TAUNET 6
6
Ng’olyot agobo maranet
1Ak ye kingotoi kotesogis bik eng’ ng’ony, ak kigisikyi ichek tibik, 2kogeer anyun werikab Kamuktaindet tibikab bik kole kororon; ak kiimutygei tugul che kilewen koek kwonyikwak. 3Ak kimwa Jehovah kole, Mabortos Tamirmiriennyu ak chi agoi, amu inendet ko borto: eng’ noto anyun, egu betusiekyik kenyisiek bogol ak tiptem. 4Kimitei Nepilik ng’ony eng’ betusiechoto, ak kogeny ye kingobata noto, ye kingotuiyogei werikab Kamuktaindet ak tibikab bik, kosikyi ichek lagok: koek lagochoto bik che ki nyigonen, choto ki bo keny, murenik che ki toogunotin.
5Ak kigeer Jehovah kole, O mising’ tengektab chi eng’ ng’ony, ak kole, kabwatutik tugul che bo muguleldanyi ko tengekto kityo betut age tugul. 6Kiibwat Jehovah kole, kima ko ta mie, koyai chi eng’ ng’ony, ak kigas ng’wanindo eng’ muguleldanyi. 7Ak kimwa Jehovah kole, Abere awong’u bik che kiatau ayai eng’ ng’ony komugul; kong’eete chi, ak tiony, ak ne ichuutegei, agoi tarit age tugul ne bo barak; kima ko ta mie ayai ichek. 8Ago kichamak Noa eng’ taitab Jehovah.
9Chu ko ortinwekab Noa. Ki chito ne bo imanda Noa, kiigesunotgei eng’ ibindanyi: kibendoti Noa ak Kamuktaindet. 10Ak kisich Noa werik somok, Sem, Ham ak Japet. 11Ak kiga kong’emak ng’ony eng’ taitab Kamuktaindet, ak kiga konyi ng’ony koromnatet. 12Ak kigeer Kamuktaindet ng’ony, ogeero, kigong’emak; amu king’em bik tugul ortinwekwak eng’ ng’ony.
13Kilenji Kamuktaindet Noa, Kagoit tainnyu kagesunetab borwek tugul; amu kanyi ng’ony koromnatet amu ichek; eng’ noto anyun, ang’eme ichek koboto ng’ony. 14Yachigei melit ne bo ketikab taragonik; ak ipchei gorik che mengechen eng’ melit, ak imale manget orit ak sang’. 15Ak iyai melit ko u ni: koindanyi ko kakwautik bogol somok che bo eut, ak tebeesindanyi ko kakwautik konom che bo eut, ak koindo ne bo tononennyi ko kakwautik sosom che bo eut. 16Ak iyai ole bunu lapkeiyet eng’ melit, ak iyai koek tonon kakwautiet agenge ne bo eut; ak inde kurgennyi tabandab melit ak ipcheune melit somok, ne bo ng’ony, ak ne bo kwen, ak ne bo barak. 17Ogeero, aipchini ane ng’ony maranet ne o ne bo beek, si ang’eme borwek tugul, age tugul ne tinyei kabusetab sobondo, eng’ kureretab kipsengwet; ak kome age tugul ne mi ng’ony. 18Ago kaagimit kayomisennyu koboten: ak inyo melit, inye, ak weriguk, ak kwondong’ung’, ak kwonyikab weriguk. 19Ak igetu alak eng’ tuguk tugul che soptos che bo borwek kobwa melit orit, aeng’ aeng’, che bo oret age tugul, si irib kosopcho koboten; lewen kirgit ak ne kotoy. 20Ak che bo taritik ko u kergeindanywa, ak che bo tuga ko u kergeindanywa, ak che bo alak tugul che ichuutegei che bo ng’ony ko u kergeindanywa, kobwanjin aeng’ aeng’ che bo oret age tugul, si irib kosopcho. 21Ak iipchige amitwogik alak tugul che kiamei; iyumjige anyun, si koek amitwogiguk, ak chechuak. 22Ak kiyai Noa ko u noto; ko u tugul che king’at Kamuktaindet inendet, kiyai anyun.
ទើបបានជ្រើសរើសហើយ៖
TAUNET 6: BUKUIT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
God's word open for all
©Bible Society of Kenya, 2020