Yowaho 11
11
Rasaro‑ya Yeso nakitame
1Betaniya‑kaya Rasaro hika adi mai fama mai eyehe winemarine. Rasaro‑ka adi oni i‑di Maata toha, one oni i‑di Mariya toha namaroni. Rasaro kiyane, kaforimatane.
2Hibati‑ya Rasaro‑ka adi i‑di Mariya Yeso‑ya yama mahi amosa‑ya sorokasa, hini tati kone‑ya Yeso teme‑ya tamonamaroni.
3Rasaro‑ka adi mai fama, mai‑ka da‑daba‑ya mai yose,
“Yeso sibatinahi. Tiwasiya, eya tiyahi.
‘Ayo, tinofi nafi kiyanene.’ Tiyahi.” Mai ati nameteni.
4Rasaro tamine‑ya Yeso mite,
“Rasaro hasinebonane. Rasaro kiyane ene Deoso ene amose‑ya mai awa, Deoso Bidi ene amose‑ya mai awahari naboneni.” Yeso ati nemarine.
5I‑di Maata, i‑di Mariya, i‑di Rasaro, mai na, Yeso mai‑ya nofi nafimarine.
6Rasaro kiyane tamine‑ya Yeso mite, tokomaki kanibote ni awiremarine. Oda wini‑kaya oda amoni famamakemaroni.
7Makobote Yeso‑ya oda da‑daba oda‑ya hiyare,
“Yodeya‑ya ai tokahi.” Ati nemarine.
8“Ayo, tiwa amoni fa‑famaraba niya, ai‑ka hidi tiwa‑ya mai ati nanahaba, Yodeya‑ya tikamariyahi.” Oda ati namaroni.
9 # 11:9 Mahi wehene‑nima Yeso ne, Yeso ati mai nofa Deoso hawine mai watowahani. Yeso‑ka yama anini hawa tohi awisara, Yeso‑ya mai nanahabi awiraboneni. “Mahi ohari‑ka ora 12 toha tene.” Yeso ati ne, sa‑sawi‑ka amoni tosiyore tamine amane. “Yama tehe‑ya ai yakana, ai sonaterani. Mahi wehene‑ya ai yakana, ai sibaraboneni. Mahi ohari‑ka ora 12 toha tene.
10Yama soki‑ya ai yakana, ai sonateni, yama wahi awiraro.” Yeso ati nemarine.
11“Ai‑ka naki, i‑di Rasaro amone, mowa·okanabone okomakeboneni.” Yeso ati nemarine.
12“Ayo, Rasaro amone, kitameba awane.” Oda ati namaroni.
13Rasaro abe tamine‑ya Yeso hiyare, ati oda watoramaroni.
14Tamine hikamini amosawahe,
“Rasaro abane.” Yeso ati nemarine.
15“Rasaro abe ene owa ene dai awabone, owati dai nofabone, fara ya‑yai·oneni. Hima, ai tokomakihi.” Yeso ati nemarine.
16“Yeso ai dabahi. Yeso abeya, ai abahareboneni.” I‑di Tome ati nemarine.
Tome oni owa i‑di Didimo tohane.
17Rasaro wini‑kaya oda tokawaha, yama yakari‑ya tamine Yeso himite,
“Rasaro oda nafoye mahi 4 kanane.” Mai ati namaroni.
18Yerosare yakari‑ya Betaniya toha, 3 kirometoro tohani.
19Yerosare‑ya mai wi‑wina mai one dama mai tokomakemaroni, i‑di Maata, i‑di Mariya, mai fama, mai‑ya mai kasomabone mai‑ka soho tabiyo mai ohinaro.
20Yeso kaki tamine‑ya i‑di Maata mita, tokamaroni. Mariya‑ta yobe‑ya towitakosameteni.
21Yeso‑ya Maata hiyara,
“Ayo, oda tabaro‑ya tisawe‑mani, oka soho abare nane.
22Deoso haatiniya, tiwati‑nima Deoso nebonane.” Maata ati namaroni.
23“Tika soho kitamebonane.” Yeso ati nemarine.
24“Hehe, yama faina‑bone‑ya ai kitamiya, oka soho kitamaharibonane.” Maata ati namaroni.
25 # 11:25 “Mai abaraboneni.” Yama hani ati na, Deoso tabaro‑ya mai ya‑yainabone tamine amani. “Mai‑ya na‑nakitama ama·oni. Ai abarabone‑ka yama da‑daa ama·oni. Owati‑ya mai nofa owa ene mai abarabone, mai abano abiya, mai abaraboneni.
26Owati‑ya mai no‑nofa yama kome fawaterabone‑kaya mai sawiteraboneni. Maata, owati tinofiraniha?” Yeso ati nemarine.
27“Hehe, Deoso‑ka Ka‑kadika amatini. Deoso Bidi bofe‑ya kakibona, yama hani ati na, fara amatini.” Maata ati namaroni.
28Hiyari hawa toha, hika yobe‑ya tokiyama, hika asima i‑di Mariya‑ya hiyara,
“Ai‑ya ka‑kanawato‑teno kobone, tiwa‑ya haanene.” I‑di Maata ati nameteni, basanaro.
29Hika adi ati‑ya mita, waamisa kanibote na, tokomamaroni, Yeso‑ya.
30Mai tabori‑ya Yeso tokomaki awire, hini i‑di Maata kobohine‑ya itarimarine.
31Mariya‑kaya mai one nahamaroni, Mariya‑ya mai kasomabonehe. Mariya waamisa kanibote na, tokoma‑ya mai awa, mai tokomake,
“Yati hodi‑ya tokomiya, ohinaboneni.” Mai atibodi ati namaroni.
32Yeso itari‑ya Mariya kobona, Yeso yowi‑ya yobati‑kaya itarisa,
“Ayo, ahi‑ya tisawe‑mani, oka soho abare nane.” Mariya ati namaroni.
33Mariya ohina‑ya Yeso awe, mai one ohina kamake‑ya awa ne, atibodi a‑arire,
34“Ebeni‑kaya Rasaro foyati?” Yeso ati ne,
“Ayo, tikamakihi, tiwa oda yofikanabani.” Mai ati namaroni.
35Yeso tokomaki, ohinemarine.
36“Rasaro‑ya nofi nafi dai awaho.” Oda‑ka hidi mai one ati nihi.
37“Maki noko‑ya kasome, Rasaro‑ya kasome‑mana, Rasaro abare nane.” Mai one ati nihi namaroni.
38Rasaro temene‑ya Yeso kobone, atibodi a‑ariremarine. Yati one‑ya hodi‑ya mai barikanamaroni.
39“Yati dai karotowitihi.” Yeso ati nemarine.
“Ayo, maho kite awane, mahi 4 kane‑ya abene.” Rasaro‑ka adi i‑di Maata ati namaroni.
40“Owati timitara awineni. Owati tinofa, Deoso ene kitabote tiawabone onani.” Yeso ati nemarine.
41Yati‑ya mai karotowite, Yeso tonokomise, ati yanane,
“Abi, owati timita, ya‑yai·oneni.
42Owati timitateni. Yama‑ya mai watobone‑ka owati amani. Owa tiyosemaro, owa‑ya mai watowahaboneni.” Yeso ati nemarine.
43I‑di Rasaro‑ya haane, ati kite,
“Rasaro tikamahi.” Ati nemarine.
44Rasaro kitame, kamemarine. Bora yaba‑ya kinikane, yehe, teme, tati ne, bora‑ya kinikananasa ne, kamemarine.
“Dai kakasawaho, tabaro‑ya tokomebonaha.” Yeso ati nemarine.
Yeso‑ya mai ati nanahababone
45Mariya‑ya mai kasomabone mai ati na, mai kamake, Yeso ene‑ya mai awa, Yeso ati‑ya mai nofawahamaroni.
46Mai one fariseo mai‑ya mai toka, Yeso ene tamine‑ya mai kaminameteni.
47Makobote Deoso‑ka yama‑bone‑ya mai da‑daa mai‑ka hidi mai toha, fariseo mai toha, mai na, oda‑ka hidi mai nafi‑ya haane, mai yorotokanameteni, Yeso tamine‑ya mai hiyarabonehe.
“Hini yamata‑nima ai nibati? Yeso ene kitabote‑ya mai dama mai awineni.
48Yeso‑ya ai ati barini awiriya, Yeso ati‑ya mai nafi nofawahiya, homano mai‑ka sodado mai kamakiya, Deoso‑ka yobe‑ya mai nanahaba, ai nafi‑ya mai nanahaba naba awineni.” Mai ati nameteni.
49Mai‑ka owa Deoso‑ka yama‑bone‑ya mai da‑daa mai‑ka hidi webote i‑di Kaifo ati yanane,
“Yama dai wato awirini.
50Ai‑ka mai one dama hidi mai tohara, fara mai nafi abarabone mai‑ka owa ohari abeya, yama sibaraboneni. Ohari abeya, ai dama ai hasinaboneni.” Kaifo ati nemarine.
51Hini ati tohi awirene. Deoso‑ka yama‑bone‑ya mai da‑daa mai‑ka hidi webote tohe, Deoso ati ene ati yananibisemarine. Yodeo oda toha, oda manakone‑ya Yeso nanahabebona tamine‑ya hiyaremarine.
52Yodeo oda manakone‑ya nanahaba, Bara mai manakone‑ya nanahabahari nebonane. Deoso‑ka mai toha, mai nafi‑ya ohariwamebonane.
53Oda‑ka hidi Yeso‑ya mai ati nanahabarimanamaroni.
54Mai noki‑kaya Yeso tokomare, Eferahi‑ya Yeso‑ya oda da‑daba oda eyehe winemarine. Kabani yakari‑ya Eferahi tohamaroni.
55Ka‑kariwa‑ka mahi koboni yanatoneya, tabora bide dama‑ka Yerosare‑ya mai tokomakemaroni, Mose‑ka yama hani ati‑nima yama‑ya mai hawa tonihebonehe.
56Yeso‑ya mai sibana, Deoso‑ka yobe‑ya mai naha mai ibi hiyara,
“Ai mariniya, Yeso koboreba awane, hini yamata‑nima dai ati niti?” Mai ati nameteni.
57Deoso‑ka yama‑bone‑ya mai da‑daa mai‑ka hidi mai toha, fariseo mai toha, mai na, Yeso tamine‑ya mai hiyara,
“Yeso dai awiya, tamine dai kaminaho, oda‑ya, oda watebonaha.” Mai ati nameteni.
ទើបបានជ្រើសរើសហើយ៖
Yowaho 11: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
