Yowaho 1
1
Yeso tamine
1 # 1:1 Deoso, Yeso, Deoso‑ka Doni mai na Deoso mai amani. Deoso‑ya Yo‑yofikana‑bona i‑di Yeso tamine amane. Hibati‑ya yama‑ba awisariya, Deoso‑ya Yo‑yofikana‑bona Deoso‑ya famematamonane. Fare Deoso amane.
2Yama awisariya, Deoso‑ya famematamonane.
3Deoso‑ya Yo‑yofikana yama nafi‑ya wamane, yama‑ya mai one wamarametemoneni.
4Deoso‑ya Yo‑yofikana ene ai hasina, ene ai one abaraboneni. Deoso‑ya Yo‑yofikana yama wahi‑nima ne ai‑ya yofikanemarine.
5Ai watoremari yama wahi‑nima ne ai‑ya yofikane, yama soki‑ka mai toha mai ati maahikanebona mai ati na, mai kitara, mai maahikaremarine.
6Ai‑ka owa kobonemarine, Deoso hiyoseri. Oni Yowaho Batita tohemarine.
7Yama wahi‑nima ne tamine‑ya Yowaho Batita kaminemarine, yama wahi‑nima ne ene Deoso ati‑ya ai nofawahabonehe.
8Yama wahi‑nima ne tamine‑ya Yowaho Batita kamine, hini tamine tohi awirane.
9 # 1:9 Yowaho Batita Deoso tamine‑ya kamine, fara yama wahi‑nima tohaharine. “Yama wahi‑nima ne amosabote” ati ne, ai‑ya kanawatone, i‑di Yowaho Batita tamine tohi awire, i‑di Yeso tamine‑ya hiyarabisane. 6:32, 55; 15:1 Yama wahi‑nima ne amosabote bofe‑ya kobone, Deoso‑ya ai nafi‑ya yofikanemarine.
10Yama nafi‑ya wamanemata, bofe‑ya sawiwahe, bofe‑ka mai hiwatoremarine.
11Hini hika mai‑ya kobone, mai hinofaremarine.
12Abano oda nofa, ati oda nofa ne, ati ene Deoso bidi oda tohawahamaroni.
13Deoso bidi ai tohabone, fana dori‑ya ai wadamatasi awiramaroni. Ai owa ene tohi awire, Deoso hini ene bidi ai tohawahamaroni.
14Deoso‑ya Yo‑yofikana ai owa tohawahane, bofe‑ya ai‑ya sawiwahemarine. Deoso Bidi yokana amane. Hini wehene oda awemarine. Ai nafi‑ya nofe, keyehe‑ya hiriremarine.
15Yeso tamine‑ya Yowaho Batita kamine,
“‘Ai owa kitabise kamakibona, owa‑ba awisariya, hibati‑ya tohematamonane.’ Ona, fare dai awaho.” Yowaho Batita ati nemarine.
16Yeso ai nafi‑ya nofe, ai‑ya kasomanadimarine.
17Ai ene towe manakone‑bone tamine‑ya Mose kanahanomatamonane. Yeso Kirisito ene amose, ai ene towe manakone‑ya nanahabe, Yeso Kirisito ene Deoso ai watowahamaroni.
18Deoso ai aware tamine‑ya Bidi kaminemarine. Bidi yokana Badi‑ya famene.
Yowaho ati‑ya mai mitabone
19Deoso‑ka yama‑bone‑ya mai da‑daa mai one toha, Refi‑ka mai one toha, mai na, oda‑ka hidi mai mai hiyose, Yerosare‑ya mai yanana, mai toka, mai kobonamaroni, Yowaho Batita ati‑ya mai mitabonehe.
“Ebeni‑ke amatiniti?” Mai ati na,
20Mai ati‑ya mite, keyehe‑ya hirire,
“Deoso‑ka Ka‑kadika ohi awirini.” Ati nemarine.
21“I‑di Eriya tihibaya?” Mai ati na,
“I‑di Eriya ohi awirini.” Ati nemarine.
“Deoso ati‑ya mi‑mita kakibona Deoso ati nemata, fare tihibaya?” Mai ati na,
“Fara ohi awirini.” Ati nemarine.
22“Ebeni‑ke amatiniti? Hini yamata‑nima oda ati ni bati, oda‑ya mai yose tiwa tamine‑ya mai mitabonehe?” Mai ati namaroni.
23“Isa·iya Deoso ati‑ya mi‑mita‑mata owa tamine‑bone‑ya kanahanomatamonane.
‘Bofe‑ka mai‑ka owa kabani‑kaya ati yananeya,
—Ai‑ka Hidi webote hawine‑bona dai namosahi.— Ati nebonane.’ Fara owa tamine amani.” I‑di Yowaho Batita ati nemarine.
24Fariseo mai‑ya mai yose Yowaho‑ya mai hiyara,
25“Deoso‑ka Ka‑kadika tiharihi, Eriya tiharihi, Deoso ati‑ya mi‑mita kakibona Deoso ati nemata, fare tiharihi tinamone tina, hini yamata ihi mai‑ya habatinirisiti?” Mai ati namaroni.
26“Faha‑ya mai‑ya haba·onirisani. Dai‑ya ai owa sawi, dai watorene.
27Kamakibona amosabote amane. Haa owa‑ta towebisa ama·oni.” Yowaho Batita ati nemarine.
28Betaniya‑ya Yowaho Batita mai‑ya hiyare, Yodaho Faha kowani‑kaya mai‑ya habanirisemarine.
29 # 1:29 Kaneiro Bidi i‑di Yeso ai manakone‑ya nanahabebona tamine amane. Mahi owa‑ya Yowaho Yeso‑ya awe, mai dami‑ya hiyare,
“Kamaki dai awaho. Deoso‑ka Kaneiro Bidi amane. Deoso hiyose, bofe‑ya ai wi‑wina ai manakone‑ya nanahabebonane.
30‘Ai owa kitabise kamakibona, owa‑ba awisariya, hibati‑ya tohematamonane.’ Ona, fare dai awaho, kamakine.
31Isara·eo‑ka dai toha faha‑ya dai‑ya haba·onirisamaroni, dai atibodi hawa tohabonehe. Hibati‑ya awi owatoremarine.
32Makobote Deoso‑ka Doni kise, wayomata awi‑nima Deoso‑ka Doni awine, Yeso‑ya sawiwahemarine.
33Hibati‑ya owa‑ya yose‑mari owa‑ya hiyare,
‘Deoso‑ka Doni kiseya, maki‑ya sawiya, tiaweya, tiwatowahebonane. Fare ati ene Deoso‑ka Doni mai‑ya sawibonane.’ Deoso ati ne, ati ene Yeso owatowahani.
34Fare oawe, Deoso Bidi amane. Deoso Bidi tamine‑ya dai‑ya okaminineni.” Yowaho Batita ati nemarine.
Yeso‑ya mai one daba
35Mahi owa‑ya hika mai da‑daba mai fama, mai eyehe waiya,
36Yeso yakane‑ya mai awa,
“Deoso‑ka Kaneiro Bidi amane.” Yowaho Batita ati nemarine.
37Yowaho ati‑ya mai mita, Yeso nowati‑ya mai towakamakemaroni.
38Yeso kiinawame, mai‑ya awemarine.
“Hini yamata‑ya dai ati koboniti?” Yeso ati ne,
“Ayo, ai‑ya ka‑kanawato amatini, ebeni‑kaya tisawiti?” Mai ati namaroni.
39“Hima, dai awabani.” Ati nemarine.
Yeso eyehe mai tokoma, 4 ora‑ya Yeso sawi‑kaya mai kobona, mai amoni oharemaroni.
40Yowaho Batita ati‑ya mai mita, Yeso‑ya mai towakamake owa oni i‑di Anidere tohemarine. Fare Simaho Bedoro sohori amane.
41Makobote i‑di Anidere anidi‑ya toke,
“Deoso‑ka Ka‑kadika oda awani.” I‑di Anidere ati nemarine.
(Kereko mai ati‑ya Deoso‑ka Ka‑kadika i‑di Kirisito amane.)
42Yeso‑ya anidi‑ya towakame, mai kobokana, Simaho‑ya Yeso kakatome, ati yanane,
“Yoaho bidi, i‑di Simaho amatini. Tiwa oni one Sefasi tohaboneni.” Yeso ati nemarine.
(Sefasi Kereko mai ati‑ya i‑di Bedoro amane.)
43Mahi owa‑ya Karireya‑ya Yeso tokebona, Firibi‑ya himane,
“Firibi, owa‑ya tisawihi.” Yeso ati nemarine.
44I‑di Anidere, i‑di Bedoro, i‑di Firibi mai na Besaida‑ya mai tabori tohamaroni.
45I‑di Natanaeo‑ya Firibi toke, fai‑ya hiyare,
“Natanaeo, owati timitahi. Mose‑ka yama hani ati toha, Deoso ati‑ya mai mi‑mita‑mete mai‑ka yama hani ati toha na, ai owa kobonebona yama hani ati na, fare Yeso Nasare‑ke amane. I‑di Yose bidi amane. Yeso oda kobonawahene.” Firibi ati nemarine.
46“Nasare‑ya ai owa ati amosa wadaterene.” Natanaeo ati ne,
“Tiawaboneni. Hima.” Firibi ati nemarine.
47Mai towakama, Yeso‑ya mai kobokana, Natanaeo‑ya Yeso hiyare,
“Isara·eo‑ka nodi yokana amatini. Tiwa ene amosa hinama tohani.” Yeso ati ne,
48“Owa tiawatera, owa‑ya tiwatoneni?” Natanaeo ati ne,
“I‑di Firibi tiwa‑ya himanebona, fiko waa bofe‑ya tiwitare, tiwa oawani.” Yeso ati nemarine.
49“Ayo, Deoso Bidi amatini. Isara·eo‑ka nodi oda toha, oda‑ka hidi webote yokana amatini.” Natanaeo ati nemarine.
50“‘Fiko waa bofe‑ya tiwitare, tiwa oawani.’ Ona,
owati tinofineni. Owa ene kitabote yokana tiawamakeboneni.” Yeso ati nemarine.
51“Owati amosabote dai mitahi. Dai‑ka Ayo neme‑ke ama·oni. Neme seekaniya, Deoso‑ka yo‑yose owa‑ya mai kisiya, mai tokomatasa, mai dai awaboneni.” Yeso ati nemarine.
ទើបបានជ្រើសរើសហើយ៖
Yowaho 1: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
