លោកុប្បត្តិ 46
46
យ៉ាកុបចុះទៅអេហ្ស៊ីប
1អ៊ីស្រាអែលក៏ចេញដំណើរជាមួយអ្វីៗទាំងអស់ដែលគាត់មាន ហើយទៅដល់បៀរ-សេបា រួចគាត់ថ្វាយយញ្ញបូជាដល់ព្រះនៃអ៊ីសាកឪពុករបស់គាត់។ 2នៅយប់នោះ ព្រះមានបន្ទូលនឹងអ៊ីស្រាអែលក្នុងនិមិត្តថា៖ “យ៉ាកុប! យ៉ាកុបអើយ!”។
គាត់ទូលថា៖ “មើល៍! ទូលបង្គំនៅទីនេះ”។
3ព្រះអង្គមានបន្ទូលថា៖ “យើងជាព្រះ គឺព្រះនៃឪពុករបស់អ្នក។ កុំខ្លាចនឹងចុះទៅអេហ្ស៊ីបឡើយ ដ្បិតយើងនឹងធ្វើឲ្យអ្នកទៅជាប្រជាជាតិដ៏ធំមួយនៅទីនោះ។ 4យើងនឹងចុះទៅអេហ្ស៊ីបជាមួយអ្នក ហើយយើងក៏នឹងនាំអ្នកឡើងមកវិញជាប្រាកដដែរ។ រីឯដៃរបស់យ៉ូសែបនឹងបិទភ្នែករបស់អ្នក”។
5បន្ទាប់មក យ៉ាកុបក្រោកឡើងចេញពីបៀរ-សេបា ហើយពួកកូនប្រុសរបស់អ៊ីស្រាអែលក៏បញ្ជិះយ៉ាកុបឪពុករបស់ពួកគេ កូនៗរបស់ពួកគេ និងប្រពន្ធរបស់ពួកគេលើរទេះដែលផារ៉ោនបានបញ្ជូនមកដើម្បីឲ្យគាត់ជិះ។ 6ពួកគេក៏យកហ្វូងសត្វរបស់ពួកគេ និងទ្រព្យសម្បត្តិរបស់ពួកគេដែលរកបាននៅដែនដីកាណាន ហើយទៅអេហ្ស៊ីប។ យ៉ាកុប និងពូជពង្សទាំងអស់របស់គាត់ដែលនៅជាមួយគាត់ 7គឺពួកកូនប្រុសរបស់គាត់ ពួកចៅប្រុសរបស់គាត់ដែលនៅជាមួយគាត់ ពួកកូនស្រីរបស់គាត់ និងពួកចៅស្រីរបស់គាត់ ព្រមទាំងពូជពង្សទាំងអស់របស់គាត់ គាត់នាំទៅអេហ្ស៊ីបជាមួយគាត់។
ក្រុមគ្រួសាររបស់យ៉ាកុប
8កូនចៅអ៊ីស្រាអែលដែលទៅអេហ្ស៊ីប គឺយ៉ាកុប និងកូនចៅរបស់គាត់ មានឈ្មោះដូចតទៅ:
រូបេនកូនច្បងរបស់យ៉ាកុប
9ពួកកូនប្រុសរបស់រូបេន មានហាណុក ប៉ាលូវ ហេស្រុន និងកើមី។
10ពួកកូនប្រុសរបស់ស៊ីម្មាន មានយេមូអែល យ៉ាមីន អូហាត់ យ៉ាគិន សូហារ និងសូលដែលជាកូនរបស់ស្ត្រីជនជាតិកាណាន។
11ពួកកូនប្រុសរបស់លេវី មានគើសុន កេហាត់ និងម្រ៉ារី។
12ពួកកូនប្រុសរបស់យូដា មានអ៊ើរ អូណាន់ សេឡា ពេរេស និងសេរ៉ាស ប៉ុន្តែអ៊ើរ និងអូណាន់បានស្លាប់នៅដែនដីកាណាន រីឯពួកកូនប្រុសរបស់ពេរេស មានហេស្រុន និងហាមុល។
13ពួកកូនប្រុសរបស់អ៊ីសាខារ មានថូឡា ពូវ៉ា យ៉ូប និងស៊ីមរ៉ុន។
14ពួកកូនប្រុសរបស់សាប់យូឡូន មានសេរែត អេឡូន និងយ៉ាលាល។
15ទាំងនេះជាកូនចៅរបស់លេអាដែលនាងបានបង្កើតឲ្យយ៉ាកុបនៅប៉ាដាន់-អើរ៉ាម ព្រមទាំងឌីណាកូនស្រីរបស់គាត់ផង។ កូនចៅប្រុសស្រីទាំងអស់របស់គាត់ មាន ៣៣ នាក់។
16ពួកកូនប្រុសរបស់កាដ មានសេផុន ហាក់គី ស៊ូនី អេសបូន អេរី អើរ៉ូត និងអើរេលី។
17ពួកកូនប្រុសរបស់អេស៊ើរ មានយីមណា យីសវ៉ា យីសវី និងបេរា ព្រមទាំងសេរ៉ាប្អូនស្រីរបស់ពួកគេ រីឯពួកកូនប្រុសរបស់បេរា មានហេប៊ើរ និងម៉ាលគាល។
18ទាំងនេះជាកូនចៅរបស់ស៊ីលផាដែលឡាបាន់បានឲ្យនាងទៅលេអាកូនស្រីរបស់គាត់។ កូនចៅដែលនាងបង្កើតឲ្យយ៉ាកុប មាន ១៦ នាក់។
19ពួកកូនប្រុសរបស់រ៉ាជែលប្រពន្ធរបស់យ៉ាកុប មានយ៉ូសែប និងបេនយ៉ាមីន។
20រីឯម៉ាណាសេ និងអេប្រាអិមកើតមកដល់យ៉ូសែបនៅដែនដីអេហ្ស៊ីប គឺអាសណាត់កូនស្រីរបស់ប៉ូទី-ផេរ៉ាបូជាចារ្យនៃក្រុងអូនបានបង្កើតឲ្យគាត់។
21ពួកកូនប្រុសរបស់បេនយ៉ាមីន មានបេឡា បេគើរ អ័សបេល កេរ៉ា ណាម៉ាន់ អេហ៊ី រ៉ុស មូភីម ហ៊ូភីម និងអើឌ។
22ទាំងនេះជាកូនចៅរបស់រ៉ាជែលដែលនាងបានបង្កើតឲ្យយ៉ាកុប មានទាំងអស់ ១៤ នាក់។
23កូនប្រុសរបស់ដាន់ មានហ៊ូស៊ីម។
24ពួកកូនប្រុសរបស់ណែបថាលី មានយ៉ាស៊ាល គូនី យេស៊ើរ និងស៊ីលិម។
25ទាំងនេះជាកូនចៅរបស់ប៊ីលហាដែលឡាបាន់ឲ្យនាងទៅរ៉ាជែលកូនស្រីរបស់គាត់។ កូនចៅដែលនាងបង្កើតឲ្យយ៉ាកុប មានទាំងអស់ ៧ នាក់។
26មនុស្សទាំងអស់ដែលទៅអេហ្ស៊ីបជាមួយយ៉ាកុប ដែលជាពូជពង្សផ្ទាល់របស់គាត់ មានទាំងអស់ ៦៦ នាក់ ដោយមិនរាប់ប្រពន្ធរបស់ពួកកូនប្រុសយ៉ាកុបទេ 27រីឯពួកកូនប្រុសរបស់យ៉ូសែបដែលកើតមកដល់គាត់នៅអេហ្ស៊ីប មាន ២ នាក់។ ដូច្នេះ ចំនួនសរុបនៃមនុស្សពីអ្នកផ្ទះរបស់យ៉ាកុបដែលទៅអេហ្ស៊ីបនោះ មាន ៧០ នាក់។
យ៉ាកុបមកដល់អេហ្ស៊ីប
28យ៉ាកុបចាត់យូដាឲ្យទៅខាងមុខ ទៅឯយ៉ូសែប ដើម្បីនាំមុខគាត់ទៅកូសែន រួចពួកគេក៏ទៅដល់ស្រុកកូសែន។ 29យ៉ូសែបក៏ទឹមរទេះសេះរបស់គាត់ ហើយឡើងទៅជួបអ៊ីស្រាអែលឪពុករបស់គាត់នៅកូសែន។ នៅពេលគាត់បង្ហាញខ្លួនដល់ឪពុក គាត់ក៏កៀកកឪពុក ហើយយំទាំងកៀកកឪពុកយ៉ាងយូរ។
30អ៊ីស្រាអែលនិយាយនឹងយ៉ូសែបថា៖ “ឥឡូវនេះ យើងអាចស្លាប់បានហើយ ពីព្រោះយើងបានឃើញមុខរបស់ឯង ហើយដឹងថាឯងនៅរស់នៅឡើយ”។
31យ៉ូសែបនិយាយនឹងបងប្អូនរបស់គាត់ ព្រមទាំងអ្នកផ្ទះរបស់ឪពុកគាត់ថា៖ “ខ្ញុំនឹងឡើងទៅទូលផារ៉ោនថា: ‘បងប្អូនរបស់ខ្ញុំព្រះបាទ និងអ្នកផ្ទះរបស់ឪពុកខ្ញុំព្រះបាទដែលនៅដែនដីកាណាន បានមកដល់ខ្ញុំព្រះបាទហើយ។ 32អ្នកទាំងនោះជាអ្នកឃ្វាលចៀម ជាអ្នកចិញ្ចឹមហ្វូងសត្វ ហើយពួកគេបាននាំហ្វូងចៀម និងហ្វូងគោរបស់ពួកគេមក ព្រមទាំងអ្វីៗទាំងអស់ដែលពួកគេមានផង’។ 33កាលណាផារ៉ោនកោះហៅអ្នករាល់គ្នា ហើយសួរថា: ‘អ្នករាល់គ្នាមានមុខរបរអ្វី?’ 34អ្នករាល់គ្នាត្រូវឆ្លើយថា: ‘បាវបម្រើរបស់ព្រះករុណាជាអ្នកចិញ្ចឹមហ្វូងសត្វតាំងពីក្មេង រហូតដល់ឥឡូវនេះ គឺទាំងយើងខ្ញុំ និងដូនតារបស់យើងខ្ញុំ’ ដើម្បីឲ្យអ្នករាល់គ្នាបានរស់នៅក្នុងស្រុកកូសែន ដ្បិតអ្នកឃ្វាលចៀមទាំងអស់ជាទីស្អប់ខ្ពើមដល់ជនជាតិអេហ្ស៊ីប”៕
ទើបបានជ្រើសរើសហើយ៖
លោកុប្បត្តិ 46: GKHB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
GLOBAL KHMER BIBLE©
Copyright © 2023 by Global Bible Initiative