MATYOO 18

Ŋwaànɛ à cee ɓɛ̀ro ɓɛm̀bog ɓi kìlɔ̀ŋ ki aɗyòò

(Mk. 9:33-37; Lk. 9:46-48)

1Ɓi cààmɛ̀n kiǹ, ɓɛ̀yilàg ɓɛ yughà Yeesus a nyoo, ɓɛ tɔg nyi lɛ: Ghɛn yɛɛ cee min ɓum ɓɛ̀cèm ɓi kìlɔ̀ŋ ki aɗyòò? 2Nni Yeesus à reŋìghày maa ŋwɔɓti à rɛsì ɓɔ nyi ɓi nyìinyìm, 3à kpaa lɛ: Ǹkalii mìni ɓi saaɗ lɛ, i ɓì koɓsɛɛ ɓi lɛ ɓi ɓa fɛlɛ yɛ̀ɛ ɓɔɓti ɓɛsàg, ɓyàa ɗiŋi ɓi ɓi kìlɔ̀ŋ ki aɗyòò. 4Kìɓan kiǹ kɛɛ̀ki, mum ǹcèm ànɛ à ɓiì sɛɛdii nyimiɗ ɓi zi fɛlɛ yɛ̀ɛ maa mutyàànɛ, nnyɛɛ ri ɓiì ceè ɓum ɓɛ̀cèm ɓi kìlɔ̀ŋ ki aɗyòò. 5Fɔɔnnɛ i mum à ghàɓi maa ŋwɔɓti yɛ̀ɛ ànɛ ɓi ɗii ɗyɛ̀m di mɛ̀ nnɛ à ghàɓi. 6Kìɓan kifog, ì ŋwaà kɛ̀ɓtii kìbog ki ɓi ɓɔɔ ɓɔɓti ɓɛ ɓɛ gherɛɛ mɛ̀ ɓɛ fìɓàg, ki ɓa tì kìrɔɔ ɓisu wii lɛ, ɓɛɛ kaŋ̀ nyi coo gɔ̀g ì kìpɛn ɓi kìmììgh, ɓɛɛ ɓimzi nyi ɓi rìɓày. 7Nyìighnyìg rì ziinɛ lɛ ɓìɓan ɓi kɛ̀ɛkɛɓtìyɛ̀n ɓum tìɓàg ɓi ri miì. Tìɓàg ti yin lɛ ti taŋ̀, kìɓan kìfog, nyìighnyìg rì ŋwaànɛ à rì ɓiì kɛ̀ɓtii romum fìɓàg. 8I càg kɔɔ nsoò lɛ ìkòò wɔɔ ɓyɛɛ ti ɓi kɛɓtàg wɔ̀ fìɓàg, rena ɓyɔ, u mag ɓyɔ fìràɓ; lɛ ki ri wɔ̀ kìrɔɔ lɛ u ghɛǹ cɛɓ rì càg kifòg, nsoò lɛ ìkòò wufòg, à cee lɛ u kɛǹ ɓi ɗuu ɗi fiɗyàɓ fikɔ̀ɔ̀ rì ɓyàg ɓyɔɔ ɓìcèm, nsoò lɛ rì mɛ̀kòò mɔɔ mɛcèm. 9I ɗis ɗyɔɔ ɗyɛɛ ti ɗi kɛɓtàg wɔ̀ fìɓàg, sɔgha ɗyɔ, u mag ɗyɔ fìràɓ, lɛ ki rì wɔ̀ kìrɔɔ lɛ, u ghɛn cɛɓ di ù rì ɗis ɗìfog à cee lɛ u kɛǹ ɓi ɗuu ɗi fiɗyàɓ fikɔ̀ɔ̀ rì mis mɔɔ mɛcèm.

Dàɗkì ì jɔ̀ɔ̀ ìnɛ ì ɗimgà

(Lk. 15:3-7)

10Kɔ̀riina ɗyomzɛ̀n lɛ kɛ̀ ɓi sɛɛti kibog ki ɓi ɓɔɓti ɓɛ. Lɛ ǹkalii mìni lɛ, ɓum ɓɛ titom ɓaa ɓɛ rɛrɛlii cààmɛ̀n kìcèm ɓi mis mɛ Seŋi wɛ̀m ànɛ à rì aɗyòò. 11Lɛ Man à mum à yùghà ki ghɛɓsii ɓumɓɛ ɓɛ ɗimgà.

12Mìnii ghɛɛ là? I ŋwaà rì ɗì jɔ̀ɔ̀ mɛ̀tin mɛtaǹ, nnɛ ì ɗimi bog, à yin nya lɛ à càɗ jɔ̀ɔ̀ yimbog mɛ̀tin mɛnin ɗì ǹtɛ̀ɗ ɗì taànìn, à ka kɛ̀n kì kaà ìnɛ yàa ɗimi? 13I à tanɛɛ tì yɔ̀, ǹkalii mìni ɓi saaɗ lɛ, à ɓiì woògh kìrɔɔ rì jɔ̀ɔ̀ ìnɛn à cee yi mɛtin mɛnin ɗì ǹtɛ̀ɗ ɗì taànìn yi yaa rɔ̀ɓi. 14Fɔlɔɔ nnɛ Seŋi wìn ànɛ à rì aɗyoo, à kɔ̀ni ɓi lɛ kìbog ki ɓi ɓɔɓti ɓɛ kɛɛ taŋ̀.

Yeesus à rèsii com ki ɓɛ̀gherɛ̀n ɓɛ ghɛɛ̀sɛɛ kì kìlaagh, di geni wàà adɛŋ à nànɛɛ

15I goni à kìi kìɓe, kɛ̀na, u reɓ nyi a mìni ɓɛ̀sɛ̀ɛ̀ ɓɛɓɛɛ̀; i à woogh deɓ yɔɔ, di ù rùnɛɛ nyi. 16Wɔ̀lɛ, i à ɓèni kì woògh deɓ yɔɔ, ù reŋì tì mum bog nsoò lɛ ɓum ɓɛɓɛɛ̀, lɛ kìɓan kiǹ kɛɛ kpaàrɛn di ɓɛ̀wusìnɛ̀ɗ ɓɛ ri ɓɛɓɛɛ̀ nsoò lɛ ɓɛraa. 17I à ɓèèdii tì ɓɔ kì woògh, ù kalì kìɓan kiǹ ɓi nyìinyìm à kìseŋi. I à rɔ̀ɓtii kɛ̀ɛ wog rikpaa ɗi kiseŋi, tera nyi fɛlɛ yɛ̀ɛ ŋwaànɛ à yin ǹgherɛ̀n nsoò lɛ yɛ̀ɛ ǹterì-làmpoŋ̀. 18Ǹkalii mìni ɓi saaɗ lɛ; com kìcèm ki ɓì ɓiì kàŋi fɛ ɓi ziinɛ, ɓɛ ri kɔ ɓiì kàŋi aɗyòò, fɔɔnnɛ kìcèm ki ɓì ɓiì fùmii fɛ ɓi ziinɛ, ɓɛ ri kɔ ɓiì fùmii aɗyòò.

19Ǹkalii tì mìni saaɗ à rìkalì lɛ; i ɓum ɓɛɓɛɛ̀ ɓɛ wooghrɛɛ jɛ̀ɛ̀ fɛ ɓi ziinɛ, lɛ ɓɛɛ tɔg Tààta wɛ̀m ànɛ à rì aɗyoo com kidɛŋ, à rì ɓɔ kɔ ɓiì faà. 20Ɓisuulɛ, jàŋ inɛ ɓum ɓɛɓɛɛ̀ nsoò lɛ ɓɛraa ɓɛ taŋzɛɛ ɓi ɗii ɗyɛ̀m, ǹɗì ɓiì ɓaà ɓi nyìinyìm wàà.

21Nni Pyɛɛri à tyòŋdɛ̀ngà Yeesus a nyoo, à tɔg nyi lɛ: Kan ǹghɛ̀ɛ̀sɛɛ kì cenɛɛ geni wɛ̀m di à kìi mɛ̀ kìɓe gɛ̀n yaŋ? Ǹɗì lɛ ǹcenɛ̀n nyi lɔŋ gɛ̀n taàɓɛ̀ɛ̀? 22Yeesus à ɓàg nyi lɛ: Ǹkalii ɓi wɔ lɛ lɔŋ gɛ̀n taàɓɛ̀ɛ̀; ǹkalii wɔ̀ lɛ; gɛ̀n mɛtin mɛraa rì ǹtɛ̀ɗ à kpaŋ, fɔlɔɔ gɛ̀n taàɓɛ̀ɛ̀.

Dàɗkì ì ǹkìì-kìsay anɛ à ɓaghà ɗì rìgɛn

23Fɔlɔɔ nnɛ kìlɔ̀ŋ ki aɗyoo ki ri fɛlɛ yɛ̀ɛ rìfòm ɗidɛŋ ɗi ɗi kɔngà lɛ ɗyɛɛ fiɓi ɓɛ̀pon ɓɛ ɓɛ̀kìì-ɓìsay ɓii ɓɛ ɓaghà nyi rì ɓɔ. 24Yɛ̀ɛ à tumɛ̀ngà bàlì, nni ɓɛ yughà nyi rì ǹkìì-kìsay adɛŋ ànɛ à ɓaghà nyi rì pon a bàlìì ɓɛ̀mìlìyɔŋ. 25Nni yɛ̀ɛ à ɓaghà ɓi ri bee inɛ lɛ à lèɓ pon anɛ̀n, nni masà wìì a kìsay a reɓsighà lɛ ɓɛɛ kaɓ lɛ, rì nyi, rì giy, rì ɓɔn ɓii, rì ɓyom ɓii ɓìcèm ɓisuu pon anɛ̀n. 26Fɔɔnnɛ ǹkìì-kìsay anɛ̀n à kpìghà ɓi zi à ɓag rìfòm mɛ̀ɗu asu, à kpaa lɛ: Masà ka cenɛn mɛ̀, ǹɗì wɔ̀ ɓiì lèɓi mɔ̀ɔ̀ni mɛ̀n mɛ̀cèm. 27Nyìighnyìg ì kìghà masà anɛ̀n ɗì ǹkìì-kìsay wiì, fɔɔnnɛ à cenɛ̀ngà nyi pon wiì, à càɗ nyi lɛ a kɛǹ.

28Nni yɛ̀ɛ ǹkìì-kìsay anɛ̀n à kpagà, à tuusɛ̀n ɗì reŋkàŋ wìì adɛŋ ànɛ à ɓaghà nyi rì pon a hɔnɗɛ̀ɗ. Nni à sɛngà ɓi roànɛ̀n, à ɓan nyi a ɓɛ̀ɓoŋ di a kakali lɛ: Lèɓa mɛ̀ mɔ̀ɔ̀ni mɛ̀m. 29Reŋkàŋ wìì anɛ̀n à kpìghà nyi a mɛ̀kòò, à yɛ̀gsì nyi ɓyàg di a kakali lɛ: Ka cenɛn mɛ̀, ǹɗì wɔ̀ ɓiì peè. 30Wɔ̀lɛ ǹkìì-kìsay anɛ̀n à gherɛ̀ngà ɓi rikalì ɗi reŋkàŋ wìì ɗiǹ. Fɔɔnnɛ à kɛ̀ngà nyi kì pìigh ɓi naà-zày, à kpaŋ yɛ̀ɛ roànɛ̀n à lèɓkà pon ànɛ̀n. 31Yɛ̀ɛ ɓɛ̀kìì-ɓìsay ɓɛmbog ɓɛ ghɛngà fɔlɔɔ, ki kɛŋ ɓɔ lɛɛ̀gwey, ɓɛ kɛǹ kì kpaà masà wàà, com kìcèm ki ki ghaghìghà. 32Fɔɔnnɛ masà wàà a romgà lɛ ɓɛɛ regiì nyi ǹkìì-kìsay anɛ̀n, nni à kpaaghà nyi lɛ: Wɔ̀ nkìì-kìsay anɛ ù rì rì rìgɛn; mɛ̀ɛ ǹcenɛɛ wɔ̀ pon wɔɔ̀ bimiɗ yɛ̀ɛ ùu mɓɔ̀ŋzaagh mɛ̀ lɛ, ǹcenɛn wɔ̀. 33Wɔ̀ɔ n-yin lɛ ù wog roŋkàŋ nyìighnyìg yɛ̀ɛ mɛ̀ mɛ̀ɛ ǹwoogh wɔ̀ nyìighnyìg? 34Nni masà wìì a wokà bim, à kpaa ɓɛ̀sujàà lɛ ɓɛɛ ɓaǹ ǹkìì-kìsay anɛ̀n, ɓɛɛ foŋ nyi ɓi naà-zày, à kpaŋ yɛ̀ɛ à ɓiì lègsii ki peè pon wiì. 35Fɔlɔɔ nnɛ Tààta wɛ̀m ànɛ à rì aɗyoo à rì mìni ɓiì kìi di mum ǹcèm ànɛ ɓi mìni à cenɛɛ ɓi geni wìì ri nɗem wii wucèm.

Currently Selected:

MATYOO 18: BAFNT

Highlight

Copy

Want to have your highlights saved across all your devices? Sign up or sign in

Learn More About Bafia Nouveau Testament

MATYOO 18

Popular Bible Verses from
MATYOO 18

Listen to MATYOO 18

Bible:

Bafia

Version: Bafia Nouveau Testament - BAFNT

MATYOO 18

MATYOO 18

Popular Bible Verses from MATYOO 18

Listen to MATYOO 18

Bible:

Bafia

Version: Bafia Nouveau Testament - BAFNT

MATYOO 18

Popular Bible Verses from
MATYOO 18