Zan 1
1
Kuma kɛra mɔgɔ ye
1Fɔlɔfɔlɔ, sanni diɲɛ ka dan, Kuma tun be yen.
O Kuma nin tun be ni Ala ye,
o Kuma nin tun ye Ala ye.
2A tun be ni Ala ye fɔlɔfɔlɔ.
3Fɛɛn bɛɛ danna ale barika la.
Fɛɛn si te yen min ma dan a barika la.
4Nii tun be sɔrɔ ale barika la.
Ale tun be yeelen bɔ adamadenw ye.
5O yeelen nin bɔra dibi la.
Nga dibi ma sɔn a ma.
6 #
Mat 3.1; Mar 1.4; Luka 3.1-2 Ala ye cɛɛ dɔ ci min tɔgɔ tun ko Zan.
7Ale nana waasa ka kɛ yeelen nin seere ye
k'a koo fɔ mɔgɔw ye
janko u bɛɛ ka la yeelen nin na ale sababu la.
8Ale Zan tun te yeelen nin ye,
nga a nana waasa ka yeelen le koo fɔ.
9O yeelen nin tun ye yeelen yɛrɛ yɛrɛ ye,
min nana diɲɛ na ka kɛnɛ bɔ mɔgɔw bɛɛ ye.
10A tun be diɲɛ na, ale lo ye diɲɛ dan,
nga diɲɛ mɔgɔw bann'a la.
11A nan'a ka siya mɔgɔw fɛ,
a ka siya mɔgɔw bann'a la.
12Nga minw sɔnn'a ma, ka l'a la,
a ye see di olu ma ka kɛ Ala deenw ye.
13O deen nunu ma sɔrɔ adamadenw sago la.
Nga u sɔrɔla Ala ka sebagaya le la.
14O kuma nin kɛra mɔgɔ ye,
ka na sigi n'an ye.
An y'a ka nɔɔrɔ ye,
dencɛ kelen be min sɔrɔ a Faa fɛ.
Ale lo ye tiɲɛtigi ni nɛɛmatigi ye.
15Zan y'a koo fɔ ko:
«Ne tun ye min koo fɔ ko a bena na ne kɔfɛ,
ale lo ye nin ye.
A ka bon ni ne ye,
bari sanni ne ka wolo, ale tun be yen.»
16Anw bɛɛ ye duba caaman sɔrɔ a ka nɛɛma barika la.
17Ala ka sariya sɔrɔla Musa sababu la.
Nga Yezu Krista le nana ni Ala ka nɛɛma,
n'a ka tiɲɛ ye.
18Mɔgɔ si ma deli ka Ala ye abada,
nga a Deen kelenpe,
min fana ye Ala ye,
ale n'a Faa Ala be ɲɔgɔn fɛ,
ale lo nana Ala cogo yira an na.
Zan batizelikɛla ye seereya min kɛ
(Mat 3.1-12; Mar 1.2-8; Luka 3.15-17)
19Zuwifuw tun ye sarakalasebaga dɔw ni Levi kɔmɔgɔ dɔw ci ka bɔ Zeruzalɛmu ka taga Zan sɛgɛrɛ tuma min na, u y'a ɲininga ko: «E ye jɔn ye?» Zan y'u jaabi.#1.19 I be se ka Luka 10.32 filɛ ni min be sɔrɔ a jukɔrɔla la. 20A ma sigasiga, a y'a fɔ ka gwɛ u ye ko: «Ne te Ala ka Mɔgɔ wolomanin ye dɛ.» 21#Sad 18.15,18; Mal 3.23 U y'a ɲininga ko: «O tuma na, e ye jɔn ye? E ye Eli ye wa?» A y'u jaabi ko: «Ne te Eli ye.» U ko: «E ye kiraba nin ye wa?» A ko ayi. 22O tuma na, u y'a fɔ a ye ko: «E ye mɔgɔ min ye, o fɔ an ye, waasa an ka se ka taga o fɔ an cibagaw ye. Ɔnhɔn. O tuma na, e ye jɔn ye?» 23#Eza 40.3 A ye kira Ezayi ka kuma ta k'u jaabi ko: «Mɔgɔ min be pɛrɛnna kongokolon kɔnɔ ko: ‹Aw ka siratilennin labɛn Matigi ye,› » a ko o y'ale Zan ye. 24Ciden nunu tun ye *Fariziɲɛw ye. 25U ye Zan ɲininga tugu ko: «Ni e te Ala ka Mɔgɔ wolomanin nin ye, ni e te Eli ye, walima kiraba, e do be mɔgɔw batize mun na?» 26A y'u jaabi ko: «Ne kɔni be mɔgɔw batize jii la. Nga mɔgɔ dɔ b'aw cɛma, aw t'ale lɔn, 27ale be na ne kɔ, ne ka dɔgɔ k'a ka sanbara juru foni.» 28O koo nunu bɛɛ kɛra Betani faan fɛ Zurudɛn baji kɔfɛ, Zan tun be mɔgɔw batizera yɔrɔ min na.
Yezu, Ala ka Sagaden
29O dugusagwɛ, Zan ye Yezu natɔ ye a fɛ, a y'a fɔ ko: «Ala ka Sagaden filɛ min be mɔgɔw ka hakɛw ban. 30N tun be ale lo koo fɔra ko mɔgɔ dɔ bena na ne kɔ min ka bon ni ne ye, bari sanni ne ka wolo, ale tun be yen. 31Ne yɛrɛ tun t'a lɔn, ne nana ka to ka mɔgɔw batize jii la, waasa Isirayɛlidenw k'a lɔn.» 32Zan y'a fɔ tugu ko: «Ne ye Nii Senuman jigitɔ ye a kan ka bɔ sankolo la, i n'a fɔ tuganin, ka to a kan. 33Ne tun t'a lɔn, nga min ye ne ci ka na mɔgɔw batize jii la, ale y'a fɔ n ye ko ni ne ye Nii Senuman jigitɔ ye ka sigi min kan, k'o tigi lo bena mɔgɔw batize ni Nii Senuman ye. 34Ne y'o ye, o la ne ko ale lo ye Ala Deen ye.»
Kalanden fɔlɔw
35O dugusagwɛ, Zan tun b'o yɔrɔ kelen nin na, n'a ka kalandenw mɔgɔ fila ye. 36A ye Yezu tɛmɛtɔ ye, a y'a fɔ ko: «Ala ka Sagaden filɛ nin ye.» 37A ka kalanden fila nunu y'o mɛn minkɛ, u tugura Yezu kɔ. 38Yezu y'a ɲaa yɛlɛma k'u ye a kɔ, a y'u ɲininga ko: «Aw be mun le ɲinina?» U y'a jaabi ko: «Arabi, e ka yɔrɔ be min?» (Arabi kɔrɔ ko karamɔgɔ.) 39A ko: «Aw ye na, aw ben'a ye.» U tagara n'a ye k'a ka yɔrɔ ye. Wuladafɛ tun lo. U tora n'a ye o loon na. 40Mɔgɔ fila minw tun ye Zan ka kuma mɛn ka tugu Yezu kɔ, u kelen tun ye Simɔn Piyɛri dɔgɔcɛ Andere ye. 41A sinna ka taga fɔ a kɔrɔcɛ Simɔn ye ko: «Anw ye Krista ye», o kɔrɔ ko Ala ka Mɔgɔ wolomanin nin. 42U tagara Yezu fɛ. Yezu y'a filɛ furututu k'a fɔ a ye ko: «E ye Zan dencɛ Simɔn ye. An bena i wele ko *Sefasi», girɛkikan na, o ye Piyɛri ye.
43O dugusagwɛ, Yezu y'a ŋaniya ta ko a be taga Galile mara la. A ye Filipu ye, k'a fɔ a ye ko: «Tugu ne kɔ.» 44Filipu ni Andere ani Piyɛri nunu bɛɛ tun ye Bɛtisayidakaw ye. 45Filipu ye Natanayɛli kunbɛn k'a fɔ a ye ko: «Mɔgɔ min koo fɔnin be Musa ka sariya sɛbɛ ni kiraw ka sɛbɛw kɔnɔ, anw y'a ye. Nazarɛtika Yezu lo, Yusufu dencɛ.» 46Natanayɛli ko: «Ka bɔ Nazarɛti? Fɛnɲuman be se ka bɔ Nazarɛti wa?» Filipu y'a jaabi ko: «E ka na sa, e ben'a ye.» 47Yezu ye Natanayɛli natɔ ye a fɛ, a y'a fɔ ko: «Nin ye Isirayɛliden yɛrɛ ye tigitigi. Namaramɔgɔ tɛ.» 48Natanayɛli ko: «I ye ne lɔn min?» Yezu y'a jaabi ko: «Sanni Filipu k'i wele, ne ɲaa tun b'i la torosun kɔrɔ.» 49Natanayɛli y'a jaabi ko: «Karamɔgɔ, i ye Ala Deen ye, i ye Isirayɛli ka masa ye.» 50Yezu ko a ma: «Ne y'a fɔ ko ne y'i ye torosun kɔrɔ minkɛ, o la, i lara ne la kɛ. I bena fɛɛn wɛrɛw ye minw bena tɛmɛ nin kan.» 51#Kod 28.12 Yezu y'a fɔ tugu ko: «Tiɲɛ tiɲɛ na, aw bena sankolo dayɛlɛnin ye ka Ala ka mɛlɛkɛw yɛlɛtɔ n'u jigitɔ ye Mɔgɔ Dencɛ kan.»
ទើបបានជ្រើសរើសហើយ៖
Zan 1: AKKDC08
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
La Bible en Jula © Alliance Biblique du Burkina Faso, 2007.
