EVASELIO A SOANE 20
20
Toe tuuake a Sesu-Kilisito
1I te uluaki aho o te vahaa, nee alu leva ia Malia mai Maketala ki te tanuma i te pogipogi uhu, kae kei fakapouli; pea nee sio leva ia kua too te maka tapunu mai te tanuma. 2Nee lele leva ia kia Simone Petelo mo te tisipulo ae nee ofa ai Sesu, pea nee ina ui age kia naua: Kua natou too te Aliki mai te tanuma, pea e mole matou iloi pe kua natou tuku ia ki fea.
3Nee ulu leva Petelo ki fafo mo te tisipulo ake ae, pea nee na olo leva ki te tanuma. 4Nee na felelei fakatahi. Kae nee gaholo age leva te tisipulo ake ae ia Petelo, pea nee uluaki kaku leva ia ki te tanuma. 5I tana punou ifo, nee sio leva ia e tuku te u foi kie hai i te kele, kae nee mole ulu leva ia ki loto. 6Ko Simone Petelo, ae nee muli age ia ia, nee kaku age leva ia, pea nee ulu leva ia ki te tanuma; nee sio leva ia ki te u kie hai nee tuku i te kele, 7pea mo te tupenu ae nee kofukofu aki te ulu o Sesu, nee mole tuku fakatahi ia mo te u kie hai, kae nee takai ia i he tahi ake faahi. 8Pea ko te tisipulo aia, nee uluaki kaku ki te tanuma, nee toe ulu leva mo ia ki loto; pea nee sio leva ia, pea nee tui leva ia. 9Koteuhi nee heeki na mahino ki te Tohi tapu, e tonu ke toe tuuake Sesu mai te kau mate. 10Pea nee toe liliu leva te u tisipulo ki tona api.
Ha a Sesu kia Malia Maketalena
11Kae nee tuu leva Malia i fafo o ovi ki te tanuma, pea nee tagi ia. I tana tagi, nee punou leva ia o fakasiosio ki te tanuma; 12pea nee sio leva ia ki ni aselo e toko lua nee kofu hina, nee heheka i te kogamea ae nee fakamoe ai te sino o Sesu, ko te tahi i te ulu, pea ko te tahi i te u vae. 13Nee na ui age leva kia ia: Fafine, kotea e ke tagi ai? Nee ina tali age leva kia naua: Koteuhi nee natou ave toku Aliki, pea e mole au iloi pe nee natou tuku ia ki fea. 14I tana palalau aia, nee maliu leva ia ki muli, pea nee sio leva ia ki te tuu a Sesu; kae nee mole ina iloi ko Sesu ia. 15Nee ui age leva e Sesu kia ia: Fafine, kotea e ke tagi ai? Ko ai e ke kumi? Nee manatu Malia ko te tagata faioloto ia, pea nee ina ui age leva kia ia: Aliki, kapau ko koe ae nee ke ave ia, fakaha mai kia au pe nee ke tuku ia ki fea, pea e au too anai ia. 16Nee ui age leva e Sesu kia ia: Malia! Nee maliu leva Malia, o ui kia ia i te fakahepeleo: Rabbouni! ko tona uhiga, Pule. 17Nee ui leva e Sesu kia ia: Aua naa ke fafa mai kia au; koteuhi e heeki au hake ki taku Tamai. Kae ke ke alu ki oku tehina, o ui kia natou e au hake ki taku Tamai pea ko takotou Tamai, ki toku Atua, pea ko tokotou Atua. 18Nee alu leva Malia Maketalena, o fakaha ki te kau tisipulo nee sio ia ki te Aliki, pea nee ina fakaha age kia ia te u mea aeni.
Ha ki te u tisipulo kae puli ia Tomasi
19I te afiafi o te aho aia, ko te uluaki aho ia o te vahaa, nee tapunu te u matapa o te kogamea ae nee fakatahi ai te kau tisipulo, koteuhi ko tanatou mataku ki te kau Sutea, nee hau leva Sesu, pea nee tuu ia i lotomalie o natou, pea nee ina ui leva kia natou: Ke ia koutou te tokalelei! 20Pea i te osi o tana palalau aia, nee ina fakaha age leva kia natou ona nima mo tona vakavaka. Pea nee fiafia leva te kau tisipulo i tanatou sisio ki te Aliki. 21Nee toe ui age leva e Sesu kia natou: Ke ia koutou te tokalelei! O hage ko te Tamai nee ina fekaui mai au, pea mo au e au fekaui koutou. 22I te osi o te u folafola aia, nee ina pupuhi leva kia natou, mo ui age kia natou: Kotou tali te Laumalie Maonioni. 23Ko natou ae e kotou fakamolemole anai ki ai anatou agahala, e fakamolemole anai anatou agahala kia natou, pea ko natou ae e kotou taofi anai ki ai anatou agahala, e taofi anai anatou agahala kia natou.
Ha ki te u tisipulo mo Tomasi
24Ko Tomasi, ae nee higoa ko Titimo, ko he tahi o te toko hogofulu ma lua, nee mole fakatahi ia mo natou i te lakaga nee alu age ai Sesu kia natou. 25Nee ui age leva e te u tisipulo kia ia: nee matou sisio ki te Aliki. Kae nee ina ui age leva kia natou: Kapau e mole au sio ki te fakailoga o te u fao i ona nima, pea kapau e mole au ai toku tuhi ki te u tuiga fao, pea kapau e mole au ai toku nima ki tona vakavaka, e mole au tui.
26Hili aho e valu, nee toe katoa age te kau tisipulo a Sesu ki te fale, pea nee nofo Tomasi mo natou. Nee hau leva Sesu, kae nee mapunu te u matapa, pea nee tuu leva ia i lotomalie o natou, o ui age: Ke ia koutou te tokalelei! 27Pea nee ina ui age leva kia Tomasi: Ai mai tou tuhi ki heni, pea ke sio ki oku nima; aumai foki mo tou nima, pea ke ai ia ki toku vakavaka; pea aua naa ke tui gataa, kae ke tui. 28Nee tali leva e Tomasi kia ia: Toku Aliki mo toku Atua! Nee ui age leva e Sesu kia ia: 29Koteuhi kua ke sio mai kia au, kua ke tui ai. Manuia natou nee mole sisio, pea nee natou tui!
Tupuaga o te Evaselio a Soane
30Nee toe fai foki e Sesu, ia mua o ana tisipulo, ni ihi age milakulo lahi, ae nee mole tohi i te tohi aeni. 31Kae nee tohi te u mea aeni o tupu ke kotou tui ko Sesu ko te Kilisito ia, te Alo o te Atua, pea ke kotou mau, e koutou e tui, te mauli i tona huafa.
ទើបបានជ្រើសរើសហើយ៖
EVASELIO A SOANE 20: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
