Génesis 3
3
Minti' xi tniman Adán ex Eva tyol Dios
1Atzunte lob'aj mastoq jawni twitz kywitz kykyaqil txkup ate' tuj k'ul, aqeju otoq che b'ant tu'n Qman Dios. Xitzun tqanin lob'aj te xu'j kyja':
—¿Maj o tzaj tma'n Dios kyeye tu'n mi'n t-xi kylo'ne twitz tkyaqil tze' kyxol awal lu?. Chi lob'aj.
2Xitzun ttzaq'we'n xu'j te lob'aj kyja':
—B'a'n t-xi qlo'ne kywitz tze' kyxol awal lu, 3atzun ti'j twitz tze' tkub' tuj tmij awal tzaj tma'n Dios kyja': Mi'n txi kylo'ne ex mi'n tz'ok kymako'ne, tu'ntzun mi'n kykyime, chi Dios qeye.
4Xitzun tma'n lob'aj te xu'j kyja':
—Mlay che kyime. 5Porke ojtzqi'n tu'n Dios, ok t-xi kylo'ne twitz tze' lu, kjaqetel kynab'le, che okele ik tza'n te Dios ex k'elel kynik'e ti'j b'a'n ex ti'j mya b'a'n, chi lob'aj.
6Tej ttil xu'j b'a'ntoq tlo'njtz twitz tze', tb'aniltoq ke'yin ex attoq tajb'en tu'n tok tnab'l, eltzun ti'n twitz tze' ex xi tlo'n; ax ikx xi tq'o'n te tchmil. Ax ikx te xi tlo'n. 7Jaqettzun kynab'l ex el kynik' kyi'j minti'toq kyxb'alun toksa'n. B'ajtzun kyslapun qe t-xaq higo te kylanter te txayb'il kye.
8Xi tb'i'n Adán tuk'ix t-xu'jil in b'ettoq Qman Dios t-xol awal tej otoq chewix q'ij te qale. Xitzun kyewan kyib' twitz Qman Dios kyxol tqan awal. 9Oktzun ten Qman Dios txkolte Adán, chi kyja':
—¿Jatum ta'ya?
10Xitzun ttzaq'we'n Adán kyja':
—Ma nb'iye in b'ettoqa t-xol awal ex ma tzaj nxob'ile tu'nju minti' txayb'il weye toksa'n. Tu'ntzun jlu ma txi wewan wib'e twitza, chi Adán.
11Xitzun tma'n Dios te kyja':
—¿Alkye ma q'mante teya tu'nju minti' txayb'il teya toksa'n? ¿Qape ma txi tlo'na twitz tze' o txi nma'ne teya tu'n mi'n txi tlo'na?.
12Xitzun ttzaq'we'n Adán kyja':
—Aju xu'j tzaj tq'o'na te wuk'ile, atzunju saj q'onte twitz tze' weye, ex ma txi nlo'ne.
13Xitzun tma'n Qman Dios te xu'j kyja':
—¿Alkye ma tb'inchaya?
Xitzun tma'n xu'j kyja':
—Aju lob'aj ma sb'unte weye, ex ma txi nlo'ne.
14Xitzun tma'n Qman Dios te lob'aj kyja':
—Tu'nju ma tb'inchaya jlu, o'kx teya kb'el tcastiwoya kyxol kykyaqil alumaj ex kyxol kykyaqil txkup ate' tuj k'ul. Ok tb'eta, kxe'l tjaqu'n tk'u'ja twitz tx'otx', ex quq kxel tlo'na kyuj kykyaqil q'ij ktela twitz tx'otx'. 15Kb'el nq'o'ne q'oj kyxole tuk'il xu'j, ex kyxol tiyjila tuk'il tiyjil xu'j. Aju tiyjil xu'j kb'el pa'n twi'ya tu'n, atzun teya k'okel ttx'a'na t-xe tqan, chi Dios.
16Xitzun tma'n te xu'j kyja':
—K'okel nq'o'ne mas nim ta'w ti'ja ok kyul itz'j tala, ex tuk'il k'ixk'oj che ul itz'j tala. Nim ok tajb'eya tchmila, atzun tchmila kkawil tib'aja, chi Dios.
17Xitzun tma'n te Adán kyja':
—Tu'nju ma txi tnimana tyol t-xu'jila, ex ma txi tlo'na twitz tze' aju xi nma'ne teya: Mi'n txi tlo'na twitz, nchitzune, ja'lotzun kb'el t-sentens tx'otx' tu'n tlaja; tuk'il siktle'n knetel twaya twitz tx'otx' kyuj kykyaqil q'ij ktela twitz. 18Tzul tpoq'sa'n tx'otx' ch'i'x k'ul ex txqantl k'ul kyxol tawala ex kxel tchyo'na itzaj at tuj kojb'il. 19K'elel a' ti'j twi'ya tu'n tknet twaya okxi taj meltz'aja tuj tx'otx', porke ti'j tx'otx' kub' b'incha'na; tquqil tx'otx'a, ex ax tquqil tx'otx' k'okela ok tkyima, chi Dios.
20Eva#3.20 Eva. Tuj yol ebrey atzun in tma'n chwinqlal, ex qa itz' aju in yolin ti'j tuj 2.7. tb'i t-xu'jil Adán ok tq'o'n tu'nju atzun k'okel te kytxu' kykyaqil xjal che ul itz'j. 21Kyi'j kytz'umal alumaj kub' tb'incha'n Qman Dios t-xb'alun Adán tuk'ix te t-xu'jil, oktzun tq'o'n kyi'j. 22Tma Qman Dios kyja':
—Lu ma tz'ok Adán ik tza'n jun qe. Ma tz'el tnik' ti'j b'a'n ex ti'j mya b'a'n. Ja'lotzun, mya yajku txi tnuqpi'n tq'ab' ti'j ju tze' in tq'o'n chwinqlal tu'n t-xi tlo'n twitz, ex jaku tz'anq'in te jumajx, chi Dios.
23Tu'ntzun jlu etz tlajo'n Qman Dios Adán tuj awal Edén tb'i, tu'n tb'aj taq'na'n tx'otx' jatum jatz q'i'n ttx'otx'il. 24Tejtzun tetz tlajo'n, e kub' tq'o'n querubín ttxlaj awal tuj tjawitz q'ij, tuk'ix jun spad in k'anttoq ex in yukchtoq tuj tkyaqil pak', tu'ntzun mi'n kyokx xjal ti'j ju tze' in tq'o'n chwinqlal.
ទើបបានជ្រើសរើសហើយ៖
Génesis 3: MAMNO
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.