Luc 2
2
Marie oje Jésu kêm ɓee ke Bethléhem
(An-in Matt 1.18-25 tɔ)
1Kêm ɓaln’t nè nga, César Auguste, ngar ke bò ke ɓeekon ke Rome unn ndu’n le kade d’unde ri dooge karé-karé malang kêm magtub tute kɔr dooge’t. 2Kunde ri dooge kêm magtub tute kɔr dooge ke desêin sàk-sàk nga, è kêm ɓal ke Kirinius on’n debe ɓeekon ke Rome ke dé ɓar’n Syrie. 3Gir’n ke nè á, nanan géa tel aw kêm ɓee kojenn’t le kade d’unde ri’n kêm magtub tute kɔr dooge’t nè nga. 4Titeke bè á, Joseph in-in’n kêm ɓee ke ri’n nè Nazareth, ɓeekon ke Galilée aw’n kêm ɓee ke ri’n nè Bethléhem ɓeekon ke le Juda. Bethléhem nga, è ɓee koje ngar David. Joseph aw le kade d’unde ri’n kêm ɓee-bò’t nè nga, tede è géa è girkà le David tɔ. 5Joseph awi se njènong le’n Marie kêm ɓee ke Bethléhem le kade d’unde ri de kêm magtub tute kɔr dooge’t. Nè Marie ndann ngonn kêm’n tɔg lêng-lêng. 6Loo ke dé nain kêm ɓee ke Bethléhem ɓai ɓaa, ndɔ koje ngonn le Marie tee pan. 7E oje ngonn der’n ke dingem. E ɓir’n se tà kubu ile’n kêm begre kuse nyan le dange, tede dooge ubei nan loo njàng-njàng kêm kei tò mbage’t.
Doo ke danrán ede njékul nyange tà ke ɔje dè koje njèkaje dooge
8Njékul nyange ndii kêl loo’t nè nga tɔ. Dé ndi ngang loo’t walé, d’ade ngonm nyankulge. 9Doo ke danrán ke Kuwe-ɓee ule’n tee hɔi ke ra de’t. Ndubra le Kuwe-ɓee ndogó gan dè de wàk ade ɓel unde de ndàt gang de. 10Nè doo ke danrán nè nga, ede de ede nè:
– Ebi ra si ɓel, tede m’ree le kede sei Tà ke Maje. Tà ke maje nè nga è gir kalra le kosdooge malang ke Israel. 11Ɓila d’oje njèkaje sei kêm ɓee’t le ngar David. E nè nga à è Kuwe-ɓee a, Krist a tɔ. 12Nyan ke à tɔje sei se’n kade i geri á tò ne: Loo ke ingei ngonn ke kide ke dé ɓir’n se tà kubu d’ile’n kêm begre kuse nyan le dange ɓaa, è è kuwe.
13Ke loon’t nè kuwe, kosdooge ke danrán teei pan gan-in dè made de ke Kuwe-ɓee ule’n nga wàk. Dé mbak d’ɔse pa dé ɗɔi’n Nube d’ede nè:
14– Maje kade dooge ulei ndubra dè Nube ke njèndi sêm danran’t.
Maje kade kêmlom le Nube nain se dooge ke taai kêm’n dè nang nè a tɔ.
Njékul nyange awi kêm ɓee ke Bethléhem
15Loo ke dooge ke danrán inyei njékul nyange le teli kawi ɓaa, njékul nyange edi nan edi nè:
– Kuwe-ɓee ade jè geri nyan ke tee nè nga ɓá. Bè ɓaa, ade j’awi sár kêm ɓee-bò ke Bethléhem j’an-in nyan nè nga se kum jéi.
16Njékul nyange ɔti kalang awi Bethléhem ɓaa ingei Marie se Joseph se ngonn ke kide. 17Njékul nyange awi an-in ngonn ke kide nè ɓaa, unni sertà ke doo ke danrán ede de kété ɔje dè ngonn nè tami. 18Dooge malang ke ooi sertàge ke njékul nyange tami nga ɓaa, tà ige de sêl. 19Nè Marie girtà dè nyange’t nè nga malang ke kété a, ke gugu a, m ade kêm’n wei nal dè’t lé. 20Loo ke njékul nyange à teli ke ra nyankulge’t le de gugu ɓaa, ei ulei ndubra dè Nube’t a, ɔsi pa ɗɔyi nin a tɔ. Nyange malang ke ei ooi tà’n se mbi de a, an-in se kum de a tɔ nga, awi loon’t deĵ titeke doo ke danrán ke Nube ule’n ede’n de kété nga.
D’ile ri Jésu
21Loo ke ngonn ke kide nè nga ra ndɔ sɔsɔ ɓaa, njékojennge adi d’uje tà mɔte’n, taɓai d’ile ri’n nè Jésu. Ri nè nga è ri ke doo ke danrán ke Kuwe-ɓee ule’n ede de kété ɓita kon’n ndann’n ɓai.
D’aw se Jésu kêm ɓee-bò ke Jérusalem dé tɔje’n Nube
22Ndɔ kɔr se ra le Marie ase deĵ se go gute-ndu Nube ke Moise ndang kêm magtub’t. Joseph se Marie unni ngonn ke kide nè nga awi se’n kêm ɓee-bò ke Jérusalem le tɔje’n Kuwe-ɓee le kade è nyan kinge’n è kuwe deri gai. 23Gute-ndu Kuwe-ɓee ke Moise ndang kêm Magtub’t nga tam ede nè: «Loo ke dinye oje ngonn dè der’n, ke nè á ngonn nè è dingem ɓaa, d’a d’unde’n se ninn’n kade è nyan kinge Kuwe-ɓee kuwe deri.» 24Joseph se Marie adi der-nda joo éké ngann der-dum joo ke nyankuje-mese se go gute-ndu Kuwe-ɓee ke Moise ndang kêm magtub’t nga.
25Dingem karé bè, ri’n nè Siméon, è ndi kêm ɓee-bò ke Jérusalem. Dingem nè nga, è njè ra nyan se dè naje’n tàkum Nube’t a, è njè kile koje dènn’t a tɔ. E ndi ngine è ke njèkaje ngannkà Israel nga tchên. Ndil-Kêmnda nain se Siméon. 26Nube ade Ndil-Kêmnda ede Siméon kété titeke ayé kwei lé sár kade an Kuwe-ɓee Krist ke Nube ule’n nga se kum’n ɓita. 27Ndil-Kêmnda ɔse Siméon balang-balang ade aw kêm kei le Nube. Loo ke Joseph se Marie reei se ngonn de ke kide nè nga le tɔje’n Nube titeke gute-ndu tam’n ɓaa, 28Siméon taa’n uwe’n kàdenn’t sêm ɗɔi’n Nube ede nè:
29– Kuwe’m, inye’m man ngonn njèndi lei ade m’aw
se kêmlom ɗarinè ta se go tà ke tee tài’t kété.
30Tede m’an njèkaje dooge ke i ule’n nga se kum ndan-ndan ɓá ta.
31Kaje ke i uwe dè nja kété nga, tò nata tàkum kosdooge’t malang ɓá.
32Njèkaje dooge nga, è lookar le kade dooge malang ke dè nang nè dé geri a,
à è riɓar le kosdooge ke ei ngannkà Israel a tɔ.
Tà ke Siméon tam ɔje’n dè Jésu
33Loo ke Joseph bɔ Jésu se kon’n Marie ooi tà ke Siméon tam ɔje’n dè ngonn de nè nga ɓaa, tà ige de sêl. 34Siméon tɔr tà’n dè de’t ɓaa, è ede Marie ede nè:
– An! ngonn nè nga Nube ɔr’n unde’n ke nyan-tɔje. A è gir koso a, à è gir kɔse nang kin le dooge bule ke ɓeekon ke Israel. Ngonn nè nga, à è nyan-tɔje le Nube. Nè dooge à uteii mbeng. 35Ngonn nè nga à ade tàgir le dooge bule ke dè ɓengre de’t à kuje ke nata. Nè i Marie kuwe géa, nyankêmkon à ribei danné titeke kuye kaskar ribe’n nyan danné bè tɔ.
Tà ke Anne tam ɔje’n dè Jésu
36Njèribe-dè-tà ke tà Nube’t ke dinye karé ri’n nè Anne. E ndi kêm ɓee-bò ke Jérusalem. E ngonn le dingem karé ke ri’n nè Phanuel. Phanuel nga è girkà le Aser, njèribe-dè-tà ke tà Nube’t. Dinye nè nga ɓuge gɔk-gɔk. Ndɔ ke è ndi kêm kei ngaw mandenn’t ase ɓal ji sejimute. 37Loo ke ngaw’n wei ɓaa, è tel taa ngaw gugu lé sár ade ɓal koje’n ase’n kɔr-sɔsɔ-gidé-sɔ. Anne ra kule ade Nube se ndɔge malang. Gir’n ke nè á è inye’n kêm kei le Nube sengel lé. E ɔge kêm’n ɓo dɔ-dɔ tede ndinge’n ndoo tà Nube’t kada a, ndɔ a tɔ. 38Loo ke Siméon ndi à tam tà ɔje’n dè ngonn nè nga ɓaa, Anne géa tee hɔi tɔ. E unn gir ra Nube oiyo tede tà le ngonn nè. Dooge malang ke ndii nginei ndɔ ke Nube à ɔr’n dooge ke Jérusalem dann kumndoo’t le de nga, Anne ede de tà ke ɔje dè ngonn ke kide nè nga.
Joseph se Marie teli awi se Jésu Nazareth
39Loo ke Joseph se Marie tɔli ngang nyan ke gute-ndu Kuwe-ɓee ɔje ɓá ɓaa, ei teli awi ɓéee Nazareth kêm ɓeekon ke Galilée. 40Ngonn nè nga ra tɔg ke kété-kété a, tàgir le’n ɓeɓer a tɔ. Kumkunju rusu ɓengre’n njin-njin. Dooge d’an titeke Nube tár’n ngain a tɔ.
Jésu naje tà se njékɔrgir gute-nduge kêm kei le Nube
41Ɓal karé-karé malang Joseph se Marie awi kêm ɓee-bò ke Jérusalem le rai nan ke dé ɓar’n Paque. 42Loo ke ɓal koje Jésu ase dɔg-gidé-joo ɓá ɓaa, è aw se njékojennge nan’t titeke rai se ɓal-ɓal nga. 43Ndɔ ke gir ra nan gang ɗás ɓá ɓaa, Joseph se Marie teli awi ɓéee le de, nè ngonn de Jésu tel ɔɔ nain gugu Jérusalem nal kade dé ger. 44Dé gir kêm de’t d’ede nè bainléa Jésu nain se njémade-loo-kawge le de. Dé njiye dé sang’n ase ndɔ karé dann njénojege’t le de se njé ke geri dege’t a tɔ. 45Nè loo ke d’inge’n lé ɓaa, d’ɔse wan dé tel dè nja de’t d’aw Jérusalem gugu, dé sang’n se loo malang. 46Ndɔ ke njèkon’t mute ɓita d’inge’n kêm kei le Nube. Jésu ndi dann njékɔrgir gute-nduge ur mbi’n oo tà ndó le de a, tel deje de tà dè’t a tɔ. 47Dooge malang ke ooi tà ke Jésu tam nga, tà ige de sêl dè gos nyanger’t le’n se dè tà ke è ile de dè’t se kumkunju’n a tɔ. 48Loo ke njékoje Jésuge an-in nin ɓaa, ndil de tee an-in soin-soin. Kon’n deje’n ede nè:
– Ngonn’m, ké bain á i ra se jé ndáng bè wa? An! jè se bɔi joo mbak jè sangi j’ɔr yàl-yàl.
49Jésu tel ile de dè’t ede nè:
– Ké i sangi man tede ri wa? Gar-gar è tà le’m le ndi kêm kei le bɔ’m Nube. Ké sei geri bè lé wa?
50Nè dé ger girtà ke Jésu tam nè nga njai lé. 51E oo tà tà njékojennge’t tel aw se de ɓéee Nazareth. Kon’n Marie girtà ke kété a, ke gugu a, dè nyange malang ke teei nè nga m ade kêm’n wei nal dè’t lé. 52Danra Jésu ra tɔg ke kété-kété. Kumkunju le’n géa in dè made’t ke kété-kété a tɔ. Nube a, dooge malang a, tárii ngain.
Currently Selected:
Luc 2: GUL04
Highlight
Share
Copy
Want to have your highlights saved across all your devices? Sign up or sign in
Magtub Mann-ra ke Kige ©Alliance Biblique du Tchad, 2004