PETRUS 1 ḶOUNA IN SINGOG
ḶOUNA IN SINGOG
Surat i Petrus Inta Muna naa in pinotuju kon intau mita in Keresten inta noibaya-bayá mako kon dotá in utuan kon Asia Mointok. Mosia in sinangoi “umat inta piniḻí i Allah”. Totok makusud in surat tanaa in moginrigonbí kon pirisaya in intau mita inta pinopomakusudan in surat tanaa inta koyogot in nokorasa kon tekanan bo inta tantú pogutúonmai popisí in mopirisaya kon i Kristus. Ki Petrus in bui noponorop kon intau mita inta pinopomakusudan in surat tanaa sinbá mosia in diá mokoḻiong kon Habar Mopia soaḷ ki Yesus Kristus inta nobaḻí jaminan in onu inta iharap mako monia. Sin ki Yesus Kristus aindon minatoi, táe nobiagbí bui bo Sia in nodandi doman kon buibí in Sia mamangoi. Tua in musti baḻíon monia dodoyonan in pirisaya sahingga morela bo monahangbí doman in koantugan in roriga. Musti kotaauan doman monia kon roriga inta kinorasaan monia tatua in tobatúbí ujian mongo totu-totuudon in mosia mopirisaya kon i Kristus. Ná doman tua, mosia in musti moyakin kon mokouḻíbí in mosia kon tontuḻí nongkon i Tuhan kon wakutu in ki Yesus Kristus mamangoidon bui.
Ki Petrus in deemanbí tongá moginrigon kon pirisaya in umat mita inta pinopomakusudan in surat tanaa inta koyogot in nokorasa kon kasusahan tatua, táe sia in nopoigum doman sinbá mosia in mobiag motompia saḷaku dumodudui mita i Kristus.
Tombonu
Tompouna 1:1-2
Tonggina sinbá monorop kon ki Allah moposaḷamat in intau 1:3-12
Tonggina sinbá mobiagdon tongá kon i Allah 1:13–2:10
Kowajiban in intau Keresten kon wakutu in koantugan in Roriga 2:11–4:19
Koompá in gina bo pogogundoi intau in Keresten 5:1-11
Simpod in surat 5:12-14
ទើបបានជ្រើសរើសហើយ៖
PETRUS 1 ḶOUNA IN SINGOG: INOMOG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Alkitab Singog In Mongondow Masa In Tanaa © Indonesian Bible Society, 2016.