Fuɗɗoode 21
21
Rimeede Isiyaaka
1Joomiraaɗo miccitii Saaratu hono no wiirunoo noon de waɗani ɗum ko aadaninoo ɗum ɗuum. 2Saaratu hooƴi reedu, rimani Ibrahiima ɓiɗɗo gorko ley naywaaku muuɗum wakkati mo Laamɗo wi'unoo oon. 3Ibrahiima inndiri ɓinngel gorel ngeel Isiyaaka (ɗum na fiirta «imo jala»). 4Caggal balɗe jeetati Ibrahiima taadi Isiyaaka hono no Laamɗo yamirnoo ɗum noon. 5Duuɓi Ibrahiima wo 100 nde rimananoo Isiyaaka ndeen. 6Saaratu wi'i:
— Laamɗo hokkii kam ɓernde welnde e jaleeɗe, neɗɗo fuu nanɗo ɗum jaldan e am.
7O ɓeydi katin, o wi'i:
— Moy waawunoo wi'ude Ibrahiima, Saaratu muynan ɓiɓɓe? Ammaa mi rimanii o ɓiɗɗo gorko ley naywaaku makko!
No Ibrahiima riiwiri Hajara e Ismaa'iila
8Isiyaaka mawni de entaa. Ibrahiima waɗi weltaare mawnde nyannde o entanoo ndeen. 9Saaratu yi'i ɓiɗɗo gorko mo Hajara Misiranke debbo rimani Ibrahiima oon, na jalnoroo Isiyaaka. 10Ndeen o wi'i Ibrahiima:
— Riiwu korɗo oo e ɓiyum fuu! Ɓiyiiko oon heɓataa ronidaa e ɓiyam Isiyaaka.
11Haala kaan naawi Ibrahiima sanne sabo Ismaa'iila oon du, wo ɓiyum. 12Ammaa Laamɗo haaldi e Ibrahiima wi'i:
— Taa mettin ɓernde maa saabe suka maa e korɗo maa oon. Ko Saaratu wi'i fuu, njaɓaa, sabo e Isiyaaka kemrataa lenyol. 13Ɓii korɗo oon du, mi waɗan ɗum lenyol sabo wo o ƴuwdi maaɗa.
14Ibrahiima dawi gilla subaka kecco, hooƴi buuru e sumalle ndiyam, wakkini Hajara, hokki ɗum suka oon de dillini ɗum. O dilli, imo yiiltoo ley ladde Beerseba yoornde. 15Nde ndiyam sumalle ɗaam timmoynoo fu, o yoppi suka oon ley lekki pamari gomma. 16O toowti haddi fiɗande kural, o jooɗii. O wi'i e ɓernde makko:
— Taa mi yi'a maayde ɓinngel am!
Nde o jooɗinoo ndeen, o ɓanti daande makko, o woyi. 17Laamɗo nani daande cukalel ngeel. Maleyka Laamɗo ƴeewnii illa dow kammuuli noddi Hajara, wi'i ɗum:
— Ɗume danyi maa Hajara? Taa hulu, sabo Laamɗo nanii daande suka oon faa to woni toon. 18Umma kooƴaa suka oon, nanngaa o e junngo maaɗa faa wooɗa sabo mi waɗan o laatoo lenyol manngol.
19Laamɗo omti gite makko. Ndeen o yi'i ildude ndiyam. O yehi, o hebbini sumalle oon, o yarni cukalel makko ngeel.
20-21Laamɗo wondi e suka oon. O mawni, imo jooɗii ley ladde Paran yoornde. O laatii piɗoowo kure. Inniiko ɓaŋani mo suka debbo jeyaaɗo Misira.
No Ibrahiima waɗiri aadi hakkunde muuɗum e Abimelek
22Wakkati oon Abimelek wardi e hooreejo sordaasiiɓe muuɗum bi'eteeɗo Pikol, to Ibrahiima mbi'i:
— Laamɗo ina wondi e maa ley ko ngaɗataa fuu. 23Joonin kaa, hunanam dow innde Laamɗo, a jambataako kam, a jambataako ɓiɓɓe am, a jambataako taaniraaɓe am, saabe mbooɗirka ka ngaɗanmaami kaan. Hunanam a moƴƴanan kam miin e leydi ndi koɗuɗaa e mum ndiin hono no moƴƴirammaami noon.
24Ibrahiima jaabii, wi'i:
— Mi hunanake ma.
25Ammaa Ibrahiima feli Abimelek dow kabaaru ɓunndu ndu gollooɓe Abimelek teeti nduun. 26Abimelek jaabii, wi'i:
— Mi anndaa moy waɗi ɗum. A humpitaay kam ɗum. Wooɗi du mi nanaay kabaaru majjum si wanaa hannden.
27Ibrahiima hooƴi na'i e be'i e baali hokki Abimelek de ɓe ngaɗidi aadi. 28Ibrahiima suɓii ɓiɓɓe baali debbi jeɗɗi. 29Abimelek haaldi e Ibrahiima, wi'i:
— Ɓiɓɓe baali jeɗɗi ɗi ittuɗaa ɗiin, ko saabii de sennduɗaa ɗi?
30Ibrahiima jaabii, wi'i:
— A jaɓan jeɗɗi ɗiin e junngo am, ɗum laatoo seedaaku ko hollata wo miin wasi ɓunndu nduun.
31Ɗum waɗi de ɓe inndiri nokku oon Beerseba (ɗum na fiirta «Ɓunndu hunayeere») sabo wo toon ɓe kunodii.
32Noon ɓe ngaɗidiri aadi Beerseba toon. Abimelek ummii, hoondi e Pikol hooreejo sordaasiiɓe muuɗum oon leydi Filistiyankooɓe. 33Ibrahiima darni lekki Tamaris ɗakkol Beerseba. O du'ii toon e innde Laamɗo Joomiraaɗo duumiiɗo faa abada. 34Ibrahiima heddii ley leydi Filistiyankooɓe duuɓi keewɗi.
ទើបបានជ្រើសរើសហើយ៖
Fuɗɗoode 21: FBF
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© SIM International 2012, 2022