OHÚTU 11
11
Inɔ̄ɔda nɛ̄hi kú Ubábɛlu ā
1Eko aflɛ́yí ā, odúúdú ācɛ kú ɛcɛ lɛ ucē ékpónú mɛ́mla īkpɛ̄lā ékpónú nēé gē ka. 2Abɔ̄ ācɛ bá ī cālɛ́ ga ɛnɔ̄ɔ̄cī ā, é lɛ ɛga okpátá éyi má, ajɛ kú Ussína. Anɔ́ɔ é má lā abɔ́ɔ á. 3É da iyī uwā kahíníī, “Aá wā kú ālɔ̄ lɛ ubulɔ́kwu ma, kú ālɔ̄ lɛ ɔ́ pá lɔfúlɔfú.” Anɔ́ɔ é lɛ aúbulɔ́kwu ma kwɛyí ɛcɔ̄ á, klla bī ukolotā kwɛyí ɔ́tɔ̄ kéē bī aúbulɔ́kwu ā kwɔhá á. 4Anɔ́ɔ é kahíníī, “Ālɔ̄ lɛ igelī nɛ̄hi gwó lɛ iyī alɔ, mɛ́mla inɔɔ̄da nōo í licō gaá kwu ɔkpāncō. Cɛ́ɛ́ ká ālɔ̄ lɛ iyē lé lɛ iyī alɔ o yá ká ālɔ̄ je pahīla ipú ɛcɛ ŋ́.”
5Anɔ́ɔ Óndú ā gāajɛ, kóō má igelī mɛ́mla inɔɔ̄da nɛ̄ ayí kú ācɛ gwó ā á. 6Anɔ́ɔ Óndú ā kahíníī, “Mɔ́ɔ̄, alɛɛcɛ wɛ ékpónú, odúúdú ūwā ī ka ucē ékpónú. Ɛ̄nyā wɛ ohútu kulɔ́dɔ́ɔ́ kú ɔdā nēé géē yá glá á. Ɔdā dóódu nēé dɔɔ̄kā ō yá abālɔbányā, é géē yá ɔ̄! 7Ālɔ̄ gajɛ kú ālɔ̄ gaá lɛ ucē nēé ī ka ā gbájí, cɛ́ɛ́ kéē híī pó ɛlā kú īyī uwā igbohá ɛ́ɛ́ gɛ ŋ́.” 8Anɔ́ɔ Óndú ā lɛ uwá pahīla ga ɛga dóódu kú ɛcɛ ā, anɔ́ɔ igelī nēé yɔ̄ ī gwó kwú ci á. 9Ohígbū ɛnyā ā, é hī iyē kú abɔ̄ ka Ubábɛlu,#11.9 Iyē nyā okónu Uhíbru wɛ “ɔdōgbájí tɔ̄há” ohígbū kā abɔ́ɔ ā, nɛ̄ Óndú ā je ucē nɛ̄ odúúdú ācɛ yɔ̄ ī ka ā gbájí á.
Ayááyí kú Ussɛ́m
(1 Úklɔ́ 1.24-27)
10Aɛ́nyā ā wɛ ayááyí kú Ussɛ́m á. Iháyí ɛpa igbīhi kú éŋkpɔ̄ nōo kpó ɛcɛ ā, eko nɛ̄ Ussɛ́m wɛ iháyí ofɛhɔ̄ ā, ó le ɔyí éyi, nōó hī ka Ápākssadi ma. 11Igbīhi ɛ̄nyā ā, ó lā iháyí úlā ce ofɛhɔ̄ ɔhá kpɔ́. Ó klla le ayí ɔhá dúú.
12Eko nɛ̄ Ápākssadi wɛ iháyí ofu ce igwɛ́ɛhɔ̄ ā, ó le ɔyí éyi, nōo hī ka Ussɛ́la ma. 13Igbīhi ɛ̄nyā ā, ó lā iháyí úlā ce ɛtá ɔhá kpɔ́. Ó klla Le ayí ɔhá dúú.
14Eko nɛ̄ Ussɛlá wɛ iháyí ofuciigwó ā, ó lɛ ɔyí éyi, nōó hī ka Ɛ́ba ma. 15Igbīhi ɛ̄nyā, ó lā iháyí úlā ce ɛtá ɔhá kpɔ́. Ó klla le ayí ɔhá dúú. 16Eko nɛ Éba wɛ iháyí ofu ce igwɛ́ɛnɛ ā, ó le ɔyí éyi, nōó hī ka Upɛ́lɛ̄gi ma. 17Igbīhi ɛ̄nyā, ó lā iháyí úlā ce ofuciigwó. Ó klla le ayí ɔhá dúú.
18Eko nɛ̄ Upɛ́lɛ̄gi wɛ iháyí ofuciigwó ā, ó le ɔyí éyi nōo hī ka Uréyu ma. 19Igbīhi ɛ̄nyā ā, ó lā iháyí ofigwó ce ahāanɛ ɔhá kpɔ́. Ó klla le ayí ɔhá dúú.
20Eko nɛ Uréyu wɛ iháyí ofu cigwɛ́ɛpa ā, ó lɛ ɔyí éyi nōó hī ka Usérūgu ma. 21Igbīhi ɛ̄nyā ā, ó lā iháyí ofigwó ce ahāapa ɔhá kpɔ́. Ó klla le ayí ɔhá dúú.
22Eko nɛ Usérūgu wɛ iháyí ofucigwó ā, ó le ɔyí éyi, nōó hī ka Unáhɔ ma. 23Igbīhi ɛ̄nyā ā, ó lā iháyí ofigwó ɔhá kpɔ́. Ó klla le ayí ɔhá dúú.
24Eko nɛ̄ Unáhɔ wɛ iháyí ofu ce ahāanɛ ā, ó le ɔyí éyi nōó hī ka Utéra ma. 25Igbīhi ɛ̄nyā ā, ó klla lā iháyí ofɛhɔ̄ ce igwáahāanɛ. Ó klla le ayí ɔhá dúú.
26Eko nɛ̄ Utéra wɛ iháyí ofɛtá ce igwó ā, ó kwú pīya ádā kú Ébram mɛ́mla Unáhɔ mɛ́mla Uháran.
Ɔ̄kā kú ipɔ́ɔma kú Utéra
27Ɛ̄nyā wɛ ɔ̄kā kú ipɔ́ɔma kú Utéra á. Utéra wɛ ádā kú Ébram mɛ́mla Unáhɔ mɛ́mla Uháran á. Uháran wɛ ádā kú Ulɔ́tu á. 28Uháran gekwú gbɔbū lɛ ádā nū, Utéra, ipú ajɛ nēé ma ɔ́ ā, ipú Ɔ́ɔru, ajɛ kú ācɛ Ucáldii. 29Anɔ́ɔ Ébram mɛ́mla Unáhɔ le anyā lɛ á. Iyē kú ɔnyā kú Ébram wɛ Usárāyi. Iyē kú ɔnyā kú Unáhɔ kē wɛ Umílka, ɔyínɔ̄nyā kú Uháran, nōo wɛ ádā kú Umílka mɛ́mla Íska āa. 30Usárāyi wɛ ɔdɔma, í kē mɔyí ŋ́.
31Utéra kwú Ébram, ɔyí nū mɛ́mla Ulɔ́tu, ɔyí kú Uháran, ɔyí nū, mɛ́mla Usárāyi, ɔnyā ɔyí nū, ú. Anɔ́ɔ é nyɛ̄ɛ̄ tɔ̄há ŋmá Ɔ́ɔru kú ācɛ Ucáldii, kéē ga ajɛ kú Ukénan á. Amáŋ eko néē gā Uháran ā, é má lā abɔ́ɔ. 32Utéra wɛ iháyí ofigwó ce ɛhɔ̄, anɔ́ɔ ó gekwú ajɛ kú Uháran á.
ទើបបានជ្រើសរើសហើយ៖
OHÚTU 11: IFBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល