Luk 12
12
Hanei sile iam u gamo
(Matiu 10:26-27)
1Tara pöata ti gono hobotoia u katuun u para koru, ba palai e töeier a mour a palai. Be Iesu e ranga mam na turu katunun tsitsilo i tanen me poeiena, “Alimiou go hanei sileiam u is turu Parasi, nonei a man gamo i taren. 2A mamanaka te hia kopkop naier i romana ena lukapa banariou i murimuri. Na mamanaka te hamouseier i romana ena hatara nariou i murimuri. 3Na manka tu ranga naiam limiou turu kuhil e hengoe roua turu alesala. Na manka tu ranga hamous naiam limiou ena ranga halakasa ner romana.”
Alimiou go matouteiam e Sunahan
(Matiu 10:28-31)
4Be Iesu e poeiena, “Alia e ranga mera goulimiou a man hahikapien i tar, ma matout rami u katuun te puli hamatier u tuenrei kaba nori i möa ta nitagala tegi kato homi menaien u namnamei. 5Alia e hatei ragi limiou esi tego matouteiam limiou: alimiou go matouteiam e Sunahan. Taraha? Nonei e antunan kato hamatiena u tuenrei, na nonei e ka has mena a nitagala tego lapo ba meraien u katuun i hel! Aa, alia e ranga mera goulimiou, nonei tego matouteiam limiou! 6A tolima a apena e holeri a moni a tetenei. Kaba e Sunahan ema solopala noa hase nei ta töa i taren. 7Kaba limiou e niga bala koru ramiou u apena. Ma matoutmi. E Sunahan e ase hakapa hasi u hulu hoboto i baku milimiou.”
Alimiou goma holis nami e Kristo
(Matiu 10:32-33, Matiu 12:32, Matiu 10:19-20)
8E Iesu e ranga lel me poeiena, “Alia e ranga mera goulimiou: esi te hatei na noa lia turu katuun, alia tu butun Katunuma ena hatei has ragou u angelo tere Sunahan nonei a katuun i tar.#12:8 U raranga teka e mar mouna uana teka, Esi te hatei ranei u katuun nonei e hamana na i tar ne ka uana tara pala i tar, alia ena hatei has ragoen turu angelo tere Sunahan. 9Kaba esi te holis nena nonei a katuun i tar i matar u katuun, balia tena holis has nagoen romana i matar u angelo tere Sunahan. 10A katuun te ranga homi nanou lia, Alia tu butun Katunuma, e Sunahan e luba noa has nanou a markato a omi i tanen. Kaba a katuun te ranga homi nena u Namnamei u Göagono, e Sunahan ema luba nanoui a markato a omi i tanen. 11Na pöata te kout raroen limiou ba limiou te tuol mia iahana u luman lotu na i matar a pal kapan, e möa tego hakats hapara uaiam limiou bate pei miou, ‘Ime temar ranga uagou lia?’ 12Taraha? U Namnamei u Göagono te hatuts ranei limiou romana a ka tego ranga naiam limiou.”
U haharuei tara tson moni a tutu
13A töa a katuun te kaia i gusur u katuun e pei tere Iesu, “O Hihatuts, alö go ranga mei e toular ba nonei te lu kakatena a manka te mate ban e tamamulam bate hale nei lia a pala i tar.” 14Be Iesu e poeiena i tanen, “Esi te hopö kapiin tego ona menai lia a manka i tamilimiou bate lu kaakata ragen?” 15Ba nonei e poeiena i taren hoboto, “Hanei iam bate taratara kap namiou a peisa milimiou tara markato hoboto tara katuun te gulena a mamanaka. Taraha? A mouna a nitöatöa ema lue ria tara mamanaka a para te ka mena a katuun.”
16Be Iesu e hatei raneien u töa u haharuei me poeiena, “A töa tson moni e ka mei u tsiktsiki te hapusukeien a kannou a parpara koru. 17Ba nonei e mar hakats uana teka: ‘Alia u möa ta makum tego haputeia lia a kannou a parpara koru i tar. Aha tego katoi lia?’ 18Ba nonei e poeiena, ‘Bara, alia e rure gou a man luman haputu i tar bate hatakei gou a man luma a man kapan. Ba lia te hapute goua a kannou na man tana manka hoboto teka. 19Ba lia te ranga pouts megou romana a peisar bate poeiegu, Möa lel! Alia e ka megu a mamanaka a niga te antunan kaka pala nou turu hiningal u parpara. Balia te nou haniga gou bate uagu, bate roro haniga gou bate sasaalagu.’ 20Be Sunahan e poeiena i tanen, ‘Alö a katuun a tutu! Tara bong i romana noahas ba lö te mate mou! Gesi te lue nou a mamanaka hoboto ti haputi lö?’” 21Be Iesu e poeiena, “E markato has uana iesana tara katuun te gono benei a peisanen a mamanaka, kaba i matana e Sunahan nonei e möa ta ka ta niga.”
Ma matout mi
(Matiu 6:25-34)
22Be Iesu e poeiena turu katunun tsitsilo, “Nonei lasi te hatei ragi lia alimiou: ma hakats hapara silemi a nitöatöa nu tuenrei na i puta, na ha te noue mou limiou na ha te hasoge mou limiou. 23Taraha? A nitöatöa ema ka sile nei a tou nou, na u tuenrei ema ka sil hase nei u hasobö. 24Rötoiam turu apena te ngö rari u kokou. Nori ema leberi a kannou na ema hagala hase rien, na nori ema ka has meri ta luman haputu tara kannou. Kaba e Sunahan noahas te hanou ranen! Na limiou e niga bala ramiou u apena! 25Esi i tamilimiou te tokuna bate gamon hangahangahe nou a nitöatöa i tanen i puta te toku uanen? E möa tala. 26Na tema antunan kato namia limiou a tsitabubun ka teka, ga taraha ba limiou te toku sile miou a man tabina manka?
27“Rötoiam temar pan uaier a man palaua a man hie. Nori ema kuiri na ema katoeri tu labalaba i taren. Na lia e ranga mera goulimiou, e Solomon a King e ka mei u hasobö u tara haniga koru, kaba a tsi töa puku a tsi plaua teka e tara haniga bala nena u hasobö tere Solomon. 28E Sunahan e katoeiena u palaua u niga, te pusukuna i romana na te haats hase roua turu tula i mahö. Na nonei ema hala has ranoui limiou tu hasobö? Alimiou e ka memiou u nihamana u tetenei. 29Na limiou goma hakats hapara silemi a ka tego noueiam limiou na tego ueiam limiou. 30U katuun u hahamana ra i puta e roron hakats sil koruer tegi lu menai a mamanaka teka. Kaba e Tamamilimiou i Kolö e atei silena te ngil mena milimiou a manka teka. 31Kaba limiou go hakats sileiam a Nipepeito tere Sunahan, ba nonei te hala has ranoui limiou a manka teka.”
A manka man niga na i Kolö
(Matiu 6:19-21)
32Be Iesu e poeiena, “Alimiou a matsi katuun i tar, alimiou goma matout mi. Taraha? E Tamamilimiou e sasaala mena tego hala meraien limiou a Nipepeito i tanen. 33Hahol naiam a manka i tamilimiou bate hala namiou a moni turu katuun ti möa ta ka. Alimiou go kui hatagala sileiam a manka tema tatei omiri, a manka man niga na i Kolö te ka nitöana, na u katuun u kopkop ema antunan lue rien romana, ne möa ta kokoros tega kato homieien. 34Tara han te kana a manka man niga bala i tamilimiou, nonei lahas te ka noa a torimilimiou.”
U katunun kui u niga
35Be Iesu e pei lelena, “Hapouseiam u hasobön kui bate hakulupe miou a man lam bate hahalose miou a saha toukui te butu nou. 36Bate heremi u katunun kui te hahaloser a katuun pan i taren tega kopis pouts uamen tara kannouna tara hitöl. Pöata te tuku nen ba nonei te porokona, ba nori te kalata boroboro narien a tamana. 37Te sabie nen u katunun kui i tanen e hahalose ren bate ma sohori, ba u katunun kui te sasaala korur. Alia e ranga mera goulimiou, nonei a katuun pan e kato here nanoi a peisanen a katunun sösöata kannou, bate hagum ranen bate hanou ranen. 38Na tega la memen a gusuna bong, tsi tara pal bongbong koru, bate tarena nori e kalata noar bate hahalosor, ba u katunun kui teka te tatei sasaala korur. 39Alimiou go hakats naiam a ka teka: Sanena tega atei sil mameia a katuun terena luma i hangisa koru tega lama a katuun a kopkop, ba nonei te hatongo kap nena a katuun teka bate ma heleie nei a luma i tanen bate tasuna. 40Na limiou has go hanei iam. Taraha? Alia tu butun Katunuma e la guma romana tara pöata alimiou ema hakats nami romana tego la uama lia.”
A tson mammam a niga na tson mammam a omi
(Matiu 24:45-51)
41Be Pita e poeiena, “Tsunono, u haharuei teka alö e hatei ramien lam pepeisa, tsi alö e ranga na mien turu katuun hoboto?” 42Ba Tsunono e ranga palisina, “Esi i tamilimiou te here nei a tson mammam hamana te hakats hanigana? A katuun pan i tanen e hataratara kap naneien romana a palair u katunun kui i tanen. Nonei te tatei hala ranoien a kannou tara pöata hamatskö. 43A mar tson mammam teka e tatei sasaalana tega mi sabe menai a katuun pan i tanen te markato uanen teka tara pöata tego la pouts men i han. 44U mana koru alia e ranga mera goulimiou, a katuun pan i tanen emi hataratara kap naneien romana a mamanaka hoboto i tanen. 45Kaba te omina a tson mammam, ba nonei temar hakats uana teka, ‘A katuun pan i tar ema sesein la pouts namei romana.’ Ba tson mammam te hatanian singata rena a palair u katunun kui, a pal tson na touhaliou, ba nonei te nouna bate ueiena u uain bate tutuna. 46Ba katuun pan tara tson mammam teka te la hasingoto nama romana tara pöata tema hakats naneien tega lamen. Ba katuun pan te hahuna korue nou a tson mammam a omi teka bate hake noen turu katunun kui tema tara kap haniga nari a toukui i taren.
47“A katunun kui te atei silena a toukui te ngilena a kapan i tanen batema hanei sile neien, na ema katoe nei a ka te ngilena a kapan i tanen, nonei te singata hapan koruier romana. 48Kaba a katunun kui tema atei sile nei a ka te ngilena a kapan i tanen, bate katoena a ka te antunana tara nihahuna, nonei te singata hateteneier romana. A katuun ti hale ii a ka a para ega hala hapara has. Na katuun ti hataratara kap nai a toukui a kapan e ga kato haniga korui a toukui teka.”
E Iesu e lu kaakata ranou u katuun
(Matiu 10:34-36)
49E Iesu e ranga lel me poeiena, “Alia u la silema tegomi hala menai u tula i puta, na lia e solon ngil koruegu u tula teka ega kulupu boroboro! 50Alia e ka megou a kamits pan tego lui lia, na torir e tiama koru silena tega kapa uaien romana. 51Ime temar hakats uami limiou? Alia u la silema tegomi hala menai a masalohana i puta? E möa. Alia e ranga mera goulimiou, alia u la silema tegomi lu kaakata merai u katuun! 52Tara man pöata te la nama, a tolima katuun te ka roua tara töa luma e ma hianiganiga roui bate katoeriou a huol a pala. A topisa te pal rer romana a huol, ba huol te pal raier a topisa. 53U munmun tamana e hiapalpalir romana, a galapien tson nu tamaren. Na u munmun tsinana e kato has uariou iesana bate hiapalpalir, a galapien touhaliou nu tsinaren. A tahol te pal nena romana a pien tahol a halöanabei i tanen, ba pien tahol te pal nena romana a tahol a halöanabei i tanen.”
Tara marei a pöata
(Matiu 16:2-3)
54Be Iesu e pei hasena turu katuun, “Pöata te tare mia limiou u köasi te butu nama tara pala te tsiruku uana a pitala, ba limiou te pei miou, ‘A langits e polo nou,’ ga langits e polo noahas nou. 55Na pöata te hasagohe mia limiou a lomolomo a belbelaha, ba limiou te pei miou, ‘A ka e hiski nou,’ ga ka e hiski noahas nou. 56Alimiou e tatei röto uamiou turu tsiktsiki na i kolö bate atei sile mou ime te mar mouna uanen. Kaba limiou u gamogamo! Taraha ba limiou tema atei silemi te mouna uana a manka te butuna i romana?”
Hamatskö gono meiam u katuun te kamer a niomi i tamilimiou
(Matiu 5:25-26)
57Be Iesu e poeiena, “E hana ba limiou tema ona peisemi a ka te matsköna? 58Tara pöata te la gono memia lö a katuun te ngilin kout neno lö, na tara pöata te ka noa mia limiou i maroro, alö go torohanan hamatskö gono meien. Nonei e namots las mena nei lö tara katuun pan turu kout bate hala nanoua lö tara polis, ba polis te hake noua lö tara karabus. 59Alia e ranga megou lö, alö ema tatei lakasa mumei romana e antunana tara pöata te hala namia lö a mamana hiholuna turu kout.”
Currently Selected:
Luk 12: HLA 2020
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.