మత్తయి 4
4
యేసుక సయ్‍తాన్‍చి అత్తి పరిచ్చ జలిసి
(మార్కు 1:12-13; లూకా 4:1-13)
1తెదొడి సయ్‍తాన్‍చి అత్తి జోచి పరిచ్చ కెరవనుక దేముడుచి సుద్ది తిలి ఆత్మ, జోక కో నెంజిలి డొంగ్రె కడ నిలన్. 2జలె, దొన్ని విస్సొ పొదులు, దొన్ని విస్సొ అందర్లు యేసు చువ్వె తతికయ్, జోక చూ కెర్తికయ్, 3పాపుమ్ కెరవుక ఉచర సయ్‍తాన్ జోతె జా కెర, “తుయి దేముడుచొ పుత్తుసి జలె, ఈంజేఁవ్ పత్రల్ పోడియొ జతి రితి సంగు” మెలన్. 4తెదొడి యేసు,
“‘ఎక్కి పోడియొ తెన్ నాయ్, గని దేముడుచి చోండి తెంతొ జెతి ఎత్కి కోడు తెన్ మాన్సుల్ జింక అస్సె’
మెన దేముడుచి కోడుతె రెగ్డ అస్సె” మెలన్.
5తెదొడి సయ్‍తాన్ యేసుక దేముడుచి గుడి తిలి యెరూసలేమ్ పట్నుమ్‍తె కడ నా కెర, జా దేముడుచి గుడితెచి వెన్గొపుచి ఉప్పిరి జోక టీఁవొ కెర, 6“తుయి దేముడుచొ పుత్తుసి జలె, ఎట్టొతొ డేఁవు.
‘తుక ప్రమాదుమ్ నే జతి రితి, జోచ దూతల్‍క దేముడు ఆడ్ర దా తెద్రయెదె’,
‘తుచ చట్టొ పత్రె నే లయితి రితి, జేఁవ్ దూతల్ జోవయించ అత్తొ చంపొ కెర, తుక ఉక్కులనుల,’
మెన దేముడుచి కోడుతె రెగ్డ అస్సె” మెన యేసుక సంగిలన్. 7సయ్‍తాన్ దస్సి సంగితికయ్, యేసు జోక
“‘ప్రబు జలొ తుమ్‍చొ దేముడుక
పరిచ్చ కెరుక నాయ్’
మెన అన్నెక్ టాన్‍తె రెగ్డ అస్సె” మెన సయ్‍తాన్‍క సంగిలన్.
8పడ్తొ అన్నె, ఒగ్గర్ డోంక్ తిలి ఏక్ డొంగుర్ ఉప్పిరి సయ్‍తాన్ యేసుక కడ నా కెర, ఈంజ లోకుమ్‍చ రాజిమ్‍లు ఎత్కి, జేఁవ్‍చి విలువ ఎత్కి జోక దెకవ కెర, 9“తుయి సెర్ను సేడ అంక జొకర్లెగిన, ఈంజ ఎత్కి తుక దెయిందె” మెన యేసుక సంగిలన్. 10యేసు జోక, “సయ్‍తాన్, తుయి ఉట్ట గో. కిచ్చొక మెలె,
‘ప్రబు జలొ తుమ్‍చొ దేముడుకయ్ జొకర,
జో ఎక్కిలొచి సేవ తుమ్ కెరుక అస్సె’
మెన రెగ్డ అస్సె.” మెన సంగిలన్. 11తెదొడి సయ్‍తాన్ జోక ముల దా ఉట్ట గెలన్, చి ఈందె దేముడుచ దూతల్ జా కెర, యేసుక సావ్రెచన కెర, సుక్కుమ్ కెర్ల.
యేసు గలిలయ ప్రాంతుమ్‍తె బస జలిసి
(మార్కు 1:14-15; లూకా 4:14-15)
12ఒత్త తెంతొ ‘బాప్తిసుమ్ దెతొ యోహానుక జేలి కెర జేల్‍తె గల అస్తి’ మెన యేసు సూన కెర, ఉత్తర పక్క గలిలయ ప్రాంతుమ్‍తె బుల ఉట్ట గెచ్చ కెర, 13ఒత్తచి నజరేతు మెలి జో వడ్డిలి గాఁవ్ తెంతొ ముల దా కెర, జెబులూను చి నప్తాలి మెల పూర్గుల్‌చ నవ్వొ దిలి ప్రాంతుమ్‍తెచి సముద్రుమ్‍చి పాసిచి కపెర్నహూమ్ మెంతి పట్నుమ్‍తె ఉట్ట జా జితె తిలస్. 14దేముడుచ కబుర్లు సంగిలొ యెసయా పూర్గుమ్‍చొచి అత్తి జో సంగిలి కోడు ఇసి నెరవెర్సుప జలి.
15“జెబులూను ప్రదేసిమి, నప్తాలి ప్రదేసిమి,
యోర్దాను గాడు ఒత్తల్‍తొ తిలి వెల్లి సముద్రుమ్‍చి పక్క,
పూర్గుమ్ యూదుల్ నెంజిలస జితె తిలి
గలిలయ ప్రాంతుమ్‍తె తిల ప్రెజల్
16అగ్గె అందర్‍బుద్ది తెన్ తిలె కి, అప్పె వెల్లి ఉజిడి దెక అస్తి.
జేఁవ్ పాపుమ్ తెన్ మొర గెల రిత జా తిలె కి,
జోవయింక రాత్ పాయిలి రితి జా,
పరలోకుమ్‍చి ఉజిడి జోవయింక డీస అస్సె”
మెన సంగిలి కోడు.
17జా దీసి తెంతొ, జా ప్రాంతుమ్‍చ ప్రెజల్‍క యేసు బోదన కెర్లిసి కిచ్చొ మెలె, “పరలోకుమ్‍చి రాజిమ్ ఇన్నె పాఁవ జా అస్సె. జాచి రిసొ, తుమ్‍చ పాపల్‍చి రిసొ దుకుమ్ జా, పాపుమ్‍బుద్ది ముల దాస” మెన బోదన కెర్తె తిలొ.
యేసు తొలితొచ సిస్సుల్‍క బుకార్లిసి
(మార్కు 1:16-20; లూకా 5:1-11)
18యేసు జా గలిలయ సముద్రుమ్‍చి గట్టుతె ఇండితె తా, ‘పేతురు’ మెన ఆసిమ్ నావ్ తిలొ సీమోను, చి జోచొ అంద్రెయ మెలొ బావొసి దొగులక దెకిలన్. జేఁవ్ దొగుల సముద్రుమ్‍తె వల గల్తె తిల. జేఁవ్ జాలర్లు. 19జలె, జోవయింక దెక కెర, “జలె, తుమ్ అంచి పట్టి జా, చి మాన్సుల్ అంక నంపజతి రిసొ తుమ్ జోవయింక అంచితె కడ ఆన్‍త జాలర్లు జతి రితి, తుమ్‍క ఆఁవ్ కెరిందె” మెన సంగిలన్. 20ఇసి సంగ బుకార్లి బేగి, జేఁవ్ జోవయించ వలల్ ముల దా కెర, జోచి పట్టి గెచ్చ, జో తెన్ బులుక దెర్ల.
21ఒత్త తెంతొ ఇదిల్ దూరి గెచ్చ, యాకోబుచి యోహాను మెల అన్నె దొగుల అన్నొబావొక యేసు దెక జేఁవ్‍క బుకార్లన్. జేఁవ్ దొగుల జెబెదయి మెలొ అబ్బొసి తెన్ జోవయించి దోనితె వెస తా, జోవయించ వలల్ చెంగిల్ కెర్తె తిల. 22యేసు బుకార్లి బేగి, జోవయించొ అబ్బొస్‍క చి దోనిక ముల దా కెర, జోచ సిస్సుల్ జతి రితి జోచి పట్టి గెల.
యేసు మాన్సుల్‍క చెంగిల్ కెర్లిసి
23యేసు జా ఒండి గలిలయ ప్రాంతుమ్‍తె బుల బుల, యూదుల్‍చ ఒత్తచ సబ గెరలె గెచ్చ గెచ్చ, “పరలోకుమ్‍చి రాజిమ్ ఇత్తల్ పాఁవ జా అస్సె” మెన సుబుమ్ కబుర్ సంగ, ప్రెజల్‍క, కిచ్చొ జబ్బు తిలె కి, జబ్బులు బాదల్ ఎత్కి గెచ్చయ్‍లన్. 24ఒండి సిరియ దేసిమ్‍చ ఎత్కిజిన్ జోచి రిసొ సూన్ల, చి రగరగాల్‍చ జబ్బుల్ తిలసక, జొర్జొల్ నొప్పుల్ తిలసక, బూతల్ దెర్లసక, మోర్చల్‍క, చి అత్తొ చట్టొ కదుల్ కెరుక నెతిర్లసక, ఇసచ ఎత్కిక యేసుతె కడ ఆన్‍తికయ్, జోవయింక చెంగిల్ కెర్లన్. 25ఈంజ ఎత్కిచి రిసొ, గలిలయ ప్రాంతుమ్ తెంతొ, దెకపొలి ప్రాంతుమ్ తెంతొ, యెరూసలేమ్ పట్నుమ్ తెంతొ, యూదయ ప్రదేసిమ్ తెంతొ, పడ్తొక యోర్దాను గాడు ఒత్తల్‍తొ తెంతొ, ఒగ్గర్‍జిన్ మాన్సుల్ జట్లు తెన్ జోచి పట్టి గెల.
ទើបបានជ្រើសរើសហើយ៖
మత్తయి 4: KEY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
