ẔWA 4
4
Jesús ẕcháḻjḻene' to no'le nbabe' Samaria
1Béngekle benne' yodo' fariseo ka' kan benne' ka' žónḻengake' Jesusen' tẕen zej nyanže' ka benne' ka' žónḻengake' Ẕwa tẕen, na' ḻezka' žezóa Jesusen' zanže benách nis ka benách ka' žezóa Ẕwan' nis. 2Jesús na'kze bi žezóe' benách ka' nis, san benne' wsedle chie' ka' žezóagake' benách ka' nis. 3Kate' wnnezle Jesusen' da' ni, bezé'e gan nbab Judea, na' zejdé' da' yoble gan nbab Galilea.
4Gan zeje', žon byenen tie' gan nbab Samaria. 5Ka' goken, bḻa' Jesusen' to yeždo' gan nbab Samaria, da' nzin' Sikar, dan' žen' gawze gan de yežlyón' da' bneẕjw Jakob che Jwsé chie' ža ni'te. 6Ḻo latjen' Jakoben' bche'ne' to yežw nis gže'. Kate' bḻa' Jesusen' ga na', wži'e žoa'a yežw nisen' dan' bejx̱áke'le' yoe'e nez, ne naken wawbíž. 7Naž bžin to no'le Samaria ga na' nich si'e nis. Jesusen' gože' ḻe', na' wnné':
—Benn da' ye'ja'.
8Jesusen' zoe' toze' dan' ba zjak benne' wsedle chie' ka' ḻo yežen' nich chejx̱í'gake' bi da' gáwgake'. 9Naž no'le Samaria na' gože' Jesusen', na' wnné':
—¿Ẕnnablo' Le' neda' da' ye'jo', na' nako' benne' judío? Neda' naka' no'le Samaria.
Ki wnné' dan' benne' judío ka' bi de chawe' benách Samaria ka'.
10Bechebe Jesusen', na' gože' ḻe':
—Chela' nónbi'o da' žonn Dios, na' no Bennen' ži'e le': “Benn da' ye'ja'” na' le' nnablo' Ḻe', na' Ḻe' gonne' chio' nis da' gonnen yeḻa' nban.
11Naž no'len' gože' Ḻe', na' wnné':
—Benne', bi no'o da' kwéjḻeno' nis, na' že'lte žia nis ni. ¿Gaẕ za' nisen' dan' žonnen yeḻa' nban? 12¿Nakžo' Le' ẕen ka Jakob, x̱a wdé chežo, bennen' benne' cheto' yežw nis ni, ga ni wẕi'e nis da' we'je', na' da' we'jgak ẕi'ne' ka', na' da' we'jgak bia beže chie' ka'?
13Bechebe Jesusen', na' wnné':
—No benne' ye'je' nis ni, da' yoble nnan ye'jen', 14san nóte'teze benne' ye'je' nisen' da' wneẕjwa' neda', biž nnan ye'jen', dan' wneẕjwa' chie' nisen' da' gaken ḻo yichj ḻáẕda'we' ka to gan žal nis, da' gonnen yeḻa' nban da' zejlí kanne chie'.
15Naž no'len' gože' Ḻe', na' wnné':
—Benne', benn chia' nisen', nich biž bil-la', na' biž yedjx̱i'a nis nga.
16Jesusen' wnné':
—Wyéj, bejḻíž benne' byo chio', na' le da ga zoa' ni.
17Beží'i no'len', na' gože' Ḻe':
—Bi zoa benne' byo chia'.
Naž Jesusen' wnné':
—Da' likze ẕnno': “Bi zoa benne' byo chia'” 18dan' ba wzóaḻeno' gayo' benne' byo ka', na' benne' byon' zóaḻeno'-ne' na'a, bi nake' benne' byo chio'. Da' ni ẕnno', da' likze ẕnno'.
19Naž no'len' gože' Ḻe', na' wnné':
—Benne', žekla' neda' nako' benne' ẕchaḻje' ḻo wláz Dios. 20X̱a x̱to'to' ka' bka'n ẕéngake' Dios ḻaw ya'a nga, san ẕnnale ḻe'e yež Jerusalén naken ga žaḻa' wká'n ẕengak benách ka' Dios.
21Jesusen' wnné':
—No'le, bejḻé' da' ẕnnia'. Za' ža katen' wká'n ẕenle X̱ažo Dios ḻa'kze bi yedjsoale ḻaw ya'ado' ni, na' ḻezka' bi chejsoale ḻo yež Jerusalén. 22Ḻe'e ẕka'n ẕenle Bennen' bi nónbia'le-ne', san neto' nónbia'to' Bennen' ẕka'n ẕento', dan' ben Dios chie' gata' yeḻa' žeslá ni'a chegak benne' judío ka'. 23Na'a, za' ža, na' ba zoažo ža na', kate' benne' ka' da' li wká'n ẕéngake' Dios, wká'n ẕéngake' Ḻe', zoaḻen Dios Be' La'y, na' da' nak dot da' li, ḻégake', dan' žénele X̱ažo Dios wká'n ẕengak benne' ka' Ḻe' ki. 24Dios nake' Be', na' benne' ka' ẕka'n ẕéngake' Ḻe', žon byenen wká'n ẕéngake' Ḻe', zoaḻen Dios Be' La'y, na' da' nak dot da' li, ḻégake'.
25Naž no'len' gože' Ḻe', na' wnné':
—Nnezla' žaḻa' ḻa' Benne' Mesías, (da' ẕnnan: “Benne' Criston'”). Kate' ḻe'e Ḻe', wḻoe'ele' žo'o yógo'te.
26Jesusen' wnné':
—Ḻekze' ẕcháḻjḻene' le'.
27Ḻa' na'ze bežingak benne' wsedle ka' che Jesusen' ga na', na' bebán ḻáže'gekle' dan' ẕcháḻjḻene' to no'le, san nitóe' bi bežogle' nnable' Ḻe', bi nne': “¿Biẕ ẕnnablo' ḻe'?” o “¿Biẕ da' ẕcháḻjḻeno' ḻe'?”. 28Naž no'len' bka'ne' že'e chie' ga na', na' beyeje' ḻo yež, na' gože' benne' ka' nníta'gake' ga na', 29na' wnné':
—Le da, ḻé'elele to benne' gože' neda' yógo'te da' ba bena'. ¿Nakkze' Ḻe' Benne' Criston'?
30Naž bžojgak benne' ka' ḻo yežen', na' bžíngake' gan zoa Jesusen'.
31Kate' ne zej no'len', benne' wsedle ka' che Jesusen' ben byéngake', na' belyi'e Ḻe':
—Benne' Wsedle, bdaw.
32Jesusen' gože' ḻégake':
—De to da' žawa', da' bi nónbia'le.
33Naž benne' wsedle chie' ka' belnnable' ljéžgake' toe' yetóe', na' wnnágake':
—¿Noẕ benne' ba bedjwé'e da' bdawe'?
34Naž Jesusen' gože' ḻégake':
—Da' nbánḻena' naken gona' da' žénele X̱a', Bennen' bseḻe'e neda', na' yeyóž gona' x̱chine'. 35Ki ẕnnale ḻe'e: “Yetáp byo' žin ža ḻapžo.” Neda' žapa' ḻe'e: le wía na'le, na' wíale benách ka' zej nake' ka gan goz Dios, da' ba nbižen nich chejḻapžon. 36Bennen' ẕḻape' ẕzi'e laẕjwe', na' dan' ẕḻapen', naken nich gata' yeḻa' nban da' zejlí kanne chegak benách ka', nich gak yebégekle tẕen benne' žazen', na' benne' ẕḻapen'. 37Nak dot da' li da' ẕnnan: “To benne' žaze', na' yetóe' ẕḻape'.” 38Neda' bseḻa'a ḻe'e chejḻaple gan bi gozle. Benne' yoble gozen', na' ḻe'e ẕzi'le da' žonn žin na' da' bene'.
39Benne' zan, benne' Samaria ka', benne' nníta'gake' ḻo yež Sikar na', bejḻé'gake' che Jesusen' ni'a che x̱tiža' no'len', dan' bchaḻje' kan nak chie', na' wnné': “Gože' neda' yógo'te da' ba bena'.” 40Kate' bžingak benne' Samaria ka' gan zoa Jesusen', góta'yoegekle' Ḻe' gá'nḻene' ḻégake'. Yechóp ža bga'n Jesusen' ga na'. 41Ka' goken, benne' zanže bejḻé'gake' che Jesusen' ni'a che da' bchaḻjkze' Ḻe'. 42Naž benne' ka' belyi'e no'len', na' wnnágake':
—Na'a žejḻe'to' chie', kégeze ni'a che da' bchaḻjo' le', san ḻezka' dan' benlto' neto' chie' Ḻe', na' nnezlto' da' li Bennen' nake' Benne' Criston', Bennen' žeslé' benách ka' nníta'gake' yežlyó nga.
Žeyón Jesús x̱kwide' byo che to benne' wnná bia'
43Yechóp ža ka', bezá' Jesusen' gan nbab Samaria, na' wyeje' gan nbab Galilea. 44Ki bene', dan' bchaḻjkze Jesusen', na' wnné': “Benne' wláž ka' che to benne' ẕchaḻje' ḻo wláz Dios bi žápegake' ḻe' ba la'ne.” 45Kate' beḻá' Jesusen' gan nbab Galilea, wdápegak benne' Galilea ka' Ḻe' ba la'ne dan' ḻezka' jake' ḻo yež Jerusalén katen' gok Lni Pasko', na' bḻé'egekle' da' ka' ben Jesusen' ga na'.
46Naž beyéj Jesusen' ḻo yež Kaná gan nbab Galilea, gan beyone' nis x̱is uba. Ḻo yež Kapernaum na' zoa to benne' wnná bia', benne' nzi' ḻo ne'e yeḻa' wnná bia' ḻo wláz benne' ẕnna bi'e, na' x̱kwide' byo chie' da'be' yižwé'. 47Kate' bennen' benle' ba bezá' Jesusen' gan nbab Judea, na' ba bežine' gan nbab Galilea na', naž wyeje' gan zoa Jesusen', na' góta'yoele' Ḻe' yide' liže', nich yeyone' x̱kwide' byo chien', dan' ba žek gatbe'. 48Naž Jesusen' gože' ḻe':
—Bi chejḻe'le chia' cha' bi ḻé'elele da' ka' zej nak bian', na' yeḻa' wak ka' da' gona'.
49Naž bennen' nzi' ḻo ne'e ḻo wláz benne' ẕnna bi'e gože' Jesusen', na' wnné':
—Benne', date ná'tege nich bi gat x̱kwide' byo chian'.
50Naž Jesusen' gože' ḻe':
—Beyéj ližo'. Nban x̱kwide' byo chion'.
Bennen' bejḻi'e da' wnná Jesusen', na' zeyeje'. 51Kate' ne yoe'e nez zeyeje', baḻe benne' wen žin chie' bedjchággake' ḻe', na' bzéngekle' ḻe', na' wnnágake':
—Nban x̱kwide' byo chion'.
52Wnnable' ḻégake' batx̱ wzó ḻaw žeyakbe'. Belyi'e ḻe':
—Bache', ka gachje ža bežój-be' da' ḻan'.
53Naž wnnezle x̱a x̱kwide' byon', beyakbe' kate' Jesusen' ne ẕcháḻjḻene' ḻe', na' gože' ḻe': “Nban x̱kwide' byo chion'.” Che ḻen bejḻi'e che Jesusen', na' ḻezka' benách ka' nníta'gake' liže' bejḻé'gake' chie'.
54Yeḻa' wak ni naken da' bežopen da' ben Jesusen' katen' wzóe' gan nbab Galilea, da' goken wdé bezé'e gan nbab Judea.
Currently Selected:
ẔWA 4: zty
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.