MATYOO 17

Yeesus à lɔ̀ɔ̀ghrɛɛ ɓɛ̀yilàg ɓi mis dɛŋ

(Mk. 9:2-13; Lk. 9:28-36)

1Ajɛ̀m ì mɛ̀ru taàfog, Yeesus à tekà lɛ rì Pyɛɛri, rì Zyaag rì Zyaaŋ à geni à kɛ̀n ɗì ɓɔ kìpàs ɓi coo dòn aɗyòò. 2À lɔ̀ɔ̀ghrɛ̀ngà ɓɔ ɓi mis dɛŋ, ìsu wii wu lonlòm yɛ̀ɛ ŋwos, ɓìlàà ɓii ɓi pupùɓ lɛ syàŋ-syàŋ yɛ̀ɛ kìtɛɛtɛn. 3Ɓɛ̀yilàg ɓɛ ghɛn di Moyis rì Eli ɓɛ ti ɓiì tòtoogh rì nyi. 4Nni Pyɛɛri à pɛ̀sìghà jɛ̀ɛ̀ à kpaa Yeesus lɛ: Kan, ki ri kìrɔɔ di, tì kɔ̀rii fɛ; i ki kɔni wɔ̀, ǹɗì ɓiì toŋì ɓìlaa fɛ ɓiraa lɛ kìfog ɓisu wɔɔ, kìfog ɓisuu Moyis, kìfog ɓisuu Eli. 5Yɛ̀ɛ Pyɛɛri à ɓaghà di a ka tòtog fɔlɔɔ nni coo kikwìɗ ki lònlomɛn ki sìgtɛ̀ngà ɓɔ. Fɔɔnnɛ jɛ̀ɛ̀ ì tòòghrɛ̀ngày ɓi kìkwìɗ kiǹ, ì kpaa lɛ:

Roànɛ à rì Man wɛm̀ à nɗem , ɓi nyi innɛ ǹfogà ǹkɔ̀nɛ̀n wɛ̀m bimiɗ, wooghna nyi.

6Yɛ̀ɛ ɓɛ̀yilàg ɓɛ wokà fɔlɔɔ, ɓɛ kpìlàg ɓi zi guɓùg, ɓɛ ruusì mɛ̀su ɓi zi, lɛ ìris wu ɓangà ɓɔ rì ìtèɗ. 7Nni Yeesus à tyòŋdɛ̀ngày ɓɔ a nyoo, à ǹyɛ̀ŋ ɓɔ, à kpaa lɛ: Pɛ̀sɛɛna aɗyòò, kɛ̀ ɓi risi. 8Fɔɔnnɛ ɓɛ pɛsìghà mɛ̀su aɗyòò, ɓɛ ghɛn lɔŋ Yeesus cɛ̀ncii.

9Nni yɛ̀ɛ ɓɛ sɛnsɛ̀ngày dòn, Yeesus à rɔ̀gsɛ̀n ɓɔ lɛ: Kɛ ɓi fèg ki kpaa ŋwaàdɛŋ kìɓan ki ɓì ghɛɛ kìn à kpaŋ lɔŋ yɛ̀ɛ Man à mum à ri ghèmɓɛn yi a ɓìloŋ. 10Ɓɛ̀yilàg ɓɛ tɔkà nyi ǹtɔɔ̀tɔɔgh lɛ: Ɓisuucɛ nnɛ ɓɛ̀rèsàg-ɓìdɔ̀gsɛna ɓɛɛ kalag min lɛ, Eli à ka ghɛ̀ɛ̀sɛɛ yì kì yùu? 11Yeesus à ɓàg ɓɔ lɛ: Ki ri lɔŋ saaɗ lɛ Eli à rì ɓiì yùu lɛ a pɛɛ̀zi kì rɛsaagh ɓiɓan ɓìcèm ɓi mɛ̀kɔ̀ɔ̀. 12Kìɓan kifog, ǹkalii mìni lɛ, Eli à yùghà wɔ̀lɛ ɓum ɓɛ yitìghà ɓì nyi, fɔɔnnɛ ɓɛ kighà rì nyi yɛ̀ɛ ki kɔngà ɓɔ. 13Nni ɓɛ̀yilàg ɓɛ yighà min lɛ, kìɓan ki Zyaŋ Bàɓtis kɛɛ̀ki à kpaaghà ɓɔ.

Yeesus à wɔ̀ɔ̀zii mutyààdɛŋ ànɛ à ɓaghà rì kìɓeɓtàg ki nghay

(Mk. 9:14-29; Lk. 9:37-43)

14Yɛ̀ɛ ɓɛ kpagà jàŋbog rì gwìy ì ɓum, ŋwaàdɛŋ à yù kì kpìi Yeesus asu, rì mɛ̀ɗu, à kpaa lɛ: 15Kan, wogha man wɛm̀ nyìighnyìg, a roròɓ kitìs, ki ki yeeyeèsì nyi lɛɛ̀gwey; à ti à kpìlàg ɓi ɗuu, nsoò lɛ ɓi mɛ̀nig. 16Màa yùu yì rì nyi a ɓɛ̀yilàg ɓɔɔ, nni àa yaagh ɓɔ rìwɔ̀ɔ̀zì. 17Yeesus à ɓàg lɛ: Mìni ɓumɓɛ, ɓì rì lɛ, mìni kɛ̀ɛ̀ rìgherɛ̀n, mìni ɓìɗyoŋi ɓi ɓum; ǹɗi ɓiì kɔ̀rii ǹɗaŋ ri mìni, ǹki cenɛn mìni ǹkpaŋ fin? Yùunay mɛ̀ fɛ rì mutyàànɛn. 18Nni Yeesus à fwààdɛ̀ngà kìɓeɓtàg ki nghay, ki kpaŋ ɓi mutyàànɛ̀n, à ghàs kì wɔ̀ni lɔŋ wɔɔ foo.

19Fɔɔnnɛ ɓɛ̀yilàg ɓɛ Yeesus ɓɛ tyoŋdɛ̀ngà nyi a nyoo, ɓɛ tɔg nyi a dwìɗ lɛ: Ɓisuucɛ nnɛ kìɓeɓtàg ki nghay kiǹ kaa yaagh ɓìsi rìnàɓ? 20Yeesus à ɓàg ɓɔ lɛ: Kaa yaagh mìni rìnàɓ lɛ rìgherɛ̀n ɗin ɗi tɔɔ ɓì; ǹkalii mìni ɓi saaɗ lɛ; i ɓyàa rì ɗì rìgherɛ̀n ɗìtèghɛn yɛ̀ɛ zàm ì doŋ, di ɓì rì lɛ, i ɓì kpaa dòn ìnɛ lɛ: Pɛ̀sɛn fɛ kɛ̀na fɛnii, ì pɛ̀sɛ̀n; di com ki yin lɛ ki yag mìni. 21Kìɓan kifog, lɔŋ bɔ̀ŋzɛ̀n ɗì kìcèlì ki ɓiɗilàg ɓyɛɛ ti ɓi kilàg lɛ, rìkuu ɗi kiɓeɓtàg ki nghay ɗìn ɗyɛɛ kpaŋ̀.

22Nni yɛ̀ɛ ɓɛ rerènìghà ziinɛ a Galile, Yeesus à kpaa ɓɔ lɛ: Ɓɛ ɓiì kàɓi Man à mum rì ɓum; 23ɓumɓɛ̀n ɓɛ wey nyi, wɔ̀lɛ ɓi ŋwos a kìraa, à ɓiì ghèmɓɛɛ. Kìɓan kiǹ ki faghà ɓɛ̀yilàg bim ɓi nɗem lɛɛ̀gwey.

Yeesus à pee làmpoŋ̀ ànɛ ɓi naà-Bɛ̀ll

24Nni yɛ̀ɛ ɓɛ kpagà a Kapɛrinawum, ɓɛ̀terì-làmpoŋ̀ ànɛ ɓi naà-Bɛ̀ll ɓɛ tɔkà Pyɛɛri lɛ: Nɗèsàg wìn à tì kɛ̀ɛ pee làmpoŋ̀ ànɛ ɓi naà-Bɛ̀ll? 25Pyɛɛri à ɓàg lɛ: À ti à peeghì. Nni yɛ̀ɛ Yeesus à ɗiŋìghà ɓi naa, fɔɔnnɛ à lokà kì tòòghrɛɛ à kpaa lɛ: Simɔn! Wɔ̀ɔ̀ ghɛɛ la? Mɛ̀fòm mɛ ɓi ziinɛ mɛ ti mɛ tɔkì ɓɛ̀ghɛn làmpoŋ̀? Ɓum ɓɛ kilɔ̀ŋ gìn ɓɛ̀kèn? 26Pyɛɛri à ɓàg nyi lɛ: Ɓɛ̀kèn ɓɛɛ̀ɓɛ ɓɛ ti ɓɛ tɔkì. Yeesus à ɓàg Pyɛɛri lɛ: Fɔlɔɔ a rèsii lɛ, ɓɔn ɓɛ kilɔ̀ŋ ɓaà pee ɓi. 27Wɔ̀lɛ ɓi ɗi lɛ tyɛ̀ ki kɛ̀ɓti ɓɔ fìɓàg, kɛ̀na ɓi rìɓày, u pig fìlɔɓ, kìzɛn ki ki ɓiì loògh kì ɗiì, sɔri kɔ̀, pini kɔ ŋwɔm fɔɔnnɛ, ù ɓiì tanɛɛ firaŋ̀ fi mɔ̀ɔ̀ni miì, tera fìraŋ̀ fiǹ u fa ɓɔ fyɔ ɓisuu làmpoŋ̀ wìs, lɛ rì mɛ̀ rì wɔ̀.

Currently Selected:

MATYOO 17: BAFNT

Highlight

Copy

Want to have your highlights saved across all your devices? Sign up or sign in

Learn More About Bafia Nouveau Testament

MATYOO 17

Popular Bible Verses from
MATYOO 17

Listen to MATYOO 17

Bible:

Bafia

Version: Bafia Nouveau Testament - BAFNT

MATYOO 17

MATYOO 17

Popular Bible Verses from MATYOO 17

Listen to MATYOO 17

Bible:

Bafia

Version: Bafia Nouveau Testament - BAFNT

MATYOO 17

Popular Bible Verses from
MATYOO 17