Genesis 7
7
CAB. VII
1As dooyrt y Chiarn rish Noah, Tar uss as ooilley dty lught-thie stiagh ’syn arg; son uss ta mee er vakin ynrick kiongoyrt rhym ayns y cheeloghe shoh. 2Jeh dagh baagh glen gowee oo hood shiaght piyryn, yn fyrryn as e woirryn: agh jeh ny beiyn neu-ghlen, daa phiyr, yn fyrryn as e woirryn. 3Jeh eeanlee yn aer myrgeddin shiaght piyryn, fyrryn as bwoirryn; dy reaylley ingan bio er slane eaghtyr y thallooin. 4Son ayns shiaghtin dy hraa ver-yms fliaghey er y thalloo, da-eed laa as da-eed oie: as dagh nhee bio ta mee er chroo, nee’m y stroie veih eaghtyr y thallooin. 5As ren Noah cordail rish ooilley ny va’n Chiarn er harey eh. 6As va Noah shey cheead bleïn dy eash, tra va’n thooilley er y thalloo.
7As hie Noah, as e vec, as e ven, as mraane e vec mârish stiagh ’syn arg; kyndagh rish ushtaghyn y thooilley. 8Jeh ny beiyn glen, as jeh ny beiyn neu-ghlen, as jeh ny eeanlee, as jeh dy chooilley nhee ta snaue er y thalloo, 9Hie stiagh gys Noah ayns yn arg, jees as jees, fyrrynagh as bwoirrynagh; myr va Jee er choyrt currym er Noah. 10As haink eh gy-kione, lurg shiaght laa dy row ushtaghyn y thooilley er y thalloo.
11As ’sy cheyoo cheead vleïn jeh eash Noah, ’sy nah vee, er y chiaghtoo laa yeig jeh’n vee, er y laa cheddin va ooilley undinyn y diunid vooar er nyn mrishey seose, as va uinniagyn yn aer foshlit. 12As gheayrt y fliaghey er y thalloo da-eed laa as da-eed oie. 13Er yn eer laa cheddin hie Noah, as Shem, as Ham, as Japheth, mec Noah, as ben Noah, as three mraane e vec mâroo, stiagh ’syn arg. 14Adsyn, as dagh baagh lurg e cheint, as ooilley’n maase, lurg nyn geint, as dy chooilley nhee ta snaue er y thalloo lurg e cheint, as dy chooilley eean lurg e cheint, dy chooilley ushag jeh dagh horch. 15As hie ad stiagh gys Noah ayns yn arg, jees as jees, jeh dy chooilley eill, ayn ta ennal y vea. 16As adsyn hie stiagh, hie ad stiagh fyrryn as bwoirryn, jeh dy chooilley eill, myr va Jee er n’oardaghey da; as ren y Chiarn eh y yeigh stiagh. 17As va’n thooilley da-eed laa er y thalloo; as ren ny ushtaghyn gatt, as dymmyrk ad seose yn arg, as ve troggit seose erskyn y thalloo. 18As ghow ny ushtaghyn niart, as ren ad thooillaghey dy mooar er y thalloo: as ren yn arg shiaulley er eaghtyr ny ushtaghyn. 19As ghow ny ushtaghyn niart erskyn towse er y thalloo, as va ooilley ny croink ard va fo’n aer er nyn goodaghey. 20Queig cubityn jeig ren ny ushtaghyn lhieeney, as va ny sleityn er nyn goodaghey. 21As hooar dy chooilley chretoor baase ren gleashagh er y thalloo, chammah ny eeanlee, as y maase, as ny beiyn, as dy chooilley nhee ta snaue er y thalloo, as dy chooilley ghooinney. 22Dy chooilley chretoor va bioys ayn, ooilley ny v’er y thalloo chirrym, hooar ad baase. 23As va dy chooilley nhee bio er ny stroie v’er eaghtyr y thallooin, chammah dooinney as baagh, as ny cretooryn snauee, as eeanlee yn aer; as v’ad er nyn stroie veih yn thalloo: as Noah, as adsyn va mârish ’syn arg va ynrycan faagit bio. 24As ren ny ushtaghyn lhieeney er y thalloo shiaght-feed laa as jeih.
ទើបបានជ្រើសរើសហើយ៖
Genesis 7: BIB1819
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© British and Foreign Bible Society 1819, 2019