TOHI GAUE A TE KAU APOSITOLO 1
1
1Teofile, nee au palalau, i taku uluaki tohi, ki te u mea fuli nee kamata fai e Sesu mo akonaki ki ai talu mai te kamataaga 2o kaku mai ki te aho nee ave ai ia ki selo, i te osi o tana tuku o ana fakatotonu, i te Laumalie Maonioni, ki te kau apositolo nee ina filifili.
3I te osi o tona mamahi, nee ha mauli leva ia kia natou, pea nee ina tuku age leva kia natou ni fakamooni lahi aupito; lolotoga aho e fagofulu, nee tau ha ia kia natou, pea ne palalau ia ki te u mea o uhiga mo te puleaga o te Atua.
4I tana kei nofo mo natou, nee ina fakatotonu leva kia natou ke aua naa natou fakamamao mai Selusalemi, kae ke natou talitali ki te mea ae nee fakapapau e te Tamai, te mea ae nee au fakaha atu kia koutou, nee ina ui leva. 5Koteuhi nee faipapitema Soane i te vai, kae ko koutou, i ni kii aho sii pe, e papitemai anai koutou i te Laumalie Maonioni. 6Pea nee fehui age leva kia ia e te kau apositolo ae nee fakatahi: Aliki, pe ko te temi koa aeni e ke toe fakatuu ai anai te puleaga o Iselaele? 7Nee ina tali age leva kia natou: E mole a koutou te iloi te u temi pe ko te u lakaga nee fakatuutuu ki ai e te Tamai i tana pule toko tahi. 8Kae e koutou tali anai he malohi, te Laumalie Maonioni e hau anai kia koutou, pea e koutou liliu anai ko aku tagata fakamooni i Selusalemi, mo Sutea katoa, mo Samalia o kaku ki te u potu fuli o te malamanei.
9I te osi o tana fakaha te mea aia, nee avake leva ia kae natou lolotoga sio kia ia, pea nee fakaugia leva ia e he ao ki onatou mata. 10Pea i tanatou kei fakamamau onatou mata ki te lagi i te lolotoga o tana mavae, koeni, nee ha mai leva ni tagata kofu hina e toko lua kia natou, 11pea ne na ui age leva: Kau tagata Kalilea kotea e koutou tutuu ai i heni o sio ki te lagi? Ko te Sesu aeni, kua avake ki te lagi mai te lotomalie o koutou, e toe hau feia anai ia o hage ko takotou sio ki tana alu ki te lagi.
Talitali ki te Laumalie Maonioni
12Pea nee natou toe liliu leva ki Selusalemi, mai te mouga nee higoa ko te mouga o Oliveto, ae nee mamao mai te kolo i he kilometa e tahi. 13I tanatou kaku, nee natou hake leva ki te kogafale i te fata ae nee natou nonofo mahani ai; ko Petelo, mo Soane, mo Sakopo, mo Atelea, mo Filipo, mo Toma, mo Patolomeo, mo Mateo, mo Sakopo foha o Alefeo, mo Simone ko te Selote, pea mo Suta foha o Sakopo. 14Nee natou loto tahi fuli ke natou faa kataki i te faikole, o fakatahi mo te u fafine, mo Malia, fae a Sesu, pea mo te u tehina o Sesu.
Filifili o Mateasi
15I te u aho aia, nee fakatahi ai te u tehina ko te toko teau uafulu ape, nee tuu ake leva ia Petelo i lotomalie o natou, o ui age:
16Kau tagata mo tehina, e tonu ke fakahoko te mea nee fakaha fakatomua e te Laumalie Maonioni, i te Tohi tapu, i te gutu o Tavite, o uhiga mo Sutasi, ae nee liliu ko te takitaki o natou nee natou puke Sesu. 17Nee lau ia mo matou, pea nee kau ia ki tamatou gaue. 18Ko te tagata aia, i te osi o tana totogi he gaueaga ki te paaga o te agahala, nee to fohifo ia o mafaki lua tona sino i lotomalie, pea nee mavete katoa ai ona tootooga fuli. 19Kua iloi te mea aia e te hahai fuli o Selusalemi, pea kua fakahigoa te gaueaga aia i tanatou lea ko Akeletama, ko tona uhiga, gaueaga o te toto. 20Koteuhi e tuu i te tohi o te u Pesalemo:
Ke lavaki tona nofoaga,
Ke aua naa nofoi ia e he tahi!
Pea:
Ke too e he tahi tona tuulaga!
21Koia, e tonu ai ki he tahi ia natou ae nee olo fakatahi mo matou i te temi katoa nee mauli ai te Aliki Sesu mo matou, 22o kamata mai te papitema a Soane o kaku ki te aho nee avake ai ia maia matou, ke kau mo matou ki te fakamooni o tona toe tuuake.
23Nee natou filifili leva he toko lua: ko Sosefo nee higoa ko Palapasi pea nee toe fakahigoa foki ko Susito, mo Mateasi. 24Pea nee natou fai leva te kole aeni, Aliki, ko koe ae e ke iloi te u loto o te tagata fuli, fakaha mai, pe ko ai ia naua aeni kua ke filifili, 25ke kau ia ki te gaue fakaapositolo, ae nee siaki e Sutasi, kae alu ia ki tona nofoaga totonu. 26Nee natou toho leva, pea nee to leva te filifili kia Mateasi, ae nee kau leva ki te kau apositolo e toko hogofulu ma tahi.
ទើបបានជ្រើសរើសហើយ៖
TOHI GAUE A TE KAU APOSITOLO 1: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
