Matìyò 8
8
Yesò chʉʼ wìʼ a ghə̀ nkwaʼa nə̀ kənsòtə̀ kə
(Mak 1.40-45; Luk 5.12-16)
1A ndìʼ ando Yesò mbwènə̀ shiʼi fa kwi pfen, nòyn viʼi sə jèʼè fà wen a bàm. 2Wù kənsòtə̀ tsen vì ə gwʉ̀ʼtə alwi wen ashɨ Yesò ə gàʼ à wen la, “Wù sətsèn kòŋ wù chʉʼ mo.”
3Yesò nàʼsə̀ kəvu kə wen ə kùmsə̀ wen ə gàʼ la, “Kə diʼ ando wu gàʼà, to fa kwaʼa ghèn.” No a zhʉ̀ kò, kənsòtə̀ a ki mè fà a wen. 4Yesò mù gàʼ à wen la, “Kə wù a mwòm əshə̀ʼtə̀ kənyʉ̀ a kə cho à wìʼ. Alì dyʉ̀ ə dìʼ wen wu à pfem ngə̀ŋ Nyìngòŋ be ku kəku kì a soʼ Mosìs ngàʼa la wìʼ to fa kənsòtə̀, ghə̀ ku kəku ndi viʼi kɨ la wù to li.”
Kətʉ kə vəsugyèʼ kə diʼ byɨmə wen
(Luk 7.1-10)
5A ndiʼ ando Yesò njèʼè dyʉ̀ kwen a ntə̀ʼ Kàbanùm, kətʉ kə vəsugyèʼ və Luma kə tsen kə vì ə sènsə wen gàʼà la ghə̀ gyamtə wen. 6“Bobo, wu shyèʼ mò nyəŋ a ngə̀ŋ mu ghə̀ kwaʼkə li kèn la ghə̀ kiʼi ji ə jèʼè, be zhʉ zaf no nànto.”
7Yesò gàʼ à wen la, “Mà vì əchʉʼ wen.”
8Kətʉ kə vəsugyèʼ kì bwènsə̀ gàʼ la, “Bobo, mà ko kwʉʼ wù kwen à mò a ngə̀ŋ. Alì gàʼa tò gàʼa la wù shyèʼ mò to, a ghə̀ a to. 9Mà gàʼà alə̀ byìʼàndo ma shyèʼè a tyì viʼi be kiʼ, vəsugyèʼ à mò a tyì. Ma gàʼ à ghèn la, ‘Dyʉ̀,’ ghə̀ dyʉ̀ tò dyʉ̀, gàʼ à ghə̀ tsen la, ‘Vi,’ ghə̀ vi tò vi. Ma be gàʼ à wù shyèʼ mò la, ‘Ne alə̀,’ ghə̀ be nè tò nè.”
10Yesò zhʉ kənyʉ̀ kèn ə sə diʼ nə̀ kaynə ə gàʼ à viʼi vyì a və jèʼè fa wen bàm lì la, “Ma gàʼ à ghə̀ŋ nəmwèʼè la, mà ko tɨmə yen wìʼ, a ghə̀ kiʼi nkì byɨmə ghənə, a loʼo Islel. 11Ma gàʼ à ghə̀ŋ la viʼi lu fʉ̀, no və ghoʼo fa təshə tə mbyì tèntə no tə̀ tsèm ə vì ŋwʉʼ a kəshi kə kəzhɨkə a kəshi kə fòyn Nyìngòŋ wenə̀ və Ablaham nə̀ Izìk bènə̀ Jàkob. 12Və lu bòŋsə̀ dzɨ̀m vunə ntuʼ vyì a və diʼ ndiʼ tsu, ə vəwenə fʉ̀ dyʉ̀ a tyì kəbəŋ kəfenəkə a və ne ndì sə̀ʼtə̀, pfiʼ asoŋ vəwenə.” 13Yesò gàʼ alì mù gàʼ à kətʉ kə vəsugyèʼ kì la, “Pfwo dyʉ̀. Və ne nè no ghò yì a wù byɨmə la mà zì mà nè à wù.”
Tò a zhʉ ayì və chʉʼ, wù shyèʼ wen a yì.
Yesò chʉʼ viʼi no və ghoʼo
(Mak 1.29-34; Luk 4.38-41)
14Yesò nə̀ jèʼè dyʉ̀ kwen a ngə̀ŋ Bità ə yen chì Bità ə wùwì nkwaʼa nə̀ fiba ə to. 15Ghə̀ kùmsə̀ kəvu kə wen, wen tsuʼghə ayì mè tò a zhʉ ayì. Ghə̀ lù sə shɨ̀tə fozhɨvə, Yesò zhɨ.
16A nè sə ndiʼ a kəlyɨŋ kə mpfwòmə, və vì nə̀ viʼi à wen no və ghoʼo a və nkiʼi zhwì byɨvə, Yesò gàʼ tò kənyʉ̀ kə mùʼ, zhwì byɨvə a vyì fʉkə, ghə̀ bè chʉʼ viʼi və kwaʼkə və no vətsèm. 17Nyʉ̀ a venə nlyɨ̀ kəshi ndi nyʉ̀ a nshə̀ʼtə̀ Isayà nlù nyòʼ kwʉʼ la, “Ghə̀ chʉʼli təkwaʼa tə vəghəŋ bè mèsə̀ kəzaf kə vəghəŋ fa vəghəŋ tə wen.”
Nkì viʼi a və zì və dzɨ̀mtə̀ Yesò
(Luk 9.57-62)
18Yesò nè yen nòyn viʼi a ghə̀ ndiʼì à wen a mbyɨ̀, mù gàʼ à ndzɨ̀mtə̀sə bàm wen la vəwenə dyaŋ təmə dyʉ̀ a dzen mo tsen yì. 19Sə laʼtə ndìʼsə̀ soʼ tsen vì a Yesò ə toŋtə wen ə gàʼ la, “Ndìʼsə̀, mà a dzɨ̀mtə̀ wù ə dyʉ̀ no fe a wù dyʉ̀.”
20Yesò bwènsə̀ gàʼ à wen la, “Məsòŋnə̀ kiʼi bʉ̀ʼ vəwenə, mənyin kiʼ təlòʼ tə vəwenə, alì kò Wàyn Wìʼ kiʼ kəshi ənyə̀ŋsə kətʉ kə wen tsu əzhʉ̀tə̀.”
21Ndzɨ̀mtə̀ bàm Yesò tsen be vì ə gàʼ à wen la, “Bobo, ghʉsə mà pfwo bvɨ̀mə̀ tìʼ ghom a mbì mi.”
22Yesò gàʼ à wen la, “Vì tò vì ə ghʉsə viʼi və pfʉkə və, vəwenə mbvɨ̀mə̀ viʼi və pfʉkə və.”
Yesò nè fwof toghə bwaʼ
(Mak 4.35-41; Luk 8.22-25)
23Yesò gàʼ alì ə kwen a nkanuʼ, wenə ndzɨ̀mtə̀sə bàm wen mù zìtə̀ sə dyaŋə̀. 24A sə laʼtə, fwof toghə tsen zìtə̀ sə chò, no fàynsə ghə̀ mu zìtə̀ sə nə̀ʼə̀ mu, mə kuʼu kwenə a tyì nkanuʼ, alì mu Yesò sə bʉnə 25Ndzɨ̀mtə̀sə bàm wen mù dyʉ̀ sə zhòmə wen gàʼ à la, “Bobo, lù ə bwòŋsə yès, yès a pfʉkə!”
26Ghə̀ lù ə bèm à vəwenə la, “Ghə̀ŋ fwaynə no ghò alə̀ a? Byɨmə ghə̀ŋə tyetə no ŋàŋ.” Ando ghə̀ ngàʼ alì mù kàyntə̀ nyʉ̀ a fwof yi bènə̀ mu, myì shi chiʼ la kùʼ.
27No ndò sə dìʼ nə̀ kàynə mù sə bèmə la, “Ghèn diʼi nkì wìʼ ko a tè fwof nə̀ mu zhʉ wen lo?”
Yesò chʉʼ viʼi və bò a və nkiʼ zhwì byɨvə
(Mak 5.1-20; Luk 8.26-39)
28A ndiʼ ando vəwenə ndyàŋ lò ə dyʉ̀ zaʼa shə loʼ tsenghə a və ndzàŋ nə̀ Gàdàlin, ə bùmtə̀ wenə viʼi vətsenvə, vəbò mu və fʉ fa mbvɨməsə. Viʼi a venə nkiʼ zhwì byɨvə, mu və ne li vəwenə sə chofə no ŋàŋ be lyomsə viʼi. Nè alì viʼi mù sə tyenə əchò fa ji ayì. 29Vəwenə yen Yesò tò yenə ə zɨmə bèm a wen la, “Wù kəŋ gho fà yès a, Wàyn Nyìngòŋ ghèn? Wù vì ə ku ngəʼ à yès mimbu kətsi kə ngəʼ yès kə kwʉʼ mu?”
30A sə ndiʼ alì, nòyn və ankwʉnyàm tsenghə zhɨ boʼsə a kəshi ayì, no ghoʼo. 31Zhwì byɨvə avyi sensə Yesò gàʼ à la, “Wù dzɨ̀mə̀ shisə̀ yès, wù tɨm yès a tyì və ankwʉnyàm a fàʼà.”
32Yesò gàʼà zhwì byɨ və avyi la, “Ghə̀ŋ dyʉ̀!” No a zhʉ kò və fʉ dyʉ̀ kwen a tyì və ankwʉnyàm vyi və nyɨŋ shiʼi fa wye bàm ayi ə tsoʼkə̀ a mù pfʉkə.
33Viʼi a və ntsɨ̀ŋə̀ və nkʉnyàm a vyi nyɨŋkə ə dyʉ̀ a tyì ntə̀ʼ shə̀ʼtə̀ kənyʉ̀ kì a kə chò no kə tsèm bènə̀ kənyʉ̀ a kə yì chò à viʼi zhwì byɨvə vyi. 34Viʼi mù fʉ fa ntə̀ʼ ayi tò və tsèm ə dyʉ̀ yen Yesò. Ne yenə wen ə sènsə wen la ghə̀ fʉ fa vəwenə a shə loʼ.
ទើបបានជ្រើសរើសហើយ៖
Matìyò 8: bbkDBLnt
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
