MI CILIMA 1
1
U Tienu n tagi li ŋandunli leni bi nisaaliba maama
1Hali mi cilima, U Tienu den tagi tanpoli leni ki tinga.
2Ki tinga den tie tinfanga ki tie bonkuonga. Li *biigili den ye u *kulu yuli po. U Tienu Fuoma den lengidi u ñingbanu po. 3U Tienu den yedi: «Mi yenma n yaa ye!» Mi yenma den tieni.#2Kol 4.6 4U Tienu den laa ke mi yenma ŋani, U Tienu den paadi mi yenma leni li biigili. 5U Tienu den cili mi yenma yaa yeli u yensiinu, li biigili mo yaa yeli ku ñiagu. Ku yenjuogu leni ku tiŋaagu den ye, lani n den tua li dakpiali.
6U Tienu den yedi: «Mi fanma n yaa ye mi ñima yaa siiga nni ke lan paadi mi ñima leni mi yama.» 7U Tienu den tagi mi fanma ki paadi yaa ñima n den ye mi fanma yaa tanpoli leni yaa ñima n den ye mi fanma tiipo. Li den tua yeni. 8U Tienu den cili mi fanma yaa yeli tanpoli. Ku yenjuogu leni ku tiŋaagu den ye, lani n den tua li dalieli.#2Pie 3.5
9U Tienu den yedi: «Yaa ñima n ye tanpoli yaa tiipo n taani kaanyendu ke ki tinkuonga n yaa ye.» Li den tua yeni. 10U Tienu den cili ki tinkuonga yaa yeli ki tinga, ki cili mi ñintaankaama yeni yaa yeli mo mi ñincianma. U Tienu den laa ke li ŋani. 11Lani n pendi U Tienu den yedi: «Li bonsoangila buoli kuli n yaa ye u tingbanu po. Ti muadi n yaa pia yaa bonbi n baa pudi, tibuolu kuli mo n yaa pia yaa bonbi n baa pudi.» Li den tua yeni. 12Li bonsoangila buolu kuli den pudi, ki tinga nni muadi kuli den loni ti bonbi nani ti buolu n tie maama. Yeni moko, i tiidi den loni i bonluonkaala ki pia li niinni i bonbi nani i buolu n tie maama. U Tienu den laa ke li ŋani. 13Ku yenjuogu leni ku tiŋaagu den ye, lani n den tua li dataali.
14U Tienu den yedi: «Mi yenma buoli n yendi ki yaa ye tanpoli yaa fanma nni ki paadi u yensiinu leni ku ñiagu ki yaa tie sinankeeninba ki waani i yogini leni a dana leni a bina. 15Mi go baa yaa tie mi yenma tanpoli yaa fanma nni, ki yaa yendi ki tinga. Li den tua yeni.» 16U Tienu den tagi mi yencianma buoli lie. Yaama n yaba ki cie mi yama den diedi u yensiinu. Yaama n den wa ki cie mi yama mo den diedi ku ñiagu. O go den tagi a ŋmabila moko. 17U Tienu den tagi lani kuli tanpoli yaa fanma nni ke lan yendi ki tinga, 18ki diedi u yensiinu leni ku ñiagu, ki nan paadi mi yenma leni li biigili. U Tienu den laa ke li ŋani. 19Ku yenjuogu leni ku tiŋaagu den ye, lani n den tua li dannaali.
20U Tienu den yedi: «Mi ñima n gbie leni bonfuodibuoli kuli, ti bonyugiditi mo n yaa yugi ki tinga nni hali tanpoli yaa fanma nni.» 21U Tienu den tagi mi ñima nni a bonfuodigbenga nani bi buoli n tie maama, leni yaa bonfuoda n dugi mi ñima nni ke baa pia bianu. O go den tagi nuano kuli leni o buolu. U Tienu den laa ke li ŋani. 22U Tienu den seligi ba ki yedi: «Yin yaa maa a bila ki pugidi ki gbieni mi ñincianma, ti bonyugiditi n yaa pugidi ki tinga nni.» 23Ku yenjuogu leni ku tiŋaagu den ye, lani n den tua li damuuli.
24U Tienu den yedi: «A bonfuoda n gbie ki tinga nni nani bi buoli n tie maama: ti denyandi, li bonbalinkaala, ti moayandi nani bi buolu n tie maama.» Li den tua yeni. 25U Tienu den tagi ki tinga yaa moayandi nani ti buoli n tie maama, ti denyandi nani ti buoli n tie maama leni ki tinga bonbalinkaala kuli nani li buoli n tie maama. U Tienu den laa ke li ŋani. 26Lanwani U Tienu den yedi: «Tin tagi o nilo ti yaa nannanli nni, nani tinba n tie maama, ke wan diedi mi ñincianma jami leni tanpoli bonyugiditi leni ki tinga nni yandi kuli leni yaa bonbalinkaala n balini ki tinga nni kuli.»#1Kol 11.7
27U Tienu den tagi o nilo o yaa nannanli nni,
O den tagi o wani U Tienu yaa nannanli nni,
O den tagi ja leni pua.#Mat 19.4; Mak 10.6
28U Tienu den seligi ba. U Tienu den yedi ba: «Yin yaa maa a bila ki pugidi ki go gbieni ki tinga ki diedi ga. Yin diedi mi ñincianma nni jami leni tanpoli yaa bonyugiditi leni yaa bonfuoda n balini ki ye ki tinga nni kuli.»#Cil 5.1-2 29U Tienu den yedi: «N puni yi yaa moabuolu n luoni kuli ki pia i bonbi ki ye u tingbanu po kuli leni yaa tibuolu n luoni kuli ki pia i bonbi, lankuli n tua yi bonjekaala. 30N puni yaa yandi n ye ki tinga nni kuli leni yaa bonyugiditi n ye tanpoli kuli leni yaa bonfuodila n balini ki tinga nni kuli, n puni ba yaa bonsoangila n pudi ki tinga nni kuli lan yaa tie bipo mi jiema.» 31Li den tua yeni. U Tienu den laa wan den tagi yaala kuli ke li ŋani hali boncianla. Ku yenjuogu leni ku tiŋaagu den ye lani n den tua li daluobili.
ទើបបានជ្រើសរើសហើយ៖
MI CILIMA 1: GUX03
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gulmancema Bible © Bible Society of Burkina Faso, 2003.