Эвел 4
4
Каин ва Авел
1Адам чан хпир Гьавайихъди шулу, хпир гъагъдиъ шулу. Хъа Каин («жвуваз гъадагъур») бабкан шулу, ва хпири кӀуру: «РАББИЙИН кюмекниинди адми гъахьунзуз». 2Хъасин дугъу Каиндин чве Авел хуру. Авел марччар уьрхрур, хъа Каин жилихъ лихрур шулу.
3СацӀиб вахтналан Каинди жилин мейвайикан РАББИЙИЗ багъиш апӀуру. 4Авелира чан лижаъ сифте гъахьи ччиларин жандкарин чагъидарстар паяр хуру. РАББИЙИЗ Авелна дугъу багъиш гъапӀдар кьабул гъахьнийи, 5хъа Каинна дугъу багъиш гъапӀдар кьабул гъахьундайи. Каиндиз яман хъял гъюру, дугъан маш кӀару шулу. 6РАББИЙИ Каиндиз кӀуру:
– Гьаз хъял гъюравуз? Маш гьаз кӀару дапӀнава? 7Эгер уву гьякьлуди апӀури гъашиш, уву кьабул дарапӀди гъузур кӀурана? Эгер уву гьякьлуди апӀури даршиш, яв урчӀарихъ увуз гуннагь ккепӀна. Увухьна дидин яман тямягь хьибди, аммаки уву дидʼин агъавал дапӀну ккунду.
8Каинди чан чве Авелиз кӀуру:
– Гъач гьудучӀвурхьа.
ХутӀлиъ айиган, Каин чан чве Авелиин алархьуру ва думу йикӀуру.
9Хъа РАББИЙИ Каиндихьан гьерхру:
– Яв чве Авел наан аяв?
– Аьгъдарзуз. Узу, йиз чве улиъ уьрхюрайир, вуйинхъа? – жаваб тувру дугъу.
10РАББИЙИ гъапи:
– Фу гъапӀва? Яв чвуччвун ифдин дихну жилиан Узуз гьарай апӀура. 11Гьамусдихъантина уву, яв хиларилантина удубзу яв чвуччвун ифи кьабул гъапӀу жилилан ултӀурккну, балайикк ккахърайир вува. 12Жилихъ лихруган, увуз сарун диди чан кьувват тувидар. Уву, жилилан утӀурккну, хал хътрур хьидива.
13Хъа Каинди РАББИЙИЗ кӀуру:
– Узуз гьадабтӀнайи жаза, узхьан аьгь апӀуз шлубтӀан гизаф ву. 14Магьа, гьамус узу жилилан ултӀурккурава, узу Увуз дярякъди хьиди, утӀурккну, жилиин хал хътрур хьиди узкан, ва узуз алахъу шли вушра узу йивну йикӀиди.
15Хъа РАББИЙИ дугъаз гъапи:
– Ваъ, шли уву, Каин, йивну гъачӀиш, дугълан ургуб ражари хъял алдабгъиди.
РАББИЙИ Каиндик, алахъу сарира думу йивну диликӀуз, лишан апӀуру. 16Хъа Каин РАББИЙИХЬАН гьудучӀвну гъягъюру ва Эдемдихьантина, ригъ гьудубчӀвру терефнаъ, Нод ругариин ерлемиш шулу.
Каиндин наслар
17Каин чан хпирихъди шулу, хпир гъагъдиъ шулу ва Янок кӀуру бай хуру. Думу вахтна дугъу шагьур диврайи, шагьриз чан бай Янокдин ччвур тувру. 18Янокдиз бай – Ирад шулу, Ираддиз бай – Мехиаил шулу, Мехиаилиз Метушаэл шулу. Метушаэлиз бай – Лемек шулу. 19Хъа Лемекди чаз кьюр шив гъадагъуру: сарин ччвур Ада, кьюбпирин ччвур Цилла вуйи. 20Адайиз Явал кӀуру бай шулу. Дугъкан, чпин лижарра хъади, чадрариъ яшамиш шлударин ата-баба гъахьну. 21Дугъан чвуччвун ччвур Ювал вуйи. Думу чюнграриин ва швутӀрамариин мукьмар йивру варидарин аба вуйи. 22Циллайиз Тувалкаин шулу. Дугъкан йифриканна рукькан вари жюрейин алатар апӀрур шулу. Тувалкаиндин чи Наама вуйи. 23Хъа Лемекди чан хпариз кӀуру:
– Ада ва Цилла! Йиз сеснахъ хъебехъай!
Йиз хпар, йиз гафариз иб тувай!
Узуз зиян апӀру адми йивну йикӀидиза.
Узуз гъурд йивру бицӀирра йивну йикӀидиза.
24Эгер Каиндихъанди ургуб ражари артухъ хъял алдабгъуруш,
хъа Лемекдихъанди ургцӀурна ургуб ражари хъял алдабгъиди.
Шит ва Энош
25Адам хъана чан хпирихъди шулу, хпириз Шит кӀуру бай шулу. «Заанури узуз Каинди йивну гъачӀи Авелин ерина жара велед тувунзуз», – бицӀириз ччвур тувруган, кӀуру хпири. 26Шитдизра бай шулу. Дугъу дугъʼин Энош кӀуру ччвур иливуру. Думу вахтнахъанмина РАББИЙИЗ икрам апӀувал ккебгъру.
ទើបបានជ្រើសរើសហើយ៖
Эвел 4: ТабГК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010, 2013, 2016, 2018, 2023