MATYOO 8
8
Yeesus à wɔ̀ɔ̀zii kukwiy
(Mk. 1:40-45; Lk. 5:12-16)
1Yɛ̀ɛ Yeesus à sɛngày ɓi dòn, ɓìtuu ɓi ɓum ɓi nɔɔ̀tìghà nyi. 2Nni kukwiy adɛŋ à yùghà nyi a nyoo, à ɓag mɛ̀ɗu ɓi zi di a kakali lɛ: Kan, ì ki kɔni wɔ̀, ù ri lɛ ù kì lɛ, mɓa ti lɛ syeesyee ɓi nyoo yɛ̀m. 3Fɔɔnnɛ Yeesus à nàmgà càg, à kòm ŋwaànɛ̀n à kpaa lɛ: Ki kɔni mɛ̀, ɓaya lɛ syeesyee ɓi nyoo yɔ̀ɔ̀. Nni ŋwaànɛ̀n à ghàskà kì wɔ̀ni kwiy wiì lɔŋ wɔɔ foo. 4Ajɛ̀m ìnɛn, Yeesus à kpaa nyi lɛ: Kɔ̀ɔ fèg ki ɓùŋi mum kìɓan ki, kɛ̀na lɔŋ, u resɛn yɛ̀ɛ pìrɛɛtìrɛ̀, u ki fa rifa ɗi Moyis à kpaaghà lɛ ɓɛɛ falag di mum à wɔ̀ni kwiy, di rìkì ɗiǹ ɗyɛɛ resi ɓɔ lɛ, ù mɛ wɔ̀n.
Yeesus à wɔ̀ɔ̀zii ǹkìì-kìsay a ǹkɔ̀mɛ̀n-ɓɛ̀sujàà
(Lk. 7:1-10)
5Yɛ̀ɛ Yeesus à ɗiŋìghà a Kapɛrinawum nni ǹkɔ̀mɛ̀n-ɓɛ̀sujàà àdɛŋ à yùghà nyi a nyoo 6à yɛ̀gsì nyi ɓyàg, à kpaa lɛ: Kan! ǹkìì-kìsay wɛm̀ a nɔ̀nɔŋii a mɛɛ, kɛ̀ɛ bee inɛ lɛ a pɛsɛn aɗyòò; a ki wowog rikɛŋ lɛɛ̀gwey. 7Yeesus à pɛ̀ɛ̀zi nyi lɛ: Ǹɗi ɓiì kɛ̀ɛ nyi kì ɓoò. 8Ǹkɔ̀mɛ̀n-ɓɛ̀sujàà à ɓàg nyi lɛ: Kan! ǹkpaŋi ɓi ɓi ǹkoŋ wulɛ, ù ɗiŋì ɓi naa yɛ̀m, kìɓan kifog, kali lɔŋ jɛ̀ɛ̀ ì ŋwɔm yɔ̀riyɔ̀, di ǹkìì-kìsay wɛm̀ a wɔǹ. 9Ɓisuulɛ, màànɛ ǹɗì ànɛ, ǹɗì ri ɓumɓɛ ɓɛ lamii mɛ̀, ǹki ɓa girig rì ɓɛ̀sujàà ɓɛ mɛ̀ ǹlàmii; i nkalii àdɛŋ lɛ, kɛ̀na, à kɛ̀n, ǹkalì roàmbog lɛ, yuiy, à yùy, nsoò ǹkìì-kìsay wɛm̀, i nkpaa nyi lɛ kìya rìkuu ɗi kiɓan ɗi, à kì. 10Yɛ̀ɛ Yeesus à wokà ɓìtòkì ɓi ŋwaànɛ̀n à tòòghrɛ̀ngà ɓiǹ à kuughràg, à kpaa ɓumɓɛ à ɓaghà rì ɓɔ lɛ: Ǹkalii mìni ɓi saaɗ lɛ, ǹka tanɛn ɓi coo righerɛ̀n ɗi fɛlɛ yɛ̀ɛ ŋwaàdɛŋ nsoò a Isirayɛl. 11Wɔ̀lɛ ǹkalii mìni lɛ, ɓum lɛɛ̀gwey ɓɛ pɛ̀sɛɛ gɛy lɛ rì a rìkpagìì ɗi ŋwos rì a rìnɔ̀ŋɗàg ɗi ŋwos, ɓɛ yu kì kɔ̀rii ɓi teɓèrè ǹɗaŋ ri Abiraham rì Isag rì Yakɔɓ, ɓi kìlɔ̀ŋ ki aɗyòò. 12Kìɓan kifog ɓumɓɛ ɓɛ ghɛ̀sɛ̀ngà lɛ ɓɛ kɔrì ɓi kìlɔ̀ŋ kiǹ, ɓɛɛ̀ɓɛ ɓɛ tyɔɔ gɛ ɓi birìm ìnɛ ɓidan, wɔɔ nnɛ ɓum ɓɛ rèerèèdɛɛ gɛ, di ɓɛɛ̀ ŋàaŋaàdì min. 13Nni Yeesus à kpaaghà min ǹkɔ̀mɛ̀n-ɓɛ̀sujàà ànɛn lɛ: Kɛ̀na, kɛɛ kilɛn lɔŋ yɛ̀ɛ wàa gherɛɛ lɛ ki ri lɛ ki kilɛ̀n. Nni ɓi cààmɛ̀n kɔm̀ kiǹ nnɛ ǹkìì-kìsay a ŋwaànɛ̀n à wɔ̀ngà.
Yeesus à wɔ̀ɔ̀zii ɓɛ̀roroɓ mɛ̀kuu mɛ̀kuu
(Mk. 1:29-34; Lk. 4:38-41)
14Yeesus à kɛ̀ngà min a mɛɛ mɛ Pyɛɛri a tanɛ̀n jɛɛ gili Pyɛɛri di à nɔ̀nɔŋii lɛ à ɓaghà lɛ tɔ̀gtɔ̀g. 15Yɛ̀ɛ Yeesus à kòmgà ǹcìli Pyɛɛri ànɛn ɓi càg, rìɓa ɗi à ɓaghà lɛ tɔ̀gtɔ̀g ɗi leèg. Fɔɔnnɛ à pɛ̀sɛ̀ngà aɗyoo, à kàà ɓɔ ɓìɗilàg. 16Yɛ̀ɛ cɛŋkò ki kpagà, ɓɛ yuiy nyi rì ɓumɓɛ ɓɛ ɓaghà rì ɓìɓeɓtàg ɓi mɛghay lɛɛ̀gwey, fɔɔnnɛ à nàɓkà ɓìɓeɓtàg ɓi mɛghay rì jɛ̀ɛ̀ yìì, à ki wɔ̀ɔ̀zi ɓɛroroɓ mɛ̀kuu mɛ̀cèm. 17À kìghà fɔlɔɔ lɛ, a roozi kìɓan ki ǹkpaŋzì-ɓìɓan Ezayii à kpaaghà lɛ: À tekà ɓìlɛm ɓi tì ɓaghà rì ɓyɔ, à ki tɛ̀g ti tiroɓ tis.
Ɓumɓɛ ɓɛ ɓaghà rì zày ìnɛ lɛ ɓɛɛ nɔɔ̀ti Yeesus
(Lk. 9:57-62)
18Yɛ̀ɛ Yeesus à ghɛngà di kìtuu ki ɓum ki mɛ kɔ̀mzɛn nyi nni à kpaaghà lɛ ɓɛɛ kɛǹ cɛcɛɗ ki riɓày. 19Fɔɔnnɛ ǹɗèsàg-ɓìdɔ̀gsɛna adɛŋ à yùghà nyi à nyoo, a kpaa lɛ: Ǹɗèsàg, ǹɗì wɔ̀ ɓiì nɔ̀ɔ̀tii jàŋbimiɗ ìnɛ ù kɛ̀ɛ. 20Yeesus à kpaa nyi lɛ: Ɓìbina ɓi ri rì mɛ̀kuɓi, tììlì ti aɗyoo rì ɓìlaa, wɔ̀lɛ Man à mum à yin ɗi jàŋ inɛ a fɔɔ̀sag. 21Nni roàdɛŋ ànɛ ɓi nɗaŋ wu ɓɛyilàg ɓii a kpaatìghà nyi lɛ: Kan! ka càra mɛ̀, mɓay kì ɓòmi tààta wɛ̀m. 22Wɔ̀lɛ Yeesus à ɓàkà nyi lɛ: Nɔ̀ɔ̀ti mɛ̀ u caɗ ɓìloŋ ɓyɛɛ ɓom̀ ɓìloŋ ɓyaa.
Yeesus à masii coo bɛ̀ɓ
(Mk. 4:35-41; Lk. 8:22-25)
23Yeesus à ɓɔkà ɓi kìkɔm, ɓɛ̀yilàg ɓii ɓɛ nɔɔ̀tì nyi. 24Fɔɔnnɛ coo bɛ̀ɓ ì tumɛ̀ngà rìfɛɓsì ɓi rìɓày rì ìtèɗ lèg ànɛ lɛ ɓìkus ɓi sigtɛ̀ngà kìkɔm, wɔ̀lɛ Yeesus à ɓaghà ɓi fìlo. 25Ɓɛ̀yilàg ɓii ɓɛ tyoŋdɛ̀ngà nyi jàŋbog ɓɛ ghemzì nyi, ɓɛ kpaa lɛ: Ghɛɓsi ɓìsi, Kan tì cuu yɛɛ lɛ̀. 26Nyii kpaa ɓɔ lɛ: Ɓisuucɛ nnɛ ɓi rirìsì? Mìni ɓum ɓɛ maa rìgherɛ̀n lɛsàg ɓɛ! Nni à pɛ̀sɛ̀ngà min aɗyoo à fwààdɛ̀n lɛ rì bɛ̀ɓ rì rìɓày, jàŋ i sugtì kì maarɛɛ lɛ fyòoog. 27Ɓumɓɛ̀n, ɓɛ̀cèm ɓɛ kuughràkà lɛɛ̀gwey ɓɛ tɔɔghrɛ̀n lɛ: Rìkuu ɗi mum adi ɗyɛɛ rì lɛ, ɗi nsoò bɛ̀ɓ nsoò rìɓày ɓyɛɛ̀ kìki mɛwog?
Yeesus à wɔ̀ɔ̀zii ɓum ɓɛɓɛɛ̀rɛn, ɓɛ ɓɛ ɓaghà rì ɓìɓeɓtàg ɓi mɛghay
(Mk. 5:1-20; Lk. 8:26-39)
28Yɛ̀ɛ Yeesus à kɛngà kì kpaŋì cɛcɛɗ ɓi kìlɔ̀ŋ ki Gadara, nni ɓum ɓɛdɛŋ ɓɛɓɛɛ̀ ɓɛ ɓɛ ɓaghà rì ɓìɓeɓtàg ɓi mɛghay, ɓɛ kpagày ɓi dɛm i zɔ̀ŋ, ɓɛ yu kìtuusɛɛ ri nyi. Kìɓɛ̀ɛ̀ ki ɓum kìn ki nyɛngà lèg ànɛ, mum àa ǹti kɛ̀ɛ ghɛɛsi lɛ a fyeè ɓi bee inɛ̀n. 29Nni ɓumɓɛ̀n ɓɛ tumɛ̀ngà rìfwànfwàn jɛ̀ɛ̀ aɗyoo lɛ: Wɔ̀ Man a Bɛ̀ll, ki rì Wɔ̀ la ri ɓìsi? Ù yùu yì fɛ lɛ, u fa ɓìsi ǹtɔɓ di cààmɛ̀n ki ka ghɛɛ̀sɛn ɓi? 30Coo kituu ki jèè ki ɓaghà ɓiì ɗiɗii yi ɓyaaɓi fɛlɛ kìpàs. 31Ɓìɓeɓtàg ɓi mɛghay ɓi ɓɔɔ̀ɓɔ̀ŋzàkà Yeesus di ɓyɛɛ kpaakpaa lɛ: I ki kɔni wɔ̀ lɛ u naɓ ɓìsi, roma ɓìsi ɓi kìtuu ki jèè ki. 32Yeesus à kpaa ɓyɔ lɛ: Kɛ̀ɛna! Fɔɔnnɛ ɓi kpagà ɓi ɓumɓɛ̀n, ɓi kɛǹ kì ɗiŋii ɓi jèè. Nni kìtuu ki jèè kiǹ ki pwaŋighày ɓi dòn aɗyoo, ki suurɛ̀n ɓi rìɓày kìcèm, jèè, yiǹ yi cuu mɛ̀nig. 33Ɓumɓɛ ɓɛ ɓeŋɓèŋgà jèè yin ɓɛ ghɛŋighà, ɓɛ kɛǹ ɓi bàn lɛ ɓɛɛ kali ɓum kìɓan kiǹ, à ɓiisɛ̀n kìɓan ki ki kilɛ̀ngà a ɓumɓɛ ɓɛ ɓaghà ɓɛǹ rì ɓìɓeɓtàg ɓi mɛghay. 34Nni bàn bimiɗ ì kɛ̀ɛ̀ghrɛ̀ngày lɛ ɓɛɛ ghɛǹ Yeesus; lɔŋ yɛ̀ɛ ɓɛ ghɛngà nyi, nni ɓɛ ɓɔŋzàkà nyi lɛ, a pɛsɛn ɓi kìlɔ̀ŋ kaa.
Currently Selected:
MATYOO 8: BAFNT
Highlight
Share
Copy
Want to have your highlights saved across all your devices? Sign up or sign in
Bafia Nouveau Testament © Bible Society of Cameroon, 2019.