Luc 15
15
Gostà ke ɔje dè bate ke ndem
(An-in Matt 18.12-14 tɔ)
1Ndɔ karé bè, njétaa tirge se njé ke d’an de ke dooge ke majelé reei ra Jésu’t le koo tàge ke à ndó de. 2Pharisienge se njékɔrgir gute-nduge murin tà kêm de’t edi nè:
– An-in! doo nè nga uwe njékaiyage ke rann’t a, use se de nyan nan’t a tɔ.
3Jésu unn gostà karé ke rang ede nè:
4– Loo ke doo karé bè dann si’t aw se batege aru. Ke nè á ke karé ndem dann madege’t ɓaa, ké à inye njé ke kɔr-jisɔ-jimi-gidé-jisɔ-jimi nè nga le kaw sang’n sár kinge’n lé wa? 5Loo ke è inge’n ɓá ɓaa, è à unn’n se ranel le sebe’n bagenn’t. 6Loo ke è ree se’n ɓéee ɓá ɓaa, è ɓar madennge se njémade-tà-keige le’n ɔse nja de nan’t ede nè: «Ade jè rai ranel tede bate le’m ke ndɔ ke ndem nga, m’inge’n ɓá ta.» 7Titeke bè á man m’ede sei ndàt, Nube se dooge le’n ke danrán ali ra de ngain tede tà le njèkaiya karé ke inye go kaiya le’n tel tur hal’n. Kalra le de dum dè kalra ke d’a d’inye ɔje dè njè ke kɔr-jisɔ-jimi-gidé-jisɔ-jimi ke an-in ra de ke njéra nyan danné sêwge.
Sile ke oso kɔke ke dinye tel inge
8Eké loo ke dinye karé aw se nar kule ke ndɔ dɔg jinn’t. Ke nè á nar karé tee dann madege’t oso nang kêm kei le’n. Ké dinye nè nga à unde por tu lampe’t kɔii’n loo tede le sang’n nar nè nga jêke^-jêke^ sár kade tel inge gugu lé wa? 9Loo ke è inge nar ke oso kɔke nè ɓá ɓaa, è ɓar dinye madennge se njémade-tà-keige le’n ɔse nja de nan’t ede nè: «Ade jè rai ranel tede nar le’m karé ke tee dann madege’t oso kɔke nga, m’inge ɓá ta.» 10Titeke bè á man m’ede sei ndàt, Nube se ngann njéndige le’n ke danrán ali ra de ngain tede tà le njèkaiya karé ke inye go kaiya le’n tel tur hal’n.
Jésu ɔr sertà le dingem karé se ngannenge ke dingem joo
11Jésu unn gostà karé ke rang tam ede nè:
– Dingem karé bè aw se ngannenge ke dingemge joo. 12E ke ndêin ede bɔ’n ede nè: «Bɔ’m, i kai nyan-ndube ke ɔje dè’m ade’m ɗarinè ɓita.» Ke loon’t nè kuwe, bɔ de kai nyan-ndube ke ɔje dè de-dè de ade de. 13Mbɔr go’t ɓaa, ngonn ke ndêin nè nga ige nyan-ndube le’n malang. E ɔse nja nar’n nan’t neĵ-neĵ, in’n ɗák aw’n dè ɓee ke heb aw tuju’n se goonge nonnge mbak. 14Loo ke è tuju nar le’n mbak ɓá ɓaa, ɓo-bò oso tip kêm ɓeekon’t nè nga ade ɓo unn gir ra kum’n ndoo. 15E aw ule dè’n gir doo karé ke ndi kêm ɓeekon’t nè nga. Doo nè ule se ngonn ke ndêin nè nga walé kêm ndɔr’t le’n le kade ngonm kɔsnyonge le’n. 16Ngonn nga ndinge ra’n le kuse kann nyange ke kɔsnyonge usei le tête’n tà ɓorɔk. Nè doo karé géa unn ade’n lé. 17Nè loo ke kum’n gang dè rann’t ɓá ɓaa, è tam kêmn’t ede nè: «Njérakulege le bɔ’m usei nyan ade ase de nák, nè man tá m’ndi m’wei yo ɓo. 18M’a m’ɔse nang kin kaw ra bɔm’t kede’n kede nè: Bɔ’m, m’ra kaiya tàkum Nube’t a, m’ra sei majelé a tɔ. 19M’ase kade i ɓar’m ngonni lé ta. Nè an’m tite njèkule lei ke karé dann madege’t bè.» 20Loo ke ngonn ke ndêin tam tà nè nga titeke bè ɓá ɓaa, è ɔse nang in aw kum’n ke ra bɔn’t.
Loo ke è nain heb ɓai kuwe ɓaa, bɔ’n an’n ɓá. Ke loon’t nè kêm’n tɔse’n se non mbik-mbik ade in an-in ngɔde tile non’n, uwe’n kàdenn’t sêm. 21Ngonn nè nga ede bɔ’n ede nè: «Bɔ’m m’ra kaiya tàkum Nube’t a, m’ra sei majelé a tɔ. M’ase kade i ɓar’m ngonni gugu lé ta.» 22Nè loo ke dé ree tee kêm kei ɓaa, bɔ’n ede ngann njéndige le’n ede nè: «Awi law-law unni kubu ke maje ke bòi yul i reei ulei ra ngonnm’t. I reei se ninge-bise ulei jinn’t a, i reei se sa ulei njann’t a tɔ. 23Awi i reei se dalu-mang ke er lɔt-lɔt, i tɔlii adi j’usei a, j’ali ra jéi a tɔ. 24An-in! ngonn’m ke nda nè nga, man m’an’n ke doo ke wei ɓá nè tel tɔse ndel. Ma m’an’n ke doo ke ndem oso kɔke nè m’tel m’inge’n ɓai.» Ke loon’t nè kuwe d’unn gir kal ra de.
25Loo ke dé nda d’a d’al ra de titeke bè ɓaa, ngonn ke tɔg nda ra kule kêm ndɔr’t walé. Loo ke è à tel ree ngɔr se ɓee ɓaa, è oo ká nyan-kundege ke d’ade ndam’n nan. 26E ɓar ngonn njèndi karé deje’n ede nè: «Ké ri á ra nyan wa?» 27Ngonn njèndi nga ede’n ede nè: «Ngokoin ke ndêin nga tel ree, è á bɔi ade dé tɔl dalu-mang ke er lɔt-lɔt tede è inge’n se lapya karè.» 28Loo ke ngonn ke ngatɔg oo tà nè nga bè ɓaa, è ra wong ndige le tel kile nja’n kêm kei lé. Nè bɔ’n unde loo tee aw ndête’n le kade tel ree kêm geng’t. 29Nè è ede bɔ’n ede nè: «Bɔ’m, an! ɓal bule ngain ke m’ra kule m’adi tite ɓer bè. Ndɔ karé bè m’al tà tài’t lé. Nè ndɔ karé bè géa ade’m ngonn-binye ke ɔje dè’m kade m’tɔl m’ade j’use se basa mademge jè ra’n ranel lé. 30Nè ngonni ke nda nè ke njètuju nyange lei malang dè kaiya-dinyege’t tel ree dɔ ɓaa, i ade dé tɔl dalu-mang ke er lɔt-lɔt tede tà le’n.» 31Nè bɔ de tel ede ngonn’n ke ngatɔg nè nga ede nè: «Ngonn’m, i ndi se’m nan’t se ndɔge malang, nyankingemge malang nga è lei i kuwe. 32Gar-gar è tà le jé le kade j’ade dé ra mur tête tà ɓee kade j’ali ra jéi. Tede ngokoin ke nda nè nga man m’an’n ke doo ke wei ɓá, nè è tel tɔse ndel; man m’an’n ke doo ke ndem oso kɔke nè m’tel m’inge’n.»
Currently Selected:
Luc 15: GUL04
Highlight
Share
Copy
Want to have your highlights saved across all your devices? Sign up or sign in
Magtub Mann-ra ke Kige ©Alliance Biblique du Tchad, 2004