Jean 6
6
Jesus mi he tena mi suma dudubu vahlâ
(Gol Mat 14.13-21; Mar 6.30-44; Luc 9.10-17)
1Bugol ahle ndazina, Jesus mi i djak woi abo apo d’a Galile d’a simiyêt ala Tiberiyat-ta. 2Ablau suma a i ad’umu, kayam a wahle suma simat suma mi lazi yam suma tugud’eid’ina. 3Jesus mi djak akulo yam ahinad’a, mi kak kä ki mam suma hata. 4Ata yi máma, vun til ma Pa’â hi Juif-fîna mi ar go. 5Jesus mi hle iram akulo, mi wablau suma a nga djï gevemu, mi de mi Filip ala: Ei guzi tena ni lara ba, sum ndazina a ted’a ge? 6Mi dum hina ná kugumu, kayam mam tamba mi we vama mam mba mi luma.
7Filip mi hulong dum ala: Le a gus tena ni ir bege hapa kikis mbà pî, ndak kala nge nge pî mi fe avunam nde nde d’a d’i.
8Sama dingâ aduk mam suma hata, ni Andre Simon Pierre wiyema, mi de mi Jesus ala: 9Gogorâ nga ka hî kavungô orsâ vahl ki kulufâ mbà abomu, wanda mi ndak ablau suma tchotcho ndazina d’ang zu?
10Jesus mi dala: Arazi a kak kä pet. Asuna nga ngola ata yi máma. Kayam ndata, azi kak kä; andjuveina ndum mazid’a ni d’igi dudubud’a vahl na. 11Jesus mi yo avungô máma, mi le mersi mAlona kamu, mi b’rawam mi suma a kak kä na. Mi hazi kulufâ hina mi, ndak yam mei mazid’a. 12Kid’a a hop dad’a, mi de mi mam suma hata ala: Agi togogi avungô orsâ ad’um mba ara, ar va mi b’lak kei d’i. 13Kayam ndata, a tok avungô ors ma vahl ma mi ar abo sumina, mi oî gumud’a dogo yam mbà.
14Ata yima suma a te ndazina a wahle suma ndandal suma Jesus mi lazina, a dala: Gagazi, sa máma ni Ma djok vun Alona ma nga mi mba kur duniyad’ina. 15Kid’a Jesus mi wala ar go azi nga mba á vum kad’enga á tinim amula d’a, kayam ndata, mi pat tam mbeyo, mi hulong mi djak akulo yam ahinad’a vam tu.
Jesus mi tit yam mbina
(Gol Mat 14.22-33; Mar 6.45-52)
16Kid’a afata nik dad’a, mam suma hata a i avun apod’a, 17a tchuk kur alumba, a nga kur apod’a á i Kapernayum. Yina mbut andjege da’, wani Jesus nga bei fazi tua. 18Abilâ nga mi sulul ngola, kayam babarâ nga mi le heî. 19Kid’a azi nga kur djangâ a mbaza d’igi kilometred’a vahl hloze karagaya na d’a, a we Jesus nga mi tit yam mbina. Mi mba go kalumba, azi nde le mandarâ. 20Wani Jesus mi dazi ala: Ni anu, agi lagi mandar ri. 21Kayam ndata, azi min á hlum kur alumba. Atogo hina zak alumba mbaza avun gongôd’id’a ata yima azi min i kuana.
Ablau suma a hal Jesus
22Tcha ndjivinda ablau suma a ar sä abo apo d’a woi hina a walumba ni tu sä hî, a wala Jesus mi djak nga kur alum ndata ki mam suma hata d’i, wani a i ni vazi hol. 23Wani alumei suma dingâ a tcholï Tiberiyat, a mba ata yima azi tavungô ma Salad’a mi le mersi mAlona kama. 24Kid’a ablau sum ndazina a we nga Jesus ki mam suma hata sä hî d’uo d’a, azi tazi tchuk kur alumei ndazina, a i Kapernayum á hal Jesus.
Jesus ni te ma he arid’a mi sumina
25Kid’a azi fum sä abo apo d’a woi hî d’a, a dum ala: Ma hat suma, ang mba ka hî ni mindja d’ö?
26Jesus mi hulong dazi ala: Gagazi, an nga ni dagiya, agi halan ni yam ahle suma simat suma agi wagizina d’i, wani yam te ma agi tum hobogi ki na. 27Ar agi lagi sunda yam te ma mba mi b’lak keina d’i, wani lagi sunda ni yam te ma ndak á hagi ari d’a didinda ma an Gor Sana mba ni hagizina, kayam Abun mi kan geuna.
28Kayam ndata, azi dum ala: Ami lami ni nana ba, ami mba ndagami ki vun sunda hAlonid’a ge?
29Jesus mi hulong dazi ala: Wana ni sunda hAlonid’a: Ar agi hagi gagazid’a kan an ma Alona mi sununïna.
30Kayam ndata, azi hulong dum ala: Ang le ni me ma simata ba, ami wamizi ami hami gagazid’a kang nge? Ang mba le ni suna me ge? 31Abuyomi ngolo a te manna hur fulâ, d’igi a b’ir kur mbaktumba na ala: Mam hazi te ma tcholï akulona.
32Kayam ndata, Jesus mi dazi ala: Gagazi, an nga ni dagiya, ni Moise ba, mi hagi te ma tcholï akulona d’i, wani nAbun ba, mi hagi te ma gagazi ma tcholï akulona. 33Kayam tena hAlonina ni sama tcholï akulona, ni sama he arid’a mi suma kur duniyad’ina.
34Azi dum ala: Salamina, ang hami te máma burâ ki burâ.
35Jesus mi dazi ala: An ni te ma harid’a mi sumina. Sama mi mba gevena, meid’a mba d’i tchum mbi. Sama he gagazid’a kana, vunam mba mi so d’uo mi. 36Wani an dagiya, agi wanu, wani agi hagi nga gagazid’a kan ndi. 37Suma Abun mi handjina pet a mba mba gevenu. Sama mba gevena, an mba ni gum mbei abu d’i, 38kayam an tcholï akulo ná le min manda d’i, wani ná le minda hi mam Ma sununïna. 39Wana ni minda hi mam Ma sununïna ala suma mi handjina pet, ar an ba sa woi adigazi tu d’i, wani an tcholozi akulo aduk suma matna kur bur ma dabid’a. 40Wana ni minda hAbunda: Sama lara pî ma wan an Goroma mi he gagazid’a kana, mba mi fe ari d’a didinda, an mba ni tcholom akulo aduk suma matna kur bur ma dabid’a mi.
41Kayam ndata, Juif-fâ a gureî kamu, kayam mi dala: An ni te ma tcholï akulona. 42Azi dala: Wana ni Jesus Josef goroma d’uo zu? Ni ma ei wum abum azi kasuma d’uo zu? Ni nana ba, mi dala: An tcholï nakulo ge?
43Jesus mi hulong dazi ala: Agi guruyôgi kurugi d’i. 44Sana mi ndak á mba geven bei Abun ma sununïna mi tanamï d’i; sama mi mbana an mba ni tcholom akulo aduk suma matna kur bur ma dabid’a mi. 45Suma djok vun Alona a b’ir kur mbaktumba ala: Alona mba mi had’azi pet. Sama lara pî ma hum Abun mi ve hat mamba mi na, nga mi mba gevenu. 46Sama wAbun yam tu nga d’i, wani ni an ma tcholï gen Abun Alonina hol, ni an ba ni wumu.
47Gagazi, an nga ni dagiya, sama he gagazid’a kana, mi nga kari d’a didinda. 48An ni te ma harid’a mi sumina. 49Abuyogi ngolo a te manna hur fulâ; hina pî a bo woyo. 50Le sama te te ma tcholï akulona ni, mba mi mit ti. 51An ni te ma hari ma tcholï akulona. Sama lara pî ma te te mámina, mba mi kak karid’a gak didin. Te ma an mba ni humzina ni hliwinu, ni ma an mba ni hum yam arid’a hi suma kur duniyad’ina.
52Kayam ndata, Juif-fâ a nde tchi tazi tuguyod’a ala: Ni nana ba, sa máma ndak á hei hliwim á ted’a ge?
53Kayam ndata, Jesus mi dazi ala: Gagazi, an nga ni dagiya, le agi tagi hliwin an Gor Sana d’uo, le agi tchagi buzuwan nduo mi ni, agi nga karid’a kurugi d’i. 54Sama mi tan hliwin mi tchan buzuwan mi na, mi nga kari d’a didinda; an mba ni tcholom akulo aduk suma matna kur bur ma dabid’a mi. 55Hliwin ni te ma gagazina, buzuwan ni vama tche ma gagazina. 56Sama mi tan hliwin mi tchan buzuwan mi na, mi nga karid’a zlapa ki sed’enu, an nga karid’a kurum mi. 57D’igi Abun ma arina mi sununï an nga karid’a yam Abun mi na, sama tana mba mi kak karid’a kan an mi. 58Wana ni te ma tcholï akulona: Mi nga ni d’igi te ma abuyogi ngolo a tum pî a bo ki na na d’i. Sama te te ma wanina mba mi kak karid’a gak didin.
59Jesus mi de zla ndata ni kid’a mam nga mi had’azi kur gong nga toka hi Juif-fâ avo Kapernayum-mba.
Zla d’a ari d’a didinda
60Kayam ndata, suma ablaud’a aduk mam suma hata a hum zla ndata, a dala: Zla ndata ni zla d’a ad’enga, ni nge mi ndak á humut ke?
61Wani Jesus mi we kurum tcha ala mam suma hat sum ndazina a nga gureî yam zla ndata. Mi dazi ala: Zla ndata ti lagi nga tagi djivi d’uo zu? 62Wani fata agi le wagi an Gor Sana djak wa akulo ata yima an nga kua avo’â ni, agi mba lagi ni nana ge? 63Ni Muzu’â hAlonina ba, mi he arid’a mi suma; hliuna ndak á le va d’i. Zla d’a de d’a an dagizid’a ni Muzu’â karid’a. 64Wani suma hiuna a nga adigagi bei he gagazid’a. Jesus mi de hina kayam mi we suma bei he gagazid’ina avok dei ki ma mba mi hum abo sumina mi. 65Mi dazi kua ala: Ni kayam ndata ba, an dagi ala: Le Abun mi mal nga lovota mi sa d’uo ni, mi ndak á mba geven ndi.
66Kid’a azi hum hina d’a, mam suma hata ablaud’a a yo tazi woi ad’umu, a dok tit ki sed’em mbuo d’a. 67Kayam ndata, Jesus mi de mi mam suma hat suma dogo yam mbàna ala: Agi min igi mi zu?
68Simon Pierre mi hulong dum ala: Salamina, ami imi ni gen nge ge? Ni ang ba, nga ki zla d’a ari d’a didinda. 69Ami hami gagazid’a, ami wami ala angî Ma dingêr ma tcholï gen Alonina.
70Jesus mi hulong dazi ala: Ni an ba ni managi dogo yam mbà d’uo zu? Wani ma dingâ tu nga adigagiya ni diable. 71Mi de ni yam Judas Simon Iskariyot goroma, kayam ni mam ba, mba mi he Jesus abo suma, mi nga aduk suma dogo yam mbàna mi.
Currently Selected:
Jean 6: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.