Matai 7
7
1Kwu bako ukumiga nujyunge umunu, pwu nuńe nujyunge nalavahige. 2Mańa umwu mukuvahigila avange mwu nuńe nda higilivwa. Ikigelelo ikyu mukuvagelela avange kyu ndagelelivwa kikyo nuńe, 3Vwilola kiki akalagalila akali ndiho lya nino vwu iṅotsi ijili ndiho lyako navwilola? 4Pwu utsovage ndeti kunnino ukuta: Leka ndivuse akalagalila akali ndiho lyako vwu iṅotsi jili ndiho lyako? 5Vi nwasi uve ngukwivusa tango iṅotsi ijili ndiho lyako, pwu ugelage humbe ukuvusa namwene unnino akalagalila akali ndiho lya mwene. 6Akavalatse kwu bako ukutsipa imbwa. Ińambo tsińo kwu bako ukutsilahila ingube. Mańa itsene tsikutsikada namalunde tsikuvakilivukila tsikuvalendulanya uńe.
7Ndovage pwu ndapevwa, mwijumilitsage ukulonda pwu ndasivona, nkoṅonage palwitsi pwu ndadindulilwa. 8Mańa voni avidova vwu vikwupililaga, voni avikijumilitsa ukulonda vwu vikusivonaga, voni avikoṅona kulwitsi vwu vidindulilwa. 9Uńe umwu mbelye kwale veni umunu uvi ikumpa iliganga umwana, vwu adovile ikivanda? 10Uvi ikumpa ińandalwe vwu adovile isomba? 11Apene ngave uńe ńi vavivi vuvule ngave avana vińo mukuvapa isya kuvapa isinnonu, pwu udadajińo kukyańa aleke ukulutilila pakuvapa isinnonu avene avidova kumwene? 12Tsoni itsu ngave mulonda ukuta avanu vavavombelage tsu muvavombelage tsitso nuńe. Ulwakuva pwu vwu mukongile namusimilitso nambańamalago. 13Mwingilage pandyango unsińe, mańa mbaha nundyango, mbaha ninzila jya kubiha kuvujatsivwa, vongosu avigenda mumwa. 14Nsińe ugwene undyango sińe ninzila jya kubiha kuvwumi, vadebe avene avikujivona. 15Mbandikage avańamalago va vunwasi avavyuta ṅolo kumbele upwu vikwitsa kwańe, mwitumbulola vali ndilinu vuvule ilibudavanu. 16Muvamańage paseke tsa vene itsu vihupa. Umunu nditungula amasilu pamitwińo? Umunu nditungula iseke tsa nkuju pamatula? 17Mańa vwu giva gyoni imibiki iminnonu, gihupa iseke innonu. Igyene imibiki imivivi gyu gihupa iseke imbivi. 18Umbiki unnonu naguhupa iseke imbivi, nagwene umbiki umbivi naguhupa iseke innonu. 19Gyoni imibiki igyu nagihupa iseke innonu gidumulwa gitagwa mmwoto. 20Pwu ndita mukuvamańaga paseke tsa vene. 21Ndatetsaga voni avita Nkuludeva, Nkuludeva, kwane vwu vikwingila kuludeva lwa kukyańa. Bako avivomba itsanogilwe udada kukyańa pavunogwe vwa mwene vwu valingila. 22Palitsuva lilyo pwu valatsova va vongosu kwane valata: Nkuludeva, Nkuludeva natulagiligi mwitavwa lyako? Imepo imbivi natuhumihitsigi mwitavwa lyako? Isipelwa si syongosu vuvule natupelili mwitavwa lyako? 23Pwu nandilasihe ndilavavula vuvule ndilata: Nandivamańili lusiku uńe, humi pane ńi mbombile itsa kubeda isimilitso.
24Uvi ikugapulika amameńu aga, uvi ikugakonga vi ndikumbwanihitsa ndita ali ndumunu va luhala uvi ińumba jya mwene atsengile palunalavwe vuvule. 25Pwu jikadudika isula, tsikadeka ningasi, likujila nilikuluguta, syu sikitaga vuvule syonipań umba iji, ijyene najikapanguka ulwakuva vatsengile palunalavwe. 26Mańa uvipulika amameńu aga, mańa aleke ukugakonga vi ali ndumunu untsimu, uvi ińumba jya mwene akatsenga pansekelevwe vuvule. 27Pwu jikadudika isula, tsikadeka ingasi, likujila nilikuluguta, syu sikitaga vuvule syoni pańumba iji, pwu ijeyne jikapanguka, jikabiluka vuvule. 28Vwu vavwene amalile UJesu ukutsova amameńu aga, pwu avanu voni umwu vavelye nsipuga vakadega vuvule vakata: Kwu kutsova kuki inongwa! 29Ulwakuva umwene vwu itsova avonekaga ukuva vi mwenenatso jujwa, natsovage ndavamańakalata avene.
ទើបបានជ្រើសរើសហើយ៖
Matai 7: Kinga
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament in Kikinga © British and Foreign Bible Society, 1961.
