Jan 2
2
Li puocaali Kana dogu nni
1Li dataali daali, li puocaali den tieni Kana, Galile diema nni. Jesu naa mo den ye likani. 2Bi den yini Jesu leni o ŋoadikaaba moko ban cua li puocaali yeni. 3Duven n den poadi, Jesu naa den yedi o: «Baa go pia duven.» 4Jesu den guani ki yedi o: «Pua, be n ye mini leni fini siiga? N yogunu daa pundi.» 5O naa den yedi bi naacenba: «Yin tieni mani wan baa yedi yi yaala kuli.»
6Bobiciamaluoba den ye likani ki tie tana, ki tie Jufinba nidiŋanbima bogida po. Bobicianyenli kuli den baa fidi ki gaa litidi kobiga. 7Jesu den yedi ba: «Yin gbieni mani a bobiciama na mi ñima.» Bi den gbieni a ke a landi landi. 8Lani, o den yedi ba: «Kabidi mani ki gedini mi puocaajiema yudaano kani.» Bi den gedini. 9Mi puocaajiema yudaano den leni yaa ñima n lebidi ki tua duven, kaa bani man ñani naani. Ama yaa naacenba n den kabidi den bani. 10Lani, o den yini o puocaano calo ki yedi o: «Nilo kuli yen kpa cuani wan yini yaaba po yaa duven n mani boncianle no. Bi yaa ñuni ki guo, wan ji cuani bi po yaa duven n mani waamu. Ama fini wani a bi wuoni yaa duven n mani boncianla, ki ti cuani o moala.»
11Lani n tie Jesu n den cili ki tieni yaa bancianma Kana, Galile diema nni. O den doagidi o kpiagidi, ke o ŋoadikaaba daani o.
12Lani n pendi, Jesu den gedi Kafarnawum, wani, o naa, o waamu leni o ŋoadikaaba kuli, ki tieni likani danaba. #Mat 4.13.
Jesu kua U Tienu diegu nni
(Mat 21.12-13; Mrk 11.15-17; Luk 19.45-46)
13Jufinba jaanma, mi Pendima jaanma yeni n den nagidi, Jesu den doni ki gedi Jerusalemi. #Ñam 12.1-27. 14O den laa U Tienu diegu nni yaaba n kuadi i ne, i pe, mu kpaajiemu leni bi ligilebidiba ke bi kaa. 15O den taa u baabu ki lebini ke u tua nani u baliju yeni, ki deli bikuli ki ñani U Tienu diegu nni, bani, bi pe leni bi ne kuli. O go den tudi ki luni bi ligilebidiba kpagidi, ki yadi yadi bi ligi, 16ki yedi a kpaajekuada: «Ñani mani laa bonla nekanba. Yin da teni n Baa diegu n tua daaga.» 17O ŋoadikaaba den tiadi ke li diani ki yedi: «A diegu yankuali cuo nni hali boncianla.» #Ps 69.10.
18Lani yaa po, Jufinba den yedi o: «A baa tieni be yaa bancianme ki doagidi ti po ke a pia li bali ki tieni ŋan tieni yaala ne?» 19Jesu den guani ki yedi ba: «Bolini mani U Tienu diegu na, n go baa maa gu danataa siiga.» #Mat 26.61; 27.40; Mrk 14.58; 15.29. 20Jufinba den guani ki yedi o: «Li den pundi piinaa n binaluoba ke bi maa U Tienu diegu na, ke fini wani baa guani ki maa gu danataa siiga?» 21Ama wan den maadi U Tienu diegu yaagu yaa maama yeni den tie o gbanande. 22Wan den fii bi tinkpiba siiga, o ŋoadikaaba den tiadi ke o maadi laa maama, ki daani i Diani n yedi yaala leni Jesu n den maadi yaa maama.
Jesu bani yaala n ye o nilo pali nni kuli
23Jesu n den ye Jerusalemi mi Pendima jaanma yogunu yeni, bi niba boncianla den laa wan tiendi yaa bancianma, ki daani o yeli nni. 24Ama Jesu ki den dugi bi po, kelima o den bani bikuli. 25Laa den tie o po tiladi ban tieni o po siedi niloba kuli po. Wani o ba den bani yaala n ye o nisaalo niinni.
ទើបបានជ្រើសរើសហើយ៖
Jan 2: BGP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gulmancema Protestant Bible © Bible Society of Burkina Faso, 2013.
