សាការី 13
13
ប្រជារាស្ត្ររបស់ព្រះត្រូវបានលាងសម្អាត
1នេះជាសេចក្ដីប្រកាសរបស់ព្រះយេហូវ៉ានៃពលបរិវារ៖ “នៅថ្ងៃនោះ នឹងមានប្រភពទឹកមួយបើកឡើងសម្រាប់វង្សត្រកូលដាវីឌ និងពួកអ្នកដែលរស់នៅយេរូសាឡិម ដើម្បីលាងសម្អាតបាប និងភាពស្មោកគ្រោក។ 2នៅថ្ងៃនោះ យើងនឹងកាត់ឈ្មោះរបស់បណ្ដារូបបដិមាករចេញពីទឹកដីនេះ ហើយគេនឹងមិននឹកចាំទៀតឡើយ។ យើងនឹងដកទាំងពួកព្យាការី និងវិញ្ញាណនៃភាពសៅហ្មងចេញពីទឹកដីនេះដែរ។ 3ប្រសិនបើអ្នកណានៅតែព្យាករទៀត ឪពុកម្ដាយរបស់អ្នកនោះដែលបង្កើតអ្នកនោះមក នឹងនិយាយនឹងអ្នកនោះថា: ‘ឯងមិនត្រូវរស់ទៀតទេ ពីព្រោះឯងបាននិយាយមុសាក្នុងព្រះនាមរបស់ព្រះយេហូវ៉ា’។ នោះឪពុកម្ដាយរបស់អ្នកនោះដែលបង្កើតអ្នកនោះមក នឹងចាក់ទម្លុះអ្នកនោះ នៅពេលអ្នកនោះព្យាករ។ 4នៅថ្ងៃនោះ ព្យាការីគ្រប់គ្នានឹងអាម៉ាស់មុខចំពោះនិមិត្តរបស់ខ្លួន ក្នុងកាលដែលពួកគេព្យាករ ហើយពួកគេនឹងមិនពាក់អាវរោមសត្វដើម្បីបោកបញ្ឆោតគេទៀតឡើយ។ 5ផ្ទុយទៅវិញ គេនឹងពោលថា: ‘ខ្ញុំមិនមែនជាព្យាការីទេ ខ្ញុំជាអ្នកធ្វើស្រែចម្ការ ដ្បិតមានមនុស្សបានលក់ខ្ញុំតាំងពីក្មេងមក’។ 6ប្រសិនបើម្នាក់សួរគេថា: ‘តើរបួសទាំងនេះនៅចន្លោះដៃទាំងពីររបស់ឯង ជាអ្វី?’ គេនឹងឆ្លើយថា: ‘ខ្ញុំត្រូវគេវាយនៅផ្ទះមិត្តសម្លាញ់របស់ខ្ញុំ’”។
7នេះជាសេចក្ដីប្រកាសរបស់ព្រះយេហូវ៉ានៃពលបរិវារ៖
“ដាវអើយ ចូរភ្ញាក់ឡើងទាស់នឹងអ្នកគង្វាលរបស់យើង
ហើយទាស់នឹងមនុស្សដែលជាគូកនរបស់យើងចុះ!
ចូរប្រហារអ្នកគង្វាល នោះហ្វូងចៀមនឹងត្រូវបានកម្ចាត់កម្ចាយ!
យើងនឹងបង្វែរដៃរបស់យើងទាស់នឹងចៀមតូចៗវិញ”។
8នេះជាសេចក្ដីប្រកាសរបស់ព្រះយេហូវ៉ា៖
“នៅក្នុងទឹកដីនេះទាំងមូល
ពីរភាគបីនឹងត្រូវបានកាត់ចេញ ហើយដាច់ដង្ហើម
ប៉ុន្តែមួយភាគបីនឹងនៅសល់។
9យើងនឹងនាំមួយភាគបីនោះទៅក្នុងភ្លើង
ហើយបន្សុទ្ធពួកគេដូចជាបន្សុទ្ធប្រាក់
ក៏នឹងសាកពួកគេដូចជាសាកមាសផង។
ពួកគេនឹងស្រែកហៅនាមរបស់យើង
ហើយយើងនឹងឆ្លើយតបនឹងពួកគេ។
យើងនឹងពោលថា: ‘ពួកគេជាប្រជារាស្ត្ររបស់យើង’
ហើយពួកគេនឹងពោលថា: ‘ព្រះយេហូវ៉ាជាព្រះរបស់ខ្ញុំ’”៕
ទើបបានជ្រើសរើសហើយ៖
សាការី 13: GKHB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
GLOBAL KHMER BIBLE©
Copyright © 2023 by Global Bible Initiative