Apostelit Piniarningit 13
13
Paulusib ajoᴋertuijartorlune ingerganersoangita sivorlingat, Barnabase aiparilugo, Antiochiamit, Sîriamêtomit Asiararsungmut. (Kap. 13; 14 lo.) Zipruseme Antiochiamelo Pisîdiamêtome oᴋâlavuk.
1Antiochiamele ilagêktune nalautaijoᴋalaukpok ajoᴋertuijoᴋarlarmelo; tâpkoa tagva Barnabase, Simonelo, Nigeremik taijak, Luziuselo Zirênemiok, Manahenelo, Herôdesib ataniub inugoijaumaᴋatinga, Sauluselo.
2Tâpkoa Nâlekamik kivgartortilugit nerritailivlutik, Anernek ajunginek oᴋarpok: Barnabaselo Sauluselo ingmigolingatilersigik, piniarnermut tamattomunga anerilaurapkik.
3Tagva nerritaililutik tuksiarput, aggangmingnullo patingmivlugik tilivakit.
4Tâpkoa Anernermut ajunginermut tilijaungmanik, Seluziamut pivuk; tagvangallo umiaktorpuk Ziprusemut.
5Salamisemullo pigamik, Gûdib oᴋausinginik oᴋâlavuk Jûdit katimavingane. Johanneseletauk ilagivâk, kivgarivlugo.
6Kikertarlo ingergavigilauramitsuk Pafose tikilugo, angakok naipipât, nalangaidlune nalautaijoᴋ, Jûdiojok, Barjehumik atilik.
7Tâmna nunab atanertanganêpok, Sergiuseme Pauluseme, anguteme silatujome. Tâpsoma Barnabaselo Sauluselo ᴋaiᴋovak Gûdib oᴋausinginik tusaromavlune.
8Elimasible angakub (taimak attek tâmna tukkeᴋarmat) akkerartorpak, nunab atanertanga okperᴋojomanago.
9Saulusible, Paulusemiktauk taijab, Anernermik ajunginermik angijomik ilumertaujub takosarpâ,
10Oᴋarlunelo: Kitorngaujotit Sâtanasemut, saglotunermiglo, uivêriklernermiglo ilumiuteᴋadlartotit, idluarnerniglo tamainik ômisuktotit, soraingilatit Nâlekab apᴋosiningit idluartut atortauningit agviarlugit;
11Mânalo ahâk, Nâlekab aggangita ᴋolangiarpâtit, tautugungnairtuksauvotit, seᴋinerlo akunit tautungniangilat. Tagvainarlo pujoksoamêlilarmelo (sorlo) târmiolerpok; maungatuinarlo ᴋenerialerpok tassiortiksaminik.
12Nunab atanertanga tamattominga takogame, okpilerpok, Nâlekablo ajoᴋertutâ tataminiarivâ.
13Paulusele najortingillo Pafosemit umiaktoramik, Pergamut pivut Pamfiliamêtomut. Johannesible ᴋemakpak, Jerusalemullo angergarmilune.
14Tâpkoale Pergamit aularivuk, Antiochiamullo Pisidiamêtomut pivlutik; tagvanelo katimavingmut iterpuk Sabbatib uvlungane, ingilutiglo.
15Perᴋojat nalautaijullo atuarêramigit katimavingme angajoᴋaujut oᴋautjaujartorᴋovait: Katangutigêt, sumik oᴋaromagupse inungnut, kaiblaromavlugit, tâva oᴋaritse.
16Tagva Pauluse nikovipok, aggangminullo nullorarpait Ilipse angutit Israêlitiojose, Gûdemiglo sivôrajose, nâlagitse!
17Inuit ukua Israêlitit Gûdingata atâtagijavut anerilaukpait, inuillo tâpkoa ivlernartilaukpait, takorngartaulaungmatta nuname Egipteneme; taikangallo anitilaukpait talermut pitsartujoksoarmut.
18Jârillo 40 it nâvlugit iluserivalauktangit kamagingitsertorpait inuᴋajuitomêtilugit.
19Inuᴋatigêllo 7 it nungupait Kanaanib nunangane, nunangallo avikpâ imeraut atortauᴋolugo.
20Kingorngane jârit 450 it nâvlugit idluarsaijunik tunitjivigivait, nalautaijok Samuêle tikidlugo.
21Tamattomalo kingorngagut atanermik tuksiarput. Gûdiblo Saulemik tunitjivigivait, Kisib erninganik, angut Benjaminib kinguvânginit, jârit 40 it nâvlugit.
22Tâmnalo atanioᴋojungnairamiuk, Dâvide ataningortipâ tâpkonunga, tâpsominga kigligiutjivok imâk: Dâvide nagvârpara, Jessib erninga, angut ômatima idluarijanga, tâpsoma perᴋojakka tamaita maligomârpait.
23Tâpsoma kinguvânginit Gûde, angernine maliklugo, Israêlib piulijiksanganik Jêsusemik sakᴋijârtitsilaukpok.
24Tâmna ajoᴋertuirᴋârtinago, Johannese oᴋâlavok baptijumik Israêlitit ilûnatik ᴋaᴋialerᴋovlugit.
25Johannesible, inôᴋojaujutigijane nâmaksitileramiuk, oᴋarpok: Taimnaunasugijapsinga taimnaungilanga: ahâgle kingunipkut ᴋainiarpok, nalopᴋotivigijara itigagutîgik singêjarlugik.
26Ilipse angutit ᴋatangutigêt, Abrahab kinguvângita ᴋitorngangit, Gûdemiglo sivôrajut ilipsingne, oᴋautsit piulijaujutiksamik tamattominga tilikliutjauvut ilipsingnut.
27Jerusalemêtut angajoᴋângitalo ilitaringinamigit Jêsuse nalautaijullônêt oᴋausingit, atortauvaktut Sabbatine tamaine, toᴋotaksangortipât, nâmaksitilugit taipkoa oᴋausingit.
28Nagvârlungigalloardlutik toᴋotsitiksangonermik, Pilatuse tuksiarvigivât toᴋotserᴋovlugo tâpsominga.
29Tamaitalo tâmna pivlugo aglaksimajut nâmaksitinamigit, ᴋejungmit akᴋartipât ilivlugolo iluvermut.
30Gûdible tupaktilaukpâ toᴋungajunit.
31Uvlunelo unuktune takojauvok Galilêamit Jerusalemut majoraᴋatigilauktaminut; tâpkoa kigligiutsijoᴋotigivait inungnut.
32Uvaguttauk angersimanek atâtagijaptingnut pijok oᴋautigivavut ilipsingnut.
33Uvaptingnut, taipkoa ᴋitornganginut, Gûdib (angersimanek tamanna) nalautsimatilaukpâ, Jêsuse tupaktinamiuk; taimaktauk aglaksimavok imgerutime 2 me: Ernerivagit, uvlome ernetârivagit.
34Toᴋungajunillo tupaktinamiuk aserornartomut (iluverme) perᴋojungnairdlugo kingorngane, tamattominga imâk oᴋarpok: Dâvidib angervioninginik soᴋosijuitunik tunitjivigijomavapse.
35Taimâk pivlugo oᴋarivoktauk imgerume tâpsoma asiane: Ajunginerit (ivjornaitoᴋotit) aserornermik (iluverme) takoᴋojomângilat.
36Dâvidele, inôvlune Gûdib pijomajanganik kivgartulaurame, toᴋolaukpok, atâtagijanginullo ilijaulaukpok, aserornermiglo tukisilaukpok.
37Gûdible tupaktilauktangata aserornek tukisilaungilâ.
38Mânale angutit ᴋatangutigêt, ᴋaujilersiuk, tâpsomûna ajornernit isumangnarungnaitomik oᴋautjaulerapse, tamainillo Môsesib perᴋojanginut idluartitaujungnanginipsingnit.
39Tâpsomungale okpertok idluartitauvok.
40Mâna udjertoritse, nalautaijut oᴋausingit ilipsingnut nalautsilerᴋonagit imaitut:
41Okokse, nachojoksôjose, tataminiarluselo nungutitse; inôtiluse piniarnermik pigama, oᴋautjaugalloarupse tamattominga okpitsangilase.
42Jûdille aningmatta katimavingmit, nalojut ᴋenuvut, Sabbatik akorngangne oᴋautsinik makkoninga oᴋautjaujomavlutik.
43katimavingmêtut katimajarêrmatta, Jûdit unuktut Jûdioᴋataujullo Gûdemik nâlektut Pauluselo Barnabaselo malikpakit; tâpkoale oᴋautivlugillo kaiblarpait, Gûdib saimarsautânut nipingatsainarᴋovlugit.
44Sabbatible tuglîane iglugasaksuit inungit ilûnakasatik katimajartorput.
45Jûdille inuit takogamigit, ningarosudlalerput, Paulusiblo oᴋausingit akkerartorlugit, akkerartorput mitauteᴋadlarlutiglo.
46Paulusele Barnabaselo sivôranatik oᴋâlavuk: Gûdib oᴋausingit oᴋautigerᴋârdlugit ilipsingnut pijariaᴋalaukpok; mânale ajaktorapsigik nangminipsingniglo pijuksaungitinapse inôtsemik nâksaungitomik, nalojunut tagva sâlerpogut.
47Nâlekab perᴋungmatigut imâk: Nalojunut ᴋaumartiksangortilaukpagit, piulijiksauᴋovlutit silaksûb isuanut.
48Nalojulle tamanna tusaramitsuk, ᴋuviasulerput, Nâlekablo oᴋausingit nakorivait; okpilerlutiglo ilûnatik inôtsemut nâksaungitomut pijuksat.
49Nâlekablo oᴋausingit siamarterput tamattoma erᴋânut ilûnânut.
50Jûdille ningarosuktidlalerpait arnat nâlektut nertornartullo, angutillo angajoᴋaujut iglugasaksoarne, Pauluse Barnabaselo unangmijauᴋovlugik, pingujarpakillo erᴋâmingnit.
51Tâpkoale itikamik sanningit katerarpait tâpkonunga, Ikôniamullo aularlutik.
52Ilinniartulle ᴋuviasulerput ilumertaulilarmiglo Anernermik ajunginermik.
Currently Selected:
Apostelit Piniarningit 13: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.