Lucas 9
9
So Jesús ÿamaq so doce lapaxaguenatacpi
(Mateo 10.5-15; Marcos 6.7-13)
1Qaq huo'o so na'a'q nachi so Jesús lapona't so doce lapaxaguenatacpi, nachi ÿanem da n'añaxac qataq da namaxasoxonaxac, da yaqto' ishit da i'odauec na n'ec leguemaxaicpi, qataq yaqto' ishit da nataden na ÿotta'a't nalolaxacpi. 2Ime, nachi ÿamaxalec somayipi da i'axat da ñi Dios nachiñi ñi ilo'ogue 'enauacna, qataq ÿamaxalec somayipi da nataden 'enauac na sa no'onpi. 3Nachi 'enapego' somayipi, 'eeta':
–Sa ishit qome da huo'o ca qauachii na nqa'aic. Sa ishit da qauachii ca qadashilaxala'ai qataq ca qadachoxonaxaquii qataq ca qonoqoi qataq aca qodomi. Ñi 'oonolec ÿachi ca 'oonolec l-lomaxaqui, qaq sa ishit da ÿachi' caua dos l-lomaxaqui'. 4Qaq camachaqca noÿic da qaviyiu'a, qaq nachica qoviÿa'a, chochi ivitta'a da qoquiÿa'ai que'eca 'alhua. 5Qaq ca huaña da sa ishit da qami' qaÿacongueta, qalaq qoquiÿa'ai que'eca pueblo. Ime, qaq qauchigoqoiuec na namoxoÿaxa naua qadapia'chilli'. Qaq damayi l'anaxat da maichi nasouaxajla't camayipi.
6Ime, nachi jec somayipi, nqo'ona 'enauac nam naña na saq 'amaqtaq shiÿaxauapiolec, nachi i'axattapeguem da n'aqtac mayi chigaqaigui da nca'alaxa, qataq natadeetac na dalolaxaicpi.
Da 'eetec da l-leuaxa so nachilaxanataxanaq mayi l'enaxat Juan
(Mateo 14.1-12; Marcos 6.14-29)
7Qaq so nta'a l'enaxat Herodes co'ollaq ÿaÿaten 'enauac nam i'ottacpi so Jesús, nachi ÿataqta sa ÿaÿaten ca 'eetec, cha'ayi huo'o na 'eetega da qaltaq nca'aleec so Juan. 8Qataq huo'o na 'eetega nachiso som l'aqtaxanaxanec ñi Dios l'enaxat Elías da qaltaq nachaxan, qataq huo'o na 'eetega souaxai' nachiso som hua'au l'aqtaxanaxanecpi ñi Dios da huo'o ca 'oonolec da qaltaq nca'aleec. 9Qalaxayi so Herodes 'enapeco':
–Nachaÿim caillayi samaxasoxoolec da qaipeteguec na lqaic so Juan. Qaq ¿chaq négue't dam da' mayi sa'aqtapeguelec da lapa na n'aqtaguec?
Nachi so Herodes ÿataqta huotaique da ÿauatton somayi.
So Jesús iqui'axan so cinco mil shiÿaxauapi
(Mateo 14.13-21; Marcos 6.30-44; Juan 6.1-14)
10Nachi so lapaxaguenatacpi co'ollaq mashi ñi'iguelaq, nachi da'aqtaxaatapeguem so Jesús 'enauac nam i'otpi. Nachi somayi ndoqteeteec somayipi da ÿauegueuga so 'alhua mayi sa qaÿapeque yi pueblo Betsaida. 11Qalaxayi so shiÿaxauapi co'ollaq l'axaÿaxac de'eda, nachi qaica'ateueegue somayi. Nachi so Jesús ÿaconguet 'enauac somayipi, nachi da'aqtaxaatapeguem da ñi Dios nachiñi ñi ilo'ogue 'enauacna, qataq nataden 'enauac na sa no'onpi.
12Qaq co'ollaq mashi avit nachi soua doce lapaxaguenataqa nachi nquicoto so Jesús, qaq qoÿiitega, qoÿiita':
–Qonapega na shiÿaxauapi, yaqto' queuo da nmateec, qataq deshijnaxanaique ca aloq da tau'alo naua nañalo na saq 'amaqtaq shiÿaxauapi, huo'otaq nam sa qaÿapeque mayi netalguete naua 'ale'u, cha'ayi na souaqta'a tojlec, qaica ca naña.
13Qalaxayi so Jesús 'enapeco':
–Qai'añiim qami' cam aloq namayipi.
Nachi somayipi 'enapeco':
–Qaica cam qonoq. Nachaqnauate' naua cincole pan qataq naua dosolqa nÿaxayi. Chaqdata da qomi' seshijnaxanaqaique ca nallic da yaqto' deque'e 'enauac ne'ena shiÿaxauapi.
14Cha'ayi namayipi huac da ivi' na cinco mil ÿallippi. Qalaxayi so Jesús 'enapega so lapaxaguenatacpi, 'eeta':
–Qoñiÿapega namayipi da nso'ooñi, qalaxayi nÿottecachi cincuenta qanqashiñi na huaxaÿa't.
15Qaq 'eda da qoÿiitec, nachi nso'ooñi 'enauac somayipi. 16Nachi so Jesús ÿaconalo soua cincole pan qataq soua dos nÿaxayi. Ime, qaq ilo'ot na piguem, nachi nqouagaxaueelguete soomayi. Qaq co'ollaq ime da icolaxachiguilo, nachi ÿanema soua lapaxaguenataqa da yaqto' soomayi ÿanoiguilo so shiÿaxauapi. 17Nachi 'enauac somayipi deque'e qataq comadaxaicpi. Qaq ime, nachi qaiÿoxoguilo soua doce canasta so ñi'iÿoxot.
So Pedro i'axat so Jesús da nachiso so nta'a mayi nca'alaxaqui
(Mateo 16.13-19; Marcos 8.27-29)
18Huo'o so na'a'q so Jesús co'ollaq ndoteec da nqouagaxaueetac, qaq nnaictagueto soua lapaxaguenataqa, nachi inatta'pe, 'eeta':
–¿Chaq négue't ca ipettega aÿim na shiÿaxauapi?
19Nachi soomayi 'ena'po':
–Qomyi huo'o na ipettega da nachi'am nachilaxanataxanaq Juan, qataq huo'o na ipettega da nachi'am Elías, qataq huo'o na 'eetega da nachi'am ca 'oonolec som hua'au l'aqtaxanaxanecpi ñi Dios da huo'otaq nca'aleec.
20Nachi ina't soomayi, 'eeta':
–Qaq qami' ¿chaq négue't ca qaupichiitega aÿim?
Nachi so Pedro 'enapeco':
–Qomyi nachi'am nta'a mayi qadca'alaxaqui mayi 'auachigoqo'ot ñi Dios.
So Jesús i'axata'a da l-leuaxa
(Mateo 16.20-28; Marcos 8.30–9.1)
21Qalaxayi so Jesús nachi ÿataqta huaqajleguete soomayi da sa ishit da huo'o ca da'aqtaxaadem de'eda. 22Nachi 'enapeco':
–Ne'ena shiÿaxaua llalec ÿataqta qalota qome da nque'ejnaxac, qataq qaimaqauec, imaqauec na nquedoxonecpi qataq na lataxala'pi na ltaxaÿaxanaxanecpi na shiÿaxauapi da qaitaxaÿapegue' ñi Dios, qataq nam dapaxaguenataxaatapeguec na nqataxacpi, qataq qaÿalauat qome. Qalaxayi da mashi ivi' caua tres na'axa'te, nachi qaltaq nca'aleec.
23Qaq ime, nachi 'enapega 'enauac somayipi, 'eeta':
–Ca nshitaique da aÿim quegue, qaq no'on da ÿalat 'enauac na maichi lhuennataxa, ime, qaq aÿim quegue 'enauaque naua na'axa'te, nai'ctaxa da daqat da nachaalataxac. 24Cha'ayi ca nshitaique da nachi 'eetai' da nca'altauec, qaq nachica ca daqat da nachaalataxac. Qaq ca daqat da nachaalataxac souaxat aÿim, qaq nachica ca jec da nca'altauec. 25Cha'ayi ¿chaq negue'to' ca ÿachigoxotaigui ca shiÿaxaua da imatta't da nauec 'enauac nam huetalec ana 'alhua, da huo'otaq daqat, huo'otaq da maichi nque'emaqchijla't? 26Cha'ayi ca aÿim ncoxolec qataq da i'aqtac, qaq nataq'en na shiÿaxaua llalec ncoxolec camayi, qom ivita da ñi'iguelaq da nta'a, nactaigui da lli'oxoyic ñi lta'a qataq nam qui'itta lamaxashicpi piguem l'ecpi. 27Ÿataqta 'eesa da qami' sa'axatema da huo'o nagui na ÿalectauo da saxanaxa qome da ileu qom huo'otaq saxanaxa da ilogui da 'eetec qom ilo'ogue 'enauacna ñi Dios.
Qanadalaxat da nmejnaguec so Jesús
(Mateo 17.1-8; Marcos 9.2-8)
28Qaq co'ollaq mashi inoxoodeec soua ocho na'axa'te da nasaxauec de'eda so Jesús, nachi nqo'ooshiguemec aso qasoxonaxa da nqouagaxauen, nnaictagueto soua Pedro, Santiago, qataq so Juan. 29Qaq co'ollaq queta da nqouagaxaueetac, nachi da lashiguiaxac nqochin, qataq soua alogo ÿataqta ÿapaga'q qataq qashilectrapiguiñi. 30Huaña, nachi nachaxa'n soua dos shiÿaxa'u, n'aqtaxaatapegueto somayi. Qaq soomayi nachisoua so Moisés qataq so Elías. 31Ÿataqta coleesopa so n'edaxa ÿataqta qaica ca 'en'am da lli'oxoyic. Qaq qai'aqtaxaatapeguem so Jesús da 'eetec da l-leuaxa qom huaña yi Jerusalén. 32Qaq so Pedro qataq soua lÿa't ÿataqta sa l'axaic na l'ochaqa', qalaxayi ishit da nlodeec. Nachi ÿauaachiyigui da lli'oxoyic so Jesús qataq soua dos shiÿaxa'u mayi hueta'agueta somayi. 33Qaq co'ollaq mashi yaqta'a da queda'aisalo so Jesús se'esoua shiÿaxa'u, nachi so Pedro 'enapeco':
–'Am mayi 'auapaxaguenataxaatac, ¡'onaxáictaxa da nachi souaqta'a ne'ena! Qaq so'ota'q caua tres qayi'axaquilli', 'am 'oonolec ca 'adma', qataq da Moisés qataq da Elías.
Qaq so Pedro sa ÿaÿaten ca naigui de'eda l'aqtac. 34Qaq co'ollaq ña detaqtac, nachi anac so l'oc ÿataqta ipelteelguete, nachi ÿataqta huo'o da lcolanqa' co'ollaq iloda'a da huejdaigui somayi. 35Nachi qai'axaÿa so nvilÿaxac, chimaxaigui so l'oc, 'eeta':
–'Eda da ÿalec mayi ÿauotaxat, damayi qan'axaÿaxañiÿa.
36Qaq co'ollaq ÿoxogue se'eso n'aqtac, nachi qaltaq qaila'a so Jesús da nda'a't. Nachi soomayi ÿataqta ñi'imaxatte', qataq sa ishit da huo'o ca da'aqtaxaadem de'eda lauanaqchi'c.
So Jesús nataden so nsoq mayi huo'o so l'ec leguemaxaic
(Mateo 17.14-21; Marcos 9.14-29)
37Qaq so lÿa na'a'q, co'ollaq mashi huenotreeguesop aso qasoxonaxa, nachi nateeda'aguet so qalota shiÿaxauapi mayi huaqatta'aguet so Jesús. 38Nachi huo'o so shiÿaxaua detaqa, ÿataqta n'axannec da l'aqtac, chimaqtoigui se'eso shiÿaxauapi, 'eeta':
–'Am mayi 'auapaxaguenataxaatac, ña 'aumeten yi ÿalec. Ten, nachaqyita 'oonolec ÿalec. 39Huo'o so n'ec leguemaxaic imattaigui, nachi i'alaqchittac qataq icopchaqchit. Nachi anacnaxa naq'en na lcochi na alap. Qaq qaica ca lyac naq'en, qataq sa ishit da ÿaxaneec. 40Qaq mashi sogote da ñachoxonnoto daua 'adapaxaguenataqa da i'oldauec ñi'iñi n'ec leguemaxaic, qalaxayi sa ishi't.
41Nachi so Jesús 'enapeco':
–¡Lloxochiyi ne'ena shiÿaxauapi yi sa da'amqajnataxan qataq qauemaicpi! Mashi huo'oi soua na'axa'te da qami' soota'agueta, qataq mashi huo'oi soua na'axa'te da ñiualaxaueetapec. Ña 'ando'ocna'a cam 'ai'alec.
42Qaq co'ollaq mashi nquigueuo so nsoq, nachi so n'ec leguemaxaic huañi naq'en somayi, nachi ÿi'iguelaxalec da decopchi naq'en. Qalaxayi so Jesús nachi nlaxa se'eso n'ec leguemaxaic, nachi no'oita naq'en so nsoq. Ime, qaq ÿi'iguelaxatot so lta'a. 43Nachi 'enauac se'eso shiÿaxauapi ÿataqta huo'o da l'aalaxa da l'amaqchic ñi Dios.
So Jesús qaltaq i'axata'a da l-leuaxa
(Mateo 17.22-23; Marcos 9.30-32)
Qaq co'ollaq ñaq queta da qai'aalatapeguec 'enauac nam i'ot so Jesús, nachi somayi 'enapegalo soua lapaxaguenataqa, 'eeta':
44–Ña qan'axaÿaxañiichigui da shinapec, qataq sa ishit qome da qaucouaÿa'ai, da ne'ena shiÿaxaua llalec qoÿanoigui qome na shiÿaxauapi, qaq namayipi maichi ÿoiqueetac qome.
45Qalaxayi so lapaxaguenatacpi sa ishit da ÿaÿaten de'eda qoÿiitega, cha'ayi sa ishit da qoÿanem da ÿaÿaten, qataq huo'o da lcolanaxa da denataxaalec da qai'axategue ca naigui de'eda n'aqtac.
¿Chaq négue't ca ÿacteec da ÿi'oxodaq?
(Mateo 18.1-5; Marcos 9.33-37)
46Nachi so lapaxaguenatacpi nqalligottapigui da chaq negue't somayipi ca ÿacteec da ÿi'oxodaq. 47Qalaxayi so Jesús ÿaÿateetac de'eda lcouennataxac somayipi. Nachi ÿaconeu'a so nogotolec, nachi huaqte'. 48Nachi 'enapeco':
–Ca ÿaconguet ne'ena nogotolec souaxat da aÿim i'amaqteetac, qaq nachaÿim mayi aÿim ÿaconguet. Qaq ca aÿim ÿaconguet, qaq nataq'en ÿaconguet ñim aÿim namaq. Cha'ayi ca ÿapacteec qaica ca l'amaqchic 'enauac da qoñiita, qaq nachica ca ÿacteec da l'amaqchic.
Ca saq qomi' npa'aguenalo, nachica ca qomi' sa iÿota'alo
(Marcos 9.38-40)
49Nachi so Juan 'enapeco':
–'Am mayi 'auapaxaguenataxaatac, qomi' huo'o so 'oonolec selaqalec da nqattac na n'ec leguemaxaicpi, do'otaxaatega da 'ad'enaxat, qaq sa sashinaxam, cha'ayi sa ishit da ñinaigaqtague'.
50Qalaxayi so Jesús 'enapeco':
–'A'i, sa ishit da qaulliÿapeguem, cha'ayi ca sa ishit da qomi' npa'aguenalo, qaq nachica ca saq qomi' iÿotaugalo.
So Jesús nlaxa so Santiago qataq so Juan
51Qaq co'ollaq mashi sa qaÿapeque so laloqo' da taigue da piguem so Jesús, nachi huesoteec yi lavilÿaxac da taigue da Jerusalén. 52Nachi i'auaxa'n soua l'aqtaxanaxanqa, nachi soomayi nqo'ooda yim naña nam saq 'amaqtaq shiÿaxauapiolec mayi huaigui yim 'alhua Samaria, da yaqto' ÿaqataxanai' cam lanataqa'. 53Qalaxayi nam naña se'eso 'alhua Samaria sa ishit da ÿaconguet somayi, cha'ayi qaila'a da tata'ague da Jerusalén. 54Nachi so Santiago qataq so Juan mayi lapaxaguenataqa co'ollaq qaila'a de'eda, nachi 'ena'po':
–'Am qadataxala', ¿'anshitaique peta'a da seÿaxanaqaique ca nodec da chigoqo'ot na piguem da yaqto' nmatchiguiñi 'enauac yimayipi da ÿavigaxat, yaqto' 'eeta'am co'ollaxa da 'eetec so l'aqtaxanaxanec ñi Dios l'enaxat Elías?
55Nachi so Jesús ÿamataiguilo soomayi, nachi nlaxalo, 'eeta':
–Qami' sa qauaÿajñi chaq negue't cam saq cha'a mayi chigoqo'ot de'eda qauem qadhuennataqai. 56Cha'ayi ne'ena shiÿaxaua llalec sa ishit da anaga da nlaxajñi da nachaalataxac na shiÿaxauapi. Chaqdata da nca'alaxateec.
Ime, nachi nqo'ooda nam naña na saq 'amaqtaq shiÿaxauapiolec.
Soua nshitraique da quedegue so Jesús
(Mateo 8.19-22)
57Qaq co'ollaq mashi quete' soomayi, nachi huo'o so shiÿaxaua 'enapega so Jesús, 'eeta':
–'Am ÿataxala', ñishitaique da 'am seca'ategue ÿataqta cam 'auataigue.
58Nachi so Jesús 'enapeco':
–Ana huaxaÿaxapi huo'o na lauac, qataq na qoÿopi 'enauac huo'o na lpata'c, qaq ne'ena shiÿaxaua llalec, qalaxayi sa ishit da huo'o ca l'axasoqo' da do'ochi.
59So Jesús qataq 'enapega so lÿa, 'eeta':
–Aÿim 'auca'ategue.
Qalaxayi somayi 'enapeco':
–'Am ÿataxala', aÿim 'au'axaÿa'a ña sa'auaxaañi da selayiñi yi ita'a.
60Qalaxayi so Jesús 'enapeco':
–Ña 'au'axaÿa'a nam 'ico' leuaxaicpi da ilayiñi nam lqatacpi. 'Am, qalaxayi qojec, 'au'axateec da ñi Dios nachiñi ñi ilo'ogue 'enauacna.
61Qataq anac so lÿa, qataq 'eeta':
–'Am ÿataxala', ñishitaique da 'am seca'ategue, qalaxayi no'on da aÿim 'au'axaÿa'a da sa'auaxaañi da ñicoyiguene' na hueta'a yi ima'.
62Qalaxayi so Jesús 'enapeco':
–Qaica ca shiÿaxaua da huo'otaq mashi ÿashil-lec ca n'arado da n'atshiguem ca n'alhua, ime, qaq ÿamata'ague na l-laq. Cha'ayi da nachi 'eetec, qaq camayi saq taiguet da l'onataxanaxac ñi Dios da ilo'ogue 'enauacna.
ទើបបានជ្រើសរើសហើយ៖
Lucas 9: TBSNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
