SAN MARCOS 3
3
Enxet ekyame xama apmek
(Mt 12.9-14; Lc 6.6-11)
1Aptaxnegwokmek axta makham Jesús tegma apchakneykekxexa axta énxet'ák judíos; xama énxet ekyame apmek axta aphak ma'a. 2Apkeláneyha axta Jesús xa énxet'ák nak, apkeltamhok axta étagkohok etakmelchesók Jesús xama énxet ekhem nellókasamakxa nelyampé, keñe keytek yakwánxa etnehek esexnenak Jesús. 3Aptahak axta apcháneya Jesús énxet ekyame apmek se'e:
—Etnamha, etnegwom xa neyseksa nak.
4Keñe axta aptaha apkelmaxneyeyncha'a Jesús énxet'ák se'e:
—¿Yaksak aksok kélhayo anlának ekhem nellókasamakxa nelyampé? ¿Aksok ektakmela, aksok ekmaso enxeykel'a? ¿Agwagkasek teyp énxet, agakhek enxeykel'a?
Wánxa agkok, apkelwanmeyágkek axta eyke aksa xa énxet'ák nak. 5Aplókek axta Jesús apkelanawo énxet'ák apchaknákxo axta m'a, kelapwokmek axta anhan hakte axta emokók elya'ásegwomhok xa énxet'ák nak. Keñe axta aptaha apcháneya énxet ekyame apmek se'e:
—Epékes apaktog.
Appékesek axta apaktog xa énxet ekyame apmek nak, takmelákxeyk axta anhan apmek. 6Xama axta apkelántepa énxet'ák fariseos, apkeláneykxek axta apkelpakmeyesma yakwánxa etnehek yakhek Jesús. Axta anhan aptahak apkelxegexma'a m'a apkelyetlo axta wese' Herodes.
Enxet apxámokma neyáwa ekpayhegwayam wátsam ekwányam
7Apmahágkek axta Jesús yetlo apkeltámeséyak neyáwa ekpayhegwayam wátsam, apxámok axta énxet apkelyetlo apkeleñama Galilea. 8Xama axta eklegáxko ektahakxa aksok apkelané Jesús, apxámok axta anhan énxet'ák apkeleñama Judea apteyánegwokmoho, Jerusalén axta anhan apkeleñamak énxet, tén han apkeleñama m'a yókxexma Idumea, axta anhan apkeleñamak ma'a neyp wátsam Jordán ekpayho nak ekteyapmakxa ekhem. Axta anhan apkeleñamak énxet ma'a nepyáwa tegma apwányam Tiro tén han ma'a Sidón. 9Ekeso eñamakxa apmésa axta appeywa Jesús apkeltámeséyak apkeltamho epencheshok elánekxések ekyetno yántakpayhe yakwayam enxoho kaxog, yakwayam enxoho nahan megkólyegók Jesús. 10Hakte apxámok axta énxet apkeltakmelcheseyam, apchahapwokmek axta anhan énxet apkelháxamap apkenmágkaxa Jesús yakwayam enxoho epaknegwomho'.#Mr 4.1; Lc 5.1-3.
11Xama axta apwet'a énxet elántaxno axta apwáxók kelyekhama', apkeltekxeyágkek axta aptapnák xóp apkenmágkaxa. Aptahak axta apkelyennaktésawo apkelpeywa s'e:
—¡Xép apteme Dios Apketche!
12Apyennaktések axta appeywa Jesús apnókásencha'a meltamho kaxének nepyeseksa énxet'ák.
Jesús apkelyéseykha doce apkeltámeséyak
(Mt 10.1-4; Lc 6.12-16)
13Apchánteyk axta Jesús néten egkexe natámen xa, apkelwóneyha axta énxet ekleklamókxa axta apwáxok. Xama axta apchaknákxo m'a, 14apkelyésáha axta doce énxet nepyeseksa xa énxet'ák nak, yakwayam enxoho etnehek apkelxegexma'a, yakwayam enxoho anhan eláphaksek eltennaha amya'a ektakmela. Apkeltemék axta anhan apkelwesey seykha amya'a, 15apmések axta anhan apkelmopwancha'a elántekkesek kelyekhama'. 16Keso doce énxet apkelyéseykha axta Jesús se'e: Simón, apkeltamhomakpo axta anhan Pedro; 17Santiago yetlo apyáxeg axta anhan ma'a apwesey axta Juan, Zebedeo axta apketchek xa, cháxa apkeltéma axta Jesús Boanerges xa (neltéma nak negko'o nempeywa, “Takha' Apketchek”); 18Andrés axta anhan ma'a, Felipe axta anhan, tén han Bartolomé, tén han Mateo, tén han ma'a Tomás, Santiago axta anhan ma'a aptaha axta Alfeo apketche; axta anhan ma'a Tadeo, Simón axta anhan ma'a, kéltéma axta Celote, 19axta anhan ma'a Judas Iscariote, cham'a appelakkasesama axta apkeltémo emakpok Jesús.
Jesús apxénamap eñama ekméso apmopwána kelyekhama'
(Mt 12.22-32; Lc 11.14-23; 12.10)
20Aptaxnegwokmek axta Jesús xama tegma natámen xa, apchaknákxeyk axta makham énxet apxámokma m'a, mopwanchek axta apmoko etwok apto, tén han ma'a apkeltámeséyak. 21Xama axta apkelleg'a amya'a Jesús apnámokkok, apyentawákxeyk axta, hakte apxénákpek axta Jesús aptaha yené.
22Aptahak axta nahan apkelpakmeta énxet'ák apkelxekmóso axta apnámokkok ektémakxa segánamakxa s'e, cham'a apkelwokmo axta apkeleñama Jerusalén: “Beelzebú nak ekméso apmopwána elántekkesek kelyekhama' xa, cham'a ektaha nak kelyekhama' wese' agkok.”#Mt 9.34; 10.25.
23Apkelwóneyha axta Jesús xa énxet'ák nak, keñe axta aptaha apkeltenneyncha'a apyetcháseykekxoho s'e: “¿Háxko katnehek katekkesaxkohok agko' ma'a Satanás? 24Apkexpancháseykpek agkok énxet'ák xama apkelókxa eñama apkelenmexamap, megkawegkók apheykha; 25apkexpancháseykpek agkok nahan énxet apheykha nak xama tegma, megkawegkók apheykha. 26Hawók nahan ektémakxa expancháseyxko enxoho Satanás, kelenmexáxchekxék agkok nahan, megkawegkók ekha; ñohok nahan kamassegwók.
27“Méko kawának kataxnegwók ma'a énxet apyennakte apxagkok nak, keñe nahan kólyementók ma'a aksok apagkok, cham'a megkólpexteta enxoho sekxo'; wánxa aksa kólewának kólyementók aksok apagkok ma'a kélpexteta enxoho sekxo'.
28“Meyakmagkásekxék sat Dios apkeltémakxa énxet'ák, cham'a ekyókxoho ektémakxa nak melya'asáxma, tén han ma'a ekyókxoho ektémakxa nak apkelpeywa ekmaso; 29Wánxa agkok eyakmagkásekxak#Lc 12.10. sat Dios aptémakxa énxet ektaha nak apxéneykha ekmaso Espíritu Santo, megkatnegwomek sat néxa apsexnánémap.”
30Cháxa aptahakxa axta appeywa Jesús xa, hakte apxénákpek axta ekha apwáxok espíritu ekmaso.
Jesús egken, tén han ma'a apkelyáxeg
(Mt 12.46-50; Lc 8.19-21)
31Wokmek axta Jesús egken tén han apkelyáxeg ma'a. Yókxexma axta eyke chaknáha, keltamhok axta aksa kóltennásekxak Jesús. 32Aptahak axta énxet'ák apcháneya Jesús se'e, cham'a apheyncha'a axta xamo':
—Yókxexma chaknágwa'ak apkelyáxeg, tén han ma'a apkelyáxeg apkelennay'a nak, egken xeyk han. Xép apketagkakpok.
33Aptahak axta apchátegmowágko Jesús se'e:
—¿Yaksak ko'o méme, tén han elyáxeg?
34Keñe axta apkelanawo Jesús ma'a énxet'ák apheykha axta aphakxa. Aptahak axta appakmeta s'e:
—Keso ko'o méme s'e, tén han elyáxeg. 35Hakte cham'a ektahakxa enxoho elané Táta apmopmenyého, cha'a aptaha elyáxeg ko'o m'a, tén han elyáxeg kelwán'ák, tén han méme m'a.
ទើបបានជ្រើសរើសហើយ៖
SAN MARCOS 3: LEGN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lengua Sur (Enxet) New Testament © United Bible Societies, 1992.