Matiu 14
14
Jɔɔnn wunba din wuur niib Yennu nyunwuru na kpinu labaar
(Mak 6.14-29; Luk 9.7-9)
1Li yoo maŋ ki Galilee batsaakɔɔ Herod din tan gbat Yisa bakitnauŋ toonjaana po, 2ki yet u jiamm a “Jɔɔnn wunba daan wuur niib Yennu nyunwuru na, u fiir kuun nie na, li paak te ki u mɔk paŋ ki tuun bakitnauŋ toonjaana na.” 3-4Ŋaan sɔɔ ki Herod maŋ poŋ kpii Jɔɔnn na.
Biaŋinba ki u daan kpiu na tee nnee: Herod din fat u mɔŋ mɔŋ waarɔ Filip ŋaapoo Herodias ki kɔɔnɔ. Ki Jɔɔnn din tuu beerɔ a “Yennu sennu ki chaba nan fan fat a waarɔ ŋaapoo ki kɔɔni.” Li paak, ki Herod din soor Jɔɔnn ki kɔɔnɔ dansarik, ki baanɔ bant, 5ki loon wun kpiu, ŋaan tiin niib jaŋmaanii, kimaan sɔɔ kura mantik din teen Jɔɔnn yada nan u tee Yennu sɔkiniie.
6Ki Bat Herod maaru jaamm daar tan baar; ki poo maŋ Herodias bonpobik baar ki tan waa siak bi tɔɔnn, ki li maŋ Bat Herod bonchiann. 7Li paak, ki u por mɔpor a u sa tur bonpobik na linba kur ki u sa yet a u loon na kura. 8Ŋanne ki u naa Herodias wannɔ wa sa boi linba po, ki bonpobik maŋ bet Bat Herod a wun pot Jɔɔnn wunba wuur niib Yennu nyunwuru na yur ki kpeen tatilaauk ni ki tan turɔ.
9Linba na din biir bat na par ni hei; ŋaan wa sat dɔŋ por mɔpor saamm na tɔɔnn na, li paak, u ji ki fit yêti; ki u chab a bin saan tun nna, 10ki tun siab a bin saan dansarik ni ki saa pot Jɔɔnn yur na. 11Ki bi saan ki saa pot u yur ki kpeen tatilaauk ni, ki tan tur bonpobik maŋ; ki u mun gaar saan tur u naa. 12Ŋanne ki Jɔɔnn poorpoweiteeb baar ki tan jii u gbanant ki pii; ŋaan ji saan ki saa bet Yisa.
Biaŋinba ki Yisa din dinn jab tusa ŋaŋŋmu
(Mak 6.30-44; Luk 9.10-12; Jɔɔnn 6.1-14)
13Yisa nba gbat Jɔɔnn kpinu po yoonba, ki u fiir leŋ ki kɔɔ burgbetir, ki poot kɔɔ muuk ni. Niburchiauŋ na nba la nna maŋ, ki bi somm taatiŋ ki kokin mɔkir na ki saa chetɔ muuk maŋ ni. 14Yisa nba saa nyii burgbetir ni ki la nibur maŋ na, ki ninbaauk soorɔ bonchiann, ki u te ki binba yiar ki be leŋ na kura paak.
15Yennu nba tan maakit yoonba, ki u poorpoweiteeb baar u boor ni, ki tan yetɔ a “Nna na tee muuk nie, ki yennu mun yaa wun baae; li paak, ŋaant ki niib na-n saan digbanbis nba kpia na ki saa la jeet ki daa.”
16Ŋanne ki u betib a “Bi daa saa. I mɔŋ-n turib jeet ki bin di.”
17Ki bi betɔ a “Boroboro kuna ŋaŋŋmu nan janbis ŋannlee kuukɔɔe be ti boor ni.”
18Ŋanne ki u betib a “Jiin na man ki turin.” 19Ki u bet nibur na a bin lakin kar kar mɔɔt paak; ŋaan jii boroboro kuna ŋaŋŋmu na, nan janbis ŋannlee na, ki gokit u yur sanpaapo, ŋaan tur Yennu niipoouk li paak, ŋaan ŋmit ŋmit boroboro na ki tur u poorpoweiteeb, ki bi jii tor nibur na. 20Ki bi kur dii gboo ki tenn. Ki u poorpoweiteeb lakin jeet nba tenn na, ki li gbee kpanchubit piik nan ŋannlee. 21Niib nba dii maŋ din tee kaman nan jab tusa ŋaŋŋmu, ŋaan ki poob nan waas kann ki pukin leŋi.
Yisa nba din somm nyun paak biaŋinba
(Mak 6.45-52; Jɔɔnn 6.15-21)
22Li poorpo ki Yisa din te ki u poorpoweiteeb kɔɔ burgbetir na ni ki tɔk nyunpaanu saa u tɔɔnn po pootir, ŋaan ki u biar a wun chab nibur na. 23Wa chab nibur na ki gbenn yoonba ki u doo jɔɔr paak a wun saa miar Yennu. Ki dajouk tan baar ki u bia daa be leŋ u kɔɔ. 24Li yoo ki u poorpoweiteeb ŋanin ji be burgbetir na nie nyun sinsuuk ni, ki bia fɔk nan gbingbann na, ki nyunpana dia ki labimm, kimaan bi din tokii wouŋo.
25Li poorpoe ki Yisa tan nyii jɔɔr na paak ki sik nyunpaanu paak ki somm kojomɔɔk, ki saa bi boor ni. 26U poorpoweiteeb nba tan la ki u somm nyun paak ki baat na, ki jaŋmaanii soorib bonchiann, ki bi yaa a “Gotir man, kpeemɔe!” ŋaan yikin jaŋmaanwuyikinii.
27Li taakpaak ni ki u betib a “Cheen i para man, li tee mine; i daa tiin jaŋmaanii.”
28Ki Piita jiin ki betɔ a “N Yomdaanɔ, li-i set kii tee finie, fan te ki n somm nyun na paak ki cheta.”
29Ki u mun jiin bet Piita a “Baat na.” Ki Piita nyii burgbetir na ni ki sik nyun na paak, ki piin somm che Yisa boor ni. 30Wa la ki wouŋ pir nyunpana ki baat yoonba, ki jaŋmaanii soorɔ, ki u piint kpii li yoo, ŋaan yikin a “N Yomdaanɔ, tinntin!”
31Ki Yisa tant u nuu yiama ki soorɔ, ŋaan boiɔ a “Fin yadakanpɔɔn daanɔ na, bee ki a birisimi?”
32Ba ŋmat saa kɔɔ burgbetir na ni yoonba, ki wouŋ na nyik danu. 33Ki binba din be burgbetir na ni baar ki tan gbaan jiantir Yisa ŋaan yeen a “Barmɔniie, a set tee Yennu Bijae.”
Yisa nba din te ki Genesaret doo baatib paak biaŋinba
(Mak 6.53-56)
34Ba saa baar mɔkgbeŋŋir na pootir yoonba, ki bi nyii doo Genesaret. 35Doo maŋ teeb nba din bann Yisa na paak, ki bi mɔɔnt leŋ maŋ niib kura, ki bi tikir bi baatib kur ki baar namm u boor ni, 36ki tan barimɔ a wun sak ki baatib maŋ-n sii u liatir mɔgbann. Ki binba siir na kura din la laafiawa.
ទើបបានជ្រើសរើសហើយ៖
Matiu 14: BIM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
