लूका 21
21
गरीब विधवा रा दान
1फिरी तेइयै औछ़ी फेरिया सेठ मांहणु बै आपणा-आपणा दान भण्डारा न भौरदै हेरै। 2तेई बौगतै तौखै एक कंगाल विधवा आई होर तेसै ताँबै रै दुई सिक्कै दान धिनै। 3तैबै यीशुऐ बोलू, “हांऊँ तुसाबै सच़ बोला सा कि ऐसा गरीब विधवा रा होछ़ा ज़ेहि दान सेठा रै बड़ै दाना न भी ज़ादा कीमती सा। 4किबैकि इन्हैं सैभियै आपणी बोहू कमाई न दान धिना पर एसै विधवै आपणी गरीबी न भी आपणी सारी कमाई धिनी।”
मन्दिरा रै बारै न भविष्यवाणी
5ज़ैबै किछ़ लोका मन्दिरै रै बारै न गैला केरदै लागैदै ती कि ऐ मन्दिर कैण्ढै शोभलै-शोभलै पात्थर होर दान केरूईदी चीज़ा सैंघै सज़ाऊदा सा तैबै यीशुऐ बोलू, 6“ते ध्याड़ै ऐणु आल़ै सी, ज़ैबै सैभ चीज़ा खत्म होंणी होर ऐई मन्दिरा रा एक बी पात्थर दुज़ै पात्थरा पैंधै नी रौहणा।”
मुसीबत होर दुःख तकलीप
7च़ेले यीशु न पुछ़ू, “ओ प्रभु जी, इन्हां सैभी गैला कैबै होंणा? होर तेई बौगतै री कि नशाणी होंणी?” 8यीशुऐ तिन्हां बै बोलू, “होशियार रौहात् किबैकि बोहू लोका मेरै नाँ न ऐणा, होर बोलणा कि हांऊँ मसीह सा, सैंघै ऐ बी बोलणा कि बौगत आऊ सा। पर तुसै तिन्हरी गैला पैंधै बशाह हेरीत् केरदै। 9तुसै लड़ाई-झ़गड़ै री अफवाहै रै बारै न शुणलै ता तुसै घबराँदै हेरीत् किबैकि इन्हां गैला रा होंणा ज़रूरी सा पर तेई बौगतै एकदम दुनिया खत्म नी होंणी।”
10यीशुऐ बोलू, “देशा-देशा न होर ज़ाति-ज़ाति न लड़ाई होंणी। 11ज़ैगा-ज़ैगा ज़ौज़री होंणी, होर रूड़ पौड़नी होर कई किस्मै री बीमारी फैल़णी, स्वर्गा न डराणु आऐ चिन्ह च़मत्कार होंणै। 12पर इन्हां सैभी गैला न पैहलै तिन्हां मेरै नाँ री बजहा सैंघै तुसै ढौकणै होर तुसा पैंधै ज़ुल्म केरनै होर आराधनालय रै हवालै केरनै, तुसै ढौकिया जेला न पांणै होर राज्यपाला होर राज़ै सामनै खड़ै केरनै। 13तैबै तुसाबै मेरै बारै न गुआही देणै रा मौका मिलणा। 14ज़ो दोष ते तुसा पैंधै लालै तिन्हां दोषा न बच़णै री तैंईंयैं तुसै पैहलै न फ़िक्र हेरित् केरदै। 15किबैकि मूँ तुसाबै ऐण्ढी बुद्धि होर समझ़ देणी कि कोई बी बरोधी तुसरी गैला बै नी काटी सकदा। 16तुसरै आमा-बापू, भाई-बैहण, रिश्तैदार होर तुसरै सैंघी तुसै ढौकणै द्याणै होर तुसा मोंझ़ै न किछ़ मकाणै। 17मेरी बजहा न बोहू लोका तुसा सैंघै बैर रखणा। 18पर ते तुसरा किछ़ नी बिगाड़ी सकदै। 19इन्हां सैभी गैला बै तुसै धीरजा सैंघै सौहिया तुसै आपणै प्राणा बै बच़ाई सका सी।”
यरूश्लेम शैहरा रै नाश हौंणै री भविष्यवाणी
20 “ज़ैबै तुसै यरूश्लेम शैहरा बै फोऊज़ियै लाइया घिरूदा हेरलै ता समझ़ेईत कि ऐईरा नाश नेड़ सा। 21अगर तुसै तेई बौगता यहूदिया प्रदेशा न रौहंदै लागै सी, ता ढौगा बै भैगा, होर ज़ो तुसै यरूश्लेम शैहरा न सी तौखै न भैगेईत् होर ज़ो तुसै ग्राँ न बाहरै सी ग्राँ आँध्रै हेरीत् ऐन्दै। 22किबैकि ते बदला लेणै रै ऐण्ढै ध्याड़ै सी, ज़ुणी बौगतै धर्म शास्त्रा न लिखुईदी सारी गैला पूरी होंणी। 23तिन्हां ध्याड़ै न ज़ो बेटड़ी सुज़दी होली होर ज़ुणिरै शोहरू दूधा पीणू आल़ै होलै, तिन्हां पैंधै बोहू दु:ख ऐणु आल़ा सा किबैकि ते ढौगा बै नी भैगी सकदी। एसा धौरती पैंधै होर यहूदी लोका पैंधै बड़ी मुसीबत ऐणु आई सा होर इन्हां लोका पैंधै परमेश्वरै री झ़िक होंणी। 24ते बड़ी बैरहमी सैंघै तलवारियै लाइया मारिनै होर यरूश्लेम शैहरा न दुज़ै कई देशै रै लोका ज़ीतणा होर सौ ताँ तैंईंयैं गुलामी न रखणा ज़ाँ तैंईंयैं होरी ज़ाति रा बौगत पूरा नी होला।
मांहणु रै बेटै रा दबारा ऐणा
25 “सर्गा न नोखै-नोखै चिन्ह च़मत्कार होंणै। ज़ोथ, सूरज़ होर चाँद होर तारै न कई किस्मै रै चिन्ह च़मत्कार हेरिनै होर धौरती पैंधलै सैभी देशै रै लोका पैंधै मुसीबता ऐणी होर तिन्हां समुद्रै री छ़ेड़ी न डौरना। 26दुनिया न ऐणु आई सैभी विपता हेरिया लोका आपणी हिम्मत हारनी किबैकि तेई बौगतै सर्गै री सारी शक्ति हिलाइणी। 27तैबै लोका न मांहणु रा बेटा बड़ी शक्ति होर महिमा सैंघै बादाला न ऐन्दै हेरिना। 28ज़ैबै ऐ सारी गैला होंदी लागली ता तुसै सीधै खड़ै होईया सर्गा धिराबै हेरीत्, किबैकि तेई बौगतै तुसरा छुटकारा नेड़ सा।”
फेगड़ै रै बूटै रा उदाहरण
29यीशुऐ तिन्हां बै एक उदाहरण दसू, “फेगड़ा रै बूटै बै होर दुज़ै इन्हां बुटै बै हेरा। 30ज़ैबै तिन्हरै नोंऊँऐं पौचा निकल़ा सी तैबै ता तुसै ज़ाणा सी कि गर्मी रै ध्याड़ै नेड़ सी। 31ऐण्ढी तैरहा ज़ैबै तुसै इन्हां गैला बै होंदै हेरलै ता तुसै बुझीत् कि परमेश्वरा रा राज्य नेड़ सा। 32हांऊँ तुसाबै सच़ बोला सा ज़ैबै तैंईंयैं ऐ सारी गैला पूरी नी होली तैबै तैंईंयैं ऐई ज़ुगा रा अंत नी होंणा। 33सर्ग होर धौरती नाश होंणै, पर मेरी गैला कैधी भी नाश नी होंणी।
बिऊदै रौहा
34 “आपणा ध्यान रखा, तुसरा ध्यान दुनियै रै खाँणै पिणै होर ज़िन्दगी री मौज़ मस्ति न नी लोड़ी भटकु, होर ज़िन्दगी री चिन्ता न पौड़िया सुस्त नैंई लोड़ी हुऐ कि सौ ध्याड़ा तुसा पैंधै च़ानक फाँसी रै फन्दै सांही ऐला। 35ज़ेतरै भी ऐसा धौरती पैंधै सी तिन्हां पैंधै तेई ध्याड़ै ज़रूरी ऐणा। 36हमेशा ज़ागदै होर प्रार्थना केरदै रौहा। अगर होई सका सा ता आपणै आपु बै ऐतरा मज़बूत बणात् कि तुसै इन्हां डराणु आई गैला न बची सकलै होर मांहणु रै बेटै सामनै खड़ै होंणै लायक बणी सकलै।”
37यीशु ध्याड़ी ता मन्दिरा न उपदेश देआ ती पर सौंझ़ा जैतून ढौगा पैंधै प्रार्थना केरदै ज़ा ती। 38हर रोज़ दोथी-दोथी बोहू सारै लोका प्रभु यीशु री गैला शुणनै री तैंईंयैं मन्दिरा न कठा होआ ती।
ទើបបានជ្រើសរើសហើយ៖
लूका 21: KFX-NT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
This work is licensed under Creative Commons Attribution-ShareAlike 4.0 License.
