Yohane 8
8
1Kweni Yesu wakaruta ku Phiri la maOlive. 2Na mulenjelenje, Yesu wakizaso ku Nyumba ya Chiuta ndipo ŵanthu wose ŵakiza kwa iyo. Ntheura iyo wakakhara pasi na kuŵasambizga. 3Ŵamanyi-marango pamoza na ŵaFarisi ŵakiza na mwanakazi uyo wakakoreka wakuchita uleŵe, ndipo pakumwimika pakati, 4ŵakati kwa Yesu, “Musambizgi, mwanakazi uyu wakoreka pa uleŵe. 5Sono Mozesi wakatilangula mu Dango kuti munthu wa ntheura wakwenera kuti wadinike na mawe. Sono kasi imwe mukuti uli?”#Lev 20.10; Mar 22.22-24 6Ŵakayowoya ichi kuti ŵamuyezge, mwakuti ŵasange chifukwa chakuti ŵamutundure nacho. Kweni Yesu wakakotama na kulemba pasi na munwe wakhe.
7Para ŵakarutilira kumufumba, Yesu wakinuka ndipo wakati kwa iwo, “Rekani uyo wandanangepo ndiyo wadange kumuponya na libwe.” 8Ndipo wakakotamaso na kulemba pasi na munwe wakhe. 9Kweni ŵakati ŵapulika ichi ŵakafumapo yumozayumoza kwamba na ŵararaŵarara. Pa umaliro Yesu wakakhara yekha na mwanakazi uyo wakimilira panthazi pakhe. 10Yesu wakinuka, wakamufumba mwanakazi wakati, “Wa mwanakazi, kasi ŵanthu ŵara ŵali nkhu? Kasi kulije na yumoza wakukupa mrandu?”
11Iyo wakati, “Na yumoza Fumu.”
Ndipo Yesu wakati, “Nanga ndine kuti nkhukupa mrandu chara. Rutanga, ndipo ureke kunangaso.”]
Yesu ndi ungweru wa charu
12 Yesu wakayowoyaso wakati, “Ine ndine ungweru wa charu. Yose uyo wakundirondezga ine kuti wati wendenge mu chisi chara, kweni wati waŵenge na ungweru wa umoyo.”#Mat 5.14; Yoh 9.5
13Sono ŵaFarisi ŵakati kwa iyo, “Sono iwe ukujipanikizgira ukaboni wekha, kweni ukaboni wako ngwa waka.”#Yoh 5.31
14Yesu pakuzgora wakati kwa iwo, “Nanga nkhujipanikizgira ukaboni ndekha, ukaboni wane ngwa unenesko, chifukwa nkhumanya uko ndili kufuma na uko nkhuruta. Kweni imwe mulije kumanya uko nkhafuma na uko nkhuruta. 15Imwe mukweruzga kwakuyana na unthu. Ine kuti nkhweruzga munthu chara. 16Kweni nanga nkhweruzga, keruzgiro kane nkha unenesko chifukwa kuti nkhweruzga ndekha chara, kweni pamoza na Ŵadada awo ŵakandituma. 17Mu marango ghinu muli kulembeka mazgu ghakuti, ‘Para ŵakaboni ŵaŵiri ŵakuzomerezgana pa icho ŵakuyowoya ipo ncha unenesko.’#Mar 19.15 18Ine nkhujipanikizgira ndekha ukaboni ndiposo Ŵadada awo ŵakandituma nawo ŵakundipanikizgira.”
19Ntheura ŵakati kwa iyo, “Kasi Ŵawuso ŵali nkhu?”
Yesu wakaŵazgora wakati, “Ine kuti mukundimanya chara nesi Ŵadada. Mundimanyenge ine mphanyi mwaŵamanya na Ŵadada wuwo.”
20Yesu wakayowoya mazgu agha para wakasambizganga mu Nyumba ya Chiuta, mu chipinda icho ŵakaŵikanga mabokosi gha vyakupereka. Kweni na yumoza wakamukora chara chifukwa nyengo yakhe yikaŵa yindafike.
Uko nkhuya ine imwe kuti mungafikako chara
21 Yesu wakatiso kwa iwo, “Ine nkhuruta, ndipo mwamkundipenja, kweni mwamkufikako chara uko nkhuruta. Ntheura muti mufwenge mu zakwananga zinu.”
22Ntheura ŵaYuda ŵakafumba ŵakati, “Kasi wamkujikoma yekha? Apo wakuti, ‘Uko nkhuruta ine kuti imwe mungizako chara?’ ”
23Yesu wakaŵaphalira wakati, “Imwe muli ŵa pano pasi, ine ndili wa kuchanya. Imwe muli ŵa charu ichi, kweni ine kuti ndili wa charu ichi chara. 24Ndicho chifukwa ndangumuphalirani kuti, muti mufwirenge mu zakwananga zinu. Mufwirenge mu zakwananga zinu, usange mukureka kupulikana kuti ‘Ndine mweneuyo.’ ”
25Ntheura ŵakati kwa iyo, “Iwe ndiwe njani?”
Yesu wakaŵazgora wakati, “Ine ndine mweneuyo nga ndi umo ndangumuphalirani pakudanga. 26Ndili na vinandi vyakuti ndiyowoye na za imwe na kweruzga. Kweni uyo wakandituma ine ngwa kuneneska, ndipo nkhuphara ku charu ivyo iyo wakandiphalira.”
27Ŵanthu ŵara kuti ŵakapulikiska chara kuti Yesu wakayowoyanga vya Ŵawiske. 28Ntheura Yesu wakati, “Para mwatumphuska Mwana wa Munthu, ndipo mwizamkumanya kuti, Ndine mweneuyo. Mwizamkumanya kuti ine nkhuchita kanthu pa ndekha chara, kweni nkhuyowoya ivyo Ŵadada ŵakandisambizga. 29Uyo wakandituma wali pamoza nane. Ndipo walije kundireka ndekha, chifukwa mazuŵa ghose nkhuchita icho chikumukondweska.”
30Apo Yesu wakayowoyanga vyeneivi, ŵanthu ŵanandi ŵakapulikana mwa iyo.
Unenesko uti umuzgorani ŵanangwa
31Ntheura Yesu wakati ku ŵaYuda awo ŵakapulikana mwa iyo, “Usange mukukhalirira mu mazgu ghane, muti muŵenge ŵasambiri ŵane nadi. 32Ntheura muti mumanyenge unenesko, ndipo unenesko uti umuzgorani ŵanangwa.”
33Ŵakamuzgora ŵakati, “Ise tili mphapu ya Abrahamu, ndipo papo kale tindakharepo ŵazga ŵa munthu waliyose. Kasi iwe ukung'anamulachi pakuyowoya kuti, muti muŵenge ŵanangwa?”#Mat 3.9; Luk 3.8
34Yesu wakaŵazgora ŵakati, “Inya, inya nadi, nkhumunenerani kuti yose uyo wakuchita uheni, ndi muzga wa uheni. 35Muzga kuti wakukhalira mu nyumba kwa muyirayira chara, kweni mwana ndiyo wakukhalira kwa muyirayira. 36Ntheura usange Mwana wakumuzgorani ŵanangwa, muti muŵenge ŵanangwa nadi. 37Nkhumanya kuti muli mphapu ya Abrahamu, ndipouli mukukhumba kundikoma, chifukwa kuti mazgu ghane ghalije malo mwa imwe. 38Ine nkhuyowoya ivyo ndaviwona kwa Ŵadada. Kweni imwe mukuchita ivyo mwapulika ku ŵawiskemwe.”
39ŴaYuda ŵakamuzgora Yesu ŵakati, “Abrahamu ndi dada withu.”
Yesu wakaŵaphalira wakati, “Muŵenge ŵana ŵa Abrahamu nadi, mphanyi mukuchita ivyo Abrahamu wakachitanga. 40Kweni sono mukukhumba kundikoma ine, nda munthu ine ndamuphalirani unenesko uwo nkhapulika kwa Chiuta. Abrahamu kuti wakachita ichi chara. 41Imwe mukuchita milimo ya wiskemwe.”
Ŵakamuzgora ŵakati, “Ise kuti tikababika mu uleŵe chara, tili na Dada yumoza pera, ndiyo Chiuta.”
42Yesu wakaŵazgora wakati, “Usange Chiuta waŵenge Wiskemwe nadi, mphanyi mukunditemwa ine, pakuti nkhafuma kwa Chiuta ndipo kuti ndili kwiza ndekha chara, kweni iyo ndiyo wakandituma. 43Chifukwa uli mukupulikiska chara ivyo nkhuyowoya? Nchifukwa chakuti mukumanya kupokerera mazgu ghane chara. 44Imwe wiskemwe ndi Satana, ndipo mukukhumba kuchita makhumbiro gha wiskemwe. Wakaŵa wakukoma ŵanthu kufuma ku mutendeko ndipo kuti unenesko walije nawo na nchito chifukwa mwa iyo mulije unenesko. Para wakuteta, wakuyowoya uto nthwakhe, chifukwa ndi mutesi, ndipo ndi dada wa utesi wose. 45Kweni chifukwa ine nkhuyowoya unenesko, kuti mukupulikana nane chara! 46Kasi ndi njani wa imwe uyo wangandipanikizgira ine kuti nkhuchita uheni? Usange nkhumuphalirani unenesko, chifukwa uli mukureka kupulikana nane? 47Uyo wakufuma kwa Chiuta, wakupulika mazgu gha Chiuta. Imwe muli ŵa Chiuta chara, ndicho chifukwa mukureka kupulika mazgu ghane.”
Yesu wakuyowoya vya Abrahamu
48ŴaYuda ŵakamuzgora Yesu ŵakati, “Kasi tikuneneska chara para tikuti, iwe ndiwe muSamariya, ndipouli na chiŵanda?”
49Yesu wakaŵazgora wakati, Ine ndilije chiŵanda. Ine nkhuŵachindika Ŵadada, kweni imwe mukundiyuyura. 50Kweni ine kuti nkhupenja uchindami wane chara, waliko yumoza pera uyo wakuwupenja ndipo ndiyo waŵenge mweruzgi. 51“Inya, inya nadi nkhumunenerani kuti, yose uyo wakughasunga mazgu ghane, kuti wati wafwenge chara.”
52ŴaYuda ŵakati, “Sono tikumanya nadi kuti uli na chiŵanda! Abrahamu wali kufwa, nchimi nazo zili kufwa, kasi ukuyowoyerachi kuti uyo wakusunga mazgu ghane kuti wati wafwenge chara? 53Kasi ndiwe mukuru kuruska sekuru withu Abrahamu mweneuyo wali kufwa? Ndipo nchimi zili kufwa! Kasi iwe ukujizgora kuŵa njani?”
54Yesu wakaŵazgora wakati, “Usange nkhujichindika ndekha, uchindami wane ngwa waka. Mbadada ndiwo ŵakundichindika awo imwe mukuti ndiwo Chiuta winu. 55Ndipo imwe mundaŵamanye chara, kweni ine nkhuŵamanya. Usange nkhuyowoya kuti ndilije kuŵamanya, ipo ndili mutesi nga ndimwe. Kweni ine nkhuŵamanya, ndipo nkhusunga mazgu ghawo. 56Wiskemwe Abrahamu wakasekerera kuti wawone zuŵa lane. Ndipo wakati waliwona, wakakondwa.”
57ŴaYuda ŵakayowoya nayo ŵakati, “Uchali undafikepo pa virimika 50, ndipo kasi ungayowoya uli kuti uli kumuwona Abrahamu?”
58Yesu wakati kwa iwo, “Inya, inya nadi, nkhumunenerani kuti Abrahamu wandaŵeko, Ndine.”
59Penepapo ŵaYuda ŵara ŵakatora mawe kuti ŵamudine, kweni Yesu wakabisama na kufumamo mu Nyumba ya Chiuta.
ទើបបានជ្រើសរើសហើយ៖
Yohane 8: Tumbuka
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of Malawi
