Matius 8
8
Si tou tinoro ung kusta liné'os ni Yesus
(Mrk. 1:40-45; Luk. 5:12-16)
1I si Yesus nimerosomé im witi kimeleng, lakez sé tou nimahtotondongané mahkiité ni Sia. 2A méyé wia ni Sia si tou tinoro ung kusta. Si tou itii kimuruzla witu u sinaru-Na ang kumua, “Tuang, sa si Tuang paaz, si Tuang én toro lumé'osé ni aku.” 3A si Yesus tumiona wia si tou itii, ang kumuama, “Ni Aku ém paaz, malé'osoma.” In toro niitukan, si tou tinoro ung kusta itii é nimalé'osa.
4 #
Im. 14:1-32
Ang kuan ni Yesus wia si tou itii, “Gena-genangen, tia' ipahkukuamu wia si séi uman kura ni ko i nimalé'osa, taan mangémo, papailekla un toumu wia si walian i ni ko é lé'oso. Wo iwéhéla u raragés tanu u méiperénta ni Musa, un tumuzu'mé wia ni séra i ni ko é lé'oso.”
Si ata ni tonaas né suraro Romawi liné'os ni Yesus
(Luk. 7:1-10)
5I si Yesus muntepa witi Kapernaum, a méyé si tonaas né sana atus suraro Romawi i mekitulung wia ni Sia, kuana, 6“Tuang, si ata witi waléku é saki. Ni sia é memitu-mitumokan ung kokolo'an pahpaan i lailai. Wo ni sia ndo'tuu én totozo zézéha.”
7Ang kuan ni Yesus wia ni sia, “Ni Aku é mangé witi walému i malumé'os ni sia.” 8Taan kuan ni tonaas né suraro itii wia si Yesus, “Tuang, tia'mo mangé witi waléku, pahpaan ni aku én zéi'kan wangun i sumungkul si Tuang witi waléku. Taan numuwu'moma, si ataku itii é malé'os. 9Ni aku kimuama in téntu pahpaan ni aku kangkasii ém wéwéhan si tonaasku wo wéwéhan kasii sé suraro pahperéntangku. Sa ni aku kumuala wia si esaané im wia sé suraroku in téntii, ‘Mangémo!’ ni sia é mangé, wo wia si esa kasii, ‘Méyé wia'i!’ ni sia é méyé. Kaapa wia si ataku, ‘Pa- ayangena ung kenu!’ ni sia é maayang niitu.”
10Kaitalingamé u méikuamé ni tonaas né suraro itii, si Yesus é mengusi-ngusingsing ang kumuama wia sé tou mahkii-kiit ni Sia, “Uli-ulit ikua-Kuma wia ni kamu, im wia sé tou Israel, ni Aku én zéi'kampé' nimahile-ilekla um pa'émanen tanu ung kawangko' um pa'émanen ni zéi'kan tou Israel kenu. 11#Luk. 13:29 Ikua-Kuma wia ni kamu: Lakez sé tou witi sendangan wo talikuzan é méyé wo kuman mahwali-wali karia ni Abraham, ni Ishak wo ni Yakub witi Kakolanoan ni Opo Empung. 12#Mat. 22:13, 25:30; Luk. 13:28 Taan sé tou Yahudi sé im puuna nimaéndo tou witi Kakolanoan ni Opo Empung én ilombo' witu ung karimbengbengan zéi'mo kakuaan. Im witu ni séra é mamé' makaz am waang néra éng karékétokan.” 13A si Yesus kumuama wia si tonaas né suraro itii, “Mawurimoma wo mamualila wia ni ko tanu um pa'émanennu.” In toro niitukan, si ata ni tonaas né suraro itii é rengan i nimalé'osa.
Si mahnuang wéwéné ni Petrus liné'os ni Yesus
(Mrk. 1:29-34; Luk. 4:38-41)
14A si Yesus mangé witi walé ni Petrus. Im witu, ileken-Nala si mahnuang wéwéné ni Petrus é meneke-nekelokan pahpaan im pasu'. 15Tionala ni Yesus u lengenna a mazéi'ma um pasu'na. Ni sia tumoozé a masumelewir si Yesus.
16I mawengimo lakez sé tou sinelazan né sétang méipahwalimé wia si Yesus. Ni Sia makasa uman nimuwu'ma i nimohoma sé sétang itii wo i limé'osa péléng sé tou saki. 17#Yes. 53:4 Niitu nimamuali wo malekepla u Nuwu' ni Opo Empung mengiité si nabi Yesaya in téntii,
“Ni Sia si mengali an zézéhata wo limé'os a sakita.”
Kura ing kumiit si Yesus
(Luk. 9:57-62)
18I si Yesus milekla sé tou lakez rimimbung wia ni Sia, an iatu-Nama sé pahtuzu'en-Na i lumewet u louz. 19A méyé si tou tulap un Torat ang kumuama wia ni Sia, “Méster, ni aku éng kumiit ni Ko, wisa uman un angéan-Nu.”
20Ang kuan ni Yesus wia ni sia, “Sé longkoi ém wéwéhan an tuleng néra, sé tumétéwél ém wéwéhan a salah néra. Taan si Oki' ni Tou én zéi'kan siapa un toro rewaan-Na.”
21A si esaané im wia sé mahkii-kiit ni Sia kumuala wia ni Sia, “Tuang, énéané ni aku i mangépé' lumewengé si ama'ku.”
22A sia wingkotela ni Yesus, “Kumiitomé ni Aku wo iwayamola sé tou nimatémo i malumewengla sé nimatémo.”#8:22 Ung kalakoan ‘sé tou nimatémo’ é ‘sé tou zéi'kan ma'éman’.
U reges repet méiento' ni Yesus
(Mrk. 4:35-41; Luk. 8:22-25)
23A si Yesus karia né pahtuzu'en-Na sumakéma londéi. 24Kumompo'mé a méyé u reges totoz repet. U reges itii nimangun u louz mahsempa' taka-takazan u londéi itii ém pahuntepenoma un zano. Taan in toro niitu si Yesus én timekel. 25A si Yesus wongkéla né pahtuzu'en-Na. Kuan néra, “Tuang! Tulungené. Ni kita éng kaléwo'mo.”
26Taan kuan ni Yesus wia ni séra, “É kamu sé zéi'kan tahlous ma'éman, kaa kamu maindé'?” A si Yesus rumendaié a rekaken-Nama u reges wo u sempa' itii. A mapenesa u louz itii. 27Sé pahtuzu'en ni Yesus é mengusi-ngusingsing. A séra mahkua, “Tou kura si Tou kenu taka-takazan u reges wo u sempa' é mahtali- talinga ni Sia.”
Si Yesus nimoho sé sétang im wia sé zua tou
(Mrk. 5:1-20; Luk. 8:26-39)
28I méikaayomoma witi lewet u louz, witi tana' né tou Gadara, a méyé wia si Yesus sé zua tou sinelazan né sétang, sé witi lelewengan a méyé. Sé zua itii én totoz léwo' taka-takazan zéi'kan siapa tou wo wuaya i lumangkoi witu u lalan itii. 29A sé sétang simelaz wia ni séra kuméréta, “É Oki' ni Opo Empung! Apa un éyé-Nu wia ni kai? Apa ni Ko niméyé é mézuméha ni kai puunala un oras tinotozo?”
30Zéi'kan zou' im witu, wéwéhan sé wawi totoz lakez sé kare- gas i mengan. 31A sé sétang itii mahaléi wia si Yesus, “Sa kai iwoho-Mu, iatumoma kai i mérama wia sé wawi kenuma.”
32Ang kuan ni Yesus wia ni séra, “Mangémo!” A séra mondola a mangé wia sé wawi itii. Péléng sé wawi sé witu u ri'ping itii éng kimonta'ma witu u louz a malemesla witu.
33A sé mahtéiz sé wawi itii rengan ing kimara'ma. I méika- ayomola witi wanua tua'na, a séra sumirita péléng a nimamuali. Méisirita néra kasiila u nimamuali wia sé tou zua sé sinelazan né sétang itii. 34Kaitalingamé u sirita néra, péléng sé tou witi wanua tua'na itii é nimaringka' a mangé wia si Yesus. I nimahilekanola karia ni Yesus, a Sia pekiondol néramé im witu un tana' néra.
ទើបបានជ្រើសរើសហើយ៖
Matius 8: LAITOM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
