MATHAYO 6
6
Kweyana
1Yiesû auga, “Îmenyeereeni rîra bûkûrûtha mantû meega bûtigaakare taka bûkwîbonania kîrî antû. N'ûntû bwarûtha ûgu bûtiona kîewa kuuma kîrî Abaagu ûra arî îgûrû.
2“Wateethia muntû arî na thîîna ûtikaugîîrie kîrî antû ta bûra eebwithia barûthaga *sinagoogiini kana njîraani, kaingo bakaathîîrua n'antû. Na mma ga nkûbwîra kîewa kîao nwa gîku. 3Rîra ûkweyana ûteethio, wana njara yaku ya ûmotho îtikaamenye bûra njara ya ûrîo îkûrûtha, 4kaingo ûteethio bwaku bûtuîka bwa witho, na Abaagu ûra oonaga mantû withooni agakwa kîewa.”
Yiesû aarutana arutwa baake kûromba
(Ruka 11:1-4)
5Yiesû eera arutwa baake, “Bwakara kûromba bûtigaakare ta eebwithia, n'ûntû beendaga kûromba barûngi *masinagoogiini na makomanooni ma njîra kaingo boonwa n'antû. Na mma ga nkûbwîra, kîewa kîao nwa gîku. 6Wenda kûromba thûngîra nyomba winge mûrango ûrombe Abaagu ûra arî îgûrû, ûra atoonagwa na meetho, na n'ûntû we noonaga mantû ma witho agakwa kîewa. 7Bûtikaarîrînge gûtarî bu bûkuuga na maromba maaraaya ta bara batarî Ayaundi, n'ûntû bathûgaanagia maromba ma ntheto inyingî i mo Ngai eegagua. 8Bûtigaakare ta bo n'ûntû wana mbere ya bûromba Abaagu naiyî moobatu meenu. 9Rombagaani ûûgû,
‘Baaba wetû ûra ûrî îgûrû,
riîtwa rîaku rîgongagwe.
10Ûnene bwaku bûûye,
kwenda gwaku kûrûthagwe gûkû nthîgûrû
ta bûra kûrûthagwa îgûrû.
11Tweyage irio bia gûtûgana.
12Tûrekagîre mabîtia meetû
ta bûra tûrekagîra bara batûbîtagîria.
13Ûtikaareke tûthûngîra magerioni,
tûtunyûkagie ûra mûthûûku.
[Ûnene, inya, na mwago
i biaku tene na tene. Aameni.]’#6:13 Mîgambo îno îtirî mabukuuni ma mbere ma Kîîngiriki.
14Weegua bûkaarekagîra bara babûbîtagîria, wana Abaagu ûra arî îgûrû akabûrekagîra. 15Îndî bwarega kûrekera antû babûbîtîria, wana biû Abaagu ûra arî îgûrû atibûrekera.”
Gûtîîrîra kûrîa irio n'ûntû bwa maromba
16Yiesû auga, “Bwatîîrîra kûrîa n'ûntû bwa maromba, bûtikang'onyarie moothiû meenu ta bûra eebwithia barûthaga kaingo boonia antû ibatîîrîrîte kûrîa n'ûntû bwa kûromba Ngai. Na mma ga nkûbwîra kîewa kîao nwa gîku. 17Bwatîîrîra kûrîa n'ûntû bwa maromba thambagaani meetho, bûgaaka ntundu maguta na bûgaicanûra ta wîthîre, 18kaingo bûtoonia antû bwîrekeetie n'ûntû bwa kûromba Ngai. Igûtuîke nwa Abaagu ûra atoonagwa na meetho wenka aiyî. Na n'ûntû n'we oonaga mantû ma witho, akabwaa kîewa.”
Ûtonga bwa mma
(Ruka 12:33-34)
19Yiesû auga, “Bûtikeebaigîre ûtonga bwa gûkû nthîgûrû bwîgwetie bu, n'ûntû ndugunye na nganka nwa ibuînyangie kana bûkaiywa n'amba. 20Îbaigîreeni ûtonga bwa îgûrû bûra bûtaûmba kwînyangua i ndugunye kana nganka, kana mwamba athûngîra aiya. 21Ara ûtonga bwa muntû bûrî noogo nkoro yake îîgagua îrî.”
Werû na mwindu
(Ruka 11:34-36)
22Yiesû auga, “Riitho i ta rîo taa ya mwîrî. Ûkaaya kwîgua gûtarî bu riitho rîaku rîkari, mwîrî waku unthe ûkaamûrîkîrwa i werû. 23Îndî riitho rîaku ûkeegua rîrî ûntû, mwîrî waku unthe ûûyûragwa i mwindu. Î rîo rî, ûkaaya kwîgua werû bûra bûrî ndeni yaku bûtuîkîîte mwindu rî, mwindu ûyu ti ûmûnene mûno!
24“Gûtirî muntû aûmba gûtûmîkîra anene baîrî. Nwa amenire ûmwe eenda ûra ûngî, kana aathîkîîre ûmwe atatîîye ûra ûngî. Bûtiûmba gûtûmîkîra Ngai na bûtûmîkîra ûtonga.”
Tigaani kwîmakîra
(Ruka 12:22-31)
25Yiesû auga, “Ka mbwîreeni, bûtikeemakîre bûkîûragia i mbi bûkaarîa, i mbi bûkaanyua, kana i kû bûkaaruta nguo cia gwîkîra. Anga mwoyo t'uu ûrî gîtûmi nkûrûki ya irio na mwîrî na uu nkûrûki ya nguo? 26Taraithaani nyoni. Cio itiandaga na itikethaga kana ciaiga irio makûmbîîni. Abaagu ûra arî îgûrû n'we acieyaga irio. I biû bûrî gîtûmi nkûrûki ya cio? 27N'ûû wacienu aûmba kwîbongeera ntugû nwa îmwe ya mwoyo wake n'ûntû bwa kwîmakîra?
28“Na i kî îîndî n'ûntû bûkwîmakîra bûkîûragia i kû bûkaaruta nguo? Taraithaani maûa mara maumaga kîthakaani bwone bûra makûrangaga. Mo matirutaga ngûgî kana matuma nguo. 29Na ka mbwîreeni, wana mûnene Soromoni ûra nkuma yake yaiyîkeene mûno, ûthongi bwa nguo ciake bûtigîkinyîîra ûthongi bwa maûa ta mama. 30Biû antû ba wîtîgio bûûkai! Ûkeegua Ngai nakûthongamia nyaki ya kîthaka bûgana ûgu rî, nyaki îkwîgua îrî îmbîthî îmunthî na rûû gûgîkinya îkîgerwa mwankiini rî, î biû akaabûmenyeera bûgana ata? 31Kwoogu bûtikeemakîre bûkîûragia, ‘I mbi tûkaarîa?’ kana, ‘I mbi tûkaanyua?’ kana, ‘I kû tûkaaruta nguo?’ 32Into ta bibu i bio antû ba nthîgûrû bacûaga. Abaagu ûra arî îgûrû naiyî bira bûrî bata na bio. 33Îgûrû rîa mantû monthe cûani ûnene bwa Abaagu ûra arî îgûrû na rûthagaani kwenda gwake, rîru bibu bionthe bûrî bata na bio akabwaa. 34Kwoogu bûtikaamakîre mantû ma rûû. Rûû rûkeemakîra rungwa. Wantugû îrî na mathîîna ma yo ma kûgana.”
ទើបបានជ្រើសរើសហើយ៖
MATHAYO 6: thk
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Bible Translation and Literacy
