Luc 20
20
Jesus mi fad’eng ndata ni lara ge?
(Gol Mat 21.23-27; Mar 11.27-33)
1Kur bur tu Jesus nga mi hat suma kur gong nga kud’ora hAlonid’a, nga mi tchazi wal Zla d’a Djivid’a mi. Nglo suma ngat buzuna azi ki suma hat gata ki suma nglona a mba atamu, 2a dum ala: Ang damiya, ni kad’eng nga lara ba, ang le kahle ndazina hina ge? Sama mi hang ad’eng ndatina ni nge ge?
3Mi hulong dazi ala: An nga ni djobogi zla tu mi, agi danu. 4Ma sunï Jean ma le suma batembina nAlona d’oze ni suma zu?
5Azi nde tchi tazi gagad’a ala: Le ei dei wa ala: Alona mi sunumï ni mamu ni, mam mba dei ini ala: Ni kayam me ba, agi hagi gagazid’a kam mbuo ge? 6Wani le ei dei wa ala: Suma a sunumï ni aziya ni, suma pet a mba duri kahinad’a, a tchiya, kayam suma a we Jean ala ni ma djok vun Alona. 7Azi hulong dum ala: Ami wami nga sama mi sunumï á le batembina d’i.
8Jesus mi hulong dazi ala: An nga ni dagi yam ad’eng nga an nga ni lahle ndazina ki sed’eta d’uo mi.
D’ogol ma yam suma a le sun guguzlu suma tchonina
(Gol Mat 21.33-46; Mar 12.1-12)
9Jesus mi de zla d’a d’ogol la wanda mi suma ala: Sana mi pe guguzlud’a kur asinemu, mi hat abo suma a le sunda kuana, mi i yam andaga d’a d’inga á kak sä kua ngola. 10Kid’a vun simetna mbad’a, mi sunï azong mama gen suma sun ndazina, kayam azi humï vud’a guguzlud’a. Wani suma sunda a to azong mama, a gum abom hawa. 11Mi sunuzï azong ma dingâ kua; azi tomu, a lazamu, a gum abom hawa. 12Mi sun ma hindina kua d’ei; azi kam mbilâ, a gum mbei bugol asinena. 13Sala asine guguzlud’a mi dala: An le ni nana ge? An mba ni sun goron ma hurun vum heîna; dam azi mba lum zulom kla. 14Wani kid’a suma sunda a wumba, a de tazi ala: Ma wana ni ma te djona; ei tchizi woyo, kayam djona arî meina. 15Azi vumu, a tchumu, a gum mbei bugol asine ma guguzlud’a.
Na ni sala asine máma mba mi lazi ni nana ge? 16Mi mba mi ba suma sun ndazina woyo, mba mi he asine máma woi mi suma dingâ.
Kid’a suma a hum zla ndatid’a, a dala: Ar ahle ndazina mba d’i.
17Wani Jesus mi golozi baba, mi dazi ala: Zla d’a a b’irit kur mbaktumba hAlonid’a ti de nana ge?
Ahina d’a suma djak gonga a gat teid’a,
ti mbut ahina d’a djik gonga akulod’a.
18Sama lara ma mi puk kä yam ahina ndatina, mba mi kus seyo, wani sama ahina ndata ti nde kä kama, mba d’i lud’ud’um mbei kukud’uk mi.
A djop Jesus yam lombo d’a hed’a
(Gol Mat 22.15-22; Mar 12.13-17)
19Ata yi máma, nglo suma ngat buzuna azi ki suma hat gata a hal á ve Jesus, kayam azi wala mi de zla d’a d’ogol ndata ni kaziya, wani azi le mandara suma. 20Kayam ndata, azi nga tchiged’emu, a tchuk led’et suma a nga golozi d’igi suma d’ingêrâ na na á vum ki zla d’a avunamba á hum abo suma te yamba, á ka sariyad’a kam mi. 21Sum ndazina a djobom ala: Ma hat suma, ami wami ala ang nga de ni zla d’a irata, ang nga hat ni hat ta irata mi. Ang nga pat sana yam iram go d’i, wani ang nga hat ni lovota hAlonid’a gagazi. 22Djivid’a ei hei lombod’a mamulâ Sesar roze ei hum mbuo zu?
23Wani Jesus mi we lem mazid’a, mi dazi ala: 24Agi tagan sile ndata ei wana. Angusa ki b’ir ra wanda ni hi nge ge?
Azi hulong dum ala: Ni hi Sesar-ra.
25Mi dazi ala: Agi hagi ahle sumala ni hi Sesar-ru na mi Sesar, agi hagi ahle sumala ni hAlona na mAlona mi. 26Azi ndak á vum ki zlad’a avok suma d’i, wani a le atchap yam zla mam mba ded’a, a seng silil.
A djop Jesus yam tchola hi suma matnid’a
(Gol Mat 22.23-33; Mar 12.18-27)
27Sadusiyê suma hiu suma a nga dala suma matna a mba tchol akulo d’uo na, a mba ata Jesus, a djobom ala: 28Ma hat suma, Moise mi b’iri ala: Le sana wiyema mi mid’a, mi ar amamba bei gorâ ni, wiyema mi vatcha ndata, mi djok andjaf wiyema. 29Adjeu suma kid’iziya a nga, azi ni b’oziyo taziya. Ma avo’â vatchad’a, mi mit bei mi vut gorâ. 30Ma mbàna mi vad’u, mi mit bei mi vut gorâ mi. 31Ma hindina ni hina mi. Suma kid’iziyana pet a vad’u, a bo bei vut grona. 32Bugola, atcha ndata ti mit mi. 33Kur bur ma tchola hi suma matnina, ti mba d’i arî atchad’a hi nge adigazi ge? Kayam azi ki zlazi d’a kid’iziyad’a pet a vat atchad’a.
34Jesus mi hulong dazi ala: Suma kur atchogoi d’a wandina a nga vik aropma kandjuveina, 35wani suma Alona mi golozi ndak á tchol akulo aduk suma matna á i kur atchogoi d’a nga d’i mbad’ina, a nga vik arop pi, aropma a nga vik andjof fuo mi. 36Azi mba bo d’i, kayam azi mba mbut ni d’igi malaikana na. Azi mba mbut nAlona groma mi, kayam azi ni suma tchol akulo aduk suma matnina. 37Wani Moise mi de woi pid’ak yam tchola hi suma matnid’a. Ata yima mi b’ir yam awei-avirinina, Moise mi yi Salad’a ala Alona hi Abraham-ma, Alona hi Isa’â, Alona hi Jakob-ma mi. 38Mam nAlona hi suma arinina, mi nga nAlona hi suma matnina d’i, kayam suma pet narid’a atamu.
39Suma hat gat suma hiuna a hulong dum ala: Ma hat suma, ang de nata yad’u. 40Azi le mandarâ á djobom zlad’a bugolo.
Mesi azi ki David
(Gol Mat 22.41-46; Mar 12.35-37)
41Jesus mi dazi ala: Ni nana ba, a nga dala Mesi ni David goroma ge? 42Kayam David tamba mi de kur mbaktum mba Sawal la Giled’a ala:
Ma didina Alona mi de mi Salana ala:
Ang kak ata bigan nda ndjufa,
43gak an mba ni mbut mang suma djangûna vama tin asengâ.
44Le David ki yam nga mi yum ala Salana, ni nana ba Mesi mi mbut goroma ge?
Giget ta yam suma hat gatid’a
(Gol Mat 23.1-36; Mar 12.38-40)
45Kid’a suma pet a humba, Jesus mi de mi mam suma hata ala: 46Agi gologi tagi djivi ki suma hat gata. Ni suma a min á tit ki baru d’a fiyaka, a min suma gazi depa ad’u su’îna mi. Azi min á kak yam zlumiyô suma avo’â kur gongîyo mazi suma toka ki yima avo’â ata yima te tena mi. 47Azi tahlena harop suma modonod’a, a nga tchen Alona tchen nda fiyaka á mbut tazi djivid’a avok suma. Sum ndazina a mba kazi sariyad’a kazi ngola kala.
Currently Selected:
Luc 20: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.