Matio 7
7
Aka kitci tipaskonekok kiwitc iriniwawok
(Natawapata kaie Luc 6.37-38,41-42)
1“Akawir awik tipaskonakw, nama tca kaie kirawaw ki ka tipaskonikowaw Kice Manito. 2Ki ka meka tipaskonikowaw kotc kaie kirawaw e ici tipaskonikeiekw. Kotc ke ici tipahamekw e tipaskonekw kiwitc iriniwaw, ekoni ke ici tipahamatakw kaie kirawaw Kice Manito.#7.2 Peikon kata ki ici nisitotakon: Akawir awik tipaskonakw. Nama tca kaie kirawaw ki ka tipaskonikowinawaw. Ki ka meka tipaskonikowinawaw, kotc kaie kirawaw e ici tipaskonikeiekw. Kotc ke ici tipahamekw e tipaskonekw kiwitc iriniwaw, ekoni ke ici tipahamakoiekw. 3Kekwan wetci kanawapatamowotc mirikosiriw e pisinitc kiwitcican, aka tca wawatc e wapamatc napakitokw kickicikok e tatc? 4Tan ke ki itatc kiwitcican: ‘Pakitinici kitci maninaman anihe mirikosi ka pisiniin,’ kir tca napakitokw e tatc kickicikok? 5Kir ka miro iriniwikasoin, pitama manini anahwe napakitokw kickicikok ka tatc. Ki ka tca miro wapaten kitci ki maninamowotc kiwitcican aniheriw mirikosiriw ockicikok.”
6“Aka mirakok atimok kekociciriw ka kitcitwaweritakonik. Kwecwan meka kata pe kiweparihowok, kirawaw tca kitci makomitakok. Aka iciwepinamowakok kokocak kimikisimiwawa ka misakitakosiritci. Kecpin meka itotiskeiekwe, otcitakotc kata tatokoskatewok.”
Nataweritamokw! Nantowapatamokw! Papawohikekw ickwatemik!
(Natawapata kaie Luc 11.9-13)
7“Nataweritamokw kekocic. Ki ka tca mirikowinawaw. Nantowapatamokw. Ki ka miskenawaw. Papawohamokw ickwatem. Ki ka cenamakowinawaw. 8Anahwe meka ka nataweritak kekociciriw, pe otitiko. Anahwe ka nantowapatak, miskam. Anahwe ka papawohak ickwatemiriw, cenamowakaniwiw. 9Atita ota e taciekw tariw okosiwawa. Kecpin tca kikosis nataweritamaske pakwecikana kitci mowatc, nitowatc ia ki ka miraw asiniwa? 10Kecpin tca nataweritamaske namesa kitci mowatc, nitowatc ia ki ka miraw kinepikwa? 11Kirawaw ata e matci iriniwiekw, peikon ki kiskeritenawaw kitci mirekok miro kekociciriw kinitcaniciwawok. Wir tca Kotawiwaw icpimik ka taciketc wawatc kirawe mictahi kackitaw kitci miratc miro kekociciriw anahweriw ka nataweritamakotc.”
12“Miro totawakok kiwitc iriniwawok, tapickotc e ici nataweritamekw kitci miro totakoiekw. Ekoni meka mia e ici kiskinohamakaniwonik otirakonikewiniwaw Moïse kaie ka ki pe nikan tipatcimotcik.”
Ickwatem ka cakwacik
(Natawapata kaie Luc 13.24)
13“Tarasak nicino ickwatem ke ki pitakaniwok, pimatisiwinik itekera. Ekoci pitakekw anihe ickwatem ka cakwacik! Arakackaw meka anihe kotak ickwatem, kirika wetan meskanaw ka iticimok ke ici onicininaniwok. Mictahi kaie mitcetiwok ka pitaketcik neta. 14Aric anihe ickwatem ka ici pitakaniwok pimatisiwinik#7.14 anihe ickwatem ka ici pitakaniwok pimatisiwinik: Pot wi itemakanotake: Kice Manito Okimawinik. cakwacin. Ariman kaie anihe meskanaw ka iticimok pimatisiwinik. Nama mitcetiwok ka miskakik.”
E wapamakaniwitc awik e itatisitc, ekoni e otci kiskerimakaniwitc
(Natawapata kaie Luc 6.43-44)
15“Ekwamictowakok iriniwok ka itekasotcik ‘ni nikan tipatcimonan Kice Manito otci,’ aka aric tapwe e itotisketcik. Ki pe natawapamikowawok mia maritcenicak e icinakohitisotcik, aric atamik iteritakosiwok mia mahikanak ka micta matcitwatcik. 16Aric ki nisitowinawawok tapwe e icinakositcik, osam e wapatamwekw otitatisiwiniwaw. Nama meka otinakaniwiw cwemin minesikacik. Peikon kaie mictikw ka kawositc nama nitawikihew wapimina. 17E mirokitc wapiminatikw, nitawikihew ka mirosiritci wapimina. Aric e maratisitc wapiminatikw, nitawikihew ka maratisiritci wapimina. 18E mirokitc wapiminatikw, nama kata ki nitawikihew ka maratisiritci wapimina. Peikon kaie e maratisitc wapiminatikw, nama kata ki nitawikihew ka mirosiritci wapimina. 19Tato wapiminatikw aka ka nitawikihatc e mirosiritci wapimina kata kickikohwakaniwiw kitci motcictewepinakaniwitc. 20E itotisketcik tca aniki iriniwok ka itekasotcik ‘ni nikan tipatcimonan Kice Manito otci,’ ki ka otci kiskerimawawok.”
E itaniwok acitc e itotiskaniwok
(Natawapata kaie Luc 13.25-27)
21“Tawok ke pakoserimitcik kitci itetcik: ‘Teperitcikein, Teperitcikein!’ Nama aric kaskina nta e tacitcik kata pitakewok neta Kice Manito Okimawinik, tepirak aniki ka itotisketcik e ici iteritamiritci Notawiwa, wakwek ka tacikeritci. 22Nikotin takociparike anihe ke kicikak kitci tipaskonikaniwok, mitcet iriniwok ni ka pe itikok: ‘Teperitcikein, Teperitcikein, ni ki pa nikan tipatcimonan, kiticinikasowin e ki totamak!#7.22 kiticinikasowin e ki totamak: Peikon kata ki ici nisitotakon: kiticinikasowin otci. Kaie matci manitowok ni ki orowiticohwananak, kiticinikasowin e ki apatcitaiak! Kirika micta mitcetwaw ni ki mata kackitanan, kiapatc kiticinikasowin e ki totamak!’ 23Aric ni ka witamawawok: ‘Nama wiskat ki ki otci kiskerimitinawaw. Matcakw nta warawik, aka kitci pecowapamiekw, kirawaw ka matci totamekw!’”
Nicw mikiwama
(Natawapata kaie Luc 6.47-49)
24“Ki ka witamatinawaw e icinakositc awik ka natotak kirika ka itotisketc aniheriw ka itewak: mia ni iriniw ka kakitaweritak ka ki manikasotc micta asinik. 25Ki micta kimiwon. Ki riskipotewa sipia, kirika ki micta rotin neta anihe mikiwam ka ici actek. Nama aric ki otci kowactan anihe mikiwam, wewerita e ki manikaniwok neta micta asinik. 26Aric anahwe ka natotak nitarimwewiniw, aka aric e itotisketc ka ki itewak, mia ni iriniw aka ka kakitaweritak, tepirak rekak ka ki maniketc. 27Ki micta kimiwon. Ki riskipotewa sipia, kirika ki micta rotin neta anihe mikiwam ka ici actek. Ki tca kowactan. Tekaci ki oraparin.”
Cecoc otiperitamowin
28Ka ickwa kiskinohamaketc Cecoc, kaskina ki micta mamiskaterimiko e ici kiskinohamakespan anihi iriniwa e mitcetiritci. 29Pitoc meka ici kiskinohamakepan Cecoc kirika aniki ka kiskinohamaketcik aiamihe irakonikewiniw. Mictahi meka ki mackawisimakaniw okiskinohamakewin.
ទើបបានជ្រើសរើសហើយ៖
Matio 7: ATMK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Canadian Bible Society, 2014
