Mak, echî 2
2
Jisos a yîm mbə́né a sôn
(Mat 9.1-8; Luk 5.17-26)
1Mfín á ka rap, Jisos a chə́bhe njəm a bhák ka Kapanom. Esə́re é jên é fáre sê yê a ri ka eték. 2Ane á bhak á súi njû nnyi yê a ri na éré-ere, kpe esogha-mmî cháŋ. Jisos a róghe ábho otîp ogyebhá-ḿbə́ŋé Obhasi esə́rə́m. 3Nji á kpik áno, ane ánî á kə̂n mbə́né á bhak mbâ eye. 4Ane á tî á chiŋ ka njû, kpe ekpak á kí si Jisos na mbə́né nnyó cháŋ. Á gyʉ̂t mân ka ósô ebhui, á yə̂m mfúk ka eji nji Jisos a gyím. Á kô mbə́né nnyó ka ekpa nji á bhóbhe nná yê, á bhî a sî mbâ Jisos. 5Nji Jisos a yéne se ane mbá á ki ḿbə́ŋé na yê, a sə́re mbə́né nnyó se, “Mmon omé, ń di wâ nsôn ń su obhí obhâ.”
6-7Nji a chorê áno, atóŋá-ebhín mba á kûn áfo á róghe ebhə́bhə́m ka ḿbə́ŋé ekpak í Jisos a faŋê ḿbə́ŋé kən a kí chot noŋ yê a ri Obhasi. Sê nne etat cháŋ nnyo a fonê ikom mfi a kí ri nne nsôn a su obhí nne ka ngun é ká chiŋi Obhasi átíŋ.
8Jisos ta a mə́ŋe nji ábho á kéra, a bhə̂p mân ábho se, “Jen é yími kən o kérá ên ka ekpak njí? 9Bhaghé ejûm nji é yúŋi é chîŋ, nji ń səre mbə́né nnyó bəre ‘Ń di wâ nsôn, ń su obhí obhâ,’ kən nji ń səre yê bəre, ‘Duî ngyím, kə́n ekpa ejâ, jen na akát choŋ?’ 10Tîk n tóŋe ên mân jáé bəre mme, Mmon-i-ntem-nne, ḿ fon ikom ka nsi nnyí mfi n kí ri nsôn n sû obhí nne.” A kpíghi a tô mbə́né nnyó 11se, “Mbə́né, duî ngyím, kə̂n ekpa ejâ, choŋ kʉ́ri ka njû eya.”
12Mbə́né nnyó a tə̂m fə́ne a rúi ngyím a kə̂n ekpa ejê a kʉ́rá. Chénchén ane mba á rî áfo á kebha, biji í kpô ábho kpe-eji, á róghe ekarám nkat mbâ Obhasi sê, “Kpe ofú bhə́t, é ka nok oyén ntʉ́ghi ejûm njí.”
Jisos a bhîŋ Libhayi se a joé ḿgbán owe
(Mat 9.9-13; Luk 5.27-32)
13Jisos a bhə̂t a jak ka mkpe aya Gariri, ekam ane é bhak mbâ eye. A jî róghe ábho ekpíím. 14Nji á jená a jak, a yên mbə́bha-ntí-echî etat a kamá se Libhayi nnyo mmon Afiyus. Libhayi a kun ka njû etûm eye. Jisos a bhîŋ yê se, “Duî ngyím, tóp ə̂m.” Libhayi a tə̂m fə́ne a rúi ngyím a jak na Jisos. 15É kpó to é kə́t mkpât ebhú, Jisos a jak a jí di édî ka njû Libhayi. Ekpatə́m ekam abhə́bhá-ntí-echî na ane mba ane á kébha sê ane abhí á rî á tobha yê. Etʉ̂ ábho etî-etî á chə̂m yê na atóbhá abhê á kí di édî njí. 16Atóŋá-ebhín mba á rî ka echəme Farasi, á yên noŋ Jisos á dik édî na abhə́bhá-ntí-echî na ane mba ane á kébha sê ane abhí. Á chîŋ á jî bhə̂p atóbhá abhê sê, “Jen kən ńsé owəné a kí di édî na ntʉ́ghi ane mbá?”
17Kən Jisos a yûk ebhə̂p ábho, a táme ka egan se, “Mmaŋa-emaŋé nâ á nora nne-njân, ane mba á rî ka osoná-biji á bhó not nne-njân. M báe ka obhô ane abhí, ń ka bhá ka obhô ane ano.”
Á bhəp Jisos ebhə̂p í nchot okagha-njaé
(Mat 9.14-17; Luk 5.33-39)
18Atóbhá Jon nnyo mfúgha-ane-ayép, na mba ane Farasi á kâk njaé sê á jíghí Obhasi. Ofú bhə́t á rî á kak njaé nnyí, etʉ̂ ane á bhâ bhə̂p Jisos sê, “Atóbhá Jon na ane echəme Farasi á kí ka njaé, jen kən abhâ á bhó ka?”
19Jisos se, “Ka ifə́né íkíkéré, nâ-ngá é rî nono nji ane á bha erom ebháé, á jak á kʉra kpe mkpât édî á ká kak ka nnyo a? Ée, áno asík! Ka nji nkógha-nkáé a ri áfo na ábho, á bhó ka njaé. 20Kən ofú tîk ó sî mbi á kí yighí nkógha-nkáé ányo ka ekam ábho. Ofú ábhi ó si, tîk á róghe mân njaé ekáám.
21“Nne kpe yót cháŋ nnyo a kí ko éfô efê a kû etəm í nkʉ̂. Á yim áno, eji a kúi áno é kí kpere é wáre etəm í nkʉ̂ ányi, mfúk ḿ fâŋ ń chíŋi mmi ndaŋa-mbá. 22Kpe nne yót cháŋ fə́ne nnyo a kí ko aməm a kâk ka itə́n mfi í fək. Á yim áno, itə́n mfí í kí kpere í yə̂m, aməm á fûk ka nsi, itə́n í bhîp. É nop sê á kâk aməm mma no ka itə́n mfi í rî nono.”
Nchot ofú oyoá-biji
(Mat 12.1-8; Luk 6.1-5)
23Ka ofú oyoá-biji bhə́t, Jisos a kí chiŋ ka etím ebhin í nkʉi etat. Ane mba á tóbha yê á rî na yê. Nji á chíŋa áno, atóbhá abhê á róghe ebhóŋóm nkʉi ka ebhin njí.#Otira 23.25. 24Ane echəme Farasi á sə́re mân Jisos sê, “Ńgyê, jen kən ábho á kí yim ejûm nji kə́n á ká yim égyé, ka ofú oyoá-biji?”
25A táme ábho se, “Nâ-ngá ó ka nok oyúk ên ejûm nji Debhit na ane abhê á yími ebhú á rî ka eket, njaé a yámá ábho a?#1 Sam 21.1-6. 26A gyée ókʉ́rí achot Obhasi a kə̂n édî nji á jóme á káre Obhasi, a kíri na ane abhê á dî. To ebhín é fíi sê nkara-agore Obhasi átíŋ nâ á dik ntʉ́ghi édî njí. Nchot nnyí a fábhe ka ebhú nne nnyo á kamá se Abiyata a ri ntûfâm akará-agore Obhasi.#Mbín 24.9.
27“Məŋê ên mân sê Obhasi a yimî ofú oyoá-biji a káre nne, á ka yim nne a káre ofú oyoá-biji. 28Deê ń sə́ré ên mân bəre Mmon-i-ntem-nne a ri Ntûfâm kpe na ofú oyoá-biji.”
Currently Selected:
Mak, echî 2: ETUNT
Highlight
Share
Copy
Want to have your highlights saved across all your devices? Sign up or sign in
Ejagham New Testament © Bible Society of Nigeria and Bible Society of Cameroon, 1996.