EVASELIO A SOANE 19
19
Fakakolona talatala o Sesu
1Pea nee fekau leva e Pilato ke puke Sesu, pea ke ta ia aki ni kaui maea.
2Nee fi leva e te kau solia he kolona talatala, pea nee natou pale ki ai tona ulu, pea nee natou fakakofu leva ia aki he pulupulu kula; pea nee natou fakaoviovi age leva kia ia, 3o ui: Malo, hau o te kau Sutea! Pea nee natou fepataki leva ia.
Faiga a Pilato ke fakamauli Sesu
4Nee toe ulu ake leva ia Pilato ki fafo, o ui ki te kau Sutea: Koeni, e au aumai ia kia koutou ki fafo, o uhi ke kotou iloi e mole au mau he hala ia ia. 5Nee ulu mai leva Sesu ki fafo, kua pale ia aki te kolona talatala pea kua kofu ia aki te pulupulu kula. Pea nee ui leva e Pilato kia natou: Koeni te tagata.
6I te temi nee sio age ai te kau pule faisakilifisio pea mo te kau ofisa kia ia, nee natou kalaga leo lahi leva: Kolusifikoi! Kolusifikoi! Nee ui leva e Pilato kia natou: Kotou puke ia e koutou totonu, pea kotou kolusifikoi ia; koteuhi ko au, e mole au mau he hala ia ia. 7Pea nee tali leva e te kau Sutea kia ia: E i ai tamatou lao; pea i tamatou lao, e tonu ke mate ia ia, koteuhi nee ina ui ko te Alo ia o te Atua.
8I te logo a Pilato ki te palalau aia, nee toe asilisili lahi leva i ai tona mataku. 9Pea nee toe ulu leva ia ki te peletolio, pea nee ina ui age leva kia Sesu: Pe e ke hau mai fea? Kae nee mole toe foaki age leva e Sesu he tali kia ia. 10Nee ui age leva e Pilato kia ia: Pe ko au ae e mole ke fia palalau mai ki ai? Pe e mole ke iloi e au mau te pule ki tou kolusifikoi, pea e au mau te pule ki tou fakaateaina? 11Nee tali leva e Sesu: E mole ke mau anai he pule o uhiga mo au, gata pe mo kapau nee foaki atu ia kia koe mai oluga. Koia, ko ia ae e ina aumai au kia koe, e ina fai he agahala e lahi age.
12Talu mai te lakaga aia, nee kumi leva e Pilato ke fakaateaina ia ia. Kae nee kalaga te kau Sutea: Kapau e ke fakaateaina ia, pea e mole ke kaumea mo Sesale. Ko he tahi pe e ina fakanofo ia ke hau, e fakafehagai ia kia Sesale. 13Ko Pilato, i tana logo ki te u kupu aia, nee ina taki ake leva Sesu ki fafo; pea nee heka leva ia ki te hekaaga o te tui fakamaau i te faahi ae nee higoa ko te Pave, pea i te fakahepeleo ko Kapata. 14Ko te teuteu aia o te Pasikate, pea nee ko te hola ono uhu ape aia. Nee ui leva e Pilato ki te kau Sutea: Koeni tokotou hau. 15Kae nee natou kalaga leva: Ave kehe, ave kehe, kolusifikoi ia! Nee ui leva e Pilato kia natou: Pe e au kolusifikoi anai tokotou hau? Nee tali leva e te kau pule faisakilifisio: E mole homatou tahi age hau ia Sesale. 16Pea nee tuku age leva ia e Pilato kia natou ke natou kolusifikoi ia. Nee natou too leva Sesu, pea nee natou ave leva ia.
Tutuki o Sesu ki te koluse
17Nee amo leva e Sesu tona koluse, pea nee kaku leva ia ki te kogamea o te ulupoko, ae nee higoa i te fakahepeleo ko Kolokota. 18Ko te kogamea aia nee kolusifikoi ai leva ia, pea mo he tahi age toko lua nee taki tahi i ona fahai, kae tuu Sesu i lotomalie.
19Nee tohi leva e Pilato he kupu, ae nee ina fakapipiki ki te koluse, pea nee tohi fenei: Sesu mai Nasaleti, hau o te kau Sutea. 20Nee lau leva e he kau Sutea kaugamalie te kupu aia, koteuhi nee ovi pe ki te kolo te kogamea ae nee kolusifikoi ai Sesu: nee fakahepeleo ia, mo fakakeleka, mo fakalatina. 21Nee ui leva e te kau pule faisakilifisio o te kau Sutea kia Pilato: Aua tau tohi: Hau o te kau Sutea. Kae ke tohi nee ina ui: E ko te hau au o te kau Sutea. 22Nee tali leva e Pilato kia natou: Ko te mea ae nee au tohi, kua au tohi ia.
23Ko te kau solia, i te osi o tanatou kolusifikoi Sesu, nee natou too leva ona teu pea nee natou fai leva ni vahe e fa, ke tahi mo ia te tagata solia tona vaega. Nee natou too foki mo tona tunika, ae nee hala kauituiga, pea nee fai aki he kie e tahi mai oluga ki lalo. Pea nee natou feuiaki leva ia natou: 24Aua naa tou haei ia, kae tou mate aki te toho pe ko ai e ina mau anai ia. Nee hoko leva te mea aia ke fakahoko ai te folafola e tuu i te Tohi tapu:
Nee natou vahe oku kofu,
Pea nee natou mate aki te toho toku tunika.
Koena te mea nee fai leva e te kau solia.
25Nee tutuu, o ovi ki te koluse o Sesu, tana fae, mo te tehina o tana fae, ia Malia, ohoana o Kolopasi, pea mo Malia mai Maketala. 26I tana sio age ki te tuu o tana fae, mo te tisipulo nee ofa ai ia tafa o tana fae, nee ina ui ifo leva ki tana fae: Fafine, koena tau tama. 27Pea nee ina ui ifo leva ki te tisipulo: Koena tau fae. Pea talu mai te lakaga aia, nee too leva ia e te tisipulo i tona api.
Mate o Sesu
28I te hili o te mea aia, pea i te iloi e Sesu kua katoa te mea fuli, koteuhi ke fakahoko ai te Tohi tapu, nee ina ui leva: E au fia inu. 29Nee i ai i te kogamea aia he ipu nee fonu i te vinika. Nee fufui leva e te kau solia he foi unu ki te vinika, pea nee natou fakapipiki leva ia ki he vaa isopa*, pea nee natou fakaoviovi age leva ia ki tona gutu. 30I te osi o te too e Sesu te vinika, nee ina ui leva: Kua katoa te mea fuli. Pea nee mapelu ifo leva tona ulu, pea nee ina tuku age leva tona laumalie.
Ko te u mea nee hoko i te mate a Sesu
31Ko te aho teuteu aia ki te sapato, pea nee mole loto te kau Sutea ke tuku te u sino i te u koluse i te lolotoga o te sapato, koteuhi ko te sapato aia ko he aho lahi ia; koia nee natou kole ai leva kia Pilato ke fasifasii te u vae o natou ae nee kolusifikoi, pea ke too ifo te u sino mai te u koluse. 32Nee olo age leva te kau solia, pea nee natou fasifasii leva te u vae o te uluaki, pea mo te lua, ia naua nee kolusifikoi mo Sesu. 33I tanatou fakaoviovi age kia Sesu, nee natou sio leva kua mate ia ia, nee mole natou fasifasii leva ona vae; 34kae nee hokai leva e he tahi o te kau solia tona vakavaka aki he tao, pea i te lakaga pe ai nee tafe leva mai ai te toto mo te vai. 35Ko ae nee sio ki ai nee fakamooni ia ki ai, pea e mooni tana fakamooni; pea e ina iloi e palalau mooni ia, koteuhi ke kotou tui mo koutou. 36Nee hoko te u mea aia, ke fakahoko ai te Tohi tapu:
E mole fasii anai hona hui pe e tahi.
37Pea nee toe fakaha foki e te folafola:
E natou toe sisio anai ki ae nee natou hokai.
Tanu o Sesu
38I te hili o te mea aia, ko Sosefo mai Alimatea, ko he tisipulo a Sesu, kae nee fakapulipuli ia i tona mataku ki te kau Sutea, nee ina kole leva kia Pilato ke fakagafua age kia ia ke ina too te sino o Sesu. Pea nee fakagafua age leva e Pilato kia ia. Pea nee hau leva ia, o too te sino o Sesu. 39Ko Nikotemo, ae nee alu i mua kia Sesu i te pouli, nee toe hau mo ia, o aumai he mila mo he aloese kua fio, ko te tolugofulu ma tolu kilo ape tona lahi. 40Nee na too leva te sino o Sesu, pea nee na kofukofu ia aki ni foi kie, mo ni mea fakamagoni, o mulimuli ki te agaifenua a te kau Sutea moka tanu he tahi. 41Koeni nee i ai he oloto i te kogamea ae nee kolusifikoi ai Sesu, pea nee tuu i te oloto he tanuma foou, nee heeki tuku ki ai he tahi. 42Ko te kogamea leva aia nee na tuku leva ki ai Sesu, koteuhi ko te teuteu a te kau Sutea ki te sapato, pea mo te tuu ovi ai o te tanuma aia.
ទើបបានជ្រើសរើសហើយ៖
EVASELIO A SOANE 19: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
