Marku 9
9
Yesu gë, i-hpyaw-i-sam htai law e
1“Nung maw le Ngaw teng teng tai kyaw kaw le, shi ma yap taw e hang ra wam, Karai Kasang e mung-dan gë, wum-aw e je le ra le a myang myang gë, shi e a hwi kaw ra,” ga e.
2Ahkwi hau htang hkyu ni lai jang, Yesu gë, Petru, Yaku, Yawhan pe le wut yu lwi, myang e bum shut yang maw le za shwi daw law e. Hau hkun yang maw e hë ma Yang e i-hpyaw-i-sam htai law le e.
3Yang e me-bu gë, kabrim-kabram dut law lwi, gyai du-baw e, mi-dam htaw ma chi htsau su, aw ngut-kaw-lang, hau myaw wa hpyu shaw waw law joi e a ngut.
4Mawshe e Elia le yang maw jang htaw shit e, yang nik gë, Yesu e dang nyaw lum kaw e.
5Hau hkun Petru Yesu le, “Rabai e, shi gyaw ma ni ra i-nung ma-tu ge taw ra. Shi gyaw ma zum sum lum, Nang e ma-tu ra lum, Mawshe e ma-tu ra lum, Elia e ma-tu ra lum, i-nung sai shang,” ga lwi, tai e.
6Yang maw gyu-nan ni e yan-mai, yang hai tai tu ra le a se law.
7Hau hkun, mut-mau je gyaw law lwi, yang maw le ngawp pyam mu, hau mut-mau mai hte htaw law lwi, tai e gë, “Shi yu gë, Ngaw jit-dap e Nga zaw ngut taw le. Yang dang gyaw ke,” ga e.
8Ahkwi han za lik wu jang, Yesu e yang maw mai gaw-tu aw le le a myang law.
Yesu dum taw ra hkyaw dum tai bi e
9Ahkwi hau bum mai gyaw law le, Hau byu-yang-zaw gë, shi bang jang mai a taw taw a-shi, yang maw myang e le aw le le a hkai kyaw shang ga, Yang yang maw le tai taw be.
10Yang maw jau gë, hau dang le matsing yu lwi, “Shi e bang jang mai dum taw ra ga e gë, hai ga e ngut le li?” ga iwi, shida-da mi lum kaw e.
11Hau hkun yang maw gë, “Elia hë je le bura, ga lwi, mau-sau ka e sara pe hai mu lwi tai ni akaw hta?” ga lwi, Yang le mi kaw e.
12Yang gë, “Ge ge wa Elia hë je le ngut mu, lung-lang le sai yau be. Hau htaw agaw, hau byu-yang-zaw le a-shaw-a-wi myaw myaw wa hkam yu lwi, a-ging e hwi ra, ga lwi, hai mu ka taw kaw e la?”
13“Nung maw le Ngaw tai kyaw le, Elia gë je le be mu lwi, yang e hkyaw ka taw e ra jung za. Yang maw gë, yum-sing e i-mit nau e dawng, yang le kut pyam bakaw,” ga e.
A dat nyaw lwi naw jit e nat le hkat pyam bi e
14Yang maw gë, lagyaw wi jang dum je law le. Yang maw e a wi a-yam ma byu jum maw ni ni mu lwi, mau-sau ka e sara pe yang maw e hë-lum ni e le law myang kaw e.
15Shi-wa byn pe Yang le myang jang, mau-ha byu bum lwi, Yang jang din-e lwi, wang-zan dang mi kaw e.
16Hau hknn Yang gë, “Nung maw hai hkyaw yang maw e mi lum kaw e lu?” ga lwi, yang maw le mi jang.
17Shi-wa hyu pe jang ma ra yu ge, tu lwi, “Sara e, nga zaw Nang jang shut shwi le a-he. A dat nyaw e nat dap ra,
18Hka ma le yang le jup-na jang, hau nat gë, yang le dun-pye pyam lwi, tsu-myup e, zwi-kik-kik lwi, gung-du le a-nywi-a-nyap dut byu e, Hau le hkat pyam bi shang ga, Nang e lagyaw pe le ngaw tai kyaw kaw-lang, yang maw a waw kut kaw,” ga tai e.
19Hau mu lwi, Yesu gë, “Lum e i-mit a baw e i-pyat e, hka nam je shaw Ngaw nung maw e ra-ha ni ni ra lu? Hka myang je shaw Ngaw waw shërang ni ra lu? Yang le Nga jang shut shwi law ke,” ga lwi, tu e.
20Hau hkun yang maw gë, hau zaw-shang le shwi e kaw e. Yang le myang hwi jang, hau nat gë, hau yu le nan nang lwi, yang mi-gung shut leng law le e, tsu-myup htaw u-jang, gawng leng leng ni e.
21Hau mu lwi, Yesu gë, “Hau su dut e hka myang ngut be hta?” ga e. Yang-wa le mi jang, “Yang gë, ti a-shi hkun mai ngut be,” ga e.
22“Yang le waw law hten shaw ga lwi, mi ma ngut-kaw-lang, i-jam ma ngut-kaw-lang, myaw myaw ling yang le du kat kat kut e. Ngut-kaw-lang, Nang waw kut le gë, nga nik le shaw-gyaw lwi, karum bi la,” ga e.
23Yesu gë, “Nang ge ge jing le gë, lum e i-mit baw su gë, hai le waw kut ra ngut le,” ga, yang le tai e.
24Hau hkun-jang, hau zaw-shang yang-wa gë, “Naw lum taw le. Nga lum e a lu e gë, karum bi shi la,” ga lwi, puk tai e.
25Hau shiwa byu pe din zup-mung bum law e le, Yesu myang jang, hau a-joi-a-yung e nat le, “A dat nyaw lwi, naw jit e nat e, Ngaw nang le ping taw le ba! Yang jang mai htaw byu law a! htang hpyang hka nam le hka dum wang law,” ga lwi, tan pyam e.
26Hau hkun nat gë, puk wut law le e, yang le nan nang kat lwi, yang htaw byu law e. Hau zaw shang le shi e su dut byu le e, byu myaw myaw wa, “Yang shi byu be,” ga bum kaw e.
27Yesu jau gë, yang e law le lang taw lwi, yang taw law be.
28Yum hkau shut wang law le, lagyaw pe gë, “Nga maw hau nat le hai yan-mai a waw hkat pyam e la?” ga lwi, ha mi wu kaw e.
29Yang gë, “Shi jung nat gë, a-kyu dung lwi za a ngut le, a waw law htaw ra ngut le,” ga lwi, yang maw tai e.
Yesu shi e mai dum taw law nyaw maw bi e
30Han mai dum htaw law kaw le, Yang maw gë, Galile mung shut hkaw e-law mu lwi, hau hkyaw le Yang aw le a se nang nau.
31“Hka-su-mu-ga-le, hau byu-yang-zaw gë, byu pe law ma ap pyam e hwi lwi, yang maw Yang le sat pyam mu ra, sat pyam hwi yau jang sum ni htang le, Yang dum dwi taw law ra,” ga lwi, Yang e lagyaw wi le nyaw maw kyaw e.
32Yang maw lum, hau dang le a dat gyaw kaw lang, Yang la a wam mi kaw.
Yesu lagyaw pe yang maw yang chang aw yu je kaw le lu?
Ga lwi, tai lum kaw e
33Hau htang yang maw gë, Kaperna-um shut e je kaw e, yum hkau ma lung taw le, Yang yang maw le mi e gë, “Nung maw hkyaw-hka hai tai lum kaw e lu?” ga e.
34Yang maw yu, jit le a ga kaw, hka-su-mu-ga-le, aw yu je kaw le lu? ga lwi, yang maw yang chang tai lum bum kaw e.
35Hau hkun Yang zung lwi, lagyaw ra htse i yu pe le wut yu lwi, yang maw le, “Je kaw nau su, aw ngut kaw lang, lung-lang bang htang ma su e, luug-lang bang e dwi-nang-zaw shang dut shang ga,” ga lwi, tai e.
36Zaw-shang ra yu le wut yu lwi, yang maw e a-gung ma yap taw nang lwi, yang le bun yu u-jang, yang maw le tai e gë,
37“Zaw-shang wi jang ma shi su e zaw-shang ra yu le, Nga ming yan-mai lawm-yu su, aw ngut-kaw-lang, Ngaw le lawm-yu taw le. Ngaw le lawm-yu su le, Ngaw le lawm-yu e a ngut; Ngaw le nang-kat su le she lawm-yu e ngut taw le.”
I-mit-nik-nge bang le nyaw maw bi e
38Hau hkun Yawhan gë, “Sara e, Nang e ming e nat hkat pyam e byu ra yu le nga maw myang be, ngut-kaw-lang yang i-nung jang a chang e yan-mai, yang le hkum pyam be,” ga lwi, tai e.
39Yesu gë, “Yang le hka hkum pyam kaw. Nga e ming e magam a-mu zwi su gë, Nga hkyaw le a ge e dang han za waw tai ra, aw le a ni.
40I-nung le gye su kut a hkum su gë, i-nung le karum su ngut taw le.
41Nung maw le Ngaw teng teng tai kyaw le, Hkristu e ming e nung maw seng ni akaw, ga lwi, i-jam ra hkaw bi su, aw ngut kaw lang, yang e a-hpau-jung-hu ge ge wa gawm ra a ngut.”
Ngarai mung shut a wang ra ma-tu nyaw maw e
42“Ra hkyaw gë, Ngaw le lum e zaw-shang pe jang ma ra yu le ling-hat nang su, aw ngut-kaw-lang, yang e ling-zing ma lwi maw twi lang lwi, nawng ma du kat pyam ra gë, yang e ma-tu je ge taw le.
43Nang e law nang le mit-ling-bat nang le ge, bau le zan-hpit pyam a! law i lum hkum ni le e, ngarai mung ma a-shi-a-shum mi hkyawm wang ra htaw ma, law hten ra, a-sak dwi e shat wang ra ge, je ge taw le.
45Nang e hki nang le mit ling bat nang le gë, hau le zan-hpit pyam a! Hki i hki hkum ni e e, ngarai mung shut hkyaw pyam ra htaw ma, hki hten ra, a-sak dwi e shut wang ra gë, je ge taw le.
47Nang e myaw nang le mit-ling-bat nang le gë, hau le chaw pyam a! Myaw i myaw hkum ni e e, yang maw e ma-tu lu a-shi mu, mi le a-shi-a-shum tawng e,
48Ngarai mung shut hkyaw pyam e hwi ra htaw ma, myaw-ji ra lum za e Karai Kasang e mung-dan shut nang wang ra gë, je ge taw le.
49Hka-su-mu-ga-le, aw ngut-kaw-lang, mi ngu e i-jum e law ngam yu e hwi ra ngut le.
50I-jum gë, ge taw le. Ngut-kaw-lang, i-jum a ngam byu le gë, hai jung e law ngam yu ra lu? Nung maw jang i-jum baw nang ke! Nung maw yang chang, shu-shu-hkau-hkau dut ni ke,” ga tai e.
ទើបបានជ្រើសរើសហើយ៖
Marku 9: ATB1951
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© British and Foreign Bible Society 1951