JOHN 11
11
Lazarus Hikur
1 #
Mk 11.1; Lk 10.38. Bethany yultlairei klei Lazarus toubi ung napawa heiwari nakur. Bethany yulthung heiri Mary'le aiyei tei Martha yakhu teinaowei leina yultlai. 2#Jn 12.3; Lk 7.38-39; Mk 14.3. (Mary heiwiri Upawayei hora muiknam shirek fleithutbi teiphaangurbi, heitoubi aiyei lurei shamne Aiyei hoya rutmathaipikur napuiyari; heirou nawurbi klei Lazarus heiri Maryei trah.) 3Yakhu teinaoni Jesu'nung pao shunthungbi: “Upawa, neiyei paluiri nawurbi leiyurame,” toubi thimi heimalhetkur. 4#Jn 9.3. Heirou Jesu'ne pao heiya loumayekbi Ane kyun, “Heinaksi kna heiwine Lazarus hinamakrou; kna heiri Dunpunung aiyei thangya alduiyerna'nungei toume, heitoubi heinaksi kna heirouwei Dunpuei Chanapawane thang'alya phananungei toume.” 5Jesu'ne Martha'le aiyei naowi Mary heirou yai trah Lazarusyakhi malungshi. 6Heiyanungkhi Ane Lazarus'ri nawurame toubi pao loumayekbikhi, tallengne wamakne aiyei leina bi heirou tlaini khnini leiwurkhou. 7Heirouri Ane aiyei ruishik rapnung, “Kane Judeara kallenglakase” toubi kyun. 8#Jn 8.59; 10.31. Heirou ruishik rapne loumallangkur, “Upawa, tlaini khnini-khyumniyei maibongroukhi thimi rapne bi heirou neiya thlungne khinghatnanungei wairaangkur; heine angtukhi nangne bi heirou hanui kallengthurouko?” 9#Jn 9.4; 12.35; Lk 13.33. Heirou Jesu'ne loukyun, “Tlaini khatrou kheen chiple khni klei nimaka? Heiniri huhune nunghang kwaar leiyeinung pocha thimi heine ho karyeinung thikmathuimakrou, ngamri ane tlaipangei kwaar heiya mulei. 10Heiya a heine masanung chawanungri thikmathuirou, ngamri anungei kwaartou heiri mak.” 11#Mk 5.39; Pao 7.60. Jesu'ne heirouwei hanuikhi yenyunthu, “Kaipalui Lazarus heiri iplhakura, heiya Keine wabi aya fyoupirou.” 12Heirou ruishik rapne loukyun, “Heiyanungri, Upawa, a heiri iplhakur hoiyanungri lhangaiya, aiyei kna heiri damlhengrouwa.” 13Jesu'ne Lazarus heiri hiyurame tounei kyun, heiya yai louningkurri aiyei iplhakur heiri nanei ngammei iplhakurme toubine loukhalkur. 14Heingammei Jesu'ne yanungei chimne yunthutpikur, “Lazarusri hiyurame, 15nanung'tlim Keiri nungwailei, heiya naingamrou Keiri akou murilbi pulne leichangmak, heiya hoiyanungkhi kane aiyei leinara wawase, heitoubi nane mubi uklum pharou.” 16#Mt 10.3; Jn 20.24-28. ‘Kanfirwa’ toubikhi ung Thomas'ne aiyei palui ruishik rapnung kyun, “Ka nammane Upawakou kalhonbi wawase, heitoubi akou kalhonbi hirou!”
Jesuri Khirouwei Ringthut Heirou Khring Chaan
17Jesu'ne bi heirou wa'tlungei kaalnungri, Lazarus hiwurbi phaliniyei maibongrou louphummurla. 18Bethanyei yulthung heiri Jerusalem khukarthille tlatkrilri lamtup khni'tomni, 19#Job 2.11. heine Jehudi'rap chungne wabi Martha'le Mary yakhu teinaoya yai trahwa hiwurnei lhawai klahne chapkanrelbi klei heiya wamanelkur. 20Heirou Jesu wa'tlungurame toubi Martha'ne pao loumayekurle tallengne Aya louronanung wathuk, heiya Marywiri cheemwairei wathukmakne louklei. 21Heirou Martha'ne Jesu'nung loushun, “Upawa, nangne bi arou louleiyanungri, keitrahwa heiri hiwurmakrou! 22Heiya Keiyei malungam leilei touri nangne anung'tlim Dunpunung buchapila'nungri asinunghakhi Dunpune loupiroume.” 23“Neitrahwa heiri hanui ringthueiroume,” toubi Jesu'ne anungei loushun. 24#Dan 12.2; Jn 5.28; Pao 24.15. “Keine mulei touri luiniyei tlainirou akhi ringthutheirou,” Martha'ne loumallangkur. 25#Jn 1.4; 5.26. Heirou Jesu'ne anungei shun, “Khirouwei ringthutkur khringei chaanri Keime. Hukhatne Keiya uklummanungri, ane hiwurbikhi, hanui ringthutheirou; 26#Jn 6.47; 8.51. heirou hukhatne Keiya malungambi khringei chaanya phakur thimi heiri hanuirouri kouniroukhi hikhoumarou. Keiyei kyun ari nangne malungam leileiko?” 27#Mt 16.16. “Moi, Upawa, nangri tlaipangra yongpikur Dunpuei Chanapawa Messiahme touri Keine uklumlei,” toubi ane loumallangkur.
Jesu'ne Lazarus'nungtlim Chapkur
28Heirou Martha'ne tlou heiya yunchibi, heirou ane rilla hungchangurbi ainaowi Marya munne hung'ungbi kyun, “Upawari wa'tlungurame, heitoubi neiyakhi Ane ngaiphaleime.” 29Mary'ne kyun heiya mayeknarou, ane khrangni Aya murilnanungei wathukkur. 30(Kheen heirouri Jesu yultlaira wachangmakhui, heiya Martha'ne Upawaya lourorilna bira leileihui.) 31Thimi rapne cheemmaira Maryle kalhonne leibi, aiyei lhawai klahya mathrilnanungei yunmanelpi, heirou ane khnotni wathukkur heiroukhi yane heichanthungkur. Yaneri ai wathukkur heiri lhanbira wabi wachaprou youkurasane toubi ningchathungkur. 32#Jn 11.22. Heirou Mary'ne Jesuei louleina bi heirou wa'tlungkur, heirouri ane Upawaya wamukurle tallengne aiyei hopongra kanellhakbine kyun, “Upawa, Nangne arou louleiyanungri, keiyei trahwa heiri himakrou!” 33Jesu'ne Maryei chapkur heirou akou louklei thimi rapbei chapkur heiya munarouri, Aiyei ukningra kalthi nungwaimakur, 34heirou Ane yanung kngai, “Nane ayari bi kourou phumwurla?” Heirouri yane, “Upawa, ara wathilak,” toubi loushunpirou, 35#Lk 19.41. Jesu chapkur. 36Heirou thimi rapne kyun, “Thilak, Ane Lazarusya kounakei malungshi!” 37#Jn 9.7. Heiya ya thaneri asitoubi kyun, “Aneri mitdeo thimi rapya mit muyerkur nimaka? Heiyanungri koungammei Ane Lazarusyari hiyermakne khouchangmako?”
Lazarusya Ringyerkur
38 #
Mt 27.60; Mk 15.46; Lk 24.2; Jn 20.1. Jesu'ne hanuikhi aiyei lhawai kalthi lahwurbi lhanranung wakur, lhan heiri thlungra utlhakbi lhanpurra thlungpak khatne tinglhing hoinabi pingkhou. 39Heirou Jesu'ne yanung shun, “Thlungpak heiri khaangthutlaka!” Hikurwayei char upawi, Martha'ne loumallang, “Upawa, chul-nammaroume. Aya phumkurri tlaini phalini tlungurame!” 40Heirou Jesu'ne anungei shunkur, “Nangne uklummanungri, Dunpuei thang'alya mupharoume toubi Keine nanung yunkhoupimaka?” 41#Jn 17.1; Mt 11.25. Heitounei yane thlungpak heiya khaangthutkur. Heirouri Jesu'ne mangalbi kyun, “Pawa, Keiyei shuncha aya louningpinei ngamrou, Keine neiya mathanglei. 42#Jn 12.30. Keine mulei touri nangne Keiyei shunchaya karyomne ninglhakpi, heiya Keine atoubi kyun ari bi arou klei thimi rapnung'tlimme. Ngamri Keiyari bi arou Neiyei yenmalhetpikurme toubi yane muheirou.” 43Ane atoubi yunchibine, heirou hou chouni heiungkur, “Lazarus, wathukalo!” 44#Jn 19.40; 20.7. Heisi tounarou ane aiyei hut-ho namma heiri khi'lhung lhomna punshel kyaoni mairakhi yumphopburbi lhanrilrei wathukkur. “Aya lhomphopkur heiya shutdurpibi, shaalyerlaka,” toubi Jesu'ne yanungei shunkur.
Jesu'ya Hatnanungei Muni Waikrang
(Mt 26.1-5; Mk 14.1-2; Lk 22.1-2)
45Marya thirou wathimi namni Jesuei touthutkur lhou rapya muwurbi, heirou yane Aya uklumkur. 46Heiya yaihangrei thimirap thane lhangai karsa rapnung kallengbi, Jesuei touthutkur lhourap nammaya yanungei hungshunpikur. 47Heitounei ngamrou Lhangai karsa raple Suipipu rapne pulne Yama-krungya murilbine kyun, “Kane kouya touserou? Napawa heine touthutkur kngakei lhourap namma heiya thilak! 48Aiyei lhou rapya kane heisi touyerbi leiyanungri, thimi nammane Aya uklummurouleiya, heirou Romeayei lhou'urpu rapne kaidoura tlouphabi, heirou kaiyei Pukhrumna cheemle, heirou kai limyakhi mityerrouleiya!” 49#Mt 26.3. Kum heirou yai hangra suipi pukhi hoikhou Caiaphas toubi ung napawa heine kyun, “Nari koukhatkhi muheimakleintu! 50Lim nammaya maangyerkur heinung'tlimri, thimi napung khatya hiyerkurni nanungei lhangaime touri nane ningmumako?” 51Heiya aiyei kyun tlou heiri aitamei kningya yunthutkur nimak; heinung'tlimri, kum heirou ane Suipipu khoine leiyeinung, Jesu'ne Jehudiya nammanung'tlim hipiwurbi; 52#Jn 10.16; 17.21. heirou yanungei tomkhi nimakne, chekkurbi klei Dunpuei thimirap namyerwaya sharungkhat khoine pulne markumlhaknanungei toubi yunthutkur. 53Heiniyei waiyoubi Jehudiyei lhou'urpu rapne Jesu'ya hatnanungei wairaangkur. 54Heitounei ngamrou Jesu'ne Jehudiya ramra mitdoni baora karwaichamakne leikur, heiya ramhei lakurkhoubi ramthing pongra klei Ephraim toubi ung khukarthilla wakur, heitoubi bi heirou Ane ruishik raple pulne leiwurkhou. 55#Mt 26.1; Mk 14.1; Lk 22.1; Jn 13.1. Ralthutpinei Kumtlun yennakurnei ngamrou, thimi rapne yaiyaiyei yultlairei Cherni maibong tlainirou youknaei marthingnanungei Jerusalem'ra marthingnei knei tlaini maibongrou kakartilkur. 56#Jn 7.11. Heirou yane Pukhrumna Cheemra kartilbine Jesu'ya louthiphabi, ya khatle khat ngaikril, “Naneri kousitoubi ningchalei? Ari Knei tlunna bi arou kouniroukhi kabine yaomakarou.” 57Heirou Suipipu raple Lhangai karsa rapne thimi rapnung chay piwurbi, huhune Jesuei leikhouna mulanungri yanunungei pao shunpirou da, heiyanungri yane Aya manchangrou.
ទើបបានជ្រើសរើសហើយ៖
JOHN 11: MARIBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
