MATYOO 11
11
Ɓumɓɛ Zyaŋ Bàɓtis à romgà yɛ̀ɛ Yeesus
(Lk. 7:18-35)
1Yɛ̀ɛ Yeesus à lègsìghà kì siitaagh ɓɛyilàg ɓii ǹtɛ̀ɗ rì ɓɛɓɛɛ̀ ɓìɓan ɓi à ghɛ̀ɛ̀sɛ̀ngà ɓɔ kì siitaagh nni à pɛ̀sɛ̀ngà ɓi jàŋ inɛ̀n, à kɛ̀n kì rèsaagh ɓum, à ki kakali Syeesyee à Ɓɔlɛ ɓi bàn yi wɔɔ.
2Wɔ̀lɛ yɛ̀ɛ Zyaŋ Bàɓtis à ɓaghà ɓi naà-zày, à wokà di ɓɛɛ̀ kakali ɓiɓan ɓi Kiris à kìkìghà, nni à romgà ɓɛ̀yilàg ɓii lɛ ɓɛɛ kɛǹ nyi kì tɔɔ̀gh lɛ: 3Wɔ̀ yɛɛ ri nya roànɛ ɓìsii yii lɛ à ɓiì yùu giǹ, tì ghɛ̀ɛ̀sɛɛ tì kì ɓoŋɓoŋi adɛŋ? 4Yeesus à ɓàg ɓɔ lɛ: Kɛ̀ɛna kì kpaà Zyaŋ ɓìɓan ɓi ɓi kìi lɛ, ɓì wog ɓì ki ghɛn. 5Ɓyɛɛ ri lɛ, ɓɛ̀ɗyaŋɗyàŋ ɓɛ ghɛɛ̀ghɛ̀nɛ̀n, ɓɛ̀lɛnlɛm ɓɛ̀ kɛɛ̀kɛ̀ɛ̀ lɛ syeesyee, ɓɛ̀kukwiy ɓɛ pɛɛ̀zɛ̀n kìɓaà lɛ syeesyee ɓi nyoo yàà, ɓɛ̀lɔlɔg ɓɛ woòghwòòghrɛ̀n, ɓìloŋ ɓi gheèghèmɓɛ̀n, Syeesyee à Ɓɔlɛ à ki kaakalɛ̀n a ɓumɓɛ ɓɛ ri nyìighnyìg. 6Mààgh rì ŋwaànɛ àa kɛ̀ɓtɛn ɓi fiɓàg ɓisu wɛ̀m.
7Yɛ̀ɛ ɓumɓɛ Zyaŋ Bàɓtis à romgày ɓɛǹ ɓɛ kɛngà, Yeesus à tumɛ̀n rìtɔtɔ̀g ɗi ɓum mɛ̀tɔɔ̀tɔɔgh ɓi kìɓan ki Zyaŋ, nwèe: Cɛ kɛɛ̀ki ɓì kɛ̀ngà kì fifiɓii ɓi-reɓ? Kìsyòŋ ki bɛ̀ɓ yɛ̀ɛ nyɛ̀ɛnyɛŋzì gìn? 8Nni cɛ kɛɛ̀ki ɓì kɛ̀ngà min ki ghɛɛ̀? Ŋwaànɛ à waatàkà ɓyoo ɓilàà giǹ? Wɔ̀lɛ ɓumɓɛ ɓɛ ti ɓɛ waatàg ɓìlàà ɓi syeesyee, ɓɛ ti ɓɛ kɔràg ɓi mɛɛ mɛ mɛfòm. 9Nni cɛ ɓì kɛ̀ngà min ki kìi? Ɓì kɛ̀ngà kì ghɛɛ̀ ǹkpaŋzì-ɓìɓan? Ɛ̀ɛ̀, ǹkalii mìni lɛ: Ŋwaàncèm à cee gì rìɓa ɗi ǹkpaŋzì-ɓìɓan. 10Lɛ nnyɛɛ rì roànɛ ɓɛ kangà kìɓan kii lɛ:
Mum wɛm̀ à fìtom innɛ ǹɗomi wɔ̀ lɛ beèbɛ̀y, lɛ a log wɔ̀ kì pegsɛɛ bee.
11Ǹkalii mìni ɓi saaɗ lɛ, ɓi ɓum ɓɛ̀cèm ɓɛ ɓɛ yalɛ̀ngà ɓi ɗùm ɗi giɓ, ŋwaànɛ à cee Zyaŋ Bàɓtis à ka ɓaghà ɓi. Wɔ̀lɛ ŋwaànɛ à ɓiisɛɛ kì ɓaà lɛsàg ɓi kìlɔ̀ŋ ki aɗyoo, à cee nyi. 12À tumɛ̀n ɓi mɛ̀ru mɛ Zyaŋ Bàɓtis à kpaŋ ɓigomìnɛ ɓum ɓɛɛ̀ rùurunɛ̀n kìlɔ̀ŋ ki aɗyoo nni ɓɛ̀tèteɗ ɓɛɛ ni ràgɛn ɗi kɔ. 13Ɓɛ̀kpaŋzì-ɓìɓan ɓɛ̀cèm rì ɓìdɔ̀gsɛna ɓi Moyis ɓɛ kalìghà kìɓan ki ki seesee kìlɔ̀ŋ ki Bɛ̀ll à kpaŋ ɓi cààmɛ̀n ki Zyaŋ à yùghà. 14I ɓì rì lɛ ɓi wog rìkpaa ɗyɛ̀m, Zyaŋ ànɛ̀n yɛɛ ri Eli ànɛ ɓɛ kpaaghà lɛ à ghɛ̀ɛ̀sɛɛ kì yùtii. 15Ŋwaànɛ à rì rì mɛ̀reè, à wog.
16Ǹɗì lɛ ǹfèg ɓà ɓumɓɛ ɓi mɛ̀ru mɛ ɗì rìkuu ɗi mum a ɗi? Ɓɛ ri fɛlɛ yɛ̀ɛ ɓɔɓti ɓɛ ɓɛ kɔkɔrii ɓi ǹlɛmɓog, ɓɛ rerèŋì ɓɛ̀geni ɓaa di ɓɛɛ kpaakpaa lɛ:
17Tì mɛ kì lɛ, tì kɛɛ̀gh mìni mɛ̀ɓàlì rì zàro, kɛ̀ ɓi ɗyen, tì ki kɛɛgh mini tyem ti riwù, kɛ̀ ɓi rèn. 18Lɛ yɛ̀ɛ Zyaŋ à yùghà, à kì lɛ; kɛ̀ɛ ɗi ɓiɗilàg, kɛ̀ɛ ki nɔ mɛrɔ̀g nnyaa ànɛn à rì rì kìɓeɓtàg ki nghay. 19Man à Mum à yù, à kìkì lɛ, à ɗiɗì ɓìɗilàg, à ki nɔnɔ mɛrɔ̀g, nnyaa ànɛn à rì lɛ, ànɛ̀n ǹɗiì-com, ànɛn ǹnɔɔ̀-mɛ̀rɔ̀g, à ki ɓa ti righan ɗi ɓɛ̀terì-làmpoŋ̀, rì ɓɛ̀kìì-kìɓe. Kìɓan kifog ɗyomzɛ̀n ɗi Bɛ̀ll ɗi ti ɗi ghɛnàg lɛ ɗi ri lɛ saaɗ ɓi ɓìɓan ɓi ɗi kiì.
Kìɓan ki bàn yi yi ɓengà kì gherɛɛ Yeesus
(Lk. 10:13-15)
20Nni Yeesus à tumɛ̀ngà rìfwààdɛ̀n ɗi bàn yi à kìghà dàm wɔɔ lɛɛ̀gwey, ɓisuulɛ ɓumɓɛ wɔɔ ɓɛ kɔngà ɓi lɛ, ɓɛɛ lɔɔ̀ghrɛn mɛ̀rem. 21Nyìighnyìg rì wɔ̀ Korazɛŋ, nyìighnyìg rì wɔ̀ Bɛdsayida, ɓisuulɛ, i dàm yi yi kilɛ̀ngà a lɔŋkin yɛɛ kilɛn fɔlɔɔ ɓi bàn yi lɛ, rì Tiir rì Sidɔŋ, di ɓumɓɛ wɔɔ ɓɛ lɔɔ̀ghrɛ̀ngà mɛ̀rem fìɗyàɓ, ɓɛ waatɛ̀n mɛ̀kùtì, ɓɛ Siŋɗɛ̀n kìɓu. 22Kìɓan kiǹ kɛɛ̀ki ǹkpaa mìni lɛ, ŋwosi ɓɛyɔ̀m ɓɛ Bɛ̀ll kìɓan ki, ɓumɓɛ a Tiir rì ɓɛ a Sidɔŋ ki nyɛni gɛ ɓi à kpaŋ yɛ̀ɛ kiŋkìn. 23Nni wɔ̀ Kapɛrinawum, u fèki nya lɛ, ù rì ɓiì ɓɔɔ̀gh aɗyoo? Èe èe, ɓɛ ri lɔŋ wɔ ɓiì sɛɛ̀dii à kpaŋ a nywɛ̀y, lɛ ì dàm yi yi kìlɛ̀ngà a lɔ̀ŋkɔɔ yɛɛ kilɛn fɔlɔɔ à Sɔdɔm di bàn ìnɛn ì kaka lɛ rì ɓɛ̀gɛɛnɛ-ànkan miì. 24Kìɓan kiǹ kɛɛ̀ki ǹkalii wɔ̀ lɛ, ŋwosi ɓɛyɔ̀m ɓɛ Bɛ̀ll, kìɓan ki ɓumɓɛ a Sɔdɔm ki nyɛni gɛ ɓi yɛ̀ɛ ki ɓumɓɛ a lɔ̀ŋkɔɔ.
Bɛ̀ll à rèsìghà ɓìɓan ɓii a ɓoɓti ɓɛsàg
(Lk. 10:21-22)
25Nni ɓi cààmɛ̀n kiǹ, Yeesus à pɛ̀sìghà ɓìtòkì à kpaa lɛ: Tààta, wàànɛ ù lamii lɛ rì ɗyoo rì zi, ǹfaa wɔ̀ ɓìtògsɛ̀n ɓisuulɛ ù nyamgàkà ɓɛ̀yiì-ɓìɓan rì ɓum ɓɛ ɗyomzɛ̀n ɓìɓan ɓi, ù rèsì ɓɔɓti ɓɛsàg ɓyɔ. 26Ɛ̀ɛ̀ Tààta, ǹtògsaagh wɔ̀, lɛ fɔlɔɔ yɛɛ ɓaghà syeesyee wɔ̀ɔ̀ à fèg. 27Seŋi wɛ̀m à faghà mɛ̀ ɓìɓan ɓicèm; ŋwaàdɛŋ à yii ɓi Man i ki yin lɛ Seŋi, ŋwaàdɛŋ kɛɛ ki yi Seŋi i ki yin lɛ Man, ǹsòò lɛ ŋwaànɛ ki kɔni Man lɛ a resi nyi Seŋì. 28Yùuna a lɔ̀ŋkɛm̀, mìni ɓɛ̀sɛ̀ɛ̀ ɓɛ̀cèm ɓɛ, ɓì rì ɓɛ fɔlɛn, mɛ̀tɛ̀g mɛ ki rìriɗ mini, ǹfa mìni rìfɔɔsɛ̀n. 29Foŋɗɛɛna ɓi kìɓèg kɛm̀, ɓì nɔ̀ɔ̀tì ɓìɓan ɓi nɗèrèsì, ɓisuulɛ, nɗem wɛ̀m wuri lɛ fyòoog, wu ki ɓa ti wu sɛɛ̀dɛn ɓi zi, fɔɔnnɛ mɛ̀ghay min mɛ̀ ri ɓiì ghɛɛ̀ rìfɔɔsɛ̀n. 30Lɛ kìɓèg kɛm̀ ki yeesɛɛ bi, ǹtɛ̀g wɛm̀ wɛ̀ kɛɛ̀ ki rìɗ.
Currently Selected:
MATYOO 11: BAFNT
Highlight
Share
Copy
Want to have your highlights saved across all your devices? Sign up or sign in
Bafia Nouveau Testament © Bible Society of Cameroon, 2019.