San Juan 13
13
Ni ndakate Jesús siꞌin tee ka skuaꞌa jin ya
1Te jañini ama ka ja kejaꞌa viko pascua ñayiu judio, te ja ni jini kaji Jesús ja ni kenta kiuu ja xndendoo ya ñuyiu yaꞌa, te noꞌo ya ja ndanitnaꞌa ya jin Tata ya. Te ja siun ni okutoo ya ñayiu maa ya ja ka oi nuu ñuyiu, te vi saa ni kutoo ña ya guaa ndee kiuu sandiꞌi. 2Te nuu ka nukoo ya ja vi kaxini ya, te suni oo Judas Iscariote, seꞌe Simón. Su ja ni kee tachi anu de ja xtuu ña de jin Jesús. 3Te ja jini guaꞌa maa Jesús ja ni jiñaꞌa Tata ya ndiꞌi ja oo yaꞌa nuu ndaꞌa ya, te nuu maa Dios vaji ya, te suni nuu maa ia Dios ndajiokuiin ya noꞌo ya. 4Te nuu ka nukoo ya nuu mesa, ni ndakoo ya, te ni tau ya saꞌun yosoninu niꞌnu ya, te ni chindee ya in toalla xiin chii ya. 5Yun te ni tnaa ya ndute nuu in tijaꞌan, te ni jinkondee ya ni ndakate ya siꞌin tee ka skuaꞌa jin ya, te ni ndasichi ya jin toalla ja yindee xiin chii ya. 6Yun te nuu ni kenta ya ja ndakate ya siꞌin Simón Pedro, te jiñaꞌa Pedro nuu ya:
―Jitoꞌo san, ¿nau ja saa maa ni ndakate siꞌin san? ―jiñaꞌa de.
7Te jiñaꞌa Jesús:
―Ma junkuiꞌnu ini ni ja saꞌa san vitna, su nuu kuee ka, te junkuiꞌnu ini ni ―jiñaꞌa ya.
8Te jiñaꞌa Pedro:
―Ja maa san, chi ma ndakate saꞌun ni siꞌin san.
Te jiñaꞌa Jesús:
―Nuu ja ma ndakate san siꞌin ni, te ma niꞌi taꞌu ni ja koo ni jin san ―jiñaꞌa ya.
9Te jiñaꞌa Simón Pedro:
―Jitoꞌo san, masu maintnoꞌo ni siꞌin san ndakate ni, chi suni ndakate ni ndaꞌa san vi xini san ―jiñaꞌa de.
10Te jiñaꞌa Jesús:
―Tee ja vi inka ni jichi de, tu jiniuꞌu ka ja ndundoo de, maa ni siꞌin de, chi ja oo vii nii de. Te maa ni, chi ja ka oo vii ni, visi masu ndiꞌi ni ―jiñaꞌa ya. 11Chi ni jini ya ndee tee kuu ja xtuu ña jin ya, te yun guaa jiñaꞌa ya: “Masu ndiꞌi ni ka oo vii”.
12Yun te nuu ni kuu ni ndakate ya siꞌi ndiꞌi de, te ni ndakiꞌin ya saꞌun tikani ja yosoninu niꞌnu ya, te ni nukoo ya nuu mesa, te jiñaꞌa ya:
―¿A ni ka junkuiꞌnu ini ni nagua kuu ja ni saꞌa san jin ni? 13Te maa ni chi “Mastru” vi “Jitoꞌo” ka xnani ña ni, te vatuka ka kaꞌan ni, chi suu ndija kuu san. 14Nuu saa te nuu ja maa san kuu Mastru vi Jitoꞌo, te ni ndakate san siꞌin ni, te suni maa ni, kuini ja vi ndakate ni siꞌin in in ni. 15Chi yaꞌa kuu in taniñu ja ni kaxtnoꞌo san, nagua ja suni vi saꞌa ni nagua ni saꞌa maa san. 16Te kaꞌan ndandaa ndija san ja in tee jinokuechi, chi masu kuu kaꞌnu ka de nuu jitoꞌo de. Te ni tee ja ni ka tetniuu ña, masu kuu kaꞌnu ka de nuu tee ni tetniuu ña yun. 17Te nase inu taꞌu nase inu ndetu ni nuu ja ka junkuiꞌnu ini ni tniuu yaꞌa, te vi kosaꞌa ni. 18Te masu kaꞌan san ja jaꞌa ndiꞌi ni, chi ja jini maa san na in ni ndakaji san. Su saa te skunkuu nagua kaꞌan nuu tutu ii:
Tee ka jaa in ni jin san xtaa ni ndakoo de siki san.
Kachi nuu tutu ii.
19’Te vi ndee vitna ja kaꞌan san, ama ka ja nagua kokuu, nagua ja nuu na vi xtuu ña, te vi kandija ña ni ja sein, chi Maa San Kuu. 20Te kaꞌan ndandaa ndija san ja na ñayiu jantaꞌu na in ni tetniuu san, te maa san jantaꞌui, te na in jantaꞌu ña jin maa san, te jantaꞌui ia ni tetniuu ña jin san ―jiñaꞌa ya.
Ja ni kaꞌan Jesús ja xtuu ña Judas jin ya
21Te nuu ni ndiꞌi ni kaꞌan Jesús tnoꞌo yaꞌa, te ni tnaꞌu ndevaꞌa ini ya, te ni kaxtnoꞌo ya, te jiñaꞌa ya:
―Kaꞌan ndandaa ndija san ja in maa ni xtuu ña jin san ―jiñaꞌa ya.
22Yun te ni ka jinkondee tee ka skuaꞌa jin ya ka ndiaꞌa tnaꞌa de, te tu ni ka kutnuni ini de na xiin jaꞌa kaꞌan ya. 23Te in tee ka skuaꞌa jin ya ja kaꞌan too ka ya, nukondee de xiin ya nuu mesa ja ka jaxini de jin ya. 24Te ni saꞌa Simón Pedro seña nuu de ja na kakan tnoꞌo de nuu ya na ndee de kuu ja kaꞌan jin ya. 25Yun te ni jintnaꞌa yatni tee yun ndika Jesús, te ni jikan tnoꞌo ña de:
―¿Ndee tee kuu, vi Jitoꞌo san? ―jiñaꞌa de.
26Te jiñaꞌa Jesús:
―Na xndajin san xtaa triu, te na tee xiin nuu kuñaꞌa san, te suu tee yun kuu ―jiñaꞌa ya.
Te ni xndajin ya xtaa triu yun, te ni jiñaꞌa ya nuu Judas Iscariote, seꞌe Simón. 27Te ni jaa de xtaa triu yun, te ni kee Tachi anu de. Yun te jiñaꞌa Jesús:
―Nagua kuini ni ja saꞌa ni, te saꞌa ñama ni ―jiñaꞌa ya.
28Su vi ni in tee ka jaxini jin ya nuu mesa yun, tu ni ka junkuiꞌnu ini de nau ja siun jiñaꞌa ya nuu de. 29Chi sava de ni ka ndakani ini ja ni kaꞌan Jesús jin Judas ja na kuaan de nagua ka jiniuꞌu ya nuu viko yun, axi kuñaꞌa de joo xuꞌun nuu ñayiu ka kundaꞌu, chi maa de ndiso itni xuꞌun. 30Te vi nuu ni jaa de in yuꞌu xtaa triu yun, te ni kee ni de kuaꞌan de, te ja ni kunee.
Ni tatnuni Jesús in tnoꞌo jaa
31Yun te nuu ni kee Judas kuaꞌan de, te jiñaꞌa Jesús:
―Vitna te xneꞌe Seꞌe Teyii maa ya ja kuu kaꞌnu ya. Te ja jaꞌa maa ya vi kuni ñayiu naxa kuu kaꞌnu ndevaꞌa ia Dios. 32Te nuu ja Seꞌe Teyii xneꞌe ja kuu kaꞌnu ia Dios, te suni ñama xneꞌe ia Dios ja kuu kaꞌnu Seꞌe ya. 33Nunuu ni ka vi koo, vi ilu. Te vi ndanduku ña maa ni, su nagua ja ni kaꞌan san nuu tnaꞌo judio, te yun kaꞌan san nuu maa ni vitna ja ma kuu kiꞌinkuei ni nuu kiꞌin san. 34Te taa san in tnoꞌo jaa ja tatnuni san ja vi kokutoo tnaꞌa in in maa ni. Chi nagua kutoo ña san jin in in ni, te suni saa vi kokutoo tnaꞌa in in maa ni. 35Chi nuu ja ka kutoo tnaꞌa in in maa ni, te yun vi kuni ndiꞌi ñayiu ja ka kuu ni tee ka skuaꞌa jin san ―jiñaꞌa ya.
Ni kaxtnoꞌo Jesús ja ndayuꞌu Pedro ja jini ña de jin ya
36Te jiñaꞌa Simón Pedro:
―¿Ndenu kuu nuu kiꞌin ni, vi Jitoꞌo san?
Te jiñaꞌa Jesús:
―Nuu kiꞌin san, chi ma kuu kondikin ña ni vitna, su nuu kuee ka, te kondikin ña ni jaa ni ―jiñaꞌa ya.
37Te jiñaꞌa Pedro:
―Jitoꞌo san, ¿nau ja ma kuu kondikin ña san vitna? Te oo anu san naxa ni na kokuu, visi na kuu san ja jaꞌa ni ―jiñaꞌa de.
38Te jiñaꞌa Jesús:
―¿A vi ndija ni ja vi oo anu ni ja kuu ni ja jaꞌa san? Kaꞌan ndandaa ndija san ja vi ama ka ja kana liꞌli, te uni jichi ma ndaa yuꞌu ni ja jini ña ni jin san ―jiñaꞌa ya.
ទើបបានជ្រើសរើសហើយ៖
San Juan 13: xtnNTplus
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
