Matiu 20
20
Toontunna barjouk
1“Kimaan Yennu naan tee kaman nan ŋaadaanɔ nba din nyii sanyapob ni ki loon niib a wun jiib ki bin ko u kpaab nee. 2Ki bi dii li daauk ki u sak a u sa pab li daar paauk a panyent daar; ŋanne ki bi din doo ki saa jak konu. 3La din tan baar kut munnyia yoonba, ki ŋaadaanɔ maŋ fiir saan daak ni, ki saa la siab ki bi see ki ki tuun siari. 4Ki u betib a ‘I do man n kpaab ni kii sai ko, ki n pai linba jaŋ.’ 5Ki bi din doo. La din tan baar kut piik nan munnlee yoonba, ki u bia ŋmat teen nna; ki kut munntaa yoo na, ki u bia ŋmat ki bia teen nna. 6La din tan baar kut muŋŋmu yoonba, ki u bia ŋmat saan ki saa la siab ki bi lakin see, ki u boib a ‘Bee ki i see nna yann damunn ki ki tuun siari?’ 7Ki bi jiin a ‘Sɔɔ ki jiit toonni.’ Ŋanne ki u betib a ‘I mun-ii do man n kpaab na ni kii sai ko.’
8“La din tan bɔnt yoonba, ki ŋaadaanɔ na bet u ŋaatoontunna saakɔɔ a ‘I saa ki saa yiin kpaara maŋ na, ki tan pab. A yaa a pab yoonba, fan piin kii pa binba bo joont ki baar na, ki tan joont binba bo dɔŋ baar na panu.’ 9Ki u toontunna saakɔɔ maŋ piin ki pa binba bo joont ki baar na, panyent-yent. 10Li paak, la din tan baar binba bo baar sanyapob niwa paak na, ki bi dukii mi a bi yar sii yabe, ŋaan ki u pab panyent-yent mun biak. 11Ba din gaar bi likirii gbenn yoonba, ki bi piin ki burin sukii ŋaadaanɔ na, 12ki yeen a ‘Gotir, binba joont ki doo kut muŋŋmu na koo yoo waaminnae, ŋaan ki timm nba ŋanin la fara sanyiɔk niwa, ki yennu faat bonchiann na, ŋaan ki timm nan ŋamm tan lakin gaar payouŋ kuukɔɔ.’
13“Ŋanne ki ŋaadaanɔ na yet bi yenɔ a ‘N yɔɔk, gbiintir, n ki ŋmabaani, kimaan ti bo dii daauko ki a sak panyent daar. 14Li paak, jiin a yar kii saa. Mine loon ki n pa fin nan binba bo joont baar maŋ yomm. 15N ki mɔk yaak a n jii n likirii ki tun ma loon biaŋinba-aa? amii a mɔk funfunn nan ma ki wuun na paakee?’ ”
16Yisa nba din yin barjouk na ki gbenn na poorpoe, ki u ji betib a “Li paak, binba dɔŋ tɔɔnn tan sa jir poor, ki binba joont poor mun bia tan sa dɔŋ tɔɔnn.”
Yisa nba ŋamm pak u kuun po taar munntaa ni
(Mak 10.32-34; Luk 18.31-34)
17Yisa nba din tan doo Jerusalem na, ki u yiin u poorpoweiteeb piik nan bannlee na ki tan bɔr ki beerib a 18“Gotir man, ti doo Jerusaleme na; ki bi tan sa jii min nisaarik Bik ki teen Yennu jiantu yudamm nan sennu wannteeb nuu ni, ki bi sa bu n buut ki yet a n ŋan nan kuume. 19Bi tan sa jiin ki tur binba ki tee Juu teeb a bii fiakin, ki boon kpaasir, ki kpaa tabinin dapunpunn paak ki man kpo, ŋaan ki li daa ŋanntaa daar, n bia sa fiir kuun niwa.”
Jems nan Jɔɔnn naa nba din miar Yisa yudantuk
(Mak 10.35-45)
20Li yoo na ki Sebedee ŋaapoo din jii u waas bannlee Jems nan Jɔɔnn ki baar namm Yisa boor ni, ki tan gbaan u tɔɔnn ni, ŋaan miarɔ sommir po. 21Ki Yisa boiɔ a “A loon bee?”
Ki u jiin a “Turin mɔsonn nan n waas na yenɔ-n tan kar a diitu po, ki lɔɔ na mun-n kar a gaŋ po, yoo nba ki a tan sa di a naan na.”
22Ki Yisa jiin betib a “I ki mi ya mei linba po. I sa fit jii jikpiatir nba ki n yaa n jii nawa-aa?”
Ki bi jiin a “Ti sa fita.”
23Ki Yisa betib a “Tɔn, i set sa jii n jikpiatir nawa; ŋaan n ki mɔk yaak nba sa gann wunba tan sa kar n diitu po amii n niigaŋ po, kimaan n Baa Yennu mɔŋ mɔŋe gann binba tan sa kar li kinkaanii paak.”
24Yisa poorpoweiteleeb na nba din gbat nna maŋ yoonba ki bi wutoa doo bi bannlee maŋ paak. 25Ki Yisa din yiin bi kura ki lakimm u boor ni, ki tan betib a “I mɔŋ mi nan tingbouŋ na ŋaateeb yudamm dont bi mɔŋe; ki nijaana bia dia bi niib nan nunmɔnn nee; 26ŋaan yimm ŋanin, li daa tee nna kaa i sinsuuk ni. Li-i tee ki sɔɔ loon yudant i sinsuuk ni, li ŋan wun kpant tarik kii tuun kii teen i kura. 27Ki li-i bia tee ki sɔɔ loon wun tan gar sinsinni, wun kpant i daabir, 28kaman nan min nisaarik Bik nba tee biaŋinba na, kimaan n ki baar ma niib-n tun turin kaa, ŋaan n baar ma n tun ki tur niibe, ki bia kpo a n te ki niib bonchiann-n la tinnu.”
Yisa nba din nyɔɔnt jɔɔnii bannlee biaŋinba
(Mak 10.46-52; Luk 18.35-43)
29Tɔn, ba din tan nyi Jeriko yoonba ki niburchiauŋ waa Yisa poorpo. 30Ki jɔɔnii bannlee din kar sanjokpiŋ ki gbat a Yisa baat a wun tan gar leŋ. Ki bi piin ki yikin sanpaapowa a “Ti Yomdaanɔ nba tee David yaaboonn, tinimit ninbaauk!”
31Ŋanne ki niburchiauŋ na din tian bi paak a bin ŋmin. Ŋaan ki bi ŋamm yikin sanpaapowa a “David yaaboonn, tinimit ninbaauk.”
32Ki Yisa din set ŋaan yiimm ki tan boib a “I loon ki n tun bee ki turiini?”
33Ki bi jiinɔ a “Ti Yomdaanɔ, ti loon ki a nyɔɔnt ti ninbina nee.”
34Ki ninbaauk din soorɔ, ki u sii sii bi ninbina maŋ, ki li nyɔɔnt nyɔɔnt, ki bi ji din waau ki saa.
ទើបបានជ្រើសរើសហើយ៖
Matiu 20: BIM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
