Yohana 1
1
1Mu litanga ya li ho Inkuva, kandi Inkuva ya li ho halala na Nyasaye, kandi Inkuva ya li Nyasaye. 2Wa zana ya li mu litanga halala na Nyasaye. 3Vindu vyosi vya lombeka ku uyu; kandi bugira uyu si vya lombeka kali kilala ku vyosi vya lombeka. 4Muye lya li liva mwoyo; na liva mwoyo lya li ubulavu bwavandu. 5Ubulavu bu lava mu kisundi; na kisundi si kya bu gumira mba. 6Mundu yadza wa tumwa kutwula ku Nyasaye, lieta lilye lya li Yohana. 7Uyu yadza ku lilolekidza, a lolekidze ubulavu yibu, vosi va duke kusuuvira kigira niye. 8Si ya li ubulavu yibwo, navutswa yadza a lolekidze ubulavu. 9Bwa li ho ubulavu bweligali, bwingira mu lirova ni bu ha avandu vosi ubulavu. 10Ya li mu lirova, kandi lirova lya lombeka kuye, kandi lirova si lya mu manya mba. 11Yadza kuvyo vivye, navo aveve si va mu bugirira mba. 12Navutswa vosi ava mu bugirira, ya va ha tsingulu kugwa avana va Nyasaye, va zana ava suuvira lieta lilye: 13ava masahi ga tivula mba, kinga ubulaliri bwo mubiri kinga ubulaliri bwomundu, navutswa ubulaliri bwa Nyasaye. 14Inkuva ya gwa mubiri, na a menya halala nekwinye (kandi kwinye kwa lola ubukumi bwibwe, ubukumi bwowivulwa muderwa wa Dada), wizuye tsimbabasi nageligali. 15Yohana a lolekidza kuye, na a gamba, na a vola, Uyu niye wa nda mu volera, Uyu udzanga inyima wange u gwiye imbiri wange: kigira ya li imbiri wange. 16Nu ku bwizuli bwibwe kwinye kwosi ku nyoye netsimbabasi ku tsimbabasi. 17Kigira lilaga lya leterwa ku Musa; tsimbabasi nageli gali ga leterwa ku Yesu Kristo. 18Si ha li nomundu wa lola Nyasaye inyinga kali indala; Mwana wivulwa muderwa u veye mu kiritu kya Dada, u mu vuuye.
19Kandi yili ni lilolekidza lya Yohana, inyinga Avayuda va tuma avasalisi na Valevi va twula Yerusalemi kumuteva, Ive ni bwaha? 20Naye yeyama, kandi si yambakana; ni yeyama, Inze si mbeye Kristo. 21Ni va mu teva, Niki kandi? Ive u veye Elija? Kandi ya vola, Si mbeye iye mba. Ive u veye muprofeti uyo? Kandi ya tivula, Auwa. 22Kunangwa va mu volera Ive ni bwaha? Ku duke kwiranyira ava ku tuma, litivula. Wevolera ndi? 23Ya vola, Inze nu mwoyo gwomundu u gamba mwigendanyama, Lungikidza inzira yo Mwami, kuli Isaya muprofeti ya vola. 24Yavo va tumwa va twula ku Vafarisayo. 25Kandi va mu teva ni va mu volera, Kigira ki ive u batidza, na ive nu u ta li Kristo, kinga Elija, kinga muprofeti uyo? 26Yohana ya va tivulira, na a vola, Inze mbatidza mu madzi: hagati henyu mulala u singiye, wa mu vula kumanya, 27u londa inyima wange, wa nta dukana kuboholola lukova lwekilatu kikye. 28Vindu yivi vya kolwa mu Betani engereka ya Yordani, wa Yohana ya batidzira.
29Mugamba ya lola Yesu yadza kuye, na a vola, Henza Mwana weligondi wa Nyasaye, u hila ubwoni bwavomkivala 30Uyu niye wa nda mu volera, Inyima wange yadza mundu u gwiye imbiri wange: kigira ya li imbiri wange. 31Kandi inze si nda mu manya; navutswa a lolekane na Israeli, yiki ni kigira ndadza ni mbatidza mu madzi. 32Yohana ya lolekidza, na a vola, Ndoli Roho yika kuli likuulu li twula migulu; kandi va menya kuye. 33Kandi si nda mu manya: navutswa uyu wa ntuma kubatidza mu madzi, ya mbolera, Wa u li lola Roho yika na a menya kuye, uyu niye a batidza mu Roho Mutakatifu. 34Na inze mmali kulola, kandi mmali kulolekidza a veye Mwana wa Nyasaye.
35Mugamba kandi Yohana ya singira, na vaviri ku vegidzwi veve; 36na a henza Yesu lwa ya genda, na a vola, Henza Mwana weligondi wa Nyasaye 37Na vegidzwi vaviri va mu hulira na a vola, ni va londa Yesu. 38Yesu ya girunkana, na a va lola va mu londanga, na a va volera, Mwenya ki? Ni va mu volera, Rabi (litivula lyalyo li veye kuvola, Mwegidzi, u menya ha li ha? 39Ya va volera, Hambi, mu la lola. Vadza ni va lola wa ya menya; ni va gona naye lidiku yilyo: ni yenya kuduka isaa i kola likumi. 40Andreya amwavo Simoni Petro, ya li mulala ku vaviri ava hulira Yohana, na a mu londa. 41Ya tanga kunyola amwavo wewe mwene, Simoni, na a mu volera, Ku nyoye Mesia (litivula li veye Kristo). 42Ya mu hila ku Yesu. Yesu ya mu henza, na a vola, Ive Simoni mwana wa Yohana: u la gulikwa Kefa (litivula li veye Ligina).
43Mugamba yenya kutsia Galilaya, na a nyola Filipu: kandi Yesu ya mu volera, U nonde. 44Filipu ya li wa Betsaida, lidala lya Andreya na Petro. 45Filipu ya nyola Natanaeli, na a mu volera, Ku nyoye uyu wa Musa ya ng'oda kuye mu lilaga kandi avaprofeti, Yesu wa Nazareti, mwana wa Yosefa. 46Natanaeli ya mu volera, Kindu kilahi ki nyala kutwula mu Nazareti? Filipu ya mu volera, Hamba, u lole. 47Yesu ya lola Natanaeli yadza kuye, na a vola kuye, Henza, Muisraeli weligali, u ta li nobugadi 48Natanaeli ya mu volera, U mmanyira haliki inze? Yesu ya tivula, na a mu volera, Filipu na a kikiri kukulanga, lwa wa li isi mwomusala gwamakuyu, nda ku lola. 49Natanaeli ya mu tivulira, Rabi, ive niye Mwana wa Nyasaye; ive nu Mwami wa Israeli. 50Yesu ya tivula na a mu volera, Kigira nda ku volera, nda ku lola isi mwomusala gwamakuyu, u suuvira? U la lola vindu vi vita yivi. 51Kandi ya mu volera, Ligali, ligali, mmu volera, Mu la lola ligulu ligulika, netsingelosi va Nyasaye va nina ni vika ku Mwana wa Adamu.
ទើបបានជ្រើសរើសហើយ៖
Yohana 1: MBE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1967
