Matiu 18
18
Ŋmee tee nijaanni?
(Mak 9.33-37; Luk 9.46-48)
1Li yoo na ki u poorpoweiteeb baar u boor ni ki tan boiɔ a “Ŋmee tee saakɔɔ Yennu naan ni?”
2Ki u yiin bik nna ki tan sennɔ bi sinsuuk ni, 3ŋaan betib a “Barmɔniie ki n beeri na, wunba ki lebit u binbeŋ ki li tee kaman nan bik binbeŋ na, u kan kɔɔ Yennu naan ni kaawa. 4Wunba sikint u mɔŋ ki u binbeŋ tee kaman nan bik na binbeŋ na, ŋɔɔe tan sii tee saakɔɔ Yennu naan ni. 5Wunba gaar bik na booru n sann paak, mine ki u gaarin.”
Jinjammii labaar
(Mak 9.42-48; Luk 17.1-2)
6“Waas nba teenin yada na ŋanin, wunba te ki bi yenɔkɔɔ tun toonbiit, bi-i bo-i lann naar li daanɔ turu ni ki tutɔ nann ki lu-u mɔkgbeŋŋir ni gbaa ki wun di nyun, li bo sii sɔ ki turɔ. 7Bonbiir sii be tingbouŋ na teeb nba kpann bi leeb ki bi tuun toonbiit na paak. Jinjammii set sa baar, ŋaan li sii bi ki teen wunba te ki jinjammii baat niib paak.
8“Li-i tee ki a nuu amii a taapauŋ te ki a yaa a tun toonbiit, fan potir ki lu. Li-i tee ki a mɔk nuu yennkɔɔ, amii taapan-yennkɔɔ, ki la manfoor nba kaa gbennu, li chee nan fii mɔk a nii kur nan a taa kur ŋaan Yennu-n tan kɔɔna muu nba kan mi kpeen na ni. 9A ninbinn-i te ki a yaa a tun toonbiit, fan kpakirɔ ki lu. Li-i tee ki a mɔk ninbin-yenn ki la manfoor maŋ, li chee nan fii mɔk ninbina ŋannlee ŋaan Yennu-n tan kɔɔna muu maŋ ni.
Pebotikauk barjouk
(Luk 15.3-7)
10“I mi man ki sɔɔ-n sian waas maŋ ni yenɔkɔɔ; kimaan li tee barmɔniie, bi malakanba nba be sanpaapo na be Yennu tɔɔnn yoo kur. 11Tɔn, min nisaarik Bik baar a n tan tinn binba bote.
12“Ŋaan li-i tee ki nirɔ mɔk pei kobik, ki yenɔkɔɔ tan boti, i dukii nan u sa teen nlee? See ki u nyik pei piinnyia nan bannyia na jɔɔr paak, ŋâan ki wun saan ki saa lon pebotikauk na. 13U lau yoo nba, barmɔniie ki n beeri na, u sii mɔk parpeenn nan mɔnii pebotikauk nba ki u lau na paak, ki gar pei piinnyia nan bannyia nba ki bot na paak. 14Nnee mun ki i Baa Yennu wunba be sanpaapo na ki loon ki waas na ni yenɔkɔɔ-n boti.
Ti leeb biit nyikinchab labaar
15“A naa bik-i tun siar ki biira, fan saan u boor ni yoo nba ki u daa be u kuukɔɔ na, ki pak wannɔ u biit; ki li-i tee ki u bann u biiti, i bia ŋamm teen naa waase na. 16Ŋaan li-i tee ki u ki sak wun gbat turani, fan yiin niyenɔ amii niib bannlee ki pukin a paak ki yin saan u boor ni, a niib bannlee amii banntaa maŋ-n gbat barii maŋ ki teen a siara damm. 17Li-i tee ki u bia ki sak wun gbat ki turibi, fan pak ki wann Yennu niib kura; ki li-i tee ki u bia ki sak nan wun gbat ki tur Yennu niibi, yin ji ŋaan ki u tee kaman nan wunba ki tee Yenweirɔ na, amii lampogaartɔɔ na.
Yisa nba tur u niib yikoo biaŋinba
18“Barmɔniie ki n beeri na, linba ki i tan lor ki yaa a li kɔɔ tingbouŋ na ni, ŋanne mun bia poŋ kɔɔ Yendɔuŋ ni; ki linba ki i bia yaa a li ki kɔɔ, ŋanne mun bia poŋ ki kɔɔ Yendɔuŋ ni.
19“N bia beerie na, yimm ni bannlee-i taan mɔb tingbouŋ na ni ki mei n Baa Yennu wunba be sanpaapo na siar paak, u sa tun ya loon biaŋinba ki turiiwa. 20Kimaan siaminba ki niib bannlee amii banntaa taan lakin n sann ni, leŋe ki n mun bia be bi sinsuuk ni.”
Daabir nba kaa nyikinchab barjouk
21Ŋanne ki Piita baar Yisa boor ni ki tan boiɔ a “N Yomdaanɔ, li-i tee ki n naa bik tumin biit, taar muŋŋae ki n nyik chabɔ? Taar munnlore-ee?”
22Ki Yisa jiin a “Aaii, taar munnlore kuukɔɔ kaa, ŋaan taar piinnlore ki saa jaŋ taar munnlore. 23Li paak, Yennu naan tee kaman nan batsɔɔ nba din tan yiin u ŋaadaaba a wun kan bi pann likirii nee. 24Wa piin kannu yoonba ki bi kɔɔ nan jasɔɔ nna, ki u dia bat na pann pɔŋ tusa tusa bonchiann. 25Ki u kan fit la ki pa; ki bat na tur mɔb a bin kɔi ŋɔɔ nan u ŋaapoo nan u waas, nan wa mɔk linba kura, ki tan pa pann maŋ. 26Ŋanne ki jɔɔ maŋ gbaan bat na tɔɔnn ni nan baruŋ, ŋaan yeen a ‘Bat, n sa pa li kura; lek din sukuru.’ 27Ki ninbaauk soor bat na bonchiann, ki u chabɔ nan pann maŋ, a wuu saa.
28“Jɔɔ maŋ nba ŋanin nyii yoonba ki u chet u daabilɔɔ, ki u mun dia u pann likirii waaminna; ki u soor u turu ni, ki faa birintɔ, ŋaan beerɔ a ‘Pan n pann na mɔtana.’ 29Ki u lɔɔ na mun gbaan u tɔɔnn ni nan baruŋ, ki yeen a ‘Din sukuru, ki n sa paawa.’ 30Ki jɔɔ na ŋanin ji ki sak u lɔɔ na baruŋ na, ŋaan te ki bi jiiu ki kɔɔnɔ dansarik, a see ki u tan pa pann na, wun nyinnɔ. 31Ki u daabileeb na nba la nna yoonba, ki li biir bi para ni bonchiann, ki bi ŋmat ki saa bet bat na linba kur tun maŋ. 32Ki bat na tun a bin yiin jɔɔ maŋ na; ŋaan piin u sukit a ‘Fin bonyoonn na, fa bo barimin na paak, ki n chaba fa dia n pann nba kura. 33Li mun bo ŋan nan fan chab a lɔɔ na ki tinɔ ninbaauk, kaman nan ma bo chab fin biaŋinba na.’ 34Ki bat na wutoor nba doo bonchiann biaŋinba na, ki u jii jɔɔ maŋ ki saan kɔɔnɔ dansarik a wuu be leŋ ki saa tuu daar nba ki u tan sa pa pann na kur.”
35Barjouk na poorpo ki Yisa ji yet a “Li-i tee ki i ki nyikit chabit i leeb nan i para kuri, nnee ki n Baa Yennu wunba be sanpaapo na sa teen yimm mune.”
ទើបបានជ្រើសរើសហើយ៖
Matiu 18: BIM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
