JUAN 1
1
Palabra eytsa rurakashqa
1Qallananchow Palabra karqan, i Palabranam Dyoswan karqan, i Palabraqa Dyosmi karqan. 2Keymi qallananchow Dyoswan karqan. 3Llapan imeykakunapis peypam rurashqa karqan, i mana peywanqa rurakashqapita manam imapis rurakashqatsu. 4Peychowmi kawey karqan, i kaweynam nunakunapa aktsin karqan. 5Aktsiqa ampikunachowmi atsikyan, i ampikuna manam pwediyashqatsu peywan.
6Juk nunam karqan Dyos kachamushqan, jutinnam karqan Juan. 7Peymi shamorqan willakiypa, aktsipaq willakunampaq, peypa llapan kreyikuyanampaq. 8Manam peytsu aktsi karqan, sinowqa aktsipaq willakoqmi. 9Taqey rasonpa aktsi, llapan nunata aktseq, key munduman shamiykarqan. 10Munduchowmi karqan, i munduqa peypam rurashqa karqan; peru mundunam reqerqantsu. 11Kikinpamanmi shamurqan i kikimpa kaqkuna chaskiyarqantsu. 12Llapan chaskeqninkunataqa, i peypa jutinman kreyeqkunataqa, qoshqam podernin Dyospa tsurinkuna kayánanpaq; 13peykunaqa manam yuriyashqa yawarpitatsu, ni eytsapa muneynimpatsu, ni ollqu muneynimpatsu, sinowqa Dyospitam.
14I taqey Palabra eytsa rurakarqan, i yacharqan noqantsikchow (i gloryanta rikarqantsik, Teytapa japallan tsurimpa gloryantanow), juntashqa grasyapa i rasonpa kaqwan. 15Juan willakorqan peypaq, i qayakorqan nishpa: “Keymi key noqa peypaq nenqá: Noqapa qepá shamoqqa, noqapa puntámi, noqapita punta kaqmi.” 16Llapan keyninpitam tsarintsik llapantsik, grasyawan grasyata. 17Leyqa Moysespam qoshqa karqan, peru grasyaqa i rasonpa kaqqa shayámorqan Jesukristupam. 18Dyostaqa manam pí rikashqatsu imeypis; japallan Tsurim, Teytapa rurinchow keykaqmi, peymi reqitsikushqa.
Juan Bawtistapa willakiynin
19Keymi key Juanpa willakiynin, judyukuna kachayarqan Jerusalenpita saserdotikunata i lebitakunata tapuyanampaq: —¿Pitaq qam kanki?
20Willakorqanmi, i negarqantsu, sinowqa nerqanmi: —Manam noqatsu ká Kristu.
21I tapuriyarqan: —¿Imanowtaq key? ¿Eliasku kanki qam?
Nerqan: —Manam noqatsu.
—¿Profetaku kanki?
I yaskerqan: —Manam.
22Niyarqannam: —¿Pitaq kanki? kachayamaqnikunata willayanápaq. ¿Imataq ninki kikikipeq?
23Nerqan: Noqaqa ká chusyaqchow juk qayakoqpa bosninmi: “Derechayey Señorpa náninta,” profeta Isaias nenqannow.
24I kachasqa kaqkuna farisewkunapitam kayarqan. 25Tapuyarqan i niyarqan: —Mana Kristu, ni Elias, ni profeta keykar, ¿imanirtaq bawtisanki?
26Juannam yaskerqan nirnin: —Noqa bawtisá yakuwanmi; mas qamkunapa chowpikikunachowmi keykan, peytam qamkuna reqiyankitsu. 27Peymi key qepáta shamoq, noqapita mas uneykaq, peypa llanqinpa watunllatapis paskeyta manam merisitsu.
28Key kosaskunam susederqan Betábarachow, Jordanpa wak tsimpanchow, tseychowmi Juan bawtiseykarqan.
Juan Bawtista willakun Jesuspaq
29Waránin junaqnam Juan rikarqan Jesús peyman shamoqta i nerqan: —¡Kaq keymi key, Dyospa Achkasnin, mundupa jutsan jorqoq! 30Keymi key peypaq noqa nenqá: “Noqapa qepátam shamun juk ollqu, keymi noqapita uneykaq, peyqa noqapa puntámi karqan.” 31Noqa manam reqerqátsu; peru masqa Israyelman rikakashqa kanampaqmi, keypaqmi noqa shamorqá yakuwan bawtisarnin.
32Juan willakorqanmi nishpa: —Espiritutam rikarqá syelupita palumanow urámoqta, i peychowmi karqan. 33I noqa manam reqerqátsu; yakuchow bawtisaq kachamaqniymi nimarqan: “Pipa jananmanmi Espiritu urámoqta rikanki i peychow kaqta peymi Espiritu Santuwan bawtisaqqa.” 34I noqam rikarqá i willakorqómi pey Dyospa Tsurin kanqanta.
Puntakaq disípulukuna
35Tsey waráninmi yapey keykarqan Juan ishkaq disípulunkunawan. 36I Jesusta tseypa purikaqta rikárirnam, nerqan: —¡Kaq keymi Dyospa Achkasnin!
37Wiyariyarqan parlaqta ishkan disípulukuna i Jesusta qatiyarqan. 38I Jesús tumeykurnam, qatiyashqanta rikárir, nerqan: ¿Imatataq ashiyanki?
Peykunanam niyarqan: “Rabi, (Keymi ninan Mayestru), ¿meychowtaq yachanki?”
39Nerqanmi: —Shayámi i rikáyey.
Eywayarqan i rikáyarqan meychow yachanqanta, i peywan keydakuyarqan tsey junaq, chunka óranowna kaptin.
40Andres, Simon Pedrupa wawqin, ishkampita juknin, wiyayashqa karqan Juanta, i Jesusta qatiyarqan. 41Peynam puntata tarerqan, wawqin Simonta, i nerqan: —Tariyarqó Mesiyastam (Key ninanmi, Kristu).
42I Jesusman apamorqan. Rikeykurnam Jesús, nerqan: —Qammi Simon kanki, Jonaspa tsurin, qampa jutikim kanqa Sefas (key ninanmi, Pedru).
43Waránin junaq Jesús eyweyta munarqan Galileyata, i tarerqan Felipita i nerqan: —Qatimey.
44Felipe karqan Betsaydapita, Andrespa i Pedrupa markanpita. 45Felipina tarirerqan Natanaelta, i nerqan: —Tariyarqó Moyses leychow peypaq qellqashqanta i tseynow profetakunapis: Nasaretpita, Josépa tsurin, Jesusta.
46Natanaelnam nerqan: —¿Nasaretpita ima alliqa yarqunmantsuraq?
Felipinam nerqan: —Shamiy i rikey.
47Jesús Natanaelta peyman witeqta rikeykurnam, peypaq nerqan: —¡Kaq keymi rasonpa Israyelitaqa, peychow manam ulikiy kantsu!
48Natanaelnam nerqan: —¿Meypitataq reqimanki?
Jesús yaskirnin nerqan: —Manaraq Felipe qayashuptikim igus yura chakinchow keykaptiki rikarqaq.
49Natanaelnam yaskirnin nerqan: —Rabi, ¡qamqa Dyospa Tsurinmi kanki! ¡Qammi Israyelpa Reynin kanki!
50Jesusnam yaskirnin nerqan: —¿Igus yura chakinchowmi rikarqoq nipteqku kreyinki? ¡Keykunapita mas jatun kosaskunatam rikanki!
51I nerqan: —Tseqeypa tseqeypam niyaq: Kananpita witseypam rikáyanki syelu kichareykaqta, i Dyospa angelninkunata Nunapa Tsurinman witsaqta i uraqta.
ទើបបានជ្រើសរើសហើយ៖
JUAN 1: QUEAN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Quechua Ancash New Testament © Peruvian Bible Society, 1992.
