Saint Luc 20
20
1Da baï mi gui mahana ka on, ka name hana mbéo ko̱ Jésus mi to̱ko̱ fènli hi njoukouli an bil temple, da kè sa mboura bèlabaï, da loukou sacrificateurli da njou‐to̱ko̱na bong guingnali jing tangchidoli mi ndoï guè monè, 2da kli sa hi nè, ka sa: Mo sa hi na, mo nding fèn aïnli ka ba ling a guè lé, maléba guème ko̱ sa bi njako̱ lé? 3Da kème féré sa, ka sa hi kli: Mè ji ouina ba none baï mbéo kéng. 4Oui sa hi mi, baptême ko̱ Jean mi nding ba an nonkala, maléba an njoukouli lé? 5Da kli kèrè ka bo̱ko̱ go̱ro̱ kli jing hana, ka sa: Tokoré name sa ba: An nonkala, yé kè sa: Baïfèn da oui tane ga la bilaou nè ya lé? 6Da tokoré name sa ba: An njoukouli, yé njoukouli on bon ma wou na ka kone, baï ko̱ Jean ba prophète mi ko̱ té laou kli. 7Da kli féré sa kli tane tou ya kong kè gui ka hane dé. 8Da Jésus sa hi kli: Da on mè ba sanakè hi oui tane tiya, ka ba bil ling a guè mi mè nding fèn aïnli.
9Kè tissaon baï sana ébèlbaï aïn hi njoukouli on: Njoukouna mbéo mi pa waka lénadi ka bi njou‐kora wakali rou ka ourou sé pou aféké, da kaou bongkè dita. 10Da ko̱ name doura lénadi mi gui tou, kè pi koï hana mbéo guè mona njou‐kora wakali, baï an klime hi hana lénadi hi nè. Da njou‐kora wakali mi wan nè ka pi nè féré fal bo̱on. 11Da kè féré pi koï aféké; da kli wan nè kéng, da kli nding bèlya nyèta jing nè, da pi nè féré fal bo̱on. 12Da kè féré pi njou‐bakara an saïkè; da kli hi nongno hi nè kéng, da ni nè tèn kala. 13Da nanjou a waka lénadi on mi sa: Yé mè nding ba fèn lé? Yé mè pi dodok goune ni, ko̱ mè sé hang‐è nyèta, ka touya yé kli ma ngou waou nonè. 14Da ko̱ njou‐korali ko̱ nè kli kèrè ka bo̱ko̱ go̱ro̱ kli jing hana, ka sa: Kè on ba njou‐yanapélé; oui gui an name i nè, da on yé fèn pélé ba ama. 15Da kli ni nè tèn kala an bil waka lénadi, ka i nè. Da on yé nanjou a waka lénadi ma nding ba fèn jing kli lé? 16Yé kè gui ka i njou‐kora wakali on, da kè ma hi waka lénadi hi njou‐afékéli.
Da ko̱ klime la baï on kli sa: Yèng an mi gui mahana ka aïn ya. 17Da Jésus ko̱ kli, kè sa: Da on, fèn on ba fèn ko̱ mi dé lé?
Kone aïn ko̱ njou‐zana voulouli mi pong nè tou,
Kone on mi tèn ba loukou kone bina kourou voulou.
18Njoukouli bon on ko̱ mi lé toul kone aïn yé kè haou monè, da njoukou on ko̱ kone aïn mi lé toulè, yé kè ma san.
19Ka l’heure o̱kèo̱ njou‐to̱ko̱na bong guingnali da loukou sacrificateurli mi nza mborokè baï bana nè, da klime waou njoukouli, baï ko̱ kli toutou kè sa ébèlbaï aïn ka ba ling kli.
20Da kli ènrèn nè nyèta; kli pi njou‐dèlali, ko̱ mi sé fong njou‐guédékli, an klime nza baï an njakè, baï soutina nè bi ndo̱ka njèran da bina baïnjaka njou‐name gangna. 21Da kli oui nè, ka sa: Njou‐to̱ko̱nafèn na toutou mo sa baï da to̱ko̱ fèn guédék hi njoukouli, da mo tane ga ènrèn njoukouna ba baï nonè ya, da mo to̱ko̱ ba dombora Ouone ka ba mbora babaï. 22Ka mboro guingna ma an name hi l’impôt hi César maléba hinakè hi nè tiya lé? 23Jésus ko̱ on ba bounabong mone kli, kè sa hi kli: 24Oui to̱ko̱ dénier mbéo hi mi. Tétéme mona guè da ling a guè ko̱ kli dé an toulkè lé? Da kli sa hi nè ba: César. 25Da kè sa hi kli: Baï on oui hi fèn hi César ko̱ ba fèn a César. Da oui hi fèn hi Ouone ko̱ ba fèn a Ouone. 26Da kli tane ma baï féra fal njaka kli jing nè an wora njoukouli ya. Da go̱ro̱ kli mi dou baï baï on ko̱ kème féré sa, da kli kaou ka njaka kli.
27Sadducéen hanali ko̱ mi sa toumnahoulkèli tane tiya, kli guè monè, ka oui nè, ka sa: 28Njou‐to̱ko̱nafèn, Moïse dé takarata hi na: Tokoré yine a njoukouna mbéo mi hou, ka yèng waïn nè bi, da kè tane ga mboung goune ya, da yine nè mi ya waïn aïn, ka mboung goundi guèl bama yine nè. 29Da ko̱ yindi mi mane difala‐séré makaou, da titilikè mi ya waïn ka hou, da kè tane ga mboung goune ya. 30Da yine nè a sérékè mi nding mahana ka on. 31Da yine nè a saïkè mi ya nè, da kli on difala‐séré mi ya nè ba waïn akli, da kli tane mboung goundi jing nè ya, da kli bon mi hou. 32Da afal waïn on mi ndé hou kéng. 33Da mono, ka name tomnahoukèli yé waïn aïn ba waïn a guè lé? baï ko̱ kli difala‐séré mi ya nè ba waïn kli jinguèl. 34Da Jésus mi sa hi kli: Goundi a saka naï mi é waïn, da njoukouli mi hi waïn hi wonron baï éna nè. 35Da kli on ko̱ Ouone mi di kli ko̱ mi ma baï name ko̱ mi nding baï guina, da ma baï tomnahoulkèli an wora houli, kli tane é waïn ya, da kli tane hi waïn hi wonron baï éna nè ya. 36Baï kli ma hou ba aféké ya, baï ko̱ kli mahana ka ba angeli, da kli ba goundi a Ouone, ko̱ ba goundi a tomnahoulkèli. 37Da houli mi tome baï ko̱ Moïse fènè mi to̱ko̱ hi na, an bèl po̱to̱ wo̱ro̱ baï ko̱ kème di Nanjou ba Ouone a Abraham, da Ouone a Isaac, da Ouone a Jacob. 38Kè tane ti ba Ouone an houlkèli ya, da ba Ouone a kli ko̱ mi yan; baï ko̱ kli bon yan baï nè. 39Njou‐to̱ko̱na bong guingna hanali mi féré sa, ka sa: Njou‐to̱ko̱nafèn, mo sa bèlta tou. 40Da afal ka name o̱kèo̱ kli tane ma baï ouina nè jing baï hana mbéo ya.
41Da Jésus sa hi kli: Ka mbora hani mi oui sa Christ fènè ba goune a David lé? 42Baï ko̱ David fènè mi sa an bil takarata Psaumeli:
Nanjou fènè mi sa hi Nanjou ni;
Mo kaou an mboro wonron ndo̱ko̱ ni,
43Bo̱l tèn ko̱ mème nding bakèlio̱ jing mo tèn ba fèn ndana ka bo̱ko̱.
44Mono on David mi di nè ba Nanjou; ka mbora hani mi kè ba goune nè lé?
45Kè sa hi njou‐séna bong nèli an souka njoukouli bon. 46Oui pèng monè baï baï a njou‐to̱ko̱na bong guingnali, kli on ko̱ ji baï séna jing péna la, da ji an njoukouli mi name kli an guèl zénacho̱ko̱li, da kli ji titili kangalali an bil synagogueli da titili guèl kaounali an guèl name sona gnèna laka. 47Kli son voula waïn soréli da baï mongna njoukouli kli noïli bi hiouna Ouone bongkè dita. Yé kli ma ya barabaï nyè maïya.
ទើបបានជ្រើសរើសហើយ៖
Saint Luc 20: KBN1947
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the British and Foreign Bible Society in 1947.
