Juan 3
3
Jesúswan Nicodemo parlanqan
1Juk fariseo nunam karqan Nicodemo shutiyuq. Pëmi Israel nunakunachö precisaq karqan. 2Juk paqasmi Jesús kaqman ëwëkur nirqan: <<Rabí, musyayämi yachatsiyämänëkipaq Teyta Dios kachamushushqëkita. Teyta Dios mana yanapaptinqa manam pipis qam rurashqëki milagrukunata ruranmantsu>>.
3Jesúsnam nirqan: <<Rasunpam niq: Pipis yapë mana yurikurqa manam Diospa mandakïninman yëkunqatsu>>.
4Nicodemunam tapurqan: <<¡Imanötaq awkis këkar yapë yurikuyanman! ¿Mamanpa pachanman kutiyanmantsuraq yapë yurikuyänanpaq?>>
5Jesúsnam nirqan: <<Rasunpam niq: Pipis yakuwan y Espíritu Santupa poderninwan#Eze. 36.25-27. mana yurikurqa manam Teyta Diospa mandakïninman yëkunqatsu. 6Mamäninpita yuriqkunaqa nunallam kayan. Espíritu Santupita yurikuqkunaqa Diospa wamrankunam kayan.
7<<Llapan nunakunapis yapëran yurikuyänan#1Ped. 1.3, 23. niptiq ama mantsakëtsu. 8Vientumushqanta wiyarpis manam musyankitsu mëpita shamushqanta ni mëpa ëwashqantapis. Tsënöllam pipis käyintsu Espíritu Santupa poderninwan nunakuna imanö yurikuyashqantapis>>.#Ecl. 11.5.
9Nicodemunam yapë tapurqan: <<Tëtë, kë ninqëkiqa ¡imanötaq kanqa!>>
10Jesúsnam nirqan: <<Israel nunakunapa yachatsiqnin këkarpis ¿manaku käyinki? 11Rasunpam niq: Rikashqäta y musyashqätam willakü. Tsënö kaptinpis niyashqaqta manam creyiyankitsu. 12Kë patsachö këkaqkunapaq niyashqaqta mana creyikarqa ¿imanöpataq creyiyankiman ciëluchö kaqkunapaq niyaptiqpis?#3.12 Kë patsachö këkaqkunapaq yachatsirqa yapë yurikuyänanpaq kashqantam Jesucristo yachatsirqan.
13<<Pipis manam gloriaman ëwëkur kutimushqatsu. Tsënö kaptinpis Nunapa Tsurinqa gloriapita shamushqa karmi rasun kaqta willakun. 14Chusyaq jirkachö broncipita fundishqa culebrata#Núm. 21.9. qeruman Moisés pallarishqannömi Nunapa Tsurintapis pallariyanqa.#3.14 Nunapa Tsurinta pallariyänanpaq kashqanta nirqa cruzchö wanutsiyänanpaq kashqanta y ciëluman kutinanpaq kashqantam Jesús nirqan.#Juan 8.28; 12.32-34; 18.32. 15Tsënöpam pipis pëman markäkuq kaqqa wiñë kawëta tarinqa>>.
Tsurinta Teyta Dios kachamunqan
16Nunakunata alläpa kuyarmi japallan Tsurinta Teyta Dios kachamurqan. Tsëmi pipis pëman markäkuq kaqqa condenashqatsu kanqa, sinöqa wiñë kawëtam tarinqa. 17Manam nunakunata infiernuman jitananpaqtsu Teyta Dios Tsurinta kachamurqan, sinöqa pëman markäkuyaptin salvananpaqmi.
18Teyta Diospa Tsurinman markäkuqkunaqa manam condenashqatsu kayanqa. Mana markäkuqkunaqa condenashqanam këkäyan. Tsënö këkäyan Teyta Diospa japallan Tsurinman mana markäkuyashqanpitam.
19Kë patsaman aktsi shamushqa kaptinpis nunakunaqa tutapëchö karmi y jutsallachö kawarmi tsë aktsita chaskiyantsu. Tsëmi condenashqa kayan. 20Llapanpis jutsallachö kawaqkunaqa Teyta Dios kachamushqan aktsita chikirmi chaskiyantsu. Tsënö chaskiyantsu jutsata rurayashqankuna musyakänanta mana munarmi.#Job 24.13-17. 21Tsënö kaptinpis allita ruraqkunaqa Teyta Dios kachamushqan aktsita chaskiyanmi. Tsënö chaskiyaptinmi Teyta Dios munashqannö kawayashqan musyakärin.
Jesúspaq Bautizakuq Juan willakunqan
22Jerusalénpita ewkurmi Judea provinciachö juk läduman discïpulunkunawan Jesús ëwarqan. Tsëchömi nunakunata bautizarqan.
23Bautizakuq Juannam Enón nishqan uranchö atska yaku kaptin tsëchö bautizëkarqan. Enónqa karqan Salim lädunchömi. Tsëchö bautizëkashqanta musyarmi wakin nunakuna tsëman bautizakuq ëwayarqan. 24Tsë witsanqa Juan manaran carcelchö llawirarqanraqtsu.#Mat. 14.3; Mar. 6.17; Luc. 3.19-20.
25Tsëchömi Juanpa discïpulunkuna Israel mayinkunawan liryakurkuyarqan imanö purificäkuyänanpaq kashqanpita. 26Tsëmi Juan kaqman ëwëkur kënö niyarqan: <<Rabí, ¿yarpankiku Jordán tsimpanchö këkar juk nunata rikärir pëpita willapäyämashqëkita? Kananqa pëpis bautizaptinmi llapan nunakuna pëmanna ëwëkäyan>>.
27Juannam nirqan: <<Pëman nunakuna ëwëkäyan Teyta Dios yanapaptinmi. 28Qamkunata niyashqaqnöllam noqaqa Cristutsu kä,#Juan 1.20. sinöqa pëpa puntanta willakunäpaq Teyta Dios kachamashqanllam kä. 29Casakuq jövinllam noviayuqqa. Casakuq jövin parlashqanta wiyar yanasan kushikushqannöllam noqapis kushikü.#3.29 Kë textuchömi Bautizakuq Juan casakuq jövinpa yanasanman iwalatsikurqan. Jesucristutanam jövinman iwalatsirqan. Jesucristuman ëwaq nunakunatanam noviaman iwalatsirqan. 30Mas allim noqaman shayämunanpa rantin pëmanna ëwayaptin.
Ciëlupita Jesús shamunqan
31<<Kë patsapita kaqkunaqa kë patsachö kaqkunallata musyarmi kë patsachö kaqkunallapaq parlayan. Ciëlupita shamuq kaqqa ciëluchö kaqkunata y kë patsachö kaqkunatapis musyanmi. Pëqa llapanpitapis poderyuqmi. 32Ciëluchö rikashqankunata y wiyashqankunata willakuptinpis nunakuna manam chaskiyantsu. 33Tsënö kaptinpis chaskiqkunaqa Teyta Diospa willakïnin rasunpa kashqantam käyiyan. 34Tsënö käyiyan ciëlupita shamuq nuna Teyta Dios nishqankunata parlaptinmi. Tsënö parlananpaqmi Espíritu Santuta Teyta Dios qararqan.
35<<Tsurinta kuyarmi pëpa poderninman llapantapis Teyta Dios churashqa.#Mat. 11.27; Luc. 10.22. 36Tsëmi Diospa Tsurinman markäkuq kaqqa wiñë kawëta tarin. Tsurinman mana markäkuq kaqqa manam tsë kawëta tarinqatsu. Tsëpa rantinmi Teyta Dios alläpa piñakur infiernuman jitanqa>>.
Currently Selected:
Juan 3: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.