ya tamonamaroni. Yobe nafi‑ya mahi amosa mahi mai hisihinamaroni.
4Yeso‑ya oda da‑daba oda‑ka owa Yeso‑ya daanebona, i‑di Yoda Isikari·oti amane. Fare Mariya ihi‑ya awe, yawemarine.
5“Ka! Yama mahi amosa ai daana‑mani, yama sibabisara neni. Mahi amosa ai daana‑mani, yama ai anini mahi 300 kane‑ka manakone‑nima manakone na manakone ai kayafiya, mai‑ka yamata wadara mai‑ya yinero ai daana neni.” Yoda ati nemarine.
6Yoda yama‑ya bo‑boti amane. Oda‑ka yinero‑ya Yoda damane, oda‑ka yinero kote‑ya botimarine. Yama mahi amosa‑ya ati daane, hiniya yinero‑ya atibodi kayafabisemarine, mai one‑ya kasomi awirebonane.
7“Yoda, tiwati arabanahi. O·ababone, owa‑ya mai nafoyabone, owa‑ya sorokari hawa tohineni.
8Yamata mai kihara mai tosiyoteraboneni. Owa sawi yaboraboneni.” Yeso ati nemarine.
9Betaniya‑ya Yeso koboni tamine‑ya oda one mai mita, mai dama mai tokomakemaroni, Yeso‑ya mai awa, i‑di Rasaro‑ya mai awahari nabonehe.
“Rasaro abe, Yeso hinakitame ai awamatahi.” Mai atibodi ati namaroni.
10-11Rasaro‑ya mai awa, Yeso ati‑ya mai dama mai nofawahamaroni. Deoso‑ka yama‑bone‑ya mai da‑daa mai‑ka hidi i‑di Rasaro‑ya mai ati nanahabaharemaroni.
Yeso‑ya mai dami kahiyara
12Ka‑kariwa ihi Yerosare‑ya mai dama mai nahamaroni. Mahi owa‑ya Yerosare‑ya Yeso toke, tamine‑ya mai dami mita,
13mai tokomake, kosi afe‑ya mai akamaroni.
“Deoso ai kahiyarineni. Deoso tiwa‑ya yose, tiwa‑ya kasomayaho oda ati nineni. Isara·eo oda‑ka hidi webote amatini.” Mai ati na, mai ati kitamaroni.
14Deoso‑ka yama hani ati‑nima boho yetene‑ya Yeso wasi, boho mese‑ya itarimarine.
15“Yerosare‑ya dai wi‑wina dai habo siitoriyahi. Dai‑ka hidi webote‑bona boho yetene mese‑ya itariya, kamakibonane.” Deoso‑ka yama hani ati nineni.
16Yama hani ati‑ya oda ati kadamowamamaroni. Yama hani ati oda wato kanibote ra, Yeso kitami hawa toheya, yama hani ati oda watowahamaroni.
17Rasaro‑ya Yeso nakitame‑ya mai awa, Yeso‑ya mai tokomake, Yeso tamine‑ya mai hiyaranademaroni.
18Yeso ene kitabote tamine‑ya mai mita, Yeso‑ya mai tokomakemaroni, Yeso‑ya mai awabonehe.
19Mai dami‑ya fariseo mai awa, mai ibi hiyara,
“Ka! Yeso ai ati barinabone ai ati na, ai ati barihini awire, Yeso‑ya mai dami tokomake, mai dai awahi.” Fariseo mai ati namaroni.
20Yerosare‑ya Yodeo oda marinabone, Kereko mai one sawemaroni, Deoso‑ya mai kahiyarabonehe.
21Firibi‑ya Kereko mai toka,
“Naki, Yeso oda hiyaraboneni.” Mai ati nameteni.
Firibi tabaro Besaida Karireya‑ka tohemarine.
22Anidere‑ya Firibi hiyare, Firibi eyehe Anidere toke, Kereko mai tamine‑ya Yeso‑ya mai kaminamaroni.
23 # 12:23 “Owa ene amosabote‑ya mai awaboneni.” Yeso ati ne, hini abebona tamine‑ya hiyarematamonane. “Dai‑ka Ayo neme‑ke ama·oni. Owa ene amosabote‑ya mai awaboneni. Fara yama kobo kanibote naboneni.
24 # 12:24 Yeso hini tamine‑ya kamine, Yeso abe, kitameya, hika mai dodamawahaboneni. Owati amosabote dai mitahi. Ahosi‑nima na noki ai kamara, dodamaterani. Noki ohare wami‑ya ai kama, noki abiya, yana, noki dodamateni.
25 # 12:25 “Dai abaterabone” yama hani ati na, Deoso tabaro‑ya dai ya‑yaini fawaterabone tamine amane. Dai abarabone dai ati na, owati‑ya dai tokadabara, dai ohinaboneni.
‘O·abi‑ya yama sibarini.’ Dai ati nibisa,
dai abateraboneni.
26Owa‑ya dai narifabone dai ati na, owa ene‑nima dai ene nahi. Owa‑ya dai narifa osawi‑kaya dai sawebone, Okobi dai‑ya kahiyarebonane.” Yeso ati nemarine.
27“Owatibodi a‑arira,
‘Abi, owa tikasomahi, o·abaraboneni.’ Oni awirani, hini o·ababone okemaroni.
28Abi, tiwa ene amosabote‑ya mai awahi.” Yeso ati ne,
neme‑ya ati kaki,
“Owa ene amosabote‑ya mai awamaro, owa ene amosabote‑ya mai awamatasaboneni.” Neme‑ke ati nemarine.
29Mai dama mai naha, neme‑ya ati mai himite,
“Bahi ati amanakani.” Mai one ati nihi,
“Deoso‑ka yo‑yose Yeso‑ya hiyare awane.” Mai one ati nihi namaroni.
30“Ati omitebona ati tohi awirane. Ati dai mitebona ati yananibisane.” Yeso ati nemarine.
31 # 12:31 Bofe‑ke mai‑ka hidi i‑di Satanasi amane. “Hibayata bofe‑ke mai ene Deoso kadikebonane. Hibayata bofe‑ke mai‑ka hidi‑ya Deoso kananebonane.
32Owa‑ya mai nawaaniya, mai nafi haa·onabone, oka mai tohawahabonehe.” Yeso ati nemarine.
33Awa‑ya Yeso abebona hini tamine‑ya kaminane.
34Mai dama, mai one ati yanana,
“Deoso‑ka Ka‑kadika koboneya, hidi tohatebona Deoso‑ka yama hani ati na, hini yamata‑nima ai‑ka Ayo neme‑ke mai nawaanabone tina, hini yamata‑nima ai‑ka Ayo neme‑ke tohati?” Mai ati namaroni.
35 # 12:35 Yeso hini tamine‑ya hiyare, bofe‑ya sawisa ne, ati dai tokadabahi. “Dai amoni fa‑famaraba niya, dai tabaro‑ya yama wahi tohasa naboneni. Yama wahi tohasa ni‑ya dai yakanahi. Yama soki kobonaboneni. Yama soki‑ya mai ya‑yaka mai toki‑ka yama‑ya mai watorani.
36Yama wahi tohasa na dai nofahi. Yama wahi dai nofiya, yama wahi‑nima dai naboneni.” Yeso ati nemarine.
Hiyari hawa tohe, tokome, hini‑ya kemomarine.
37Yeso ene kitabote‑ya mai awi dama, Yeso ati‑ya mai nofasa ramaroni.
38Mai tamine‑ya Isa·iya kanahano,
“Deoso, tiwati okamina, ai ati‑ya mai nofarani. Tiwa ene kitabote mai‑ya yofi·okana, tiwa ene‑ya mai nofi awisarani.” Isa·iya ati nematamonane.
Haa‑nima mai teni.
39Deoso ati‑ya mai nofaterabone, mai tamine‑ya Isa·iya kanahanomatamonane.
40“Yama‑ya mai awa, Deoso hini ati ene yama‑ya mai watora, tamine mai himite, Deoso hini ati ene tamine mai hiwatorane. Mai ihi‑maro‑nima mai ihi namariya, mai‑ya Deoso kasomane.” Isa·iya ati nematamonane.
41Hibati‑ya Yeso amosabote‑ya Isa·iya awe, Yeso tamine‑ya kanahanomatamonane.
42Yeso ati‑ya mai dami nofa, Yeso ati‑ya oda‑ka hidi mai dama mai nofahare, hini mai tamine‑ya mai kamini awirani.
“Oda tamine‑ya oda kaminiya, fariseo oda‑ya mai kakoya, Deoso‑ya mai hi‑hiyara‑ke yobe‑ya oda sawimaraboneni.” Mai atibodi ati namaroni.
43Ai one ati‑ya mai nofi ba‑basi na, Deoso ati‑ya mai nofi bi‑bidi neni.
44Yeso ati yanane, ati kite,
“Owati‑ya mai no‑nofa owa‑ya yose‑mari ati‑ya mai nofaharineni.
45Owa‑ya dai awa, owa‑ya yose‑mari dai awahari neni.
46Yama wahi‑nima oneni. Owati‑ya mai no‑nofa yama soki‑ya mai yakanamarabone ihi okemaroni.
47Owati‑ya mai mita, owati‑ya mai tokadabara, mai‑ya wee·orani. Mai nafi okasomabone, okemaroni.
48Owa‑ya mai nofara, owati‑ya mai nofaharira, mai ihi manakone wada, yama faina‑bone koboniya, hini mai ihi manakone‑ya mai kayafaboneni.
49Owati yanana, owa ene owati yanarani. Okobi owa‑ya yose‑mari ati okaminabisineni.
50Okobi ati‑ya dai tokadaba dai abateraboneni. Okobi ati okamine, dai abarabonehe.” Yeso ati nemarine.
ទើបបានជ្រើសរើសហើយ៖
Yowaho 12: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
